Debura ná Baraki kani
4
Ehudi à kwû ke,
kani li ɲyɛ kafuun Kafooŋi ɲyii na ke,
Izirayɛli shiinbilʼà lire pyi sahaŋki.
2 Lire kurugo Kafooŋi à pi le Kana shiinbii saanŋi Yabeni fànhe ɲwɔhʼi,
uru mpyi a tɛ̀ɛn Azɔri kànhe e.
U kàshikwɔɔnbii yyaha yyére shinŋi mɛgɛ mpyi Sisera,
uru mpyi a tɛ̀ɛn Arosɛti-Goyimu kànhe e.
3 Tɔɔnte shɔnyi wòtorii ŋkwuu baacyɛɛre (900) na mpyi saanŋi Yabeni á kàshige mɛɛ na.
U à Izirayɛli shiinbii kyérege sèe sèlʼe yyee beɲjaaga funŋʼi,
ka pire si mɛɛ wà Kafooŋi á.
4 Ɲyɛ,
Lapidoti cwoŋi Debura u mpyi Kile tùnntunŋɔ ke,
uru u mpyi Izirayɛli shiinbii yukyaaŋi lire tèni i.
5 U mpyi maha ntɛ̀ɛn támaracige kà ɲwɔhʼi Arama kànhe ná Bɛtɛli kànhe shwɔhɔlʼe,
Efirayimu ɲaŋkuluni i.
Pi à pa kuru cige mɛge le Debura támaracige.
Izirayɛli shiinbii mpyi maha si na pi karigii cwɔɔnre u yyére kuru cyage e.
6 Ɲyɛ canŋka u à Abinohamu jyaŋi Baraki yyere Kedɛshi kànhe e,
Nɛfitali shiinbii kùluni i,
maa u pyi:
«Kafooŋi,
Izirayɛli u Kileŋi u à nte tùnnture kan:
“shiin kampwɔhii kɛ (10.000) cwɔɔnrɔ Nɛfitali ná Zabulɔn shiinbilʼe,
maa dùgo ná pi e Tabɔri ɲaŋke na.
7 Mii sí saanŋi Yabeni kàshikwɔɔnbii yyaha yyére shinŋi Sisera sɔ̀n n-yaha yii na,
si u pyi u pa Kisɔn dùge ɲwɔge na,
si yii tùn ná tɔɔnnte wòtorobii ná u kàshikwɔɔnbilʼe.
Ŋka mii sí yii pyi yii sí ta pi na.”»
8 Ka Baraki si Debura pyi:
«Ká mpyi mu sí n-kàre ná mii i,
mii sí n-kàre.
Ŋka kampyi mu sì n-kàre ná mii i mɛ,
mii sì n-kàre mɛ.»
9 Ka Debura si u pyi:
«Mii sí n-kàre ná mu i,
ŋka mu sì ŋke kàshige mɛge ta mɛ,
ɲaha kurugo yɛ,
Kafooŋi sí Sisera le ceeŋi wà cye e.»
Ɲyɛ ka Debura si yîrʼa kàre ná Baraki i Kedɛshi i.
10 Ka Baraki si Zabulɔn shiinbii ná Nɛfitali shiinbii yyerʼa bínni Kedɛshi i.
Ka shiin kampwɔhii kɛ (10.000) si ntaha u fye e.
Debura mú à kàre ná u e.
11 Lirʼà Keni shinŋi wà ta wani,
u mɛgɛ mpyi Ebɛri.
Uru mpyi a wâlʼa láha Keni shiinbii sanmpii na,
maa sà ntɛ̀ɛn Kedɛshi kànhe taan,
maa u vàanŋke bage kwôro Zananimu kànhe cibwɔhe taan.
Keni shiinbii tulyɛge ku mpyi Obabu,
Musa nafenaŋi.
12 Tèni i yʼà jwo Sisera á na Abinohamu jyaŋi Baraki ná u kàshikwɔɔnbilʼà dùgo Tabɔri ɲaŋke na ke,
13 ka Sisera si u tɔɔnnte shwɔnyi wòtorobii ŋkwuu baacyɛɛreŋi (900) puni lwɔ́,
maa u kàshikwɔɔnbii puni wà piye na Arosɛti-Goyimu kànhe funŋke e,
maa ŋkàre ná pi e Kisɔn dùge ɲwɔge na.
14 Ɲyɛ ka Debura si Baraki pyi:
«Yii à sì pi fye e,
ɲaha kurugo yɛ,
Kafooŋi à Sisera le yii cye e niɲjaa.
Kafooŋi yabiliŋi sí n-sìi n-yaha yii yyaha na.»
Ka Baraki si u kàshikwɔɔnbii kampwɔhii kɛŋi (10.000) yyaha cû mà tîge Tabɔri ɲaŋke na.
15 Ka Kafooŋi si kàshikwɔnŋwɔɔni tɛ̀gʼa Sisera ná u shwɔnyi wòtorobii puni ná u kàshikwɔɔnbii puni kɔ̀rʼa caala Baraki yyaha na.
Ka Sisera si ntîge u shwɔnge wòtoroŋi na,
maa fê tɔɔre na.
16 Ka Baraki si ɲcyán Sisera shwɔnyi wòtorobii ná u kàshikwɔɔnbii fye e mà kàre fo Arosɛti-Goyimu i,
maa kàshikwɔnŋwɔɔni tɛ̀gʼa Sisera kàshikwɔɔnbii puni bò,
ali shin niŋkin ɲyɛ a shwɔ mɛ.
17 Ka Sisera si fê tɔɔre na mà sà nɔ Ebɛri cwoŋi Yahɛli vàanŋke bage na.
Lire tèni i Azɔri saanŋi Yabeni ná Keni shinŋi Ebɛri pyɛngɛ shiinbii shwɔ̀hɔŋi mpyi a ɲwɔ.
18 Ka Yahɛli si fworʼa Sisera ɲùŋɔ bɛ̂,
maa u pyi:
«Jyè bage e mii kàfooŋi,
maha raa fyáge mɛ,
yafyin sì mu ta mɛ.»
Ɲyɛ ka Sisera si jyè Yahɛli fye e u vàanŋke bage e,
ka Yahɛli si vàannto tɛ̀gʼa u tò.
19 Ka Sisera si u pyi:
«Maye sanŋa yaha maa lwɔhɔ kan na á si bya,
ɲaha kurugo yɛ,
byage naha mii na.»
Ka Yahɛli si nùjirimpe yaleŋke múgo,
maa pà kan u à bya,
maa vàanntoŋi tò u na sahaŋki.
20 Ka Sisera si Yahɛli pyi:
«Sà yyére vàanŋke bage ɲwɔge na,
wà ká mpa mu yíbe na shin na ɲyɛ naha la,
maa urufoo pyi:
“Ɔnhɔ.”»
21 Ɲyɛ Sisera à pa ŋɔ́ɔnʼa cûnnu,
ɲaha kurugo yɛ,
u mpyi a kànha sèe sèlʼe.
Ka Ebɛri cwoŋi Yahɛli si vàanŋke bage kwòro kwòro sìkanni là ná sìkanŋkworoge lwɔ́,
maa mpeelʼa file Sisera na lùtaan na,
maa lire sìkanni kwòro u ɲùŋke e,
ka li i ɲùŋke fûru fo mà jyè taare e.
Ka Sisera si ŋkwû.
22 Ɲyɛ Baraki à Sisera fyè tɔ̀rʼa sà nɔ wani ke,
ka Yahɛli si fworʼa u ɲùŋɔ bɛ̂ maa u pyi:
«Ta ma,
nàŋi mu ɲyɛ na ɲcaa ke,
mii sí u cyêe mu na.»
Ka Baraki si jyè vàanŋke bage e,
mà Sisera ta u à cwo a sànhana ɲìŋke na mà kwû,
sìkanni sí ɲyɛ u ɲùŋke e.