Yukyaabii Sémɛŋi
Zhuda shiinbii ná Simiyɔn shiinbilʼà Kana shiinbii tùn
1
Ɲyɛ Zhozuwe kwùŋkwooni kàntugo,
Izirayɛli shiinbilʼà Kafooŋi yíbe maa jwo:
«Wuu e,
mpire pi à yaa pi fyânha a shà kàshige kwɔ̀n Kana shiinbii na yɛ?»
2 Ka Kafooŋi si jwo:
«Zhuda tùluge kʼà yaa ku fyânha a shà.
Yii li cè,
mii sí pi yaha pi jà Kana shiinbii na.»
3 Ka Zhuda tùluge shiinbii si pi cìnmpyiibii Simiyɔn shiinbii pyi:
«Yii pa wuu tɛ̀gɛ,
kìni cyage kʼà kan wuu á ke,
wuu u Kana shiinbii tùn a lwɔ́ wani.
Lire kàntugo cyage kʼà kan yii á ke,
wuu sí n-bâra yii na,
wuu u sà kuru cyage shiinbii tùn.»
Ɲyɛ ka Simiyɔn shiinbii si ɲɛɛ maa sà Zhuda shiinbii tɛ̀gɛ.
4 Zhuda shiinbilʼà kàre kàshigʼá ke,
ka Kafooŋi si pi yaha pi à jà Kana shiinbii ná Pɛrɛzi shiinbii na.
Pi à shiin kampwɔhii kɛ (10.000) bò Bezɛki kànhe e.
5 Pi à saanŋi Adoni-Bezɛki ta wani kànhe e,
maa u tùn.
Pi à jà Kana shiinbii ná Pɛrɛzi shiinbii na.
6 Ka Adoni-Bezɛki si fê pi yyaha na,
ka pi i u fyè tɔ̀rɔ,
maa u cû maa u kampembwoobii ná numpembwoobii kwɔ̀n.
7 Ka Adoni Bezɛki si jwo:
«Mii mpyi a saanlii beetaanre ná kɛ (70) tùn maa jà pi na,
maa pi kampembwoobii ná pi nimpembwoobii kwɔ̀n kwɔ̀n,
mii ɲjyìpaanre ti mpyi maha ɲcwo ɲìŋke na ke,
pi mpyi maha tire bílili na lyî.
Kile à mii kapiini fwooni tò mii na.»
Ɲyɛ ka Izirayɛli shiinbii si ŋkàre ná Adoni-Bezɛki i Zheruzalɛmu kànhe e,
wani u à kwû.
8 Ka Zhuda shiinbii si Zheruzalɛmu kànhe shiinbii tùn maa jà pi na,
maa kànhe shiinbii bò ná kàshikwɔnŋwɔɔni i,
maa kànhe súugo.
9 Lire kàntugo,
Kana shiinbii pi mpyi a tɛ̀ɛn kìni ɲaŋkuluni ná li wwòro kùlu síwage kàmpanŋke na,
ná mpii pi mpyi a tɛ̀ɛn kìni tatiige e ke,
ka Zhuda shiinbii si sà pire tùn.
10 Kana shiinbii pi mpyi a tɛ̀ɛn Eburɔn kànhe e ke,
Zhuda shiinbilʼà sà pire tùn.
Tèecyiini i pi mpyi maha kuru kànhe pyi Kiriyati-Araba.
Pi à Shishayi,
ná Ahimani ná Talimayi tùluyi tùn maa jà yi na.
11 Pi à yîri wani maa ŋkàrʼa sà Debiri kànhe tùn.
Tèecyiini i pi mpyi maha kuru kànhe pyi Kiriyati-Sefɛri.
12 Kalɛbu mpyi a jwo:
«Ŋgemu ká Kiriyati-Sefɛri kànhe tùn maa jà ku na ke,
mii sí na pworoŋi Akisa kan urufoo u pyi u cwo.»
13 Ka Kalɛbu kàntugowuŋi Kenazi jyaŋi Ɔtiniyɛli si kànhe tùn maa jà ku na,
ka Kalɛbu si u pworoŋi Akisa kan u à pyi u cwo.
14 Tèni i u à kàre u pooŋi Ɔtiniyɛli yyére ke,
ka u u u pooŋi pyi u taare ta ɲáare uru tuŋi Kalɛbu á.
Akisa à tîge u dùfaanŋke na tèni ndemu i ke,
Ka Kalɛbu si u pyi:
«Na ɲaha yɛ?»
15 Ka Akisa si u pyi:
«Ɲwɔ na na maa na kan,
mu à kìni wwòro kùlu kàmpanŋa taare ntemu kan mii á ke,
lwɔhɔ ɲyɛ tʼe mɛ.»
Ka Kalɛbu si nìɲyi yyére lùbilibii cyage ná ɲwɔhɔntaan yyére wuubii cyage kan u á.
16 Ka Musa nafenaŋi Keni tùluge shiinbii si yîri ná Zhuda shiinbilʼe támaracire kànhe Zheriko e,
maa sà ntɛ̀ɛn Zhuda síwage e,
Aradi kànhe wwòro kùlu kàmpanŋke na,
ná wani shiinbilʼe.
17 Lire kàntugo ka Zhuda shiinbii si ŋkàrʼa sà bâra pi cìnmpyiibii Simiyɔn shiinbii na,
Kana shiinbii pi mpyi a tɛ̀ɛn Zefati i ke,
si pire tùn.
Pi à kànhe shiinbii bò maa kànhe kɛ̀ɛge feefee.
Ka pi i kuru cyage mɛge le Ɔrima.a
18 Zhuda shiinbii mú à sà Gaza ná Asikalɔn ná Ekurɔn kànyi shiinbii tùn,
maa yire kànyi ná yi kwùumpe cû.
Izirayɛli shiinbii ɲyɛ a jà Kana shiinbii mpimu na mɛ
19 Kafooŋi mpyi ná Zhuda shiinbilʼe,
ka pi i ɲaŋkuluni shiinbii tùn maa jà pi na.
Ŋka pi ɲyɛ a jà tatiige kànyi shiinbii na mɛ,
ɲaha kurugo yɛ,
tɔɔnte kàshikwɔn wòtorobii mpyi pirʼà.
20 Ka pi i Eburɔn kànhe kan Kalɛbu á,
bà Musa mpyi a yi jwo mɛ,
ka u u Anaki jyaabii taanreŋi tùluyi shiinbii kɔ̀rʼa lwɔ́ wani.
21 Ŋka Yebusi shiinbii pi mpyi a tɛ̀ɛn Zheruzalɛmu i ke,
Bezhamɛ shiinbii ɲyɛ jà a pire kɔ̀re mɛ.
Ka pire si ŋkwôro Zheruzalɛmu kànhe e ná Bezhamɛ shiinbilʼe fo mà sà nɔ niɲjaa na.
22 Ka Yusufu shiinbii mú si ŋkàrʼa sà Bɛtɛli kànhe shiinbii tùn.
Kafooŋi mpyi ná pi e.
23 Mà jwo pi sà Bɛtɛli kànhe tùn ke,
pi mpyi a pìi tun pi à sà ku ŋwɔhʼa wíi.
Tèecyiini i kuru kànhe mɛgɛ mpyi Luzi.
24 Ka pire si sà nàŋi wà ta u u fwore kànhe e,
maa u pyi:
«Kànhe jyiŋkanni cyêe wuu na,
wuu sí kacɛnnɛ pyi mu á.»
25 Ka nàŋi si kànhe jyiŋkanni cyêe pi na,
ka pi i kànhe shiinbii puni bò ná kàshikwɔnŋwɔɔni i,
ŋka pi à uru nàŋi ná u pyɛngɛ shiinbii yaha pi à kàre.
26 Ɲyɛ ka uru nàŋi si ŋkàrʼa sà ntɛ̀ɛn Ɛti shiinbii kìni i,
maa kànhe faanra wani,
maa ku mɛgɛ le Luzi.
Kuru mɛgʼà kwôro ku na fo niɲjaa.
27 Kana shiinbii pi mpyi a tɛ̀ɛn Bɛti-Sehan kànhe ná Tanaki kànhe ná Dɔri kànhe ná Ibilehamu ná Megido kànhe ná yi kwùumpe kànyi i ke,
Manase shiinbii ɲyɛ a pire kɔ̀re mɛ.
Kana shiinbilʼà kwôro yire kànyi i.
28 Izirayɛli shiinbii fànha a pa ɲyaha ke,
ka pi i fànha cyán Kana shiinbii na maa pi yaha báarawayi na,
ŋka pi ɲyɛ a pi kɔ̀rʼa yige kìni i mɛ.
29 Kana shiinbii pi mpyi a tɛ̀ɛn Gezɛri kànhe e ke,
Efirayimu Shiinbii mú ɲyɛ a pire kɔ̀re mɛ.
Pi à kwôro wani Gezɛri i ná Efirayimu shiinbilʼe.
30 Zabulɔn shiinbii mú ɲyɛ a Kitirɔn kànhe shiinbii ná Nahaloli kànhe shiinbii kɔ̀re mɛ.
Pire Kana shiinbilʼà kwôro wani ná Zabulɔn shiinbilʼe,
ka pire si pi yaha báarawayi na.
31 Ashɛri shiinbii mú ɲyɛ a Ako kànhe shiinbii ná Sidɔn kànhe shiinbii ná Akila kànhe shiinbii ná Akizibu kànhe shiinbii ná Eliba kànhe shiinbii ná Afiki kànhe shiinbii ná Erehɔbu kànhe shiinbii kɔ̀rɔ mɛ.
32 Lire kurugo,
Kana shiinbii pi mpyi kìni i ke,
Ashɛri shiinbilʼà tɛ̀ɛn pire shwɔhɔlʼe,
ɲaha kurugo yɛ pi ɲyɛ a pi kɔ̀rɔ mɛ.
33 Nɛfitali shiinbii mú ɲyɛ a Bɛti-Semɛsi kànhe shiinbii ná Bɛti-Anati kànhe shiinbii kɔ̀re mɛ,
maa ntɛ̀ɛn ná pire Kana shiinbilʼe pi kìni i,
maa fànhe cyán pi na,
maa pi yaha báarawayi na.
34 Amori shiinbilʼà Dan shiinbii kɔ̀rʼa sà yaha ɲaŋkuluni i,
pi ɲyɛ a pi yaha pi à tɛ̀ɛn tatiige e mɛ.
35 Amori shiinbii mpyi a tɛ̀ɛn Ɛrɛsi ɲaŋkuluni,
ná Ayalɔn kànhe ná Salibimu kànhe e.
Ŋka kàntugo,
Yusufu shiinbilʼà pa fànha cyán pi na,
maa pi yaha báarawayi na.
36 Amori shiinbii taare mpyi a lwɔ́ Akirabimu taduguge na,
maa sà ntòro Sela kànhe taan mà kàre wani.