Kafooŋi mɛ̀lɛkɛŋi kani
2
Ka Kafooŋi mɛ̀lɛkɛŋi si yîri Giligali kànhe e,
mà kàre Bokimu kànhe e,
maa Izirayɛli shiinbii pyi:
«Mii à yii yige Misira kìni i,
kìni ɲwɔmɛɛni mii mpyi a lwɔ́ yii tulyeyʼá ke,
maa mpa ná yii e lire kìni i.
Mii mpyi a jwo,
ɲjwo tunmbyaare mii à le ná yii e ke,
mii sì n-sìi tire kɛ̀ɛge mɛ.
2 Yii àha ŋkwɔ̀ tunmbyara le ná Kana kìni shiinbilʼe mɛ,
yii sí pi sárayi tawwuyi jya jya.
Ŋka yii ɲyɛ a lógo mii á mɛ.
Nde mii à jwo yii á ke,
ɲaha na yii ɲyɛ a lire pyi mà yɛ?
3 Mii mpyi a jwo mú na:
“Mii sì Kana shiinbii kɔ̀rɔ yii yyaha na kìni i mɛ,
pi sí n-pyi yii tɛ̀ɛnɲɛɛ,
pi yasunɲyi sí n-pyi kànhaŋa fiige yii á”.»
4 Tèni i Kafooŋi mɛ̀lɛkɛŋi à mpe jwumpe jwo Izirayɛli shiinbii punʼ á ke,
ka pi i wa na mɛɛ súu maa ŋkwúuli.
5 Ka pi i kuru cyage mɛgɛ le Bokimua,
maa sáraya wwû Kafooŋi á kuru cyage e.
Zhozuwe ŋkwùŋi
6 Tèni i Zhozuwe à Izirayɛli shiinbii cye yaha ke,
cyeyi yi mpyi a kan kan tùluyʼá ke,
ka pi shin maha shin si sà ntɛ̀ɛn u taare e.
Lire pyiŋkanni na pi à kìni cû.
7 Izirayɛli shiinbilʼà Kafooŋi pêe Zhozuwe shìŋi canmpyaagii puni i.
Kacwɔnɔrɔbii pi mpyi ná pi e Zhozuwe kwùŋkwooni kàntugo,
ná pi à Kafooŋi kabwɔhigii ɲya mà yyaha tíi ná Izirayɛli shiinbilʼe ke,
pi à Kafooŋi pêe pire shìŋi canmpyaagilʼe mú.
8 Ka Nuni jyaŋi Zhozuwe,
Kafooŋi báarapyiŋi si ŋkwû mà u shìŋi yaha yyee ŋkuu ná kɛ (110) na.
9 Taare ti mpyi a kan u á Timinati-Ɛrɛsi kwùumpe e ke,
ka pi i u tò wani Efirayimu ɲaŋkuluni i,
Gasi ɲaŋke suumɔ kùlu yyéreŋi i.
10 Zhozuwe tìiŋi shiinbii punʼà pa ŋkwû ke,
lyeɲwɔyi yʼà pa kàntugo ke,
yire mpyi a Kafooŋi cè mɛ.
Kafooŋi mú mpyi a kabwɔhigii ɲcyiimu pyi Izirayɛli shiinbilʼá ke,
pi mpyi a yaaga cè cyire e mɛ.
Izirayɛli shiinbii Kile ɲwɔmɛyahani
11 Ɲyɛ kani li ɲyɛ kafuun Kafooŋi ɲyii na ke,
Izirayɛli shiinbilʼà lire pyi.
Pi à kacyiinni Baali sun.
12 Pi à kàntugo wà Kafooŋi pi tulyeyi u Kileŋi á,
uru ŋgemu u à pi yige Misira kìni i ke,
maa kilebii piibɛrii pêre.
Supyishiŋi sanŋi u mpyi pi ŋkère na ke,
pi mpyi na pire u kilebii pêre,
maa niŋkure sínni pire taan.
Ka lire si Kafooŋi lùuni pyi lʼà yîri sèe sèlʼe.
13 Pi à kàntugo wà Kafooŋi na,
maa kacyanhigii Baali ná Asitariti sunni.
14 Lirʼà pyi ke,
ka Kafooŋi lùuni si yîri sèlʼe Izirayɛli shiinbii taan,
ka u u pi yaha nàŋkaabii cye e,
ka pire si mpa ɲcwo pi na,
maa pi cyeyaayi kuu.
Pi zàmpɛɛnbii pi mpyi pi ŋkère na ke,
ka Kafooŋi si pi yaha pire cye e,
pi ɲyɛ a jà a yyérʼa pire sige mɛ.
15 Pi ná mpyi a kàre kàshigʼá,
Kafooŋi mpyi maha pi tùn a kan pi zàmpɛɛnbilʼá.
Kafooŋi mpyi a kâa pi á,
maa jwo na pi aha uru ɲwɔmɛɛni yaha,
uru sí lire pyi.
Lire pyiŋkanni na,
Kafooŋi à yyefugo nimbwɔhɔ yaha Izirayɛli shiinbii na.
16 Ɲyɛ ka Kafooŋi si yukyaabii pìi tìŋɛ Izirayɛli shiinbii ɲùŋɔ na,
ka pire si pi shwɔ nàŋkaabii na.
17 Ŋka Izirayɛli shiinbii ɲyɛ a ɲɛnʼa lógo pire yukyaabilʼá mɛ.
Pi mpyi a taha kilebii piibɛrii fye e,
maa pire pêre.
Pi tulyeyʼà kuni ndemu ɲaara ke,
pi à kàntugo wà lire na fwɔfwɔ.
Pi ɲyɛ a Kafooŋi sàliyaŋi kuni ɲaara bà pi tulyeyi mpyi a li ɲaara mɛ.
18 Kafooŋi ná mpyi a yukyaaŋi wà tìŋɛ pi ɲùŋɔ na,
u mpyi maha uru tɛ̀gɛ u shìŋi canmpyaagii funŋke e,
urʼasi Izirayɛli shiinbii shwɔ pi zàmpɛɛnbii na.
Kafooŋi ná mpyi a pi ɲya yyefuge e,
pi i ŋkyaali pi kyéregefeebii cye e,
u mpyi maha ɲùɲaara ta pi na.
19 Ŋka uru yukyaaŋi ná mpyi a kwû,
Izirayɛli shiinbii mpyi maha núru pi kapyiɲjyɛɛgilʼà,
pi bá mpyi maha mpi mà tòro pi tiibii na.
Pi mpyi maha ntaha kilebii piibɛrɛ fye e,
maa pire pêre,
maa niŋkure sínni pire taan.
Pi mpyi maha ɲcyé lahaga cyire kapegigii na,
maa Kile ɲwɔmɛɛni yaha.
Kile à Izirayɛli shiinbii zàmpɛɛnbii tɛ̀gʼa pi sugurʼa wíi
20 Ka Kafooŋi lùuni si yîri Izirayɛli shiinbii taan.
Ka u u jwo:
«Tunmbyaare mii à le ná nte sùpyire tulyeyi i ke,
pi à tire kɛ̀ɛge.
Pi ɲyɛ a sàa mii ɲwɔmɛɛni cû mɛ.
21 Lire kurugo Zhozuwe à kwû mà supyishiŋi kuuyi ɲjemu ta pi ŋkère na ke,
mii sì kuru kà kɔ̀rɔ n-lwɔ́ pi taan mɛ.
22 Mii sí uru supyishiŋi kuuyi tɛ̀gɛ Izirayɛli shiinbii suguro ŋgíi si li cè kampyi pi sì ɲɛɛ,
lire ɲyɛ mɛ,
kampyi pi sì ɲɛɛ mii ɲwɔmɛɛni cû sʼa ɲaare sʼa ntàanni ná mii ɲyii wuuni i,
bà pi tulyeyʼà li pyi mɛ.»
23 Lire kurugo Kafooŋi à uru supyishiŋi kuuyi yaha kìni i ná Izirayɛli shiinbilʼe.
U ɲyɛ a ɲɛnʼa pi kɔ̀rɔ fwɔfwɔ mɛ.
U mú ɲyɛ a mpyi a ɲɛnʼa Zhozuwe ná u kàshikwɔɔnbii yaha pi jà pi na mɛ.