Samusɔn ziŋi kani
13
Ka Izirayɛli shiinbii si núrʼa Kafooŋi kafuun pyi sahaŋki.
Ka Kafooŋi si pi le Filisi shiinbii fànhe ɲwɔhʼi yyee beeshuunni funŋʼi.
2 Nàŋi wà na mpyi Zoreya kànhe e,
u mɛgɛ mpyi Manoya,
Dan tùluge shin u mpyi u wi.
U cwoŋi mpyi cijiriŋɛ,
u mpyi a pyà si a ɲya mɛ.
3 Canŋka,
ka Kafooŋi mɛ̀lɛkɛŋi si fworo ceeŋʼá,
maa u pyi:
«Mu na ɲyɛ cijiriŋɛ,
maa mpyi pyà bàa.
Ŋka mu sí n-pa laa ta si pùnambili si.
4 Mà lwɔ́ numɛ na,
yaha maye na,
ma hà ɛrɛzɛn sinmɛ lire ɲyɛ mɛ,
sinmpe kuuge kà tufiige bya mɛ.
Ma hà yafunge kà tufiige lyî mɛ.
5 Ɲaha kurugo yɛ,
mu sí n-pa laa ta si pùnambili si.
Ɲùŋkulu yaaga ɲyɛ a sàa yaa ku jyè u ɲùŋke e mɛ,
ɲaha kurugo yɛ,
u sí n-pyi naziriyɛn si mpyi Kile yahare e tèrigii puni i ali mà u yaha zimbaa.
Uru u sí li ɲwɔ cû raa Izirayɛli shiinbii shwuu Filisi shiinbii na.»
6 Ɲyɛ ka ceeŋi si ŋkàrʼa sà u pooŋi pyi:
«Kile sùpyaŋi wà a fworo mii á,
u mpyi mu à jwo Kile mɛ̀lɛkɛ,
mii mpyi a fyá u na sèlʼe.
Mii ɲyɛ a u yíbe u tayirige na mɛ,
u mú ɲyɛ a u mɛge cyêe mii na mɛ.
7 U à jwo mii á,
na mii sí n-pa laa ta si pùnambili si,
na mii àha ɛrɛzɛn sinmɛ,
lire ɲyɛ mɛ,
sinmpe kuuge kà tufiige bya mɛ,
na mii àha yafunge kà tufiige lyî mɛ,
ɲaha kurugo yɛ,
pyàŋi sí n-pyi naziriyɛn,
si mpyi Kile yahare e,
mà u yaha zimbaa fo mà sà nɔ u canŋkwuge na.»
8 Ka Manoya si Kafooŋi ɲáare na:
«Kafooŋi,
mii na mu ɲáare,
Kile sùpyaŋi mu mpyi a tun ke,
u yaha u núrʼa fworo wuu á.
Pyàŋi u sí n-pa si ke,
nde wuu à yaa wuu pyi mà yyaha tíi ná u e ke,
u u lire jwo wuu á.»
9 Ka Kile si Manoya ɲarege shwɔ.
Canŋka Kile mɛ̀lɛkɛŋi à fworo ceeŋi á sahaŋki.
Lirʼà ceeŋi nintɛɛnŋi ta kɛrɛge e,
u pooŋi Manoya mpyi ná u e mɛ.
10 Ka u u fê a kàrʼa sà yi jwo u pooŋʼá:
«Wíi,
nàŋi u mpyi a pa mii yyére kuru canŋke ke,
u à núrʼa fworo mii yyaha na.»
11 Ka Manoya si ntílʼa yîrʼa taha u cwoŋi fye e,
mà kàre nàŋi cyage e maa u pyi:
«Mu u à jwo ná mii cwoŋi i la?»
Ka nàŋi si jwo:
«Ɔɔn,
mii wi.»
12 Ka Manoya si núrʼa u pyi:
«Ɲyɛ mu jwumpe ká ntòro pu jwuŋkanni na,
ɲaha wuu à yaa wuu pyi mà yyaha tíi ná pyàŋi i yɛ?
Pyàŋi yyeshempe ná u nimpyiini sí n-pyi ndi yɛ?»
13 Ka Kafooŋi mɛ̀lɛkɛŋi si Manoya ɲwɔ shwɔ maa jwo:
«Jwumpe puni mii à jwo mu cwoŋi á ke,
u à yaa u à puru puni kurigii ɲaare.
14 Yaaga maha yaaga kʼà yaa ná ɛrɛzɛnŋi yasɛɛre e ke,
u àha kuru kà lyî mɛ,
u àha ɛrɛzɛn sinmɛ bya mɛ,
u àha sinmpe kuuge kà tufiige bya mɛ,
u àha yafunge kà tufiige lyî mɛ.
Karigii puni mii à jwo u á ke,
u à yaa u cyire puni kurigii ɲaara.»
15 Ka Manoya si Kafooŋi mɛ̀lɛkɛŋi pyi:
«Maye sanŋa yaha maa wuu sige wuu u sà sikabili shwɔhʼa pa ŋkan mu á.»
16 Ka Kafooŋi Mɛ̀lɛkɛŋi si u pyi:
«Mii mɛɛ ká mu sige,
mii sì mu ɲjyìŋi lyî mɛ.
Ŋka kampyi mu sí ɲɛɛ,
sáraga nizogogo wwû Kafooŋi á.»
Manoya mpyi a cè na Kafooŋi mɛ̀lɛkɛŋi wi mɛ.
17 Ka Manoya si Kafooŋi Mɛ̀lɛkɛŋi pyi:
«Ma mɛge jwo wuu á.
Lire e,
nde mu à jwo ke,
lire ká ntòro li jwuŋkanni na,
wuu sí n-pa mu pêe.»
18 Ka Kafooŋi Mɛ̀lɛkɛŋi si u pyi:
«Ɲaha na mu ɲyɛ na mii mɛge yíbili yɛ?
Kʼà cûgo.»
19 Ka Manoya si sikabilini cû,
ná sùmaŋi sárage ku mpyi a yaa ku bâra sárage nizogoge na ke,
maa yire pyi sáraga Kafooŋi á kafaage kà na.
Mà Manoya ná u cwoŋi yaha pi i wíi,
Mɛ̀lɛkɛŋi à kakyanhala kani là pyi.
20 Nage pi mpyi a le sárayi tawwuge na ke,
tèni i kuru mpyi na ɲî na dùru nìɲyiŋi i ke,
Kafooŋi Mɛ̀lɛkɛŋi à dùgo naɲiŋke e pi ɲyii na.
Manoya ná u cwoŋi à lire ɲya ke,
ka pi i ɲcwo ɲìŋke na,
maa yyahayi cyígile.
21 Kafooŋi Mɛ̀lɛkɛŋi ɲyɛ a fworo Manoya ná u cwoŋi á sahaŋki mɛ.
Ka Manoya si li cè na Kafooŋi Mɛ̀lɛkɛŋi u mpyi u wi.
22 Ka Manoya si u cwoŋi pyi:
«Wuu sí n-sìi nde kàŋkwuuni kwû,
ɲaha kurugo yɛ,
wuu à Kile ɲya.»
23 Ka u cwoŋi si u pyi:
«Ká mpyi Kafooŋi la mpyi si wuu bò,
u mpyi na sí ɲɛɛ wuu sárage nizogoge ná wuu sùmaŋi sárage na mɛ,
u mpyi sí ɲcyii karigii puni cyêe wuu na,
si mpe jwumpe puni jwo wuu á mɛ.»