Samusɔn ná Filisi shiinbii pworoŋi kani
14
Canŋka Samusɔn à kàre Timina kànhe e,
maa Filisi shiinbii pworoŋi wà ɲya.
2 U à núrʼa kàre pyɛnge e ke,
maa sà u tuŋi ná u nuŋi pyi:
«Mii à Filisi shiinbii pworoŋi wà ɲya Timina kànhe e,
u kyalʼà táan mii á,
yii sà u cya na á.»
3 Ka u tuŋi ná u nuŋi si u pyi:
«Taha cyee ɲyɛ wuu tùluge ná wuu kìni tùluyi sanɲyi i,
ka mu u ŋkàrʼa sà a ceewe caa Filisi shiinbii niŋkwɔnmbaabii pùcempyire shwɔhɔlʼe mɛ?»
Ka Samusɔn si u tuŋi pyi:
«Yii sà u cya na á,
u kyalʼà táan mii á.»
4 Ŋka u tuŋi ná u nuŋi mpyi a cè na lire kani à fworo Kafooŋi i mɛ.
Kafooŋi mpyi na pyiŋkanna caa si Filisi shiinbii tùn,
ɲaha kurugo yɛ,
Izirayɛli shiinbii mpyi Filisi shiinbii fànhe ɲwɔhʼi lire tèni i.
5 Ka Samusɔn si ŋkàre ná u tuŋi ná u nuŋi i Timina kànhe e.
Mà pi niŋkaribii yaha,
ka Samusɔn si wâlʼa jyè Timina shiinbii ɛrɛzɛn kooyi i.
Ka cànrayaaga si mpâlʼa fworo u á,
maa ŋkwòore u kurugo.
6 Ka Kafooŋi Múnaani si ntîge Samusɔn na ná fànhe e,
ka u cyeŋgaya wuŋi si cànrage bò bà wà maha sikabili pyi mɛ.
Ŋka u ɲyɛ a lire kani jwo u tuŋi ná u nuŋi á mɛ.
7 Lire kàntugo,
ka Samusɔn si ŋkàrʼa sà jwo ná pùcwoŋi i,
u kyaa mpyi a táan u á sèlʼe.
8 Tèrʼà tòro ke,
ka Samusɔn si núrʼa kàre si pùcwoŋi cikwɔɔnre pyi.
Mà u yaha kuni na,
ka u u wâa si cànrakwuge wíi,
mà sà sìmurujwoo ta lʼà sɛɛre yaa cànrakwuge seewage funŋke e.
9 Ka u u tire sɛɛre wwû,
maa tà lyî kuni na,
na wà.
U à sà nɔ u tuŋi ná u nuŋi cyage e ke,
ka u u tà kan pi á.
Ŋka u ɲyɛ a yi jwo pi á na urʼà ti wwû cànrakwuge seewage funŋke e mɛ.
10 Ka Samusɔn tuŋi si ŋkàre pùcwoŋi shiinbii yyére,
maa cikwɔɔnre karigii cwɔɔnrɔ.
Ka Samusɔn si kataan nimbwoo pyi,
bà nàɲjiibii maha ntêe na li pyi mɛ.
11 Filisi shiinbilʼà u ɲya ke,
ka pire si nàɲjyii beɲjaaga ná kɛ cwɔɔnrʼa pyi u wwoɲɛɛ,
ka pire si mpyi ná u e.
12 Ka Samusɔn si nàɲjiibii pyi:
«Mii sí tàalinɛ jwo yii á,
yii aha jà a li ɲwɔhe cè a jwo mii á,
kataanni canmpyaagii baashuunniŋi funŋke e,
mii sí vàantinmpyɛrɛ beɲjaaga ná kɛ ná vàantinmbwoyo beɲjaaga ná kɛ kan yii á.
13 Ŋka yii àha mpyi yii ɲyɛ a jà a li ɲwɔhe cè a jwo mii á mɛ,
yii pi sí vàantinmpyɛɛre beɲjaaga na kɛŋi,
ná vàantinmbwoyi beɲjaaga ná kɛŋi kan mii á.»
Ka pi i u pyi:
«Ma tàanlini jwo wuu u li lógo.»
14 Ka u u pi pyi:
«Yalyigʼà fworo lyìlyiŋi funŋke e,
yalyige kʼà pôo ke,
kurʼà fworo fànha yaage funŋke e.»
Nàɲjyiibilʼà canmpyaa taanre pyi,
pi ɲyɛ a jà a tàanlini ɲwɔhe jwo mɛ.
15 Kataanni canmpyi sicyɛrɛ wuuni,
ka pi i Samusɔn cwoŋi pyi:
«Ma pooŋi fɔ̀ɔnŋɔ u u tàanlini ɲwɔhe jwo,
ma pa jwo wuu á,
lire baare e,
wuu sí mu ná ma pyɛngɛ shiinbii súugo.
Yii à wuu yyere yii cikwɔɔnre na si wuu cyeyaayi puni shwɔ wuu na kɛ?»
16 Ka Samusɔn cwoŋi mɛɛsuwuŋi si sà u pooŋi pyi:
«Mii kyaa ɲyɛ a táan mu á mɛ,
mii kyalʼà pɛn mu á.
Mu à tàalinɛ jwo mii shiinbilʼá,
mu sí ɲyɛ a li ɲwɔhe jwo mii á mɛ!»
Ka Samusɔn si u pyi:
«Mii ɲyɛ a nde tàanlini ɲwɔhe jwo ali na sifeebilʼá mɛ,
ɲaha na mii sí li ɲwɔhe jwo mu á yɛ?»
17 Ka ceeŋi si wá na mɛɛsuu kataanni canmpyaagii baashuunniŋi funŋke e.
U à Samusɔn yyaha fwɔhɔrɔ sèlʼe.
Canmpyibaashwɔnwuuni i,
ka Samusɔn si tàanlini ɲwɔhe jwo u á.
Ka u u fyâlʼa sà li ɲwɔhe jwo u shiinbilʼá.
18 Kataanni canmpyi baashwɔnwuuni i,
mà jwo canŋaɲyiini li cwo ke,
ka nàɲjiibii si mpa Samusɔn pyi:
«Ɲaha kʼà táannʼa sɛrɛ kwɔ̀ yɛ?
Yaage ŋki fànha kʼà ɲyahʼa cànrage woge kwɔ̀ yɛ?»
Ka Samusɔn si pi pyi:
«Ká mpyi yii mpyi a mii nùpyaŋi tɛ̀gʼa yii nùtuuge dìri mɛ,
yii mpyi na sì tàanlini ɲwɔhe cè mɛ.»
19 Ɲyɛ ka Kafooŋi Múnaani si ntîge Samusɔn na ná fànhe,
ka u u ŋkàre Asikalɔn kànhe e,
maa nàmbaa beɲjaaga ná kɛ bò,
maa pire vàanɲyi lwɔ́ a sà ŋkan kànhe nàɲjyiibilʼá,
ɲaha kurugo yɛ,
pi à tàanlini ɲwɔhe jwo.
Lire kàntugo,
ka u lùyiriwuŋi si núrʼa kàre u tupyɛnge e.
20 Kànhe nàɲjiiŋi u mpyi Samusɔn cevooŋi cikwɔɔnre canmpyaagilʼe ke,
ka pi i u cwoŋi kan urʼá.