Debura ná Baraki mɛɛni
5
Kuru canŋke,
ka Debura si nde mɛɛni cêe ná Abinohamu jyaŋi Baraki i na:
2 «Wuu à fwù kan Kafooŋi à.
Kacwɔnrɔbilʼà ɲɛnʼa tòro Izirayɛli shiinbii yyaha na,
Izirayɛli shiinbii mú a ɲɛɛ maa ŋkàre ná pi e kàshigʼá.
3 Saanbii,
yii mpe lógo,
ɲùŋufeebii,
yii niŋgyiigii múgo!
Mii sí mɛɛ cêe,
sèe wi,
mii sí mɛɛ cêe Kafooŋi á.
Mii sí Kafooŋi,
Izirayɛli u Kileŋi pêe ná mɛlʼe.
4 Kafooŋi,
canŋke mu à yîri Seyiri kànhe e ke,
tèni i mu à yîri Edɔmu kànhe kwùumpe e ke,
ɲìŋkʼà cyɛ̂ɛnnɛ,
ka nìɲyiŋi puni si mpyi lwɔhɔ,
ɲahayʼà lwɔhe cwûunnɔ.
5 Kafooŋi,
ɲaɲyʼ à cyɛ̂ɛnnɛ mu yyaha na,
Sinayi ɲaŋke Kafooŋi,
Izirayɛli u Kileŋi yyaha na.
6 Anati jyaŋi Samugari tèni i,
Yahɛli u tèni i,
sùpya mpyi na ntùuli kuumbwoyi i mɛ,
kùsheebii mpyi maha ɲaare kuuɲcwɔɔre e.
7 Ɲùŋufoo mpyi Izirayɛli shiinbii na mɛ,
ɲùŋufoo mpyi pi na mɛ fo canŋke mii à yîri,
mii Debura à yîri maa mpyi Izirayɛli shiinbii nuŋi ke.
8 Pi mpyi a kɛ̂ɛnŋɛ na kacyanhigii sunni,
lire kurugo pi zàmpɛɛnbilʼà pa pi tùn pi kànhe tajyiɲwɔyi na.
Pi kàshikwɔɔnbii mpyi a nàmbaa kampwɔhii beeshuunni (40.000) kwɔ̀,
ŋka tɔɔnnɔ yabeŋɛ lire ɲyɛ mɛ,
tàan mpyi pi wà niŋkin á mɛ.
9 Mii sɔ̀nŋɔrʼà yyaha tíi ná Izirayɛli shiinbii yyaha yyére shiinbilʼe,
pire mpiimu pi à ɲɛɛ maa fworo sùpyire shwɔhɔlʼe mà kàre kàshigʼá ke.
Yii Kafooŋi kêe!
10 Yii pi ɲyɛ na dùru dùfanɲcyeebii nivyiinbii na ke,
yii pi maha ntɛ̀ɛn vàanɲyi loŋgara wuyi ɲuŋʼi ke,
yii pi ɲyɛ na ɲaare kuni i ke,
yii sɔ̂nŋɔ mpe na!
11 Lùkwubii pi maha lwɔhe kwóre bɛ̀ɛnɲyi na ke,
pire maha Kafooŋi kacɛnŋkii nimpyiiŋkii kyaa yu,
u à kacɛnŋkii ɲcyiimu pyi Izirayɛli shiinbii yyaha yyére shiinbilʼá ke.
Ɲyɛ Kafooŋi shiinbii pi kànhe tajyiɲwɔyi kuni lwɔ́.
12 Ɲɛ̀,
ɲɛ̀,
ɲɛ̀ Debura!
Yîri maa mɛɛ cêe!
Baraki,
yîri maa wà ná ma bilibii niɲcuumpilʼe,
mu Abinohamu jyaŋi!
13 Supyipaanre ti mpyi a kwôro ke,
tirʼà kàrʼa sà fànhafeebii tùn maa jà pi na.
Kafooŋi shiinbilʼà kàshikwɔnmpiyi yà tùn a kan mii á.
14 Mpii pi à sí ta Amalɛki shiinbii na ke,
Efirayimu shiinbilʼe pirʼà fworo,
Bezhamɛ shiinbilʼà bâra pi na.
Ɲùŋufeebii pìlʼà yîri Makiri kùluni i,
ka yyaha yyére shiinbii pìi si fworo Zabulɔn shiinbilʼe.
15 Isakari shiinbii ɲùŋufeebilʼà bâra Debura na,
Isakari shiinbilʼà cye le Baraki á,
pi à tîn a fworʼa kàre u yyére bafage e.
Ŋka Urubɛn shiinbii ɲwɔmyahigii mpyi a táa,
pi à piye kyáala a mɔ.
16 Ɲaha kurugo yii à kwôro kacwoyi shwɔhɔlʼe,
maa yatɔɔre myahigii núru yɛ?
Urubɛn shiinbii ɲwɔmyahigii mpyi a táa,
pi à piye kyáala a mɔ.
17 Galadi shiinbilʼà kwôro Zhurudɛn baŋi canŋafyinmpe e.
Ɲaha na Dan shiinbilʼà kwôro pi bakwooyi taan yɛ?
Ashɛri shiinbii mú à kwôro suumpe lwɔhe ɲwɔge na,
pi à kwôro pi bakwooyi tayyerege e.
18 Zabulɔn shiinbii ɲyɛ a fyá kwùŋi yyaha na mɛ,
Nɛfitali shiinbii mú a kàre fo kàshige takwɔnge yyaha yyére.
19 Saanbii pìlʼà pa kàshige kwɔ̀n,
Kana kìni saanbilʼà pa kàshige kwɔ̀n
Tanaki cyage taan,
Megido dùge ɲwɔge na,
ŋka pi ɲyɛ a yaage katufiige lwɔ́ mɛ,
pi ɲyɛ a wyɛ́rɛfyin lwɔ́ mɛ.
20 Wɔ̀rigilʼà tɛ̀ɛn nìɲyiŋi na,
maa kàshige kwɔ̀n,
mà cyi yaha cyi i ɲaare nìɲyiŋi i,
cyi à yoge kwɔ̀n Sisera shiinbii na.
21 Kisɔn dùge lwɔhʼà pi puni fwɔ a lwɔ́,
Kisɔn dùge ku ɲyɛ wani fo tèemɔni i ke.
Yii yii zòompii tàra yii raa sì kàshigʼá.
22 Shwɔnyi fèreyi na tùnmpe yige ɲìŋke na sèlʼe.
Yi na fî,
yi na fî mu à jwo shwɔnpeeye fànha wuyo.
23 Kafooŋi mɛ̀lɛkɛŋi à jwo:
“Yii Merozi kànhe láŋa,
yii ku láŋa,
yii ku shiinbii láŋa.
Ɲaha kurugo yɛ,
pi ɲyɛ a ɲɛnʼa Kafooŋi tɛ̀gɛ mɛ,
pi ɲyɛ a ɲɛnʼa Kafooŋi tɛ̀gɛ kàshikwɔnmpiyi na mɛ.”
24 Yahɛli à yaa u kêe mà tòro cyeebii puni taan,
Keni shinŋi Ebɛri cwoŋi kyaa li.
Cyeebii puni pi ɲyɛ na ntɛ̀n vàanɲyi bayi i ke,
yii u kêe yii tòro pire puni taan.
25 Sesira à lwɔhɔ ɲáare u á,
ka u u nùjirimɛ kan u á.
U à nùjirintanhaga kan u à saanbii lùbyayaagʼe.
26 U à sìkanni cû ná cye niŋkin i,
maa báarapyiŋi sìkanŋkworoge lwɔ́ ná kàniŋɛ cyɛge e,
maa sìkanni kwôro Sisera ɲùŋke e,
maa ku bwɔ̀n a jya,
u à u ɲùɲceni sú a fûru.
27 Ka u u ɲcwo mà kúrulo Yahɛli tooyʼe,
u à cwo a sànhana wani.
U à kúrulo u tooyʼe,
u à cwo wani,
cyage e u à kúrulo ke,
u à cwo a kwû wani.
28 Sisera nuŋʼà wíi fìnɛtiriŋi tɛ̀nmɛŋi wuŋi i,
maa jwo:
“Ɲaha na u kàshikwɔn wòtoroŋʼà mɔ maa mpa yɛ?
Ɲaha na u shwɔnyi kàshikwɔn wòtorobii ɲyɛ a núru na ma fwɔfwɔ mà yɛ?”
29 U shɛ̀rɛfeebii yákilibii pi mpyi a pêe ke,
mpe pirʼà jwo ke,
puru pu mpyi u funŋʼi mú na:
30 “Nàkaana bàa,
yaayi pi à kuu kàshige cyage e ke,
yire pi ɲyɛ na ntáali!
Kàshikwɔɔnbii puni pùcyaa niŋkin niŋkin lire ɲyɛ mɛ pùcyaa shuunni shuunni.
Vàanɲyi nisinaɲyi kacɛnŋkuure wuyi ɲyɛ Sisera wuyo.
Vàanɲyi nisinayi kacɛnŋkuure wogo niŋkin ná vàanɲyi nizuyi shuunni sí n-le javooŋi na.”
31 Ei,
Kafooŋi,
mu zàmpɛɛnbii puni pi kakyara amuni!
Ŋka mpii pi à mu kyaa táan piyʼá ke,
pire pi a ɲî canvugo canŋaɲyii fiige.»
Ɲyɛ ka Izirayɛli shiinbii si mpyi yyeɲiŋke e yyee beeshuunni funŋʼi.