Samusɔn ná Gaza shiinbii kani
16
Ɲyɛ canŋka,
Samusɔn à kàre Gaza kànhe e,
u à fwòroba cwoŋi wà ɲya wani,
maa ŋkàre u yyére.
2 Ka Gaza shiinbii si lógo na Samusɔn na ɲyɛ pire kànhe e.
Ka pi i sùpyire tà yaha ti i kànhe cyeyi puni kàanmucaa numpili puni,
mà bâra kànhe tajyiɲwɔyi na.
Pi ɲyɛ a ɲɛnʼa yaaga pyi kuru numpilage e mɛ,
pi mpyi a bɛ̂ li na,
na ɲyɛ̀ge ka múgo pire sí nta Samusɔn bò.
3 Ka Samusɔn si sínni wani mà sà nɔ ɲìɲiŋke na.
Ɲìŋkʼà ɲî ke,
ka u u yîri,
maa Gaza kànhe tajyiɲwɔge bàrapyiyi shuunniŋi ná ŋkère cire ná ɲwɔpara cire dìrʼa wwû mà taha fukange na mà sà yaha ɲaŋke ɲuŋʼi,
Eburɔn kànhe yyetiimpe na.
Samusɔn ná Dalila kani
4 Lire kàntugo,
ka Samusɔn si núrʼa ɲyii yige ceeŋi wà kurugo,
u mɛgɛ mpyi Dalila,
u mpyi na yîri Sorɛki bafage e.
5 Ka Filisi shiinbii saanbii kaŋkuruŋi si mpa yi jwo Dalila á na:
«Karigii puni pyi maa Samusɔn fɔ̀ɔnŋɔ,
fànhe kakyanhala woge ku ɲyɛ u e ke,
bà u si mpyi si kuru taŋkanni jwo,
si uye cùŋkanni jwo mɛ.
Lire ká mpyi wuu sí n-sà u cû si u pwɔ.
Mu aha jà a lire pyi,
wuu shin maha shin si wyɛ́rɛfyinŋi tɔɔnɲwɔ kampwoo ná ŋkuu (1.100) kan mu á.»
6 Ka Dalila si Samusɔn pyi:
«Samusɔn,
maye sanŋa yaha na á,
maa ma kakyanhala fànhe taŋkanni jwo na á.
Yapwɔge ŋki ku sí n-jà ntɛ̀gɛ mu pwɔ si mu kíbe ɲjaha tanuge e yɛ?»
7 Ka Samusɔn si u pyi:
«Pi aha mii pwɔ ná mɛɛrɛ nimpururo baashuunni i,
nte ti ɲyɛ ti sàha ŋkwɔ̀ a waha mɛ,
mii fànhe si ŋkwɔ̀,
mii sí n-pyi sùpyire sannte fiige.»
8 Ɲyɛ ka Filisi shiinbii saanbii si mɛɛrɛ nimpururo baashuunni kan Dalila á ntemu ti ɲyɛ ti sàha ŋkwɔ̀ a waha mɛ.
Mà Samusɔn yaha ŋɔɔmpe na,
ka Dalila si tire mɛɛre tɛ̀gʼa u pwɔ.
9 Lirʼà Filisi shiinbii pìi ta pi à ŋwɔhɔ wani u bage e.
Ka u u mpâlʼa kwúulo maa jwo:
«Samusɔn,
Filisi shiinbii naha a pa mu mɛɛ na!»
Ka Samusɔn si ntílʼa tire mɛɛre kwɔ̀n mu à jwo dìizimɛɛ lʼà sógʼa kwɔ̀n.
Pi ɲyɛ jà a u fànhe tayirige cè mɛ.
10 Ka Dalila si Samusɔn pyi:
«Mu à mii ɲwɔ fáanŋa,
mu ɲyɛ a ɲɛnʼa sèeŋi jwo mii á mɛ.
Ɲyɛ náaŋa,
maa yi yyaha jwo na á,
ɲaha shi ku sí n-jà ntɛ̀gɛ mu pwɔ yɛ?»
11 Ka Samusɔn si u pyi:
«Pi aha mii yalʼa pwɔ ná mɛɛrɛ nivɔnnʼi,
ntemu ti ɲyɛ ti sàha ntɛ̀gʼa yaaga pwɔ a ɲya mɛ,
mii fànhe sí n-kwɔ̀,
mii sí n-pyi sùpyire sannte fiige.»
12 Ɲyɛ mà u yaha ŋɔɔmpe na,
ka Dalila si mɛfɔnnɔ cya mà tɛ̀gʼa u pwɔ,
maa ŋkwúulo maa jwo:
«Samusɔn,
Filisi shiinbii naha a pa mu mɛɛ na!»
Lire mpyi a Filisi shiinbii pìi ta pi à ŋwɔhɔ bage e.
Ka Samusɔn si yîri maa tire mɛɛre kwɔ̀n kwɔ̀n mu à jwo dìizimɛɛ li mpyi u cyeyi na.
13 Ka Dalila si Samusɔn pyi:
«Ali numɛ,
mu na mii ɲwɔ fáanŋi,
mu ɲyɛ a sèeŋi jwo mii á mɛ.
Ɲaha mii à yaa mii i tɛ̀gʼa mu pwɔ yɛ?
Yi yyaha jwo na á sa!»
Ka Samusɔn si u pyi:
«Mu aha mii ɲùŋke cyiigii baashuunniŋi niɲjoore ná dìizinŋi bínnʼa cîn ná vàanncinyaage e,
mii sí n-pyi sùpyire sannte fiige.»
14 Mà Sanson yaha ŋɔɔmpe na,
ka Dalila si u ɲùɲjwoore bínnʼa cîn ná dìizinŋi i,
maa vàanncinyaage tɛ̀gʼa ti cû cû.
U à lire pyi ke,
maa núrʼa Samusɔn pyi:
«Samusɔn!
Filisi shiinbii naha a pa mu mɛɛ na.»
Ka Samusɔn si yîri ŋɔɔmpe na,
maa vàanmɛɛge ná vàanncinyaage dìrʼa sànha láha ɲùŋke na.
15 Ka Dalila si u pyi:
«Ɲaha na mu à jwo na mii kyalʼà táan mu á,
mà ta mu ɲyɛ na fínniŋi na yu mii á mà yɛ?
Mu à mii ɲwɔ fáanŋa fo tooyo taanre,
mu ɲyɛ a ɲɛnʼa ma fànhe kakyanhala woge tayirige jwo mii á mɛ.»
16 Canŋa maha canŋa u mpyi maha yibiyi taha Samusɔn na,
maa jwumpe ɲyaha u na fo mà u nɔ u tɛgɛni na.
17 Ka u u yi puni yyaha jwo u á.
U à jwo:
«Mà lwɔ́ mii à si ke,
ɲùŋkulu yaaga sàha jyè a ɲya mii ɲùŋke e mɛ,
ɲaha kurugo yɛ,
mà mii yaha zimbaa,
mii à pyi naziriyɛn maa mpyi Kile yaharʼe.
Pi aha mii ɲùŋke kûlu,
mii fànhe sí n-fworo mii i,
mii sí n-pyi fànha bàa sùpyire sannte fiige.»
18 Ɲyɛ Dalila à li ɲya na Samusɔn à fíniŋʼa jwo urʼá ke,
ka u u wà pyi u à sà yi jwo Filisi shiinbii saanbilʼá na:
«Yii a ma,
ɲaha kurugo yɛ,
u à fínniŋʼa jwo mii á,
numɛ u tɔɔge e.»
Ka Filisi shiinbii saanbii si mpa Dalila yyére ná wyɛ́rɛŋi i piye cye e.
19 Ka Dalila si Samusɔn pyi u à ŋɔ́ɔ u tooyi na,
maa nàŋi wà yyére,
ka uru si mpa Samusɔn ɲùŋke cyiigii baashuunniŋi kûlu.
Lire pyiŋkanni na,
u à Samusɔn fɔ̀ɔnŋʼa ta,
ɲaha kurugo yɛ,
u fànhe mpyi a fworo u e.
20 Ɲyɛ ka u u jwo:
«Samusɔn,
Filisi shiinbii wa na ma mu mɛɛ na!»
Ka Samusɔn si ɲɛ̀ a yîri ŋɔmpe na,
maa jwo uye funŋʼi:
«Mii sí naye shwɔ pi na bà mii à li pyi tɔɔyi nintoroyi i mɛ.»
U mpyi a cè na Kafooŋi à kàntugo wà uru na mɛ.
21 Ka Filisi shiinbii si u cû maa u ɲyiigii jya,
maa ŋkàre ná u e Gaza kànhe e,
maa u pwɔ na dàɲyɛ tɔɔnnɔ yɔ̀rɔyɔ shuunni i,
maa u yaha sùmaŋi ntiriŋi na kàsubage e.
22 Ɲùŋke ku mpyi a kûlu ke,
kuru pyi a ɲwɔ cû na fûnni.
Samusɔn kwùŋi kani
23 Ɲyɛ canŋka,
Filisi shiinbii saanbilʼà piye bínni,
si kataan nimbwoo pyi,
si pi kacyiinni Dagɔn sun.
Pi mpyi na ŋko:
«Wuu kacyiinni à wuu zàmpɛnŋi Samusɔn le wuu cye e.»
24 Sùpyirʼà Samusɔn ɲya ke,
ka pi i pi kacyiinni báama,
maa jwo:
«Wuu kacyiinnʼà wuu zàmpɛnŋi Samusɔn le wuu cye e,
wuu zàmpɛnŋi u mpyi na wuu kìni kɛ̀ɛge,
maa shinɲyahara bò wuu e ke.»
25 Mà pi yaha kuru funntange e,
ka pi i jwo:
«Yii Samusɔn yyerʼa pa,
u u mpa a sɛɛgɛ táan wuu na.»
Ka pi i sà Samusɔn yige kàsuŋi i mà pa,
ka u u mpa a sɛɛgɛ táan pi na.
Pi mpyi a u yyéeŋɛ babwɔhe cinŋkunɲyi shuunniŋi shwɔhɔlʼe.
26 Nàɲjiiŋi u mpyi a Samusɔn cû u cyɛge na ke,
ka Samusɔn si uru pyi:
«Babwɔhe tugure ɲyɛ cinŋkunɲyi ɲjemu na ke,
na cyɛge cû a file yi na si bwɔ̀n yi na,
bà mii si mpyi si ntíiŋɛ yi na mɛ.»
27 Lire mpyi a babwɔhe ta kʼà ɲî nàmbaabii ná cyeebii na.
Filisi shiinbii saanbii puni mpyi wani.
Sùpyire ti mpyi bage kàtanŋke ɲuŋʼi na Samusɔn wíi takwɔhɔge e ke,
pire mpyi a shiin kampwɔhii taanre (3.000) fiige kwɔ̀,
nàmbaabii ná cyeebii.
28 Ka Samusɔn si Kafooŋi ɲáare na:
«Saanbwɔhe Kafooŋi,
mii na mu ɲáare,
yaha na na.
Ei Kile,
na fànhe núruŋʼa le ni i ŋke toozanŋke e,
bà mii si mpyi si naye nàvunŋɔ kwɔ̀ Filisi shiinbii na tɔɔgɔ niŋkin,
mii ɲyipyaagii shuunniŋi ɲjyaŋi kurugo mɛ.»
29 Cinŋkunɲyi shuunniŋi yi mpyi bage niŋke e,
bage tugure sí ɲyɛ yi ɲuŋʼi ke,
ka Samusɔn si u cyeyi taha yire na.
U à u kàniŋɛ cyɛge taha kà na,
maa u kàmɛnɛ cyɛge taha ku sanŋke na,
30 maa jwo:
«Mii ná Filisi shiinbii pi kwû siɲcyan!»
Maa cinŋkunɲyi ŋɔɔŋɔ ná u fànhe puni i,
saanbii ná sùpyire sannte puni ti mpyi wani ke,
ka bage si ɲcwo pire puni ɲuŋʼi.
Lire pyiŋkanni na,
u niŋkwuŋʼà sùpyire pɛ̀rɛge ŋkemu bò ke,
u ɲyii wuŋi ɲyɛ a tire pɛ̀rɛge fiige bò mɛ.
31 Ka u cìnmpyiibii ná u pyɛngɛ shiinbii puni si sà u buwuŋi lwɔ́ a kàrʼa sà ntò u tuŋi Manoya fanŋke e,
Zoreya ná Esitayɔli kànhe shwɔhɔlʼe.
Samusɔn à pyi Izirayɛli shiinbii yukyaaŋi yyee beɲjaaga funŋʼi.