3
Ɲyɛ Kafooŋi à uru supyishiŋi kuuyi yaha kɔ̀rɔmbaa kìni i,
Izirayɛli shiinbii pi mpyi pi ɲyɛ a kàshi kwɔ̀n mà ɲya ná Kana shiinbilʼe mɛ,
bà u si mpyi si pi suguro ŋgíi uru supyishiŋi cye kurugo mɛ.
2 Izirayɛli shiinbii lyeɲwɔyi yi mpyi a si lire tèni i,
ná pi mpyi a kàshi kwɔ̀n mà ɲya mɛ,
u à lire pyi bà pire si mpyi si kàshige taana mɛ.
3 Kafooŋi mpyi a supyishiŋi kuuyi ɲjemu yaha kɔ̀rɔmbaa kìni i ná Izirayɛli shiinbilʼe ke,
yire mɛyi yi ɲyɛ:
Filisi shiinbii kùlugii kaŋkuroŋi,
ná Kana shiinbii puni,
ná Sidɔn shiinbii,
ná Evi shiinbii pi mpyi a tɛ̀ɛn Liban kìni ɲaŋkuluni i,
mà lwɔ́ Baali-Ɛrimɔ ɲaŋke na,
mà sà nɔ fo Amati kànhe tajyiɲwɔge na ke.
4 Kafooŋi à uru supyishiŋi kuuyi yaha kìni i,
si Izirayɛli shiinbii suguro ŋgíi pi cye kurugo,
si ɲcè kampyi pi sí raa uru toŋi kuni ɲaare,
u à uru ŋgemu kan pi tulyeyʼá u báarapyiŋi Musa cye kurugo ke.
5 Lire pyiŋkanni na Izirayɛli shiinbilʼà tɛ̀ɛn kìni i ná Kana shiinbii ná Ɛti shiinbii ná Amori shiinbii ná Pɛrɛzi shiinbii ná Evi shiinbii,
ná Yebusi shiinbilʼe.
6 Ɲyɛ ka Izirayɛli shiinbii si uru supyishiŋi kuuyi pworobii pìi lèŋɛ mà pyi pi cyee,
maa pi pworobii pìi kan pi pùnampyirʼá,
maa pi kacyanhigii sunni.
Ɔtiniyɛli à pyi Izirayɛli shiinbii yukyaaŋi
7 Izirayɛli shiinbilʼà Kafooŋi kafuun pyi:
Pi à funŋɔ wwɔ̀ Kafooŋi pi Kileŋi na,
maa kacyanhigii Baali ná Asera sunni.
8 Ka Kafooŋi lùuni si yîri Izirayɛli shiinbii taan sèe sèlʼe.
Lire kurugo u à pi le Mezopotami kìni saanŋi Kusan-Irisatayimu cye e.
Ka Izirayɛli shiinbii si ŋkwôro uru fànhe ɲwɔhʼ e yyee baataanre (8) funŋʼi.
9 Ka Izirayɛli shiinbii si mɛɛ wà Kafooŋi á,
ka uru si pi kan shwofooŋi wà na,
bà uru si mpyi si pi shwɔ mɛ.
Uru mɛgɛ mpyi Ɔtiniyɛli,
Kalɛbu cɔɔnŋi Kenazi jyaŋi u mpyi u wi.
10 Ka Kafooŋi Múnaani si mpa Ɔtiniyɛli na.
Ka u u mpyi Izirayɛli shiinbii yukyaaŋi.
U à kàre kàshigʼá ke,
ka Kafooŋi si u pyi u à sí ta Mezopotami saanŋi Kusan-Irisatayimu na.
11 Ka yyeɲiŋke si mpyi kìni i yyee beeshuunni funŋʼi,
fo mà sà nɔ Kenazi jyaŋi Ɔtiniyɛli kwùŋi na.
Ehudi à pyi Izirayɛli yukyaaŋi
12 Ɲyɛ kani li ɲyɛ kafuun Kafooŋi ɲyii na ke,
ka Izirayɛli shiinbii si cye le lire e na mpyi sahaŋki.
Ka Kafooŋi si là bâra Muwabu shiinbii saanŋi Egilɔn fànhe na pi mɛɛ na.
Ɲaha kurugo yɛ,
kani li ɲyɛ kafuun Kafooŋi ɲyii na ke,
pi à lire pyi.
13 Saanŋi Egilɔn mpyi a Amoni shiinbii ná Amalɛki shiinbii bâra uye na,
maa Izirayɛli shiinbii tùn.
Pi à sí ta pi na,
maa támaracire kànhe Zheriko shwɔ pi na.
14 Ka Izirayɛli shiinbii si ŋkwôro Muwabu shiinbii saanŋi Egilɔn fànhe ɲwɔhʼ e,
yyee kɛ ná baataanre (18) funŋʼi.
15 Lire kàntugo ka Izirayɛli shiinbii si mɛɛ wà Kafooŋi á,
Ka uru si pi kan shwofooŋi wabɛrɛ na,
uru mɛgɛ mpyi Ehudi,
Gera jya u mpyi u wi,
Bezhamɛ tùluge shin u mpyi u wi.
Ehudi na mpyi kàmɔɔ.
Izirayɛli shiinbilʼà múnalwɔɔre kan Ehudi á,
u sà ŋkan Muwabu shiinbii saanŋi Egilɔn á.
16 Ka Ehudi si kàshikwɔnŋwɔɔni ɲwɔyɔ shuunni wuu yaa,
maa li tɔɔnre pyi kàsinmɛɛni sínniŋɛ niŋkin,
maa li pwɔ u nínugumpe e kàniŋke na,
u vàanntinŋke ɲwɔhʼi.
17 U à sà múnalwɔɔre kan Muwabu shiinbii saanŋi Egilɔn á.
Egilɔn mpyi nàtababaaga.
18 Ehudi à múnalwɔɔre kan a kwɔ̀ ke,
maa fworʼa kàre ná u tugulwoobilʼe.
19 Pi à sà nɔ Giligali i kafaasunɲyi cyage e ke,
ka u u u tugulwoobii yaha pi à kàre,
maa núrʼa kàre saanŋi yyére maa u pyi:
«Saanŋi,
mii ná mu kanni jwumɔ na naha mii á mà jwo mu á.»
Ka saanŋi si u shiinbii puni pyi pi fworo ntàani na,
ka pi puni si fworo.
20 Ɲyɛ ka Ehudi si file saanŋi nintɛɛnŋi na u bage nìɲyi babilini i,
saanŋi kanni u mpyi na jyè lire e.
Ka Ehudi si u pyi:
«Kile à jwumɔ jwo mii á,
mii u jwo mu á.»
Ka saanŋi si yîrʼa yyére.
21 Ka Ehudi si u kàmɛnɛ cyɛge tɛ̀gʼa ŋwɔɔni dìrʼa wwû u kàniŋɛ cyage na,
maa li tɛ̀gʼa saanŋi yaceni sú a fûru.
22 Ŋwɔɔpyige ná ku cyiinni punʼà jyè saanŋi yaceni i,
fo sìnmpʼà ŋwɔɔni tò.
U à ŋwɔɔni yaha u yaceni i,
u ɲyɛ a li wwû mɛ.
23 Ka Ehudi si nìɲyi babilini ɲwɔyi shwɔ̂hɔ saanŋi na,
maa fworo bàanni ɲwɔge e mà kàre.
24 Ehudi fworoŋkwooni kàntugo,
ka saanŋi báarapyiibii si mpa.
Pi à bayi ɲwɔyi ta yʼà shwɔ̂hɔ ke,
ka pi i jwo:
«Saanŋi si nta u à jyè kàloge e nìɲyi babilini i.»
25 Pi à u sige a kànha fo mà pi funɲyi pɛn u ɲyɛ a ɲwɔyi múgo mɛ,
ka pi yabilimpii si tirikyaanni tɛ̀gʼa ku múgo,
mà pi kàfooŋi niŋkwuŋi niziniŋi ɲya ɲìŋke na.
26 Mà jwo pi kwɔ̀ cyire karigii puni na ke,
lirʼà Ehudi ta u à fê a sà ntòro kafaasunɲyi cyage taan,
mà kàre Seyira kànhe e.
27 U à sà nɔ wani ke,
maa mpuruge wyì Efirayimu ɲaŋkuluni i.
Ka Izirayɛli shiinbii si fworʼa pa bínni u taan,
ka u u ntòro pi yyaha na mà tîge ɲaɲyi ɲuŋʼi.
28 Ka u u pi pyi:
«Yii taha na fye e,
Kafooŋi à yii zàmpɛɛnbii Muwabu shiinbii le yii cye e.»
Ka Izirayɛli shiinbii si ntaha u fye e.
Ka pi i ŋkàrʼa sà Zhurudɛn baŋi tɔɔrɔfee tajyiige kuni cû,
maa kuni kwɔ̀n Muwabu shiinbii na.
Pi ɲyɛ a Muwabu shinŋi wà niŋkin yaha u à baŋi jyiile mɛ.
29 Kuru canŋke,
Izirayɛli shiinbilʼà Muwabu shiinbii kampwɔhii kɛ (10.000) bò,
pi puni mpyi nàmbaa fànha wuu ná kàshikwɔnmpiye.
Pi wà ɲyɛ a shwɔ mɛ.
30 Mà lwɔ́ kuru canŋke na,
ka Muwabu shiinbii si mpyi Izirayɛli shiinbii fànhe ɲwɔhe e,
ka kìni si mpyi yyeɲiŋke e yyee beecyɛɛre (80) funŋʼi.
Samugari à pyi Izirayɛli yukyaaŋi
31 Ɲyɛ Ehudi à kwû ke,
ka Anati jyaŋi Samugari si u tayyerege lwɔ́.
Canŋka urʼà Filisi shiinbii nàmbaa ŋkwuu baani (600) bò ná nùnaha kàbiini i.
Uru mú à Izirayɛli shiinbii shwɔ.