Dan shiinbii na tatɛɛngɛ caa
18
Lire tèni i,
saanwa mpyi Izirayɛli shiinbii ɲùŋɔ na mɛ.
Dan tùluge shiinbii mpyi na tatɛɛngɛ caa si ntɛ̀ɛn,
ɲaha kurugo yɛ,
fo mà sà nɔ kuru canŋke na,
pire mpyi na sàha ŋkwɔ̀ a tatɛɛngɛ ta Izirayɛli shiinbii shwɔhɔlʼe mɛ.
2 Ka Dan shiinbii si kàshikwɔnmpiye kaŋkuro cwɔɔnrɔ pi shiinbilʼe mà fworo Zoreya ná Esitayɔli kànhe e,
pi i sà kìni ŋwɔhʼa wíi.
Ka pire si ŋkàrʼa sà nɔ Efirayimu ɲaŋkuluni i,
Mika pyɛnge taan,
maa shwɔ̀n wani.
3 Mà pi yaha Mika pyɛnge taan,
pi à Levi tùluge nàɲjiiŋi mɛjwuuni lógo ke,
ka pi i li cè na Levi tùluge shin wi.
Ka pi i file u na maa u pyi:
«Jo u à pa ná mu i naha yɛ?
Ɲaha mu pyi naha yɛ?
Ɲaha na mu à tɛ̀ɛn naha yɛ?»
4 Ɲyɛ karigii puni Mika ɲyɛ na mpyi u á ke,
ka u u cyire puni yyaha jwo pi á.
U à jwo:
«Mika à mii pyi u sáragawwuŋi,
u maha mii sârali.»
5 Ka pi i u pyi:
«Ɲwɔ wuu na,
maa Kile yíbe wuu á,
ká mpyi wuu ɲani sí n-táan,
wuu u lire cè.»
6 Ka sáragawwuŋi si pi pyi:
«Yii a sì yyeɲiŋke e,
Kafooŋi na ɲyɛ ná yii e,
nde ɲani i.»
7 Ka pire nàmbaabii kaŋkuroŋi si kuni lwɔ́,
maa ŋkàrʼa sà nɔ Lahisi kànhe e.
Pi à nɔ wani ke,
ka pi i li ɲya na kuru cyage shiinbii yákilibilʼà tɛ̀ɛn,
pi saɲcwɔnŋʼà kɔ̀rʼa ɲwɔ,
pi mú ɲyɛ yyeɲiŋke e,
Sidɔn kànhe shiinbii fiige.
Wà mpyi pi ɲùŋɔ na si ŋkwɔ̀ raa pi yyaha fwɔ́hɔre mɛ.
Pi ná Sidɔn shiinbii laage mpyi a tɔɔn piye na,
ŋgwò mpyi pi ná wà shwɔhɔlʼe mɛ.
8 Ɲyɛ ka pire nàmbaabii kaŋkuruŋi si núrʼa kàre pi cìnmpyiibii cyage e Zoreya kànhe ná Esitayɔli kànhe e.
Ka pi cìnmpyiibii si pi pyi:
«Kafɛɛge ŋki yii à ta yɛ?»
9 Ka pi i pi cìnmpyiibii pyi:
«Yii yîri wuu a sì Lahisi kùluni mɛɛ na.
Wuu à kùluni ɲaara,
li lemɛ wa a sàa ɲwɔ.
Yii yà jwo kɛ!
Yii àha yatanɲyi bò mɛ.
Yii yîri wuu u sà nde kùluni tùn,
wuu li pyi wuye wuu.
10 Yii aha nɔ wani,
yii sí li ɲya na lire kùluni shiinbii ɲyɛ a tɛ̀ɛn ná lʼe na wà sí n-pa kàshi kwɔ̀n pire na mɛ.
Pi kùlunʼà pêe,
yafaayi shiŋi puni na ɲwɔge lʼe.
Kile yabiliŋi u à nde kùluni kan wuu á.»
Dan shiinbilʼà Mika kacyanhigii yû
11 Ɲyɛ ka Dan tùluge shiin ŋkwuu baani (600) si yîri Zoreya ná Esitayɔli kànyi i,
maa ŋkàre ná pi kàshikwɔnyaayi i.
12 Pi à sà nɔ Kiriyati-Yeharimu kànhe canŋacwumpe e,
Zhuda kùluni ke,
ka pi i pi vàanɲyi bayi kwòro kwòro wani.
Lire kurugo pi à kuru cyage mɛgɛ le Mahane-Dan.
Kuru mɛgɛ ku ɲyɛ na yîri ku na ali niɲjaa.
13 Ka pi i yîri kuru cyage e,
maa ŋkàre Efirayimu ɲaŋkuluni i,
mà sà nɔ Mika pyɛnge na.
14 Pi à nɔ wani ke,
nàmbaabii kaŋkuruŋi u mpyi a sà Lahisi kànhe ŋwɔhʼa wíi ke,
ka pire si pi cìnmpyiibii pyi:
«Ta yii a cè na efodi ná kacyanhii ná yateŋɛ ná wyɛ́rɛfyinŋi niɲaŋi kacyiin na ɲyɛ ŋke bage kʼe la?
Nde wuu sí n-pyi ke,
yii yabilimpilʼà li cè.»
15 Ɲyɛ ka pire nàmbaabii kaŋkuruŋi si núrʼa sà jyè Mika pyɛnge e,
maa jyè Levi tùluge nàɲjiiŋi bage e,
maa u ticuumɔ yíbe.
16 Dan tùluge shiinbii ŋkwuu baaniŋi (600) u mpyi ná kàshikwɔnyaayi ke,
lire mpyi a pire ta pi à yyére pyɛnge ɲwɔge na.
17 Nàmbaabii kaŋkuruŋi u mpyi a kàrʼa sà kìni ŋwɔhʼa wíi ke,
ka pire si jyè bage e,
maa yateŋke ná efodiŋi ná kacyanhigii ná wyɛ́rɛfyinŋi niɲaŋi kacyiinni lwɔ́.
Nàmbaabii ŋkwuu baaniŋi (600) u mpyi ná kàshikwɔnyaayi i ke,
sáragawwuŋi mpyi a yyére ná pire e pyɛnge ɲwɔge na.
18 Sáragawuŋʼà nàmbaabii kaŋkuruŋi ɲya pi à jyè Mika bage e,
si sà yateŋke ná efodiŋi ná kacyanhigii ná wyɛ́rɛfyinŋi niɲaŋi kacyiinni lwɔ́ ke,
ka u u pi pyi:
«Ɲaha yii ɲyɛ na mpyi amɛ yɛ?»
19 Ka pi i u pyi:
«Ma ɲwɔge tò!
Ma hà yaaga jwo mɛ,
taha wuu fye e,
maa mpyi wuu yɛrɛfooŋi ná wuu sáragawwuŋi.
Mà pyi shin niŋkin sáragawwu,
lire mɛ,
mà pyi Izirayɛli tùluge kà nimpuŋɔ sáragawwu,
cyire kapyaagii shuunniŋi i,
ndi lʼà pwɔ́rɔ yɛ?»
20 Ka puru jwumpe si ntáan sáragawwuŋi i sèlʼe.
Ka u u efodiŋi ná kacyanhigii ná yateŋke shwɔ a cû,
maa ŋkàre ná pi e.
21 Ka pi i kuni lwɔ́ na wà,
pi mpyi a nàŋkopyire ná yatɔɔre ná yaayi yaha piye yyaha na.
22 Pi à kàrʼa laaga tɔɔn Mika pyɛnge na ke,
ka Mika ná u tɛɛnɲɛɛbii si wà piye na,
maa pi fyè tɔ̀rɔ.
23 Pi à pi kɔ̀rʼa ta ke,
maa sêe pi na,
ka Dan shiinbii si yyahayi kɛ̂ɛnŋɛ maa Mika pyi:
«Ɲaha kʼà pyi yɛ?
Ɲùŋke ŋkire na mu à nte sùpyire puni bínni yɛ?»
24 Ka Mika si jwo:
«Ɲaha na yii ɲyɛ na mii yíbili yɛ?
Yasunɲyi mii à yaa ke,
yii à yire puni lwɔ́,
maa ŋkàre ná mii sáragawwuŋi i.
Yafyin sàha ɲyɛ mii cye e mɛ.»
25 Ka Dan shiinbii si Mika pyi:
«Jwumpe ɲwɔ yaha amɛ dɛ!
Lire baare e,
wuu shiinbii pìi lùgigii sí n-yîri,
si mu ná ma pyɛngɛ shiinbii puni bò.»
26 Ka Dan shiinbii si ntòro ná ɲani i.
Mika à li ɲya na pi fànhʼà ɲyaha uru woge na ke,
ka u u núrʼa kàre pyɛngɛ.
Dan shiinbilʼà Lahisi shiinbii tùn
27 Lire pyiŋkanni na,
Dan shiinbilʼà Mika yasunɲyi lwɔ́,
maa ŋkàre ná u sáragawwuŋi i.
Ka pi i sà ɲcwo Lahisi kànhe shiinbii na,
mà li ta kuru kànhe shiinbii mpyi yyeɲiŋke e,
pi mpyi a tɛ̀ɛn ná lʼe na wà sì n-pa n-cwo pire na mɛ.
Pi à kànhe shiinbii puni bò,
maa kànhe súugo.
28 Wà ɲyɛ a ta ŋgemu u sí Lahisi shiinbii tɛ̀gɛ mɛ,
ɲaha kurugo yɛ,
kànhe laage mpyi a tɔɔn Sidɔn na,
ŋgwò mpyi pi ná wà shwɔhɔlʼe mɛ.
Lahisi kànhe mpyi bafage e Bɛti-Erehobu kàmpanŋke na.
Lire kàntugo,
ka Dan shiinbii si Lahisi kànhe núruŋʼa faanra,
maa ntɛ̀ɛn kʼe.
29 Maa kànhe mɛge kɛ̂ɛnŋɛ na yîri Dan,
pi tulyɛge mɛge ku mpyi kure.
Izirayɛlia jyaŋi wà u mpyi u wi.
Kànhe mɛgɛ mpyi Lahisi tèecyiini i.
30 Lire kàntugo,
ka pi i yasunŋke yaha cyage kʼe.
Musa ɲampyige mɛge ku ɲyɛ Gerishomu ke,
ka pi i uru jyaŋi Zhonatan ná u tùluge shiinbii pyi Dan tùluge shiinbii sáragawwuubii,
ka pire si wá na uru sáragawwu báaraŋi pyi,
fo canŋke pi à pa lire kùluni shiinbii kulʼa kàre bilere e ke.
31 Kile vàanŋke bagʼà tèni ndemu pyi Silo kànhe e ke,
Mika yasunɲyʼà kwôro Dan shiinbilʼá lire tèni puni i mú.