Zhediyɔn à jà Madiyani shiinbii na
7
Ɲyɛ,
ɲyɛ̀sɔɔge na,
Yerubaali u ɲyɛ Zhediyɔn ke,
ka uru si n-tòro kàshikwɔɔnbii yyaha na,
ka pi i ŋkàrʼa sà pi vàanɲyi bayi kwòro Arɔdi lùbiliŋi taan.
Madiyani shiinbii kàshikwɔɔnbii mpyi a pi vàanɲyi bayi kwòro pi suumɔ kùlu yyére bafage e,
More ɲaŋke kàmpanŋke na.
2 Ka Kafooŋi si Zhediyɔn pyi:
«Mu kàshikwɔɔnbilʼà ɲyaha mà tòro mii i Madiyani shiinbii le mu cye e,
lire baare e,
Izirayɛli shiinbii sí raa piye pêre sʼa ŋko na pire yabilimpii fànhe ɲyahaŋi kurugo pirʼà jà pi na.
3 Lire e ke,
yi jwo supyirʼá na:
“Shin maha shin u à fyá fo na ɲcyɛ̂ɛnni ke,
pire puni pi yîri Galadi ɲaŋke cyage e pi a sì pyɛngɛ.”
»
Zhediyɔn à puru jwo ke,
ka shiin kampwɔhii beɲjaaga ná shuunni (22.000) si núrʼa kàre pyɛngɛ. Ka shiin kampwɔhii kɛ (10.000) si ŋkwôro ná Zhediyɔn e.
4 Ka Kafooŋi si Zhediyɔn pyi:
«Ali numɛ,
sùpyirʼà ɲyahʼa tòro,
ta sì ná pi e lwɔhe ɲwɔge na,
mii yabiliŋi sí pi cwɔɔnrɔ mu á.
Mpii pi à yaa pi kàre ná mpii pi à yaa pi núru ke,
mii sí yire jwo mu á.»
5 Ka Zhediyɔn si ŋkàre ná sùpyire e lwɔhe ɲwɔge na.
Ka Kafooŋi si jwo:
«Sùpyire kàanmucya tabyage e,
mpii pi ɲyɛ na lwɔhe kwóre ná cyeyi i maa ɲjini tɛ̀gɛ na ku byii pwuunbii byaŋkanni na ke,
pire cwɔɔnrʼa yaha ŋkère na.
Mpimu ka niŋkure sín maa byii ke,
pire yaha pi mɛgɛ cyagʼe.»
6 Mpii pi mpyi na lwɔhe kwóre na byii ná cyeyi i ke,
pire mpyi shiin ŋkwuu taanre (300).
Pi sanmpii puni mpyi a niŋkure sín maa byii.
7 Ka Kafooŋi si Zhediyɔn pyi:
«Shiin ŋkwuu taanreŋi (300) u à lwɔhe kwó a bya ná pi cyeyi i ke,
mii sí yii shwɔ si Madiyani shiinbii le yii cye e,
pire cye kurugo.
Sùpyire sannte ti núru tʼa sì pi pyɛnyi i.»
8 Ɲyɛ ka Zhediyɔn si tire sùpyire yaha a kàre pyɛngɛ,
maa pi ɲjyìŋi ná pi tìimpirigii shwɔ.
Ka Zhediyɔn si ŋkwôro ná shiin ŋkwuu taanre (300) kanni i.
Madiyani shiinbii kàshikwɔɔnbii vàanɲyi bayi mpyi Zhediyɔn ná u shiinbii wuyi ɲwɔhɔntaan,
bafage e.
9 Kuru canŋke numpilage e,
ka Kafooŋi si Zhediyɔn pyi:
«Yîri,
maa sà Madiyani shiinbii tùn,
ɲaha kurugo yɛ,
mii à pi le mu cye e.
10 Ŋka kampyi mu wa na fyáge,
ta sì ná ma báarapyiŋi Pura e pi cyage e.
11 Yii aha nɔ wani,
Madiyani shiinbii na mpemu yu ke,
puru lógo,
lire e mu saha sì n-fyá si sà pi tùn mɛ.»
Ɲyɛ ka Zhediyɔn ná Pura si ŋkàre fo Madiyani shiinbii vàanɲyi bayi taan.
12 Madiyani shiinbii ná Amalɛki shiinbii ná canŋafyinmpe shiinbii puni mpyi a sínni sínnʼa piye sànhana kampɛɛnɲyɛ niɲyahaya fiige mà bafage ɲî.
Pi ɲwɔ́hɔɲyi mpyi na sì n-jà ntɔ̀rɔ mɛ.
Yi mpyi a ɲyaha suumpe lwɔhe ɲwɔge nticyɛnŋi fiige.
13 Tèni i Zhediyɔn ná Pura à nɔ pi cyage e ke,
lirʼ à pi wà niŋkin ta u u u ŋɔɔge yyaha yu u shɛ̀rɛfooŋi wà á.
U à jwo:
«Mii à ŋɔɔgɔ ŋɔ́ɔ mà li ɲya na bwúuruɲuŋɔ niŋkin mpyi na kùuŋkuu na ma,
mà pa jyè wuu Madiyani shiinbii vàanɲyi bayi shwɔhɔlʼe,
maa kà bwɔ̀n a cyán fo mà ku cyígile ɲìŋke na.»
14 Ka u shɛ̀rɛfooŋi si u pyi:
«Ɲje ɲyɛ yabɛrɛ mɛ,
Izirayɛli shinŋi Yowasi jyaŋi Zhediyɔn kàshikwɔnŋwɔɔni kyaa li.
Kile à Madiyani shiinbii kàshikwɔɔnbii puni le u cye e.»
15 Ɲyɛ Zhediyɔn à kuru ŋɔɔge ná ku ɲwɔhe lógo ke,
ka u u niŋkure sín maa fwù kan Kile á.
Lire kàntugo maa núrʼa kàre Izirayɛli kàshikwɔɔnbii cyage e.
U à nɔ wani ke,
ka u u sêe maa jwo:
«Yii yîri!
Kafooŋi à Madiyani shiinbii le wuu cye e.»
16 Ka Zhediyɔn si u kàshikwɔɔnbii ŋkwuu taanreŋi (300) táa mà pyi kuruɲwɔ taanre,
maa tìimpire niŋkin ná pworo cwoo niŋkin kan pi shin maha shin á,
maa pi pyi pi kamiiŋkii cyìi mînʼa le cwɔhɔgilʼe.
17 Lire kàntugo ka u u pi pyi:
Yii na wílʼa ɲwɔ,
mii aha ndemu pyi ke,
yii i lire fiige pyi.
Wuu aha nɔ Madiyani shiinbii cyage e,
mii aha ndemu pyi ke,
yii i lire fiige pyi mú.
18 Mii ná na kuruŋke shiinbii ká wuu tìimpirigii wyì tèni ndemu i ke,
yii i yii wogigii mú wyì yii tɛ̀gʼa Madiyani shiinbii mâhana yii i ŋkwúulo yii i jwo:
«Kafooŋi á,
ná Zhediyɔn á.»
19 Zhediyɔn ná shiin ŋkuuŋi (100) u mpyi ná u e ke,
pirʼà nɔ Madiyani shiinbii cyage taan ɲìɲiŋke laage e.
Saɲcwɔnsigibii pi mpyi na kàanmucyage pyi ke,
pi mpyi a pìi tɛ̀gʼa pire fáa kàavo.
Ka Zhediyɔn ná u shiinbii si bâra maa pi tìimpirigii wyì,
maa pi pwoore cwɔhɔgii jya jya.
20 Ka kuruɲyi sanɲyi mú si pi tìimpirigii wyì,
maa pi pwoore cwɔhɔgii jya jya,
maa kamiiŋkii mînʼa cû cû ná pi kàmɛnɛ cyeyi i,
maa tìimpirigii cû cû ná pi cyendige cyeyi i,
maa ŋkwúulo na:
«Wuu à ŋwɔhigii lwɔ́ si kàshige kwɔ̀n Kafooŋi á,
ná Zhediyɔn á.»
21 Pi puni mpyi a kwôro pi tayyereyi i,
pi mpyi a yyérʼa Madiyani shiinbii mâhana.
Ka Madiyani shiinbii si wá na kwuuyi wàa maa fî shwomɔ.
22 Mà Izirayɛli kàshikwɔɔnbii ŋkwuu taanreŋi (300) yaha pi i pi tìimpirigii wyì,
ka Kafooŋi si Madiyani shiinbii pyi pi à wùrugo piyʼe na bùu.
Kʼà pa nɔ cyagʼe,
ka pi sanmpii si fê a kàre Bɛti-Sita kànhe e,
Sereda kànhe kàmpanŋke na.
Pi à kàrʼa sà nɔ fo Abɛli Mehola kànhe cyage e,
Tabati kànhe ŋkère na.
23 Izirayɛli shiinbii sanmpiipi ɲyɛ Nɛfitali shiinbii ná Ashɛri shiinbii ná Manase shiinbii puni ke,
pire punʼà wà piye na maa Madiyani shiinbii fyè tɔ̀rɔ.
24 Ka Zhediyɔn si tùnnturo tun Efirayimu ɲaŋkuluni shiinbii punʼá,
na pi fworʼa Madiyani shiinbii ɲùŋɔ bɛ̂ pi i kuni kwɔ̀n pi na Zhurudɛn baŋi tajyiige e mà sà nɔ fo Bɛti-Bara kànhe baŋi tajyiige na.
Ka Efirayimu shiinbii puni si fworʼa pa bínni,
maa kuni kwɔ̀n Madiyani shiinbii na,
Zhurudɛn baŋi tajyiige e fo mà sà nɔ Bɛti-Bara kànhe baŋi tajyiige na.
25 Ka pi i Madiyani shiinbii ɲùŋufeebii pìi shuunni cû,
Orɛbu ná Zɛbu.
Pi à Orɛbu bò Orɛbu kafaage cyage e,
maa Zɛbu bò Zɛbu ɛrɛzɛn lwɔhe tawwuge e.
Ka pi i Madiyani shiinbii fye tɔ̀rɔ sahaŋki,
maa núrʼa pa ná Orɛbu ná Zɛbu ɲùmbogilʼe mà pa ŋkan Zhediyɔn á Zhurudɛn baŋi kàntugo.