Efirayimu shiinbilʼà Zhediyɔn cɛ̂ɛgɛ
8
Ka Efirayimu shiinbii si Zhediyɔn pyi:
«Ɲaha mu à pyi amɛ ná wuu e yɛ?
Mu niŋkareŋi zà Madiyani shiinbii tùn,
ɲaha na mu ɲyɛ a wuu yyerʼa bâra maye na mà yɛ?»
Pi à Zhediyɔn cɛ̂ɛgɛ sèlʼe.
2 Ka Zhediyɔn si pi ɲwɔ shwɔ:
«Kani ndire mii à pyi,
ná li sí n-jà ntàanna ná yii u nimpyiini i yɛ?
Yii Efirayimu shiinbilʼà ɛrɛzɛn kɔɔge fûgo maa ɛrɛzɛnŋi ŋgemu ta ke,
uru ɲyɛ a fànha tò mii tulyɛge Abiyezɛri ɛrɛzɛn kɔɔge puni ɛrɛzɛnŋi na mà?
3 Yii cye e Kile à Madiyani shiinbii ɲùŋufeebii shuunniŋi le,
Orɛbu ná Zɛbu,
kani ndire mii à pyi ndemu lʼà lire kwɔ̀ yɛ?»
Zhediyɔn à puru jwo ke,
ka puru jwumpe si Efirayimu shiinbii funɲyi ɲíŋɛ.
Zhediyɔn à Madiyani shiinbii saanlii shuunni bò
4 Ka Zhediyɔn ná u nàmbaa ŋkwuu taanreŋi (300) si ŋkàrʼa sà nɔ Zhurudɛn baŋi na,
maa u jyiile.
Pi mpyi a kànha,
ŋka lire ná li wuuni mú i,
pi mpyi na Madiyani shiinbii fyè tɔ̀re.
5 Pi à sà nɔ Sukɔti kànhe na ke,
ka u u kànhe shiinbii pyi:
«Madiyani shiinbii saanbii Zeba ná Zalimuna fyè mii ɲyɛ na tɔ̀re.
Yii yiye sanmii yaha yii i ɲjyì kan na fyèɲwɔhɔshiinbilʼá,
ɲaha kurugo yɛ,
pi à kànha fo mà pi fànhe kwɔ̀.»
6 Ka Sukɔti kànhe yahayyere shiinbii si Zhediyɔn pyi:
«Ɲaha na wuu sí ɲjyì kan yii á,
mà li ta yii sàha ŋkwɔ̀ a Zeba ná Zalimuna cû mà yɛ?»
7 Ka Zhediyɔn si pi pyi:
«Ɲyɛ,
Kafooŋi ká Zeba ná Zalimuna le mii cye e,
mii ninuruŋi sí n-pa yii seeyi kɔ̀ɔngɔ ná ŋure kàsɔrɔgii ná síwage ŋure kàbigilʼe.»
8 Ka pi i yîri wani maa ŋkàre Penuwɛli kànhe e.
Ka Zhediyɔn si pire ɲáare yalyire na mú.
Sukɔti kànhe shiinbii mpyi a u ɲwɔ shwɔ pyiŋkanni ndemu na ke,
ka Penuwɛli shiinbii si u ɲwɔ shwɔ amuni mú.
9 Ka Zhediyɔn si Penuwɛli shiinbii pyi:
«Mii aha Madiyani shiinbii tùn a kwɔ̀,
mii ninuruŋi,
mii sí yii kànhe batɔɔnge jya.»
10 Zeba ná Zalimuna na mpyi Karikɔri kànhe e ná pi kàshikwɔɔnbii sanmpii kampwɔhii kɛ ná kaŋkuroŋi i (15.000).
Pire kanni pi mpyi a kwôro canŋafyinmɛ yyéreŋi kàshikwɔɔnbii cyagʼe.
Shiin kampwɔhii ŋkuu ná beɲjaaga (120.000) mpyi a bò pi e.
Pire puni mpyi na jìni kàshikwɔnŋwɔɔni kàshige na.
11 Mpii pi maha ntɛ̀n na mâre síwage funŋke e ke,
ka Zhediyɔn ná u shiinbii si ntòro ná ɲani i pire u kuni i,
Noba ná Yogibeha kànyi canŋafyinmpe e.
Ka pi i sà nɔ Madiyani shiinbii kàshikwɔɔnbii na,
maa ɲcwo pi na,
pire mpyi na sɔ̂nŋi na yaaga sàha sì pire ta mɛ.
12 Ka Madiyani shiinbii ɲùŋufeebii,
Zeba ná Zalimuna si fê,
ka Zhediyɔn ná u kàshikwɔɔnbii si pi kɔ̀rʼa cû.
Ka ɲyàhaŋguruguŋi si jyè Madiyani kàshikwɔɔnbii kuruŋke e.
13 Ka Yowasi jyaŋi Zhediyɔn ná u kàshikwɔɔnbii si núrʼa pa Ɛrɛsi ɲaɲke taduguge kuni i.
14 Ka Zhediyɔn si Sukɔti kànhe nàɲjiiŋi wà cyán a cû,
maa u yíbe.
Ka uru si Sukɔti kànhe yyaha yyére shiinbii ná ku kacwɔnribii beetaanre ná kɛ na baashuunniŋi (77) mɛyi sémʼa kan u á.
15 Lire kàntugo,
ka Zhediyɔn si ŋkàre Sukɔti kànhe shiinbilʼá maa sà pi pyi:
«Yii funŋɔ cwo li na,
na yii à mii cyahala maa jwo:
“Ɲaha na wuu sí ɲjyì kan yii á,
mà li ta yii sàha ŋkwɔ̀ a Zeba ná Zalimuna cû mà yɛ?”
Ɲyɛ pi pii wuu cye e.»
16 Ɲyɛ ka u u Sukɔti kànhe kacwɔnribii cû maa pi seeyi kɔ̀ɔngɔ ná síwage ŋgure kàsɔrɔgii ná ŋgure kàbigilʼe.
17 U à sà Penuwɛli kànhe batɔɔnge jya maa kànhe nàmbaabii puni bò mú.
18 Lire kàntugo,
ka Zhediyɔn si Zeba ná Zalimuna yíbe maa jwo:
«Nàmbaabii yii à bò Tabɔri ɲaŋke na ke,
di pire mpyi yɛ?»
Ka pi i Zhediyɔn pyi:
«Pi mpyi a fworo mu kurugo.
Pi mpyi mu à jwo saanwa pyìi.»
19 Ka Zhediyɔn si jwo:
«Mii cìnmpyiibii pi,
wuu na ɲyɛ nu niŋkin pyìi.
Mii sí n-kâa Kafooŋi ɲyii wuŋi mɛge na,
na kampyi yii mpyi a pi bò mɛ,
mii mpyi na sì yii bò mɛ.»
20 Ɲyɛ ka Zhediyɔn si u jyaŋi niɲjyeŋi Yetɛri pyi:
«Yîri maa pi bò.»
Ŋka pyàŋi ɲyɛ a ɲɛnʼa u kàshikwɔnŋwɔɔni wwû li fwuuni i si pi bò mɛ.
Ɲaha kurugo yɛ,
nàŋkocyaawa u mpyi u wi,
u mpyi na fyáge.
21 Ka Zeba ná Zalimuna si Zhediyɔn pyi:
«Mu yabiliŋi u yîri maa wuu bò,
ɲaha kurugo yɛ,
bà supyaŋi ɲyɛ mɛ,
amuni u fànhe ɲyɛ.»
Ka Zhediyɔn yabiliŋi si yîri maa pi bò.
Kacɛnŋkuure yaayi yi mpyi a le pi ɲwɔ́hɔɲyi yaciyi na ke,
maa yire lwɔ́.
Zhediyɔn karigii nizaanŋkii
22 Lire kàntugo Ka Izirayɛli shiinbii si Zhediyɔn pyi:
«Pyi wuu saanŋi,
ɲaha kurugo yɛ,
mu u à wuu shwɔ Madiyani shiinbii na.
Mu pyìibii ná mu ɲampyire sí raa piye fáre mu saanre yatɛɛnŋke na.»
23 Ka Zhediyɔn si pi pyi:
«Mii sì n-pyi yii saanŋi mɛ,
mii pyìibii mú sì n-pyi saanlii yii ɲùŋɔ na mɛ.
Kafooŋi u sí n-pyi yii ɲùŋɔ na.»
24 Ka u u núrʼa pi pyi:
«Mii sí kyaa niŋkin cya yii á,
sɛɛnŋi fègempii yii à shwɔ yii zàmpɛɛnbii na kàshige cyage e ke,
yii shin maha shin u wà niŋkin kan na á.»
(Madiyani shiinbii mpyi maha fègempii leni Isimayɛli shiinbii sanmpii fiige).
25 Ka Izirayɛli shiinbii si Zhediyɔn pyi:
«Wuu à sàa ɲɛɛ lire mpyiŋi i.»
Ka pi i vàanntinmbwɔhe kà pìli ɲìŋke na.
Ka pi shin maha shin si sɛɛnŋi fègewe niŋkin wwû u yaayi nintayi i,
mà yaha kuru na.
26 Sɛɛnŋi pi à kan Zhediyɔn á ke,
uru mpyi a cúlii beɲjaaga kwɔ̀.
Pi à kacɛnŋkuure yaayi yabɛrɛ kan u á mú,
ná fègempii ná vàantinmbwoyi nisinayi Madiyani shiinbii saanbii mpyi maha leni ke.
Kacɛnŋkuure yaayi pi mpyi maha leni ɲwɔ́hɔyi yaciyi na ke,
pi à yire yà kan u á mú.
27 Ka Zhediyɔn si uru sɛɛnŋi tɛ̀gʼa efodia yaa,
mà yaha u yabiliŋi kànhe e,
Ofira kànhe e.
Ka Izirayɛli shiinbii puni si wá na uru efodiŋi sunni.
Uru kani lʼà pa mpyi kànhaŋa mà Zhediyɔn ná u pyɛngɛ shiinbii cû.
28 Ka Madiyani shiinbii si mpyi Izirayɛli shiinbii fànhe ɲwɔhʼi.
Pi ɲyɛ a jà a piye shwɔ pi na mɛ.
Ka kìni si ŋkwôro yyeɲiŋke e yyee beeshuunni funŋʼi,
fo mà sà nɔ Zhediyɔn kwùŋi na.
29 Yowasi jyaŋi Zhediyɔn pi maha mpyi Yerubaali ke,
ka uru si núrʼa kàrʼa sà ntɛ̀ɛn u pyɛnge e.
30 Pùnampyire beetaanre ná kɛ (70) ti mpyi Zhediyɔn á,
ɲaha kurugo yɛ,
u cyeebii mpyi a ɲyaha.
31 U mpyi a bilicwoŋi ŋgemu lèŋɛ ma pyi u cwo Sikɛmu kànhe e ke,
urʼà pùnambili niŋkin si u á,
ka u u li mɛgɛ le Abimelɛki.
32 Yowasi jyaŋi Zhediyɔn à lyɛ sèlʼe maa nta a kwû.
Ka pi i u tò u tuŋi Yowasi kwùunni ŋkère na,
Ofira kànhe e,
kuru ku mpyi u tulyɛge Abiyezɛri shiinbii kànhe.
33 Zhediyɔn kwùŋkwooni kàntugo,
ka Izirayɛli shiinbii si núru na kacyiinni Baali sunni.
Kacyiinni mɛgɛ ku ɲyɛ Baali-Beriti ke,
lire pi à pyi pi kileŋi.
34 Izirayɛli shiinbii ɲyɛ a Kafooŋi pi Kileŋi wíi yaaga mɛ,
uru ŋgemu u mpyi a pi shwɔ pi zàmpɛɛnbii puni na,
pire mpiimu pi mpyi a pi kwûulo kàmpanɲyi puni na ke.
35 Zhediyɔn u ɲyɛ Yerubaali ke,
kacɛnŋkii puni uru mpyi a pyi Izirayɛli shiinbilʼá ke,
pi ɲyɛ a cyire kacɛnŋkii cè ná u pyɛngɛ shiinbilʼe mɛ.