Madiyani shiinbilʼà Izirayɛli shiinbii yyahayi fwɔhɔrɔ
6
Ka Izirayɛli shiinbii si Kafooŋi kafuun pyi sahaŋki.
Ka Kafooŋi si pi le Madiyani shiinbii fànhe ɲwɔhe e yyee baashuunni funŋʼi.
2 Madiyani shiinbilʼà pi kyérege sèlʼe,
fo Izirayɛli shiinbilʼà pa a fî na ŋwɔhɔni pi yyaha na wyikuuyi ná kafaawyiyi ná ɲaŋgyiyi i.
3 Izirayɛli shiinbii ná mpyi a pi kɛrɛyi nûgo tèni ndemu i ke,
lire tèni i Madiyani shiinbii ná Amalɛki shiinbii ná canŋafyinmpe shiinbii mpyi maha pa pi tùn.
4 Pi mpyi maha mpa pi vàanɲyi bayi kwòro Izirayɛli shiinbii taare e,
maa kìni sùmaŋi puni kɛ̀ɛge fo mà sà nɔ Gaza kànhe na.
Pi mpyi na yalyire yare Izirayɛli shiinbilʼá mɛ,
pi mpyi na Izirayɛli shiinbii mpàabii ná nìiyi ná dùfaanɲyi yare mɛ.
5 Pi mpyi maha mpa a ɲyaha kampɛɛnɲyɛ fiige ná pi yatɔɔre ná pi vàanɲyi bayi i.
Pi ná pi ɲwɔ́hɔɲyi mpyi a ɲyaha ntɔ̀rɔ na.
Pi mpyi maha mpa Izirayɛli shiinbii cyeyaayi kɛ̀ɛge kìni i.
6 Madiyani shiinbilʼà Izirayɛli shiinbii yyahayi fwɔhɔrɔ fo mà tòro.
Ka Izirayɛli shiinbii si mɛɛ wà Kafooŋi á.
7 Pi à mɛɛ wà Kafooŋi á na u pire shwɔ Madiyani shiinbii na ke,
8 ka Kafooŋi si tùnntunŋɔ tun pi á,
ka uru si jwo:
«Kafooŋi Izirayɛli u Kileŋi à jwo:
“Mii u à yii yige Misira kìni i,
lire ndemu i yii mpyi bilere e ke.
9 Mii u à yii shwɔ Misira shiinbii ná yii kyéregefeebii sanmpii puni na,
mii à pi kɔ̀rʼa lwɔ́ yii yyaha na,
maa pi kìni kan yii á.
10 Mii à yi jwo yii á,
na mii u ɲyɛ Kafooŋi,
yii Kileŋi,
Amori shiinbii kìni i yii à tɛ̀ɛn ke,
yii àha raa pire u kacyanhigii sunni mɛ.
Ŋka yii ɲyɛ a lógo mii á mɛ.” »
Kafooŋi à Zhediyɔn cwɔɔnrɔ
11 Ɲyɛ lire kàntugo ka Kafooŋi mɛ̀lɛkɛŋi si mpa ntɛ̀ɛn Ofira kànhe cibwɔhe kà ɲwɔhʼi,
kuru cyage na mpyi Abiyezɛri shinŋi wà wogo,
uru mɛgɛ mpyi Yowasi.
Lirʼà Yowasi jyaŋi Zhediyɔn ta u u sùmaŋi bwùun ɛrɛzɛn lwɔhe tawwuge e,
si u ŋwɔhɔ Madiyani shiinbii na.
12 Ka Kafooŋi mɛ̀lɛkɛŋi si fworo u á maa u pyi:
«Kafooŋi ɲyɛ ná mu i kàshikwɔnmpege.»
13 Ka Zhediyɔn si u pyi:
«Ei,
mii kàfooŋi,
kampyi sèe wi na Kafooŋi na ɲyɛ ná wuu e,
ɲaha na ɲje yyefuyi punʼà nɔ wuu na yɛ?
Wuu tulyeyʼà jwo wuu á na Kafooŋi à kabwɔhigii ɲcyiimu pyi pirʼá,
maa pire yige Misira kìni i ke,
ɲaha na Kafooŋi sàha ɲyɛ na cyire fiige pyi mà yɛ?
Ɲaha na Kafooŋi à cye wwû wuu taan,
maa wuu le Madiyani shiinbii cye e yɛ?»
14 Ka Kafooŋi si Zhediyɔn wíi maa jwo:
«Fànhe ku ɲyɛ mu i ke,
ta sì maa sà Izirayɛli shiinbii shwɔ Madiyani shiinbii na,
ná kurʼe.
Taha mii bà u à mu tun mɛ?»
15 Ka Zhediyɔn si Kafooŋi pyi:
«Ei,
mii Kafooŋi,
di mii sí Izirayɛli shiinbii shwɔ ɲjwo yɛ?
Mii baga shiinbii pi a cyɛ́rɛ mà tòro Manase tùluge shiinbii sanmpii bayi na.
Mii mú u ɲyɛ mii tusiini puni nimbileni.»
16 Ka Kafooŋi si núrʼa u pyi:
«Mii sí n-pyi ná mu i,
mu sí Madiyani shiinbii puni bò,
mu à jwo shin niŋkin mu à bò.»
17 Ka Zhediyɔn si jwo:
«Ká mpyi mii kyalʼà táan mu á,
kani là pyi a cyêe na na,
nde li sí li cyêe na Kafooŋi yabiliŋi u ɲyɛ na yu ná mii i ke.
18 Maye sanŋa yaha,
ma hà ŋkàre mɛ,
na sige fo mii aha shà maa mpa.
Mii sí n-pa sáraga wwû mu á.»
Ka Kafooŋi si jwo:
«Mii sí mu sige,
fo mu aha shà a pa.»
19 Ka Zhediyɔn si ŋkàre pyɛngɛ,
maa sà sikabilini là cû a bò,
mà shwɔhɔ,
maa mbyimpe cúlii beɲjaaga ná kɛ cwɔ̀nhɔ mà pyi bwúuru niɲjyirigembaawa.
U à kyaare le shàhani lʼe,
maa cyɛnge le yaage kʼe,
maa ŋkàrʼa sà yi kan Kile mɛ̀lɛkɛŋi á cibwɔhe ɲwɔhʼi.
20 Ka Kile mɛ̀lɛkɛŋi si u pyi:
«Kyaare ná bwúuruŋi niɲjirigembaaŋi yaha kafaage ɲuŋʼi,
maa cyɛnge wu yi na.»
Ka Zhediyɔn si li pyi amuni.
21 Kàbiini li mpyi Kafooŋi mɛ̀lɛkɛŋi cye e ke,
ka u u lire bwɔ̀n kyaare ná bwúuruŋi na,
ka nage si fworo kafaage e,
maa kyaare ná bwúuruŋi niɲjirigembaaŋi súugo.
Lire kàntugo ka Kafooŋi mɛ̀lɛkɛŋi si mpînni Zhediyɔn na.
22 Ɲyɛ Zhediyɔn à li ɲya na Kafooŋi mɛ̀lɛkɛŋi wi ke,
maa jwo:
«Ei,
Saanbwɔhe Kafooŋi,
mii wuunʼà kɛ̀ɛge,
ɲaha kurugo yɛ,
mii ɲyiinʼà Kafooŋi mɛ̀lɛkɛŋi ɲya.»
23 Ka Kafooŋi si u pyi:
«Mii sí yyeɲiŋke kan mu á,
ma hà raa fyáge mɛ,
yafyin sí mu ta mɛ.»
24 Ka Zhediyɔn si sáraya tawwugo faanra Kafooŋi á kuru cyage e,
maa ku mɛgɛ le:
«Kafooŋi u ɲyɛ yyeɲiŋke kanfooŋi.»
Kuru sárayi tawwuge na ɲyɛ Ofira kànhe e fo niɲjaa.
Abiyezɛri shiinbii taare e kuru cyage ɲyɛ.
Zhediyɔn à kacyiinni Baali bage jya
25 Kuru canŋke numpilage yabiliŋi i,
ka Kafooŋi si Zhediyɔn pyi:
«Ma tuŋi nupeeni shwɔnwuuni cû,
lire ndemu li ɲyɛ yyee baashuunni ke,
kacyiinni Baali bage ku ɲyɛ mu tuŋi pyɛnge e ke,
ku waraga.
Cyiinni lʼà cûru ku ŋkère na kacyiinni Asera mɛgɛ na ke,
maa lire pánnʼa cyán.
26 Lire kàntugo maa sáraya tawwugo yalʼa faanra Kafooŋi,
mu Kileŋi á,
kuru kafaage ɲuŋʼi,
maa lire nupeeni shwɔnwuuni cû ma pyi sáraga nizogogo ku na Kafooŋi Kile á,
kacyiinni Asera cyiinni mu à pánnʼa cyán ke,
maa lire tɛ̀gʼa sárage súugo.»
27 Ka Zhediyɔn si u báarapyiibii nàmbaa kɛ yyerʼa pa uru báaraŋi pyi,
bà Kafooŋi mpyi a yi jwo u á mɛ.
Ŋka numpilage e u à u pyi,
u ɲyɛ a ɲɛnʼa u pyi canŋke e mɛ,
ɲaha kurugo yɛ,
u mpyi na fyáge u pyɛngɛ shiinbii ná kànhe shiinbii na.
28 Kànhe shiinbilʼà pa yîri ɲyɛ̀ge na mà kacyiinni Baali bage ɲya kʼà jya.
Cyiinni li mpyi a cûru kacyiinni Asera mɛgɛ na ke,
lire mú sʼà pánnʼa cyán.
Pi à li ɲya mú na wà à nupeeni shwɔnwuuni pyi sáraga nizogogo sárayi tawwuge nivɔnŋke na.
29 Ka pi i wa na piye yíbili na:
«Jo u à ŋge kashiŋi pyi amɛ yɛ?»
Ka pi i yibiyi pyi maa yi yyaha cya,
mà pa li ta na Yowasi jyaŋi Zhediyɔn fyè wi.
30 Ka pi i Yowasi pyi:
«Ma jyaŋi yige naha,
wuu sí u bò.
U à kacyiinni Baali bage jya,
cyiinni lʼà cûru kacyiinni Asera mɛgɛ na ke,
maa lire pánnʼa cyán.»
31 Ɲyɛ,
mpii pi mpyi a yyére Yowasi taan ke,
ka u u pire puni pyi:
«Taha yii pi sí raa sùpyire tùnni sʼa ŋkaan Baali á?
Ná yii bà mɛ,
Baali sì n-jà yaaga pyi uyʼá mà?
Ŋgemu ká sùpya tùn mà kan Baali á ke,
urufoo sí n-bò mà jwo ɲyɛge ku múgo ke.
Ká mpyi Baali u ɲyɛ Kile,
u yabiliŋi u u zàmpɛɛnbii tùn.
Ɲaha kurugo yɛ,
pi à u bage jya.»
32 Mà lwɔ́ kuru canŋke na,
pi à Zhediyɔn mɛgɛ le Yerubaali,
kuru mɛge ɲwɔhe ku ɲyɛ Baali sí u tùn.
Ɲaha kurugo yɛ,
u à Baali bage jya.
Zhediyɔn na tàafyeebii caa Kile á
33 Ɲyɛ ka Madiyani shiinbii ná Amalɛki shiinbii,
ná canŋafyinmpe shiinbii si mpa piye bínni maa Zhurudɛn baŋi jyiile,
maa sà pi vàanɲyi bayi kwòro Zizirɛli bafage e.
34 Ka Kafooŋi Múnaani si ntɛ̀ɛn Zhediyɔn na,
ka u u mpuruge wyì kàshige mɛɛ na,
maa Abiyezɛri shiinbii pyi pi à taha u fye e.
35 Ka Zhediyɔn si tùnntunmii tun Manase kùluni puni i,
ka pire mú si piye bínni maa ntaha u fye e.
U à tùnntunmii tun Ashɛri tùluge shiinbii ná Zabulɔn tùluge shiinbii ná Nɛfitali tùluge shiinbilʼá,
ka pire mú si mpa bâra u na.
36 Ka Zhediyɔn si jwo Kile á na:
«Ká mpyi sèe wi na mu sí Izirayɛli shiinbii shwɔ mii cye kurugo,
bà mu à yi jwo mɛ,
37 wíi,
mii sí mpàsɛɛgɛ cyán sùmaŋi fyiini na.
Mà jwo ɲyɛge ku múgo ke,
kamɛŋke ku mpàsɛɛge kanni ɲíŋɛ,
ku u fyiini niŋgaani yaha,
lire e mii sí n-cè na mu sí Izirayɛli shiinbii shwɔ mii cye kurugo,
bà mu à yi jwo mɛ.»
38 Bà Zhediyɔn à li cya u á mɛ,
amuni u à li pyi.
Ɲyɛ̀sɔɔge na,
Zhediyɔn à sà mpàsɛɛge lwɔ́ maa ku yûgo,
ka lwɔhe si fworo kʼe mà funɲcwoŋkwuu ɲî.
39 Ka Zhediyɔn si núrʼa jwo Kile á:
«Maye sanŋa yaha,
ma hà ma lùuni yîrige na taan mɛ.
Mii aha numɛ wuyi jwo,
mii saha sì yabɛrɛ jwo mɛ.
Mii la ɲyɛ maa kani là cyêe na na sahaŋki ná mpàsɛɛge e.
Numɛ,
mii la ɲyɛ,
mà jwo ɲyɛge ku múgo ke,
mpàsɛɛge ku kwôro kamɛŋɛ bàa,
ŋka kamɛŋke ku fyiini sanni ɲíŋɛ.»
40 Bà Zhediyɔn à yi jwo mɛ,
ka Kile si li pyi amuni kuru canŋke numpilage e.
Mpàsɛɛgʼà kwôro kamɛŋɛ bàa,
ŋka fyiini punʼà ɲíŋɛ kamɛŋke na.