Tola à pyi Izirayɛli shiinbii yukyaaŋi
10
Abimelɛki kwùŋkwooni kàntugo,
Isakari tùluge shinŋi wà na mpyi wani,
u mɛgɛ mpyi Dodo.
Dodo jyaŋi mɛge ku mpyi Puwa ke,
ka uru jyaŋi Tola si yîri maa Izirayɛli shiinbii shwɔ pi zàmpɛɛnbii na.
U mpyi a tɛ̀ɛn Samiri kànhe e,
Efirayimu ɲaŋkuluni i.
2 U à pyi Izirayɛli shiinbii yukyaaŋi yyee beɲjaaga ná taanre (23) funŋʼi.
U à kwû ke,
ka pi i u tò Samiri kànhe e.
Yahiri à pyi Izirayɛli shiinbii yukyaaŋi
3 Tola kwùŋkwooni kàntugo,
Yahiri u à u fáa.
Uru mpyi na yîri Galadi kùluni i.
U à pyi Izirayɛli shiinbii yukyaaŋi yyee beɲjaaga ná shuunni (22) funŋʼi.
4 Pùnampyire beɲjaaga ná kɛ ti mpyi Yahiri á,
dùfaanŋa mpyi pi shin maha shin mɛgɛ na.
Pi mpyi kànyi beɲjaaga ná kɛ ɲùŋɔ na Galadi kùluni i.
Yahiri mɛge saha na ɲyɛ yire kànyi na ali niɲjaa.
5 Yahiri à kwû ke,
ka pi i u tò Kamɔni kànhe e.
Amoni shiinbilʼà Izirayɛli shiinbii tùn
6 Ka Izirayɛli shiinbii si núrʼa Kafooŋi kafuun pyi.
Pi à kacyanhigii Baali ná Asitariti sun,
mà bâra Siri shiinbii ná Sidɔn shiinbii ná Muwabu shiinbii ná Amoni shiinbii ná Filisi shiinbii kacyanhigii puni na.
Pi à kàntugo wà Kafooŋi á,
pi sàha mpyi na u pêre mɛ.
7 Ka Kafooŋi lùuni si yîri Izirayɛli shiinbii taan sèlʼe.
Ka u u pi le Filisi shiinbii ná Amoni shiinbii cye e.
8 Mà lwɔ́ lire yyeeni na,
Izirayɛli shiinbii pi mpyi Zhurudɛn baŋi canŋafyinmpe e,
Galadi kùluni i,
Amori kìni i ke,
ka Amoni shiinbii si pire pyi pi bilii.
Pi à pi yyahayi fwɔhɔrɔ sèlʼe yyee kɛ ná baataanre (18) funŋʼi.
9 Ka Amoni shiinbii si Zhurudɛn baŋi jyiile,
maa sà ɲcwo Zhuda tùluge shiinbii ná Bezhamɛ tùluge shiinbii ná Efirayimu tùluge shiinbii na mú.
Izirayɛli shiinbii mpyi yyefugo nimbwɔhʼe.
10 Ɲyɛ ka Izirayɛli shiinbii si mɛɛ wà Kafooŋi á na:
«Kafooŋi,
wuu à kapii pyi mu na,
ɲaha kurugo yɛ,
wuu à kàntugo wà wuu Kileŋi á,
maa kacyiinni Baali sunni.»
11 Ka Kafooŋi si Izirayɛli shiinbii ɲwɔ shwɔ maa jwo:
«Mii u à yii shwɔ Misira shiinbii ná Amori shiinbii ná Amoni shiinbii ná Filisi shiinbii
12 ná Sidɔn shiinbii ná Amalɛki shiinbii ná Mayɔn shiinbii na.
Tèni i pi mpyi na yii kyérege ke,
yii à mɛɛ wà mii á ke,
mii ɲyɛ a yii shwɔ pi na mà?
13 Lire ná li wuuni mú i,
yii à kàntugo wà mii na,
maa kilebii piibɛrii pêre.
Lire kurugo mii sàha sì yii shwɔ mɛ.
14 Kacyanhigii yii ɲyɛ na sunni ke,
yii cyire yyere cyi i mpa yii shwɔ yyefuge na numɛ.»
15 Ka Izirayɛli shiinbii si núrʼa Kafooŋi pyi:
«Wuu à kapii pyi mu na.
Nde lʼà táan mu á ke,
lire pyi wuu na,
ŋka,
náaŋa maa wuu shwɔ niɲjaa.»
16 Ɲyɛ supyishiŋi sanŋi shiinbii kacyanhigii cyi mpyi pi á ke,
ka pi i cyire wà,
maa núru na Kafooŋi pêre.
Izirayɛli shiinbii kyaage kurugo,
ka Kafooŋi si pi ɲùɲaara ta.
17 Ɲyɛ ka Amoni shiinbii si mpa bínni Galadi kùluni i kàshige mɛɛ na.
Ka Izirayɛli shiinbii mú si piye bínni Misipa e kàshige mɛɛ na.
18 Izirayɛli shiinbii pi mpyi a tɛ̀ɛn Galadi kùluni i ke,
ka pire ná pi yyaha yyére shiinbii si jwo piyʼá:
«Jo u sí n-tòro wuu yyaha na,
wuu u sà Amoni shiinbii tùn yɛ?
Nɔ̀ maha nɔ̀ u à jà a lire pyi ke,
uru u sí n-pyi Galadi shiinbii puni ɲùŋufooŋi.»