Abimelɛki kani
9
Canŋka,
ka Yerubaali jyaŋi Abimelɛki si ŋkàre Sikɛmu kànhe e,
u nuŋi cìnmpyiibii ná u nuŋi tuŋi pyɛngɛ shiinbii puni yyére,
maa sà jwo ná pi e,
na:
2 «Yii yiye sanmii yaha yii i na jwumpe nɔ Sikɛmu kànhe shiinbii kacwɔnribii puni na.
Yii yi jwo pi á na:
“Yerubaali jyaabii beetaanre ná kɛŋi (70) puni u tɛ̀ɛn yii ɲùŋɔ na,
lire ɲyɛ mɛ,
u jya niŋkin u tɛ̀ɛn yii ɲùŋɔ na,
cyire kapyaagii shuunniŋi i li ndi lʼà pwɔ́rɔ yɛ?
Yii funŋɔ cwo li na mú na mii ná yii na ɲyɛ shinnuu.” »
3 Ka Abimelɛki nuŋi cìnmpyiibii si ŋkàrʼa sà puru jwumpe jwo Sikɛmu kànhe shiinbii kacwɔnribii punʼá,
maa Abimelɛki mɛtanga jwo pi á.
Ka pi i li lwɔ́ si ntaha u fye e,
maa jwo:
«Wuu cìnmpworo u ɲyɛ u wi.»
4 Ka pi i wyɛ́rɛfyinŋi tɔɔnɲwɔ tɔɔnɲwɔ beetaanre ná kɛ (70) wwû kacyiinni Baali-Beriti bage e,
mà kan Abimelɛki á.
Ka Abimelɛki si supyifahafahayi yà ná supyikuuyi yà yyerʼa taha uye fye e,
maa yire sârali ná wyɛ́rɛŋi i.
5 Lire kàntugo,
u à kàre u tupyɛnge e Ofira kànhe e.
U à nɔ wani ke,
maa u sìɲɛɛbii puni bò kafaaga niŋkin na,
u tuŋi Yerubaali jyaabii beetaanre ná kɛŋi (70) puni.
Pi puni cɔɔnŋi Yotamu kanni u à shwɔ,
ɲaha kurugo yɛ,
uru mpyi a ŋwɔhɔ.
6 Ɲyɛ ka Sikɛmu kànhe kacwɔnribii puni ná Bɛti-Milo kànhe shiinbii puni si mpa bínni Sikɛmu kànhe cibwɔhe taan,
kafaabwɔhe taan,
maa Abimelɛki tìŋɛ mà pyi pi saanŋi.
Yotamu bàtaage kani
7 Ɲyɛ,
Yotamu à yire lógo ke,
ka u u ŋkàrʼa sà dùgo Garizimu ɲaŋke ɲùɲcyage e,
maa jwo fànha na:
«Sikɛmu kànhe shiinbii,
kampyi yii la ɲyɛ Kile si lógo yii ɲwɔ na,
lire e ke,
yii lógo na ɲwɔ na.
8 Canŋka,
cirʼà bɛ̂ li na si saanwa tìŋɛ tiye ɲùŋɔ na.
Ka pi i jwo Oliviye cigʼá:
“Pyi wuu saanŋi.”
9 Ka Oliviye cige si pi ɲwɔ shwɔ maa jwo:
“Sìnmpe pu maha fwore mii i ke,
puru maha ɲjire taha Kile na,
maa ɲjire taha sùpyire na.
Yii la ɲyɛ mii u lire yaha,
si sà raa fyínge cire sannte ɲuŋʼi la?”
10 Ɲyɛ ka cire si ŋkàrʼa sà yi jwo fizhiye cigʼá:
“Ta ma a pa ntɛ̀ɛn wuu ɲùŋɔ na.”
11 Ka fizhiye cige si pi pyi:
“Ntàanŋi u ɲyɛ mii i,
ná yasɛɛre nintaanre mii maha seni ke,
yii la ɲyɛ mii i tire yaha,
si sà raa fyínge cire sannte ɲuŋʼi la?”
12 Ka cire si ŋkàrʼa sà yi jwo ɛrɛzɛn cigʼá:
“Ta ma a pa ntɛ̀ɛn wuu ɲùŋɔ na.”
13 Ka ɛrɛzɛn cige si pi pyi:
“Sinmpe nintanmpe pu maha fwore mii i ke,
puru maha Kile ná sùpyire funɲyi táan,
yii la ɲyɛ mii i lire yaha,
si sà raa fyínge cire sannte ɲuŋʼi la?”
14 Ɲyɛ ka cire puni si bɛ̂ li na maa ŋkàrʼa sà yi jwo ŋgure tahʼá:
“Ta ma a pa ntɛ̀ɛn wuu ɲùŋɔ na.”
15 Ka ŋgure taha si pi pyi:
“Ká mpyi sèe u ɲyɛ u wi na yii la ɲyɛ si mii tìŋɛ mpyi yii saanŋi,
yii pa ntɛ̀ɛn mii mbyimpe e.
Yii àha mpyi yii ɲyɛ a ɲɛɛ mɛ,
nage sí n-fworo mii ŋgure e si Liban Sediri cire súugo.” »
16 Ka Yotamu si pi pyi:
«Yii à Abimelɛki tìŋɛ mà pyi yii saanŋi,
ta yii à lire pyi sèeŋi ná ntìiŋi funŋke e?
Nde yii à pyi Yerubaali ná u pyɛngɛ shiinbii na ke,
lirʼà tíi la?
Nde u à pyi yii á ke,
ta yii à li cè ná u e?
17 Mii tuŋi à kàshige kwɔ̀n yii kurugo,
fo u múnaani mpyi mpuŋɔ na,
u à yii shwɔ Madiyani shiinbii na.
18 Ŋka niɲjaa,
yii pi à yîri mii tuŋi pyɛngɛ shiinbii kurugo,
yii à u jyaabii beetaanre ná kɛŋi (70) puni bò kafaaga niŋkin ɲuŋʼi.
Yii à u bilicwoŋi jyaŋi Abimelɛki tìŋɛ mà pyi Sikɛmu kànhe saanŋi,
mà lire ɲùŋke pyi yii ná uru na ɲyɛ cìnmpyii.
19 Ɲyɛ nde yii à pyi Yerubaali ná u pyɛnge shiinbii na ke,
kampyi yii à lire pyi sèeŋi ná ntìiŋi funŋke e,
lire e ke,
Abimelɛki u yii funɲyi ɲíŋɛ,
yii mú pi u funŋke ɲíŋɛ.
20 Ká mpyi lire bà mɛ,
nage ku fworo Abimelɛki i,
ku u Sikɛmu kànhe shiinbii ná Bɛti-Milo kànhe shiinbii puni súugo.
Nage kà mú ku fworo Sikɛmu kànhe shiinbii ná Bɛti-Milo shiinbilʼe ku Abimelɛki súugo.»
21 Lire kàntugo,
ka Yotamu si yîri wani u fyagara wuŋi,
maa fê a sà ŋwɔhɔ fo Bɛri i,
u cìnmpworonaŋi Abimelɛki yyaha na.
Sikɛmu shiinbilʼà yîri Abimelɛki kurugo
22 Abimelɛki à tɛ̀ɛn Izirayɛli ɲùŋɔ na yyee taanre funŋʼi.
23 Lire kàntugo ka Kile si mbèmbaaŋi le Abimelɛki ná Sikɛmu kànhe shiinbii shwɔhɔlʼe.
Ka pire si u ɲwɔhɔ yaha maa yîri u kurugo.
24 Kile à uru mbèmbaaŋi le pi shwɔhɔlʼe,
bà li si mpyi,
Abimelɛki à u sìɲɛɛbii,
Yerubaali jyaabii beetaanre ná kɛŋi (70) ŋgemu bò ke,
tire boore ŋkooŋi si wwû u ná Sikɛmu kànhe shiinbii na mɛ,
ɲaha kurugo yɛ,
pirʼà u tɛ̀gɛ tire boore na.
25 Ka Sikɛmu shiinbii si kuɲcyaanbii pìi pyi pi à ŋwɔhɔ ŋwɔhɔ ɲaɲyi ɲuŋʼi,
Sikɛmu kànhe taan.
Pire mpyi maha kuni cyáan kùsheebii na,
maa pi cyeyaayi shwuu pi na.
Ka wà si sà yire yyaha jwo Abimelɛki á.
26 Lire tèni i,
Ebɛdi jyaŋi Gali ná u cìnmpyiibii mpyi a sà ntɛ̀ɛn Sikɛmu kànhe e.
Gali kyaa mpyi a táan kànhe shiinbilʼá,
fo pi mpyi a pi sɔ̀nŋɔre taha u na.
27 Canŋka,
kànhe shiinbilʼà fworʼa kàre pi ɛrɛzɛn kooyi i,
ɛrɛzɛnŋi yasɛɛre takwɔnge e,
si mpa ti lwɔhɔ wwû mpyi ɛrɛzɛn sinmɛ.
Lire kàntugo ka pi i kataan nimbwoo pyi,
maa jyè pi kacyiinni bage e maa lyìmbwoo pyi maa bya sèlʼe maa jwumpimpe jwo Abimelɛki na.
28 Ka Ebɛdi jyaŋi Gali si jwo:
«Abimelɛki ɲyɛ ɲaha shi wuu Sikɛmu shiinbilʼá,
fo wuu wuye yaha u a ŋkɛ̂ɛnŋi yɛ?
Ɲaha na wuu à Abimelɛki yaha u à tɛ̀ɛn wuu ɲùŋɔ na,
mà li ta Yerubaali jya u ɲyɛ u wi yɛ?
U fànhafembwɔhe Zebuli u à lwɔ́ a pyi Sikɛmu kànhe yyaha yyére shinŋi.
Amori shiinbii fànhe na yii à yaa yii ɲɛɛ.
Amori u à Sikɛmu kànhe tìŋɛ.
Wuu ɲyɛ a sàa yaa wuu ɲɛɛ Abimelɛki u fànhe na mɛ.»
29 Ka Gali si núrʼa pi pyi:
«Yii aha Sikɛmu kànhe yyaha yyérete kan mii á,
mii sí Abimelɛki kɔ̀re si ɲjîrige fànhe na,
si yi jwo u á:
“Abimelɛki,
pìi bâra ma kàshikwɔɔnbii na,
maa mpa na tùn.” »
30 Puru jwumpe Ebɛdi jyaŋi Gali mpyi a jwo ke,
purʼà nɔ kànhe yyaha yyére shinŋi Zebuli na.
Ka u lùuni si yîri sèe sèlʼe.
31 Ka u u tùnntunmii ŋwɔhʼa tun Abimelɛki á pi sà yi jwo u á na:
«Ebɛdi jyaŋi Gali ná u cìnmpyiibilʼà pa Sikɛmu kànhe e,
maa sùpyire ɲùŋɔ kyánge mu na.
32 Lire e ke,
niɲjaa numpilage e,
mu ná ma shiinbii,
yii fworʼa sà ntɛ̀ɛn sige e pi mbà e.
33 Nùmpanŋa ɲyɛ̀ge na,
canŋaɲyiini tèefworoni i,
yii i mpâlʼa sà n-cwo kànhe na.
Gali ná u shiinbii ká fworo si mu tùn,
nde mu sí n-jà n-pyi pi na ke,
maa lire pyi.»
34 Ɲyɛ ka Abimelɛki ná u shiinbii si yîri numpilage e,
maa ŋkàrʼa sà ntɛ̀ɛn pi mbà e,
Sikɛmu kànhe ŋkère na.
Pi mpyi a piye táa mà pyi kuruɲwɔ sicyɛɛre.
35 Kuru canŋa nùmpanŋa ɲyɛ̀ge na,
ka Ebɛdi jyaŋi Gali si sà yyére kànhe tajyiɲwɔge na.
Lire tèni i,
ka Abimelɛki ná u shiinbii si mpâlʼa fworo pi mbàŋi i.
36 Gali à pi ɲya ke,
maa Zebuli pyi:
«Mii naha a sùpyire tà ɲya ti i ntîri ɲaɲyi na.»
Ka Zebuli si jwo:
«Ɲaɲyi nàɲjaabii mu ɲyɛ na ɲaa sùpyii fiige.»
37 Ka Gali si u pyi:
«Sèe wi dɛ,
sùpyire tà ti naha na ntîri ɲaɲyi na.
Kuni lʼà pa céepyiibii cibwɔhʼá ke,
kàshikwɔɔnbii piibɛrii naha na ma lire e.»
38 Ka Zebuli si jwo:
«Yàmpeente jwumpe mu mpyi na yu ke,
mu funŋʼà wwɔ̀ puru na la?
Taha mu bà u mpyi a jwo:
“Abimelɛki ɲyɛ ɲaha shi si ŋkwɔ̀ mpyi wuu ɲùŋɔ na yɛ?
Sùpyire mu mpyi na fare ke,
tire ti nte mu taan.
Yîri maa pi tùn numɛ.” »
39 Ka Gali si ntòro Sikɛmu kànhe shiinbii yyaha na,
si sà Abimelɛki tùn.
40 Ka Abimelɛki si Gali kɔ̀rɔ,
ka u u fê u yyaha na.
Ka Abimelɛki shiinbii si Sikɛmu kànhe shiinbii niɲyahamii bò mà jwo pi fê a nɔ kànhe tajyige na ke.
41 Lire kàntugo,
ka Abimelɛki si ŋkàrʼa sà ntɛ̀ɛn Aruma kànhe funŋke e.
Zebuli mpyi a Gali ná u cìnmpyiibii kɔ̀rʼa sige Sikɛmu kànhe na.
42 Ɲyɛ kuru canŋa nùmpanŋa,
ka Sikɛmu shiinbii si fworʼa kàre pi kɛrɛyi i.
Ka pi i sà yire yyaha jwo Abimelɛki à.
43 Ka u u u kàshikwɔɔnbii táa kuruyo taanre,
maa ŋkàrʼa sà ntɛ̀ɛn sige e pi mbà e.
Pi à sùpyire nivworore ɲya kànhe e ke,
ka pi i ntîn a fworo si sà pi tùn.
44 Ka Abimelɛki ná kàshikwɔɔnbii kuruŋke kà niŋkin si fê a kàrʼa sà yyére Sikɛmu kànhe tajyige e.
Ka kuruɲyi sanɲyi shuunniŋi si sà ɲcwo sùpyire na sige e.
45 Abimelɛki à Sikɛmu kànhe shiinbii tùn kuru canŋke canmpuni,
maa kànhe cû,
maa ku shiinbii bò,
maa kànhe jya,
maa suumpe wu pi taare cyeyi puni i.
46 Ɲyɛ,
Migidali-Sikɛmu shiinbilʼà yire lógo ke,
ka pi puni si ŋkàrʼa sà ŋwɔhɔ kacyiinni Baali-Beriti batɔɔnge ɲwɔhɔntaan babilini i.
47 Ka wà si sà yi jwo Abimelɛki á,
na Migidali-Sikɛmu shiinbii puni wa a sà bínni pi kacyiinni bage e.
48 Ka Abimelɛki si ŋkàre ná u kàshikwɔɔnbii puni i Zalimɔ ɲaŋke na.
U à kaciige lwɔ́ mà tɛ̀gʼa cige kà ŋkéŋɛ páan,
maa ku lwɔ́ a taha u fukange na,
maa kàshikwɔɔnbii pyi:
«Nde mii à pyi numɛ ke,
yii fyâlʼa lire fiige pyi.»
49 Ka pi shin maha shin si ŋkéŋɛ niŋkin kwɔ̀n maa ntaha Abimelɛki fye e.
Ka pi i sà cyire ciinŋkii le kacinmbage ɲwɔhʼi,
maa cyi yalʼa taanna bage na,
maa nage le cyi na si bage ná ku funŋɔ shiinbii puni súugo.
Lire kwùŋkanni na Migidali-Sikɛmu shiinbii punʼà kwû.
Pi mpyi a shiin kampwoo (1.000) kwɔ̀,
nàmbaabii ná cyeebii.
Abimelɛki kwùŋkanni
50 Lire kàntugo,
ka Abimelɛki si ŋkàre Tebɛsi kànhe tatunŋʼi.
U à kànhe mâhana maa ku cû.
51 Kàshisulu batɔɔnge ku mpyi kànhe niŋke e ke,
ka kànhe shiinbii puni si ŋkàrʼa sà ŋwɔhɔ kuru batɔɔnge e,
nàmbaabii bâra cyeebii na.
Pi mpyi a ku ɲwɔyi shwɔ̂hɔ piye na,
maa dùgʼa kàrʼa sà ntɛ̀ɛn fo ku ɲùɲcyage e.
52 Ka Abimelɛki si ŋkàrʼa sà nɔ fo batɔɔnge na,
maa ɲcwo ku na,
maa file ku ɲwɔge na si nage le ku na.
53 Ka ceeŋi wà si ntɛ̀ɛn batɔɔnge ɲùɲcyage e,
maa tiraga yahʼa tîge Abimelɛki ɲuŋʼi,
mà u ɲùŋke jya.
54 Ɲyɛ u kàshikwɔnyaayi mpyi nàɲjiiŋi ŋgemu cye e ke,
ka u u ntílʼa uru pyi:
«Ma ŋwɔɔni wwû maa na bò,
bà li si mpyi,
pi àha ŋkwɔ̀ ɲjwo na ceewe u à mii Abimelɛki bò mɛ.»
Ka nàɲjiiŋi si ŋwɔɔni tɛ̀gʼa u sú a fûru,
ka u u ŋkwû.
55 Izirayɛli shiinbilʼà Abimelɛki ɲya u à kwû ke,
ka pi shin maha shin si núrʼa kàre u pyɛnge e.
56 Lire pyiŋkanni na,
Kile à Abimelɛki kapiini fwooni tò u na,
u mpyi a lire ndemu pyi u tuŋi na,
u sìɲɛɛbii beetaanre ná kɛŋi (70) mbòŋi cye kurugo ke.
57 Sikɛmu shiinbii mpyi a kapiini ndemu pyi ke,
Kile a lire fwooni tò pi na mú.
Lire pyiŋkanni na Yerubaali jyaŋi Yotamu mpyi a laŋaŋke ŋkemu pyi ke,
kurʼà cwo pi na.