Musa ziŋi ná u nàŋkocyɛɛre kani
2
Ɲyɛ lire tèni i Levi* tùluge shinŋi wà mpyi a kuru tùluge ninuge pùceebilini là lèŋʼa pyi u cwo. 2 Uru ceeŋʼa pa yyére maa si pùnambile. Li lemɛ mpyi a ɲwɔ u ɲyiini i, ka u u pyàŋi ŋwɔhɔ yiɲyɛ taanre funŋʼi.3 Ɲyɛ pyàŋʼa pa ŋwɔhɔ jà ke, ka nufooŋi si mbwùuni là lwɔ́, lire mbwùuni mpyi a yaa ná paanŋkii shiŋi wʼe, maa mánalwɔhe ná cige kà kùru tɛ̀gʼa li wɔɔgɔ lwɔhe ɲjyèŋi yaha na, maa pyàŋi le a sínniŋɛ li funŋke e mà sà yaha ɲyɛge shwɔhɔlʼe Nili baŋi ɲwɔge na. 4 Ka pyàŋi muɲcwoŋi si ntɛ̀ɛn laage e maa pyàŋi kàanmucaa, nde li sí n-pa u ta ke, si lire cè.
5 Pure na u ɲyɛ, ka Farɔn* pworoŋi si mpa tawúlige e Nili baŋi i. U shɛ̀rɛfeebii pi mpyi a pa ná u e ke, u ná pire mpyi na baŋi ɲwɔge *saanre. Ka u u mpa wílʼa mbwùuni ɲya ɲyɛge shwɔhɔlʼe, maa u báarapyi cwoŋi pyi u a sà li lwɔ́. 6 Ɲyɛ báarapyicwoŋʼa sà li lwɔ́ a pa ke, ka Farɔn pworoŋi si li múgo. Ta yoo pinmpiɲyaga pi mpyi a le a sínniŋɛ lʼe ku u mɛɛ súu! Ka pyàŋi ɲùɲaare si jyè u e, ka u u jwo: «*Eburu shiinbii pyàŋi wà u naha u wi dɛ!» 7 Ka pyàŋi muɲcwoŋi si file saanŋi pworoŋi na maa jwo: «Mu sì n-yyére mii i sà ceeŋi wà cya Eburu shiinbii shwɔhɔlʼe u u mpa pyàŋi lwɔ́ u a byíi ma a mà? 8 Ka Farɔn pworoŋi si ɲɛɛ. Ka pùcwoŋi si ŋkàrʼa sà pyàŋi nuŋi yyerʼa pa. 9 Ka Farɔn pworoŋi si jwo u a: «Ŋge pyàŋi lwɔ́, maa u kaan u a ŋwɔre na a, mii sí n-kwɔ̀ mu sâra.» Ɲyɛ ka ceeŋi si pyàŋi lwɔ́ a kàre.
10 Tèni i pyàŋʼa pa lyɛ ke, ka u u ŋkàre ná u e Farɔn pworoŋʼa, ka uru si u pyi u jya, maa u mɛge le *Musa, ɲaha na yɛ u a jwo na urʼa u yige lwɔhe e.
Musa veŋi kani
11 Ɲyɛ *Musa a pa lyɛ ke, canŋka u a kàrʼa sà fworo u cìnmpyiibii *Eburu shiinbii na, mà sà pi ta báarawayi na, maa mpa wílʼa *Misira shinŋi wà ɲya u u u cìnmpworoŋi Eburu shinŋi wà bwùun. 12 Ka u u wíi wílʼa mâha uye taan u ɲyɛ a sùpya ɲya mɛ, maa Misira shinŋi bwɔ̀n a bò, maa u le a ŋwɔhɔ nticyɛnŋi i.
13 Kuru canŋa nùmpanŋa, ka u u núrʼa sà Eburu shiinbii pìi shuunni ta pi i ntùnni. Ka u u tànga baa fooŋi pyi: «Ɲaha na mu ɲyɛ na ma cìnmpworonaŋi bwùun yɛ?» 14 Ka uru si u pyi: «Jofoo u a mu tìŋɛ wuu ɲùŋɔ na, maa mu pyi wuu yukyaaŋi yɛ? Bà mu a Misira shinŋi bò mɛ, taha amuni mu la ɲyɛ si mii bò la?» Musa a yire lógo ke, ka fyagare si jyè u e, ka u u jwo uye funŋʼi: «Nàkaana baa kani mii a pyi ke, sùpyirʼa li cè.»
15 Ɲyɛ Farɔn a pa Musa kapyiini lógo ke, maa wá na u caa si mbò. Ka Musa si fê Farɔn yyaha na mà sà ntɛ̀ɛn Madiyani kìni i. U a nɔ wani ke, maa ntîgʼa tɛ̀ɛn bɛ̀ɛnŋke kà ɲwɔ na.
16 Ɲyɛ Madiyani kìni sáragawwuŋi Zhetoro, pi maha mpyi Erewɛli ke, uru na mpyi ná pworii baashuunni i, pire mpyi a pa si lwɔhe yige nde yatɔɔre yabyayi i, pi tuŋi yatɔɔre mbyaŋi mɛɛ na. 17 Ka yatɔɔnahabii pìi si nɔ wani, maa ɲcaa si pùcyaabii kɔ̀rɔ. Ɲyɛ ka Musa si jyè yatɔɔnahabii ná pùcyaabii shwɔhɔlʼe, maa pùcyaabii yatɔɔre kan tʼa bya. 18 Ɲyɛ pùcyaabilʼa núrʼa kàre pyɛnge e ke, ka pi tuŋi Erewɛli si pi yíbe maa jwo: «Di kʼa ta a jwo ka yii i wyɛ̀rʼa pa niɲjaa yɛ? 19 Ka pi i jwo: «Misira shinŋi wà u a wuu shwɔ yatɔɔnahabii na, maa lwɔhe yigʼa kan wuu yatɔɔrʼa tʼa bya ba!» 20 Ka u u pi pyi: «Taa uru nàŋi ɲyɛ ke? Ɲaha na yii sʼa pa u baa yɛ? Yii sà u yyere u u mpa lyî.»
21 Ɲyɛ ka pi i ŋkàrʼa sà Musa yyere. Ka Musa si mpa ntɛ̀ɛn nàŋi pyɛnge e, ka nàŋi si u pworoŋi Sefura kan u a, u a pyi u cwo. 22 Ka uru si mpa pùnambile si Musa a, ka Musa si jwo: «Mii sí li mɛgɛ le Gerishwɔmu, ɲaha na yɛ nàmpɔnnte e mii ɲyɛ naha nde kìni i.»
23 Ɲyɛ tère nintɔɔnlʼa pa ntòro purʼe ke, ka Misira saanŋi si mpa ŋkwû, lirʼa *Izirayɛli shiinbii ta pi i mpaare maa ŋkyɛ̀n bilere e sahaŋki. Pi parage mpyi na nɔni Kile na. 24 Ɲyɛ Kile a pi parage lógo ke, *tunmbyaare u mpyi a le ná *Ibirayima ná Ishaka ná *Yakuba e ke, ka u u yákili yaha tire na. 25 Kile a pi yyefuge ɲya ke, ka pi ɲùɲaare si u ta.