Sémɛŋi u ɲyɛ na Izirayɛli shiinbii vworoŋi kyaa yu Misira kìni i ke Mpe yii à yaa yii cè mà jwo yii jyè sémɛŋi funŋɔ jwumpe e ke
Yakuba tùluge shiinbilʼa kyaala Misira kìni i
1
*Yakuba pi maha mpyi *Izirayɛli ke, u jyaabii pi a pa ná u e ná pi cyeebii ná pi pyìibilʼe, *Misira kìni i ke, pire mɛyi yi ɲyɛ: 2 Urubɛn, Simiyɔn, Levi, *Zhuda, 3 Izakari, Zabulɔn, Beezhamɛ, 4 Dani, Nɛfitali, Gadi, Ashɛri. 5 Yakuba pyìibii ná u ɲampyire puni mpyi shiin beetaanre ná kɛ (70). Lirʼa u jyaŋi Yusufu ta Misira kìni i.6 Ɲyɛ Yusufu ná u sìɲɛɛbii ná lire tèni sùpyire punʼa pa ŋkwû. 7 Izirayɛli shiinbii mpyi a pyìi niɲyahamii si, maa ɲyaha teetee, ka là si wá na bârali pi fànha ɲyahaŋi na. Pi mpyi a kìni cyaga kùuŋɔ mɛ.
8 Ɲyɛ ka saanŋi wabɛrɛ si mpa ntɛ̀ɛn kìni ɲùŋufente na, uru mpyi a yafyin cè Yusufu kataanmpe e mɛ. 9 Ka uru saanŋi si u shiinbii pyi: «Yii Izirayɛli shiinbii wíi dɛ! Pi a ɲyaha wuu na maa núrʼa fànha tò wuu na. 10 Wuu a yaa wuu pyiŋkanna cya, bà li si mpyi là ká núru raa bârali pi ɲyahaŋi na mɛ, lire baare e, yogo ká jyè wuu ná pìi shwɔhɔlʼe pi sí n-bâra wuu zàmpɛɛnbii na, si wuu tùn, si fworo wuu kìni i.»
11 Ɲyɛ lirʼa pyi ke, ka pi i ɲùŋufee tìŋɛ Izirayɛli shiinbii ɲùŋɔ na, bà pire si mpyi si pi yyahayi fwɔ́hɔrɔ ná báaraŋi niŋgaŋi i mɛ. Yire báara wahawahayi Izirayɛli shiinbilʼa pyi maa Pitɔmu kànhe ná Aramusɛsi kànhe faanre Farɔn*a a, u a pyi u yaayi tabegege. 12 Ŋka bà pi mpyi na pi yyahayi fwɔ́hɔre ná báarawayi i mɛ, amuni là mpyi na bârali pi ɲyahaŋi na, ka lire si Misira shiinbii pyi pi i fyáge Izirayɛli shiinbii na maa pi kyaa pɛn piyʼa. 13 Lire pyiŋkanni na, Misira shiinbii mpyi a báaraŋi ntùnŋke pêe Izirayɛli shiinbii na, maa pi pyi bilii. 14 Pi mpyi a pi múnahagii kyaala ná báarawayi i fo mà tɛ̀ɛnni pyi lʼa pɛn pi na: mu à jwo pucwɔnhɔni ná lafawuni ná bafanrani, ná kɛriyi báaraŋi puni, ɲwɔ ɲyage niŋkin na, pi mpyi maha báara wage shiŋi puni tɛ̀re pi na ɲùɲaara baa.
15 Ka Misira kìni saanŋi si núrʼa yi jwo *Eburub shiinbii lashwocyeebii, Shifira ná Puwa a na: 16 «Eburu shiinbilʼe, yii aha a sí raa ceeŋi wà laa shuu yii pyàŋi kàanmucya. U aha nta pùnambile, yii u bò, u aha nta pùceebile yii u yaha ɲyii na.» 17 Ŋka lashwoobii mpyi na fyáge Kile na, lire e pi ɲyɛ a ɲɛnʼa li pyi bà Misira saanŋi mpyi a yi jwo mɛ, maa pùnampyire yare bòmbaa. 18 Ka saanŋi si lashwoobii yyere maa jwo: «Ɲaha shi yii a pyi amɛ yɛ? Ɲaha na yii ɲyɛ na pùnampyire yare bòmbaa yɛ?» 19 Ka lashwoobii si saanŋi pyi: «Mu aha li ɲya amuni, Eburu shiinbii cyeebii ná Misira wuubii ɲyɛ niŋkin mɛ, pi yatanɲyʼa waha, lire e, pi maha sini mà jwo lashwoŋi u nɔ wani ke.»
20 Là mpyi na bârali Izirayɛli shiinbii na, na wà fo pi fànhʼa pa ɲyaha sèe sèlʼe. Kile mpyi a ɲwɔ lashwoobii na, 21 maa pyìi kan pi a, ɲaha na yɛ pi mpyi na fyáge u na.
22 Ɲyɛ ka Farɔn si yi jwo u shiinbii punʼa, na pi a Izirayɛli shiinbii pùnampyire nizivɔnnte puni wàa Nili baŋi i, pirʼa pùceepyire yare ɲyii na.