Zhozuwe Sémɛŋi
Kile à Zhozuwe tɛ̀gʼa Musa fáa
1
Kafooŋi báarapyiŋi Musa kwùŋkwooni kàntugo,
Nuni jyaŋi Zhozuwe u mpyi Musa tɛgɛfooŋi ke,
ka Kafooŋi si uru pyi:
2 «Mii báarapyiŋi Musa à kwû,
numɛ,
bégele maa yîri mu ná Izirayɛli shiinbii puni,
yii i Zhurudɛn baŋi jyiile,
kìni mii sí n-kan yii á ke,
yii raa sì lire e.
3 Bà mii à ɲwɔmɛɛni lwɔ́ Musa á mɛ,
yii tooyi ká ɲcyán cyaga maha cyagʼe ke,
mii sí kuru kan yii á.
4 Yii taare sí n-lwɔ́ síwage na wwòro kùlu yyére si zà nɔ Liban kìni ɲaɲyi na suumɔ kùlu yyére,
si lwɔ̀ Efirati baŋi na canŋafyinmɛ yyére si Ɛti shiinbii kìni jyiile si zà nɔ fo suumpe lùbwɔhe na canŋacwumɔ yyére.
5 Mu shìŋi canmpyaagii puni i,
sùpya sì n-jà n-yyére mu sige mɛ.
Mii sí n-pyi ná mu i bà mii mpyi ná Musa e mɛ.
Mii sì cye wwû mu taan mɛ,
mii sì kàntugo wà mu na mɛ.
6 Ma zòŋi tàra ma a ma yatanɲyi waha,
ɲaha kurugo yɛ,
mii à kâa ŋge supyishiŋi tulyeyʼá na mii sí kìni ndemu kan pi á pi pyi pi wuu ke,
mu u sí pi lèŋɛ lire e.
7 Ma zòŋi tàra ma a ma yatanɲyi waha kanna.
Sàliyaŋi mii báarapyiŋi Musa à jwo mu á ke,
ta uru kurigii puni ɲaare.
Ma hà n-fworo lire kuni lʼe si ŋkàre kàniŋke lire ɲyɛ mɛ,
kàmɛni na mɛ.
Lire ká mpyi,
mu cyeleŋkarigii puni sí n-ɲwɔ.
8 Ta sàliyaŋi sémɛŋi jwumpe yu tèrigii puni i.
Ta sɔ̂nŋi pu na pìlaga bâra canŋa na,
yaaga maha yaaga kʼà sémɛ u e ke,
bà mu sí n-pyi sʼa yire puni kurigii ɲaare yi sémɛŋkanni na mɛ.
Lire ká mpyi,
mu cyeleŋkarigii puni sí ɲwɔ,
mu sí raa sì yyaha na.
9 Funŋɔ cwo li na,
na mii u à jwo ma ma zòŋi tàra ma a ma yatanɲyi waha.
Ma hà n-fyá mɛ,
ma zòŋi kʼàha raa ɲcyɛ̂nni mɛ,
ɲaha kurugo yɛ,
Kafooŋi mu Kileŋi sí n-pyi ná mu i mu cyeleŋkarigii puni i.»
Zhozuwe à Zhurudɛn baŋi ɲjyiiliŋi jwo yyaha yyére shiinbilʼá
10 Ɲyɛ ka Zhozuwe si jwo a kan sùpyire yyaha yyére shiinbilʼá na:
11 «Yii ɲaara a yi jwo Izirayɛli shiinbii punʼá:
“Yii yalyire bégele,
ɲaha kurugo yɛ,
canmpyaa taanre kàntugo,
yii sí Zhurudɛn baŋi jyiile sʼa wà kìni i,
Kafooŋi,
wuu Kileŋi à ndemu ɲwɔmɛɛ lwɔ́ wuu á wuu pyi wuye wuu ke.”»
12 Ka Zhozuwe si yi jwo Urubɛn tùluge shiinbii ná Gadi tùluge shiinbii ná Manase tùluge niŋɛ taagʼá na:
13 «Kafooŋi báarapyiŋi Musa à tùnnture ntemu jwo yii á ke,
yii funŋɔ cwo ti na.
U à jwo:
“Kafooŋi yii Kileŋi à nde kìni kan yii á yii pyi yii taŋɔɲcyaga.”
14 Kìni Musa à kan yii á Zhurudɛn baŋi kàntugo ke,
yii cyeebii ná yii pyìibii ná yii yatɔɔre ti tɛ̀ɛn lire e.
Yii kàshikwɔnmpiyi puni yi tòro yii cìnmpyiibii sanmpiiyyaha na ná yii kàshikwɔnyaayi i.
Yii i pi tɛ̀gɛ,
15 fo Kafooŋi u taŋɔɲcyaga kan pi á bà u à ku kan yii á mɛ.
Kafooŋi,
yii Kileŋi sí kìni ndemu kan pi á ke,
yii pi tɛ̀gɛ pi jà a lire ta a pyi piye wuu.
Lire kàntugo,
yii i núru yii a sì yii kìni i,
Kafooŋi báarapyiŋi Musa à ndemu kan yii á Zhurudɛn baŋi canŋafyimpe e ke.»
16 Ka pi i Zhozuwe pyi:
«Mu aha sàa jwo ndemu ke,
wuu sí lire pyi.
Mu aha wuu tun cyaga maha cyagʼe ke,
wuu sí n-kàre.
17 Wuu sí mu ɲwɔmɛɛni cû karigii puni i bà wuu mpyi a Musa ɲwɔmɛɛni cû mɛ.
Kafooŋi mu Kileŋi u kwôro ná mu i bà u mpyi a kwôro ná Musa e mɛ.
18 Shin maha shin ká n-cyé si mu ɲwɔmɛɛni cû,
maa ɲcyé si mu tuntunre pyi ke,
urufoo sí n-bò.
Ma zòŋi tàra ma a ma yatanɲyi waha kanna.»