Zɛfite à pyi Izirayɛli shiinbii yukyaaŋi
11
Ɲyɛ kàshikwɔnmpege kà na mpyi wani,
ku mɛgɛ mpyi Zɛfite.
U tuŋi mɛgɛ mpyi Galadi,
Galadi mpyi a Zɛfite si fwòrobacwoŋi wà na.
2 Ceeŋi Galadi mpyi a lèŋɛ ke,
uru mú mpyi a pùnampyire si.
Tirʼà pa lyɛ ke,
ka tire si Zɛfite kɔ̀rɔ.
Pi à u pyi:
«Mu nàzhan ɲyɛ wuu tuŋi kɔɔge e mɛ,
ɲaha kurugo yɛ,
ceeŋi wabɛrɛ u pyà u ɲyɛ mu.»
3 Ka Zɛfite si fê a yîri u cìnmpyiibii taan,
maa sà ntɛ̀ɛn Tobu kùluni i.
Ka supyikuuyi yà si sà bínni u taan,
u ná yire mpyi maha ɲaare cyeyi yyaha kurugo maa ɲcwo sùpyire na.
4 Ɲyɛ tèrʼà tòro ke,
ka Amoni shiinbii si mpa Izirayɛli shiinbii tùn.
5 Amoni shiinbilʼà pa Izirayɛli shiinbii tùn ke,
ka Galadi shiinbii kacwɔnribii si ŋkàre Zɛfite fye e Tobu kùluni i.
6 Pi à sà u pyi:
«Ta ma a pa wuu kàshikwɔɔnbii kuruɲyi yyaha cû,
wuu u sà Amoni shiinbii tùn.»
7 Ka Zɛfite si pi pyi:
«Yii à mii kyaa pɛn yiyʼá,
maa mii kɔ̀rʼa yige na tuŋi pyɛnge e.
Yyefugʼà nɔ yii na numɛ ke,
ɲaha na yii à pa mii fye e yɛ?»
8 Ka Galadi shiinbii kacwɔnribii si u pyi:
«Wuu à núrʼa pa mu á numɛ,
ta ma ná wuu e,
maa mpa Amoni shiinbii tùn.
Wuu si mu pyi wuu ɲùŋufooŋi,
mu sí mpyi Galadi kùluni puni ɲùŋɔ na.»
9 Ka Zɛfite si pi pyi:
«Yii aha mii pyi mii à sà Amoni shiinbii tùn,
ka Kafooŋi si mii pyi mii à jà pi na,
mii u sí n-pyi yii ɲùŋufooŋi.»
10 Ka Galadi shiinbii kacwɔnribii si u pyi:
«Nde mu à jwo ke,
wuu aha mpyi wuu ɲyɛ a lire pyi mɛ,
Kafooŋi ɲyii ɲyɛ wuu na.»
11 Ɲyɛ ka Zɛfite si ŋkàre ná Galadi shiinbii kacwɔnrɔbilʼe.
Ka pi i u tìŋɛ mà pyi pi kàshikwɔɔnbii kuruɲyi puni ɲùŋufooŋi ná yi yyaha yyére shinŋi.
Pi ná Zɛfite mpyi a bɛ̂ ɲjemu na ke,
ka Zɛfite si yire puni jwo Kafooŋi yyahe taan Misipa kànhe e.
Zɛfite à tùnntunmii tùn Amoni shiinbii saanŋʼá
12 Ka Zɛfite si tùnntunmii tun Amoni shiinbii saanŋʼá,
maa jwo:
«Ɲaha kʼà jyè wuu ná mu shwɔhɔlʼe,
fo yii à pa mpa wuu kìni tùn yɛ?»
13 Ka Amoni saanŋi si Zɛfite tùnntunmpii pyi:
«Mii la ɲyɛ si yii tùn,
ɲaha kurugo yɛ,
Izirayɛli shiinbilʼà fworo Misira kìni i ke,
pi à mii kìni kàmpanŋke kà shwɔ mii na,
mà lwɔ́ Arinɔ dùge cyage na,
mà sà nɔ fo Yabɔki dùge na,
maa ŋkàrʼa sà nɔ fo Zhurudɛn bafage na.
Mii la ɲyɛ yii i yire cyeyi kan na á,
yii aha ku yaha ku nɔ kàshi na mɛ.»
14 Ɲyɛ ka Zɛfite si núrʼa tùnntunmpii pìi tun Amoni shiinbii saanŋʼá,
15 pi sà yi jwo u á na Zɛfite à jwo:
«Izirayɛli shiinbii ɲyɛ a Muwabu shiinbii taare shwɔ pi na mɛ,
pi mú ɲyɛ a Amoni shiinbii taare shwɔ pi na mɛ.
16 Ɲaha kurugo yɛ,
tèni i Izirayɛli shiinbilʼà fworo Misira kìni i ke,
síwage e pi à tòro mà kàre Suumpe Lwɔhe Niɲyage cyage e,
fo mà sà nɔ Kadɛsi i.
17 Ɲyɛ ka Izirayɛli shiinbii si tùnntunmii tun pi sà yi jwo Edɔmu shiinbii saanŋʼá na:
“Maye sanŋa yaha maa wuu yaha wuu tòro mu kìni i.”
Ŋka Edɔmu shiinbii saanŋi ɲyɛ a ɲɛɛ mɛ.
Pi à tùnntunmpii pìi tun Muwabu shiinbii saanŋʼá mú,
ka uru si ɲcyé mú.
Ka Izirayɛli shiinbii si ntɛ̀ɛn Kadɛsi kùluni i.
18 Lire kàntugo ka Izirayɛli shiinbii si ntòro ná ɲani i síwage funŋke e,
maa ntòro Edɔmu kìni ná Muwabu kìni ŋkère na.
Pi à sà nɔ Muwabu kìni canŋafyinmpe e ke,
ka pi i pi vàanɲyi bayi kwòro kwòro Arinɔ dùge kàntugo,
pi ɲyɛ a jyè Muwabu kìni i mɛ,
ɲaha kurugo yɛ,
Arinɔ dùge ku mpyi Muwabu kìni tɛgɛni.
19 Ɲyɛ ka Izirayɛli shiinbii si tùnntunmii tun Amori shiinbii saanŋi Siyɔn á,
uru mpyi a tɛ̀ɛn Ɛsibɔn kànhe e,
maa u pyi:
“Wuu yaha wuu tòro ma kìni i wuu a sì wuu tashage e.”
20 Ŋka saanŋi Siyɔn mpyi a dá Izirayɛli shiinbii na si pi yaha pi tòro u kìni i mɛ.
Ka u u u kàshikwɔɔnbii puni wà piye na Yahasi kànhe e,
maa Izirayɛli shiinbii tùn.
21 Ŋka Kafooŋi,
Izirayɛli u Kileŋi à saanŋi Siyɔn ná u kàshicyɛge le Izirayɛli shiinbii cye e,
ka pire si jà pi na.
Amori shiinbii kìni cyage ku mpyi kuru kàmpanŋke na ke,
ka Izirayɛli shiinbii si kuru puni cû.
22 Mà lwɔ́ Arinɔ dùge na,
mà sà nɔ fo Yabɔki dùge na,
maa lwɔ́ síwage na,
mà sà nɔ Zhurudɛn baŋi na,
Izirayɛli shiinbilʼà yire cyeyi puni shwɔ Amori shiinbii na.
23 Ɲyɛ,
ná Kafooŋi Izirayɛli u Kileŋi à Amori shiinbii kɔ̀rɔ,
maa pi kìni kan u shiinbii Izirayɛli shiinbilʼá,
lire e ke,
mu la ɲyɛ si núru mpyi lire kìni foo la?
24 Kìni mu kileŋi Kemɔsi à kan mu á ke,
lire puni ɲyɛ mu cye e mà?
Ɲyɛ,
Kafooŋi wuu Kileŋi mú ká cyaga maha cyaga kan wuu á ke,
kuru mú à yaa ku pyi wuu wogo.
25 Lire e ke,
Sipɔri jyaŋi Balaki u mpyi Muwabu saanŋi ke,
taha mu à pwɔ́rɔ uru na?
Urʼà têlʼa jwumɔ dìri ná Izirayɛli shiinbilʼe,
lire ɲyɛ mɛ,
mà pi tùn la?
26 Cyi yyee ŋkwuu taanre (300) u ɲyɛ ŋge Izirayɛli à tɛ̀ɛn Ɛsibɔn ná u kwùumpe kànyi ná Arowɛri ná u kwùumpe kànyi ná kànyi puni yi ɲyɛ Arinɔ dùge ɲwɔge na ke,
ɲaha kurugo yii à pi yaha pi à lire tèni puni pyi,
mà ta yii ɲyɛ a pi kɔ̀rʼa yɛ?
27 Wuu kɔni ɲyɛ a yafyin pyi yii na mɛ,
yii pi ɲyɛ ɲcɛ̀ɛgɛfeebii,
ɲaha kurugo yɛ,
yii la ɲyɛ si wuu tùn.
Kafooŋi u ɲyɛ yukyaaŋi ke,
uru u yoge kyaala wuu Izirayɛli shiinbii ná yii Amoni shiinbii shwɔhɔlʼe niɲjaa.»
28 Ɲyɛ,
tùnntunmpii Zɛfite mpyi a tun Amoni shiinbii saanŋʼá ke,
u ɲyɛ ɲɛnʼa lógo pire ɲwɔ na mɛ.
Zɛfite ɲwɔfaage kani
29 Ka Kafooŋi Múnaani si ntîge Zɛfite na.
Ka u u Galadi kùluni ná Manase kùluni jyiile,
lire kàntugo,
u à kàre Misipa kànhe e Galadi kùluni i,
maa yîri wani mà kàre Amoni shiinbii mɛɛ na.
30 Ka Zɛfite si ɲwɔfaaga fáa Kafooŋi á,
maa jwo:
«Mu aha sàa mii pyi mii à jà Amoni shiinbii na,
31 mii ninuruŋi mà yîri kàshige cyage e,
shincyiiŋi u sí n-fworo mii pyɛnge e,
si mii ɲùŋɔ bɛ̂ ke,
mii sí uru yaha mu Kafooŋi yahare e,
si u pyi sáraga nizogogo mu á.»
32 Ɲyɛ ka Zɛfite si ŋkàrʼa sà Amoni shiinbii tùn,
ka Kafooŋi si u pyi u à jà pi na.
33 U à Amoni shiinbii puni kakyara,
mà lwɔ́ Arowɛri kànhe na,
mà sà nɔ Miniti ná u kwùumpe kànyi na.
Kànya beɲjaaga yi mpyi kuru cyage e,
u à yire puni cû,
maa ŋkàrʼa sà nɔ fo Abɛli-Keramimu kànhe na.
Ka Amoni shiinbii si mpyi Izirayɛli shiinbii fànhe ɲwɔhʼi.
34 Ɲyɛ,
Zɛfite niɲjyiriŋi kàshige cyage e na ŋkɛ̀ɛge pyɛngɛ,
Misipa e,
u à pâlʼa u pworoŋi nimpaŋi ɲya u u ŋkwɔ̂hɔli na u ɲùŋɔ bêni ná pìnɲyi i.
Uru kanni u mpyi pyà Zɛfite á,
pùnambile mpyi u à mɛ,
pworofooŋi wà sàha mpyi u á mɛ.
35 Zɛfite à u ɲya ke,
ka nàvunŋke si u pyi u à u vàanɲyi cwɔn,
maa jwo:
«Ei!
Na pworo,
mu à kawaa nɔ mii na dɛ!
Mu yabiliŋi u à nàvunŋke pyi kʼà nɔ mii na niɲjaa.
Mii à ɲwɔfaaga fáa Kafooŋi á,
mii sì n-jà n-pyi ná mii ɲyɛ a ku wwû mɛ.»
36 Ka pworofooŋi si u pyi:
«Ká mpyi ɲwɔfaaga mu à fáa Kafooŋi á,
nde mu à jwo u á ke,
lire pyi na na,
ɲaha kurugo yɛ,
Kafooŋi à mu nàvunŋɔ kwɔ̀ mu zàmpɛɛnbii Amoni shiinbii na.»
37 Ka u u núrʼa tufooŋi pyi:
«Mii sí kyaa niŋkin cya mu á.
Yiɲyɛ shuunni kan na á,
si sà ɲaara ná na shɛ̀rɛfeebilʼe ɲaɲyi ɲuŋʼi si mɛɛ sú,
ɲaha kurugo yɛ,
mii nivurumbaaŋi u sí n-kwû.»
38 Ka tufooŋi si u pyi:
«Ta sì.»
Ka u u u yaha uyʼá yiɲyi shuunni funŋʼi.
Ka u u ŋkàre ná u shɛ̀rɛfeebilʼe mà sà a ɲaare ɲaɲyi shwɔhɔlʼe maa mɛɛ súu,
na uru sí n-kwû mà ta uru ɲyɛ a fúru mɛ.
39 Yiɲyi shuunniŋʼà fûnŋɔ ke,
ka u u núrʼa pa tufooŋi yyére.
Ɲwɔfaage uru mpyi a fáa ke,
ka uru si kuru fûnŋɔ mà yyaha tíi ná pworofooŋi i.
U mpyi a nɔ̀ cè mɛ.
Ka lire si mpyi kalyee Izirayɛli shiinbilʼá.
40 Yyee maha yyee,
Izirayɛli shiinbii pùcempyire maha fworʼa sà canmpyaa sicyɛɛre pyi,
si piye funŋɔ cwo Galadi shinŋi Zɛfite pworoŋi na.