Mika kacyanhigii kani
17
Nàŋi wà mpyi a tɛ̀ɛn Efirayimu ɲaŋkuluni i,
u mɛgɛ mpyi Mika.
2 Canŋka u à jwo u nuŋʼá:
«Mu wyɛ́rɛfyinŋi tɔɔnɲwɔ kampwoo ná ŋkuuŋi (1.100) u mpyi a yû,
fo mu mpyi a u lwɔfooŋi láŋa mii ɲyii na ke,
wyɛ́rɛŋi u ŋge.
Mii u mpyi a u yû.»
Ka u nuŋi si u pyi:
«Na jya,
Kafooŋi u ma wuuni ɲwɔ.»
3 Ka Mika si uru wyɛ́rɛfyinŋi tɔɔnɲwɔ kampwoo ná ŋkuuŋi (1.100) núruŋʼa kan u nuŋʼá.
Ka uru si u pyi:
«Na jya,
mii yabiliŋi cyɛge sí ŋge wyɛ́rɛŋi yaha uye kanni na,
si mpyi Kafooŋi wu,
si u ɲa si mpyi yaage kà nàɲja,
si mpyi kacyiin mu mɛge na.
Lire pyiŋkanni na,
mii sí ŋge wyɛ́rɛfyinŋi núruŋɔ si ŋkan mu á.»
4 Mika à uru wyɛ́rɛŋi núruŋʼa kan u nuŋʼá ke,
ka uru si wyɛ́rɛfyinŋi tɔɔnɲwɔ ŋkwuu shuunni (200) wwû uru wyɛ́rɛŋi i mà kan sɛɛnbuŋi wà á.
Ka uru si u ɲa a pyi yaage kà nàɲja mà pyi kacyiin.
Ka pi i li yaha Mika bage e.
5 Kacyinmbaga na mpyi Mika á.
Ka u u efodia ná kacyanhii yaa,
maa u jyaŋi wà pyi u u cyi sunni.
6 Lire tèni i saanwa mpyi Izirayɛli shiinbii ɲùŋɔ na mɛ.
Pi shin maha shin mpyi na u ɲyii karigii pyi.
7 Nàɲjiiŋi wà na mpyi Bɛtilɛhɛmu kànhe e,
Zhuda kùluni i.
Levi tùluge shin u mpyi u wi.
8 U mpyi a yîri Bɛtilɛhɛmu kànhe e Zhuda kùluni i,
si sà tatɛɛngɛ cya cyage kabɛrʼe.
Mà u yaha ɲani na,
u à sà nɔ Mika pyɛnge na,
Efirayimu ɲaŋkuluni i.
9 Ka Mika si u pyi:
«Taa mu à yîri ke?»
Ka u u jwo:
«Levi tùluge shin u ɲyɛ mii,
mà yîri Bɛtilɛhɛmu kànhe e,
Zhuda kùluni i.
Tatɛɛngɛ mii ɲyɛ na ɲaare na ɲcaa.»
10 Ka Mika si u pyi:
«Tɛ̀ɛn naha mii yyére,
mu sí n-pyi mii yɛrɛfooŋi sí n-pyi mii sáragawwuŋi.
Yyee maha yyee mii sí mu sâra ná wyɛ́rɛfyinŋi tɔɔnɲwɔ kɛ e,
mii sí raa vàanɲyi ná ɲjyìŋi kaan mu á.»
Ka Levi tùluge nàɲjiiŋi si jyè Mika pyɛnge e.
11 U à ɲɛɛ maa ntɛ̀ɛn Mika yyére,
ka Mika si u cùmulemɛ ɲwɔ u yabiliŋi jya fiige.
12 Ka Mika si uru Levi tùluge shinŋi yaha uru báaraŋi na,
ka uru nàɲjiiŋi si ŋkwôro u pyɛnge e,
maa mpyi u sáragawwuŋi.
13 Ka Mika si jwo:
Numɛ,
mii à li cè na Kafooŋi sí ɲwɔ mii na,
ɲaha kurugo yɛ,
Levi tùluge shin mii à pyi na sáragawwuŋi.