Samusɔn à nàvunŋɔ kwɔ̀ Filisi shiinbii na
15
Ɲyɛ,
tèrʼà tòro ke,
sùmakwɔɔngii tèni i,
ka Samusɔn si ŋkàrʼa sà fworo u cwoŋi na,
ná sika bile e.
U à sà nɔ wani ke,
maa jwo:
«Mii la ɲyɛ si jyè na cwoŋi kurugo bage e.»
Ŋka ceeŋi tuŋi ɲyɛ a ɲɛnʼa u yaha u à jyè mɛ,
2 maa u pyi:
«Mii mpyi na sɔ̂nŋi na mu sàha ɲyɛ na ɲcáa u na mɛ,
lire kurugo mii à u kan mu cevooŋʼá.
Maye sanŋa yaha maa u kàntugo wuŋi lwɔ́ u cyaga,
uru lemɛ bá a ɲwɔ mà tòro u na.»
3 Ka Samusɔn si jwo:
«Numɛ kɔni,
nde mii sí n-pyi Filisi shiinbii na ke,
wà sì n-jà mii cɛ̂ɛgɛ lire mpyiŋi i mɛ.»
4 Ka u u ŋkàrʼa sà sigepwuun ŋkwuu taanre (300) cû,
maa pi nɛɲyi pwɔ pwɔ yiye na shuunni shuunni,
maa ɲyɛ̀sigire tà pwɔ pwɔ pi nɛɲyi shwɔhɔlʼe.
5 Ka u u nage le tire ɲyɛ̀sigire na,
maa sige pwuunbii kɔ̀rʼa kàre Filisi shiinbii kɛrɛyi i.
Ka nage si sùmaŋi niŋkwɔnŋi ná niŋkwɔnmbaaŋi puni súugo mà sà nɔ pi ɛrɛzɛn kɔɔyi ná pi oliviye cire na.
6 Ka Filisi shiinbii si jwo:
«Jo u à nde pyi yɛ?»
Ka pi i jwo:
«Samusɔn u à nde pyi,
ɲaha kurugo yɛ,
u nafenaŋi u ɲyɛ Timina kànhe e ke,
urʼà u cwoŋi shwɔ u na mà kan u cevooŋi á.»
Ɲyɛ ka Filisi shiinbii si ŋkàrʼa sà ceeŋi ná u tuŋi cû,
maa pi súugo.
7 Ka Samusɔn si pi pyi:
«Ká mpyi lire yii á pyi,
mii sì yii yaha yyeɲiŋʼi mɛ,
fo mii aha na nàvunŋke kwɔ̀ yii na.»
8 U à pi kakyara maa pi niɲyahamii bò,
lire kàntugo,
maa ŋkàrʼa sà ntɛ̀ɛn Etamu ɲaŋgyige fuŋke e.
9 Ɲyɛ lirʼà pyi ke,
ka Filisi shiinbii si sà pi vàanɲyi bayi kwôro kwôro Zhuda kùluni i,
maa pi kàshikwɔɔnbii yaha yaha mà sà nɔ fo Lehi kànhe na.
10 Ka Zhuda shiinbii si pi pyi:
«Ɲaha na yii à pa mpa wuu tùn yɛ?»
Ka pi i jwo:
«Wuu à pa mpa Samusɔn cû,
kapiini u à pyi wuu na ke,
si lire ŋkooŋi wwû u na.»
11 Ɲyɛ Zhuda shiinbilʼà yire lógo ke,
ka pi shiin kampwɔhii taanre (3.000) si ŋkàre Etamu ɲaŋgyige na,
maa Samusɔn pyi:
«Ɲaha kafiile mu à pyi amɛ yɛ?
Mu ɲyɛ a cè na wuu ɲyɛ Filisi shiinbii fànhe ɲwɔhɔ e mà?»
Ka Samusɔn si pi pyi:
«Nde pi à pyi mii na ke,
lire ŋkooŋi mii à wwû pi na.»
12 Ka pi i u pyi:
«Wuu à pa si mu pwɔ zà ŋkan Filisi shiinbilʼá.»
Ka Samusɔn si pi pyi:
«Yii kâa na á,
na yii yabilimpii sì mii bò mɛ.»
13 Ka pi i Samusɔn pyi:
«Wuu sì mu bò mɛ,
wuu la ɲyɛ si mu cû n-pwɔ kanna,
si mu kan pi á.»
Ɲyɛ ka pi i jyè ɲaŋgyige e,
maa u cû a pwɔ ná mɛɛrɛ nivɔnnɔ shuunni i,
ma yige cyíinŋi na.
14 Pi à sà nɔ ná u e Lehi kànhe na ke,
ka Filisi shiinbii si wá na funntanga kwuuyi wàa,
maa pi ɲùŋɔ bêni.
Ka Kafooŋi Múnaani si ntîge Samusɔn na ná fànhʼe.
Mɛɛre ti mpyi a tɛ̀gʼa u cyeeyi pwɔ ke,
tirʼà pyi u á,
mu à jwo dìizimɛɛ nagʼà súugo.
U à tire mɛɛre kwɔ̀n a láha uye na.
15 Ka u u dùfaanŋa ɲwɔmyahaŋa nimpurugo ɲya,
maa kuru lwɔ́ a tɛ̀gʼa Filisi shiinbii nàmbaa kampwoo (1.000) bwɔ̀n a bò.
16 Lire kàntugo Samusɔn à jwo:
«Supyikwuyi yà yi ɲje yʼà bínni,
yà saha yi ɲje yʼà bínni,
mii à pi bò ná dùfaanŋke ɲwɔmyahaŋke e.
Mii à shiin kampwoo (1.000) bò
ná dùfaanŋke ɲwɔmyahaŋke e.»
17 Samusɔn à puru jwo a kwɔ̀ ke,
maa dùfaanŋke ɲwɔmyahaŋke wà,
maa kuru cyage mɛgɛ le Aramati-Lehia.
18 Ɲyɛ lire kàntugo ka byage si shwɔ Samusɔn e.
Ka u u Kafooŋi ɲáare maa jwo:
«Kafooŋi,
mu u à nte sítaare nimbwɔɔre kan ma báarapyiŋʼá.
Ma hà byage yaha ku na bò,
nte sùpyire niŋkwɔnmbaare ti kwɔ̀ a cye taha na na,
si mii pyi pi ɲɛɛmpe mɛ.»
19 U à puru jwo ke,
ka Kile si kafaage kà paha Lehi kànhe e,
ka lwɔhe si fworo kurʼe.
Ka Samusɔn si bya maa fànha ta,
ka lire si u múnaani lo.
Lire kurugo pi à uru lùbiliŋi mɛge pyi Ɛni-Akɔreb.
Uru na ɲyɛ Lehi kànhe e ali niɲjaa.
20 Samusɔn à pyi Izirayɛli shiinbii yukyaaŋi yyee beɲjaaga funŋʼi,
Filisi shiinbii tèni i.