Efirayimu shiinbii ná Zɛfite kàshige
12
Ka Efirayimu tùluge shiinbii si piye bínni maa ŋkàre Safoni kànhe e,
maa Zɛfite pyi:
«Ɲaha na mu à sà Amoni shiinbii tùn,
mu sí ɲyɛ a wuu yyerʼa bâra maye na mà yɛ?
Wuu sí mu ná ma bage súugo.»
2 Ka Zɛfite si pi pyi:
«Mii ná na shiinbii mpyi kàshibwɔhɔ na,
ná Amoni shiinbilʼe.
Wuu à yii yyere yii pa wuu tɛ̀gɛ,
ŋka yii wà ɲyɛ a ɲɛnʼa fworʼa pa cye le wuu á mɛ.
3 Tèni i mii à li ɲya na yii sì n-pa mii tɛ̀gɛ mɛ,
ka mii i na múnaani dùrugo mpuŋɔ na,
maa ŋkàrʼa sà Amoni shiinbii tùn,
mii ná na shiinbii.
Ka Kafooŋi si mii yaha mii à jà pi na.
Ɲyɛ numɛ,
ɲaha kurugo yii à pa,
si mii tùn yɛ?»
4 Ka Zɛfite si Galadi shiinbii nàmbaabii puni wà piye na,
maa Efirayimu shiinbii tùn maa jà pi na.
Pire pi mpyi maha ŋko:
«Yii Galadi shiinbii ɲyɛ yafyin mɛ,
yii a fê a yîri Efirayimu shiinbii yyére,
maa ŋkàre Manase shiinbii yyére.»
5 Cyeyi i tɔɔrɔfeebii mpyi maha Zhurudɛn baŋi jyiili na ŋkɛ̀ɛge Efirayimu shiinbii kùluni i ke,
ka Galadi shiinbii si sà yire puni cû,
maa kuni kwɔ̀n pi na.
Efirayimu shinŋi wà ná mpyi a fê a sà nɔ baŋi tajyiige kà na,
maa jwo:
«Yii na yaha si ntòro,»
Galadi shiinbii maha u pyi:
«Efirayimu shin bà u ɲyɛ mu mà?»
U aha jwo:
«ɔnhɔn,»
6 pi maha u pyi u jwo:
«Shibolɛti».
U asi jwo:
«Sibolɛti»,
ɲaha kurugo yɛ,
Efirayimu shiinbii mpyi na jà a lire jwumbilini jwo Galadi shiinbii jwuŋkanni na mɛ.
Pi mpyi maha uru cû maa u bò Zhurudɛn baŋi tajyilige e.
Pi à nàmbaa kampwɔhii beeshuunni ná shuunni (42.000) bò Efirayimu shiinbilʼe lire tèni i.
7 Galadi shinŋi Zɛfite à pyi Izirayɛli shiinbii yukyaaŋi yyee baani (6) funŋʼi.
Lire kàntugo ka Zɛfite si ŋkwû,
ka pi i u tò Galadi shiinbii kànhe kʼe.
Yukyaabii pi à tɛ̀ɛn Zɛfite kàntugo Izirayɛli shiinbii ɲùŋɔ na ke
8 Ɲyɛ Zɛfite kwùŋkwooni kàntugo,
Ibizan u à pyi Izirayɛli shiinbii yukyaaŋi.
Uru mpyi na yîri Bɛtilɛhɛmu kànhe e.
9 Pùnampyire beɲjaaga ná kɛ,
ná pùceepyire beɲjaaga ná kɛ ti mpyi u à.
U à u pworobii kan nàmbayi i supyishiŋi wabɛrʼá,
maa cyeebii pìi cya supyishiŋi wabɛrʼá mà kan u jyaabilʼá.
U à pyi Izirayɛli shiinbii yukyaaŋi yyee baashuunni (7) funŋʼi.
10 Lire kàntugo Ibizan à kwû,
ka pi i u tò Bɛtilɛhɛmu kànhe e.
11 Lire kàntugo Elɔn u à pyi Izirayɛli shiinbii yukyaaŋi.
Zabulɔn tùluge shin u mpyi u wi.
Urʼà pyi Izirayɛli shiinbii yukyaaŋi yyee kɛ funŋʼi.
12 Lire kàntugo Zabulɔn shinŋi Elɔn à kwû,
ka pi i u tò Ayalɔn kànhe e,
Zabulɔn shiinbii taare e.
13 Uru kàntugo,
Ilɛli jyaŋi Abidɔn u à pyi Izirayɛli shiinbii yukyaaŋi.
U mpyi na yîri Piratɔn kànhe e.
14 Pùnampyire beeshuunni,
ná ɲampyire nàmbaa beɲjaaga ná kɛ mpyi u á.
Dùfaanŋa niŋkin mpyi pi shin maha shin á ɲani kurugo.
Abidɔn à pyi Izirayɛli shiinbii yukyaaŋi yyee baataanre (8) funŋʼi.
15 Lire kàntugo Piratɔn shinŋi Ilɛli jyaŋi Abidɔn à kwû.
Ka pi i u tò Piratɔn kànhe e Amalɛki shiinbii ɲaŋkuluni i,
Efirayimu tùluge shiinbii taare e.