Zhozuwe à Izirayɛli tùluyi puni bínni Sikɛmu i
24
Zhozuwe à Izirayɛli tùluyi puni bínni Sikɛmu kànhe e,
pi kacwɔnribii ná yyaha yyére shiinbii ná yukyaabii ná ɲùŋufeebii,
ka pi i mpa yyére Kile yyahe taan.
2 Ka Zhozuwe si sùpyire puni pyi:
«Kafooŋi,
Izirayɛli Kileŋi à jwo:
“Yii tulyeyi Ibirayima ná Nakwɔri,
ná pire u tuŋi Teraki mpyi a fyânha a tɛ̀ɛn tèemɔni i Efirati baŋi kàntugo yyére maa kilebii piibɛrii pêre.
3 Ka mii i yii tulyɛge Ibirayima pyi u à yîri Efirati baŋi kàntugo,
maa u tun u sà Kana kìni puni ɲaara.
Mii à u tùluge ɲyaha maa Ishaka kan u á.
4 Mii à Yakuba ná Ezawu kan Ishaka á.
Mii à Seyiri ɲaŋkuluni kan Ezawu tùlugʼá pi ta,
ŋka Yakuba ná u pyìibilʼà kàre Misira kìni i.
5 Kàntugo yyére,
ka mii i mpa Musa ná Arɔn tun maa yyefuyo niɲyahaya nɔ Misira kìni na,
maa yii pyi yii à fworo lʼe.
6 Mii à yii tulyeyi yige Misira kìni i,
ka pi i ŋkàrʼa sà nɔ Suumpe Lwɔhe Niɲyage ɲwɔge na.
Ka Misira shiinbii si yii tulyeyi fyè tɔ̀rɔ ná shwɔnyi wotorobii ná shwɔnfeempilʼe mà sà nɔ wani.
7 Ka yii tulyeyi si tùbile wà Kafooŋi á,
ka u u numpini le pi ná Misira shiinbii shwɔhɔlʼe,
maa suumpe lwɔhe núruŋʼa tɛ̀gʼa pi lyî.
Nde mii à pyi Misira shiinbii na ke,
yii ɲyiigilʼà lire ɲya.
Ka yii mú si ŋkwôro síwage e mà mɔ.
8 Lire kàntugo,
ka mii i yii yyaha cû mà kàre Amori shiinbii kìni i,
pire mpyi a tɛ̀ɛn Zhurudɛn baŋi kàntugo yyére.
Pirʼà kàshige kwɔ̀n yii na,
ŋka,
mii à pi le yii cye e,
ka yii i jà pi na maa pi kìni shwɔ a ta,
ka mii i pi shi bò yii ɲyii na.
9 Muwabu shiinbii saanŋi Balaki u ɲyɛ Sipɔri jyaŋi ke,
ka uru si yîri maa kàshige kwɔ̀n Izirayɛli shiinbii na,
maa Beyɔri jyaŋi Balamu yyere u u mpa yii láŋa.
10 Ŋka mii ɲyɛ a ɲɛnʼa lógo Balamu á mɛ.
Mii à u pyi u à jwó le yii á,
ka mii i yii shwɔ u na.
11 Ka yii i Zhurudɛn baŋi jyiile mà sà nɔ Zheriko e.
Ka Zheriko kànhe shiinbii si yii tùn,
mà bâra Amori shiinbii ná Pɛrɛzi shiinbii ná Kana shiinbii ná Ɛti shiinbii ná Girigasi shiinbii ná Evi shiinbii nà Yebusi shiinbii na.
Ka mii i pi le yii cye e.
12 Mii à zhìtaanmpii tùugo yii yyaha na,
ka pire si Amori shiinbii saanbii shuunniŋi kɔ̀rʼa lwɔ́ yii yyaha na.
Yii kàshikwɔnŋwɔɔni ná yii sintaaga bà kʼà lire pyi mɛ.
13 Mii à tara kan yii á,
yii ɲyɛ a ntemu fàa mɛ,
mii à kànya kan yii á tɛ̀ɛn,
yii ɲyɛ a ɲjemu faanra mɛ,
maa ɛrɛzɛnŋi ná oliviye cire kàɲyɛyi kan yii á yii ɲyɛ a ɲjemu cɛnmɛ mɛ.
Yirʼà pyi yii yalyire.”»
14 Ka Zhozuwe si núrʼà jwo:
«Numɛ,
yii a fyáge Kafooŋi na yii raa báare u á ná ntìiŋi ná ɲwɔmɛfente e.
Yii tulyeyʼà kilebii mpiimu pêe Efirati baŋi kàntugo yyére,
lire ɲyɛ mɛ,
Misira kìni i ke,
yii kàntugo wà pire punʼá,
yii raa Kafooŋi pêre.
15 Ká mpyi Kafooŋi mpèeŋi ɲyɛ a táan yii á mɛ,
yaage yii la ɲyɛ sʼa mpêre ke,
yii kuru cwɔɔnrɔ niɲjaa:
Yii tulyeyʼà kilebii mpiimu pêe Efirati baŋi kàntugo ke,
pire,
lire ɲyɛ mɛ,
Amori shiinbii shwɔhɔlʼe yii à tɛ̀ɛn ke,
pire u kilebii.
Mii ná na pyɛngɛ shiinbii pi ke,
wuu sí raa Kafooŋi pêre.»
16 Ka sùpyire si Zhozuwe ɲwɔ shwɔ:
«Wuu sì sìi n-jà Kafooŋi yaha sʼa kilebii piibɛrii pêre mɛ!
17 Ɲaha kurugo yɛ,
Kafooŋi u ɲyɛ wuu Kileŋi.
Uru u à wuu ná wuu tulyeyi yige bilere e Misira kìni i.
Uru u à kàkyanhala karigii nimbwɔhigii pyi wuu ɲyii na,
maa wuu saɲcwɔnŋi kɔ̀rɔ wuu ɲani tèni puni i,
ná supyishiŋi kuuyi puni shwɔhɔlʼe wuu à jyè a fworo ke.
18 Kafooŋi à supyishiŋi kuuyi puni kɔ̀rʼa lwɔ́ wuu yyaha na mà cye cyán Amori shiinbii pi ɲyɛ lire kùluni i ke.
Lire kurugo wuu mú sí raa Kafooŋi pêre,
ɲaha kurugo yɛ,
uru u ɲyɛ wuu Kileŋi.»
19 Ka Zhozuwe si jwo sùpyirʼá:
«Yii sì n-jà raa Kafooŋi pêre mɛ,
ɲaha kurugo yɛ,
Kileŋi sèewuŋi wi,
yiɲcyɛge ɲyɛ u e.
U sì yii ɲùŋkyaanre ná yii kapegigii yàfa yii na mɛ.
20 Yii aha Kafooŋi yaha maa supyishiŋi wàbɛrɛ u kilebii pêre,
u sí yyaha kɛ̂ɛnŋɛ yii á si kapii pyi yii na,
si yii shi bò,
mà li ta u mpyi a fyânha a kacɛnnɛ pyi yii na.»
21 Ka supyire si Zhozuwe pyi:
«Ɔnhɔ,
Kafooŋi wuu sí raa mpêre!»
22 Ka Zhozuwe si sùpyire pyi:
«Yii yabilimpii pi ɲyɛ yiye shérii.
Yii yabilimpii pi à jwo na yii sí raa Kafooŋi pêre!»
Ka pi i u ɲwɔ shwɔ:
«Ɔɔn,
wuu pi à jwo amuni.»
23 Ka Zhozuwe si jwo:
«Supyishiŋi sanŋi kilebii pi ɲyɛ yii shwɔhɔlʼe ke,
yii pire wà,
yii i yyaha kɛ̂ɛnŋɛ Kafooŋi,
Izirayɛli u Kileŋi á ná yii zòmpyaagii puni i.»
24 Ka sùpyire si Zhozuwe ɲwɔ shwɔ:
«Wuu sí raa Kafooŋi,
wuu Kileŋi pêre sʼa u jwumpe kurigii ɲaare.»
25 Ka Zhozuwe si tunmbyaare le kuru canŋke ná sùpyire e maa sàliyaŋi ná yyeshempe pà kan pi á Sikɛmu i.
26 Lire kàntugo,
ka Zhozuwe si cyire karigii sémɛ Kile sàliyaŋi sémɛŋi i,
maa ŋkwɔ̀ maa Kafaabwɔhɔ yyéeŋɛ cibwɔhe kà ɲwɔhʼi Kafooŋi cyage niɲcɛnŋke e.
27 Ka Zhozuwe si jwo sùpyire punʼá:
«Yii wíi,
ŋke kafaage sí n-pyi yii shéere,
ɲaha kurugo yɛ,
jwumpe puni Kafooŋi à jwo yii á ke,
kʼà pu lógo.
Ku sí n-pyi yii shéere,
bà yii sí n-pyi,
yii àha ŋkwɔ̀ ɲcyé Kile na mɛ.»
28 Lire kàntugo,
ka Zhozuwe si sùpyire cye yaha ka shin maha shin si ŋkàre u cyage e.
Zhozuwe kwùŋi
29 Cyire karigii kàntugo,
Nuni jyaŋi Zhozuwe,
Kafooŋi báarapyiŋʼà kwû mà u shìŋi yaha yyee ŋkuu ná kɛ (110) na.
30 Ka pi i u tò u nàzhan taare e Timinati-Sera kànhe e,
Efirayimu ɲaŋkuluni i,
Gasi ɲaŋke suumɔ kùlu yyéreŋi i.
31 Izirayɛli shiinbii mpyi na Kafooŋi pêre Zhozuwe tìiŋi puni ná kacwɔnribii pi mpyi a kwôro u kàntugo ná pi mpyi a Kafooŋi kapyiiŋkii puni cè Izirayɛli shiinbii kàmpanŋke na ke,
pire u tìiŋi puni i.
32 Izirayɛli shiinbii mpyi a Yusufu kaciiyi ɲjemu tugʼa yîri Misira kìni i mà pa ke,
pi à yire tò Sikɛmu i Yakuba kɛrɛge nizhwɔge e Amori shiinbilʼá.
U mpyi a ku shwɔ wyɛ́rɛfyinŋi tɔɔnɲwɔ ŋkuu (100) na,
Sikɛmu kànhe sìifooŋi Amori pyìibilʼá.
Kurʼà pyi Yusufu tùluge shiinbii wogo.
33 Arɔn jyaŋi Eliyazari mú à pa ŋkwû,
ka pi i u tò Gibehati kànhe e.
a Kuru cyage mpyi a kan u jyaŋi Fineyasi á,
Efirayimu ɲaŋkuluni i.