Levi tùluge shinŋi ná u cwoŋi kani
19
Lire tèni i,
saanwa mpyi Izirayɛli shiinbii ɲùŋɔ na mɛ.
Levi tùluge shinŋi wà mpyi a tɛ̀ɛn Efirayimu ɲaŋkuluni tɛgɛni na.
U mpyi a bilicwoŋi wà lèŋɛ mà pyi u cwo,
uru ceeŋi mpyi na yîri Bɛtilɛhɛmu i,
Zhuda kùluni i.
2 Ŋka uru ceeŋi ɲyɛ a pyi ɲwɔmɛɛfoo mɛ,
maa yîri u pooŋi taan mà kàre u tuŋi yyére Bɛtilɛhɛmu kànhe e Zhuda kùluni i.
U à yiɲyɛ sicyɛɛre pyi wani.
3 Ka u pooŋi si ŋkàre u fye e si sà jwo ná u e,
bà u si mpyi si núru mɛ.
Nɔ̀ŋi mpyi a kàre ná u bilinaŋi ná dùfaanɲya shuunni i.
Ka ceeŋi si ŋkàre ná u e,
u tuŋi bage e.
Tufooŋʼà nàŋi ɲya ke,
maa u sunmbage shwɔ ná funntangʼe.
4 Ka nafenaŋi,
ceeŋi tuŋi si u pyi u canmpyaa taanre pyi ná urʼe.
Ka u u ntɛ̀ɛn wani ná pi e,
ka pi i wa na lyî maa byii maa shwùun wani.
5 Canmpyi sicyɛrɛwuuni,
ka pi i sôlʼa yîri,
ka Levi shinŋi si bégele sʼa wà.
Ka ceeŋi tuŋi si u pyi:
«Yyére yii i lyî,
yii i fànha ta,
yii i nta yii a sì.»
6 Ɲyɛ ka pi mú shuunniŋi si lyî maa bya,
ka ceeŋi tuŋi si u pyi:
«Yii niɲjaa numpilage pyi naha seetange e.»
7 Nàŋi mpyi a yîrʼa kwɔ̀,
sʼa wà,
ka nafenaŋi si u ɲáare sèlʼe na u numpilage pyi,
ka u u kuru numpilage pyi sahaŋki.
8 Canmpyi kaŋkuro wuuni ɲyɛ̀sɔɔge na,
ka u u yîri sʼa wà.
Ka ceeŋi tuŋi si núrʼa u pyi:
«Yii yyére yii i lyî,
yii i canŋke yaha ku tîge,
yii i nta yii a sì.»
Ɲyɛ ka pi mú shuunniŋi si lyî siɲcyan.
9 Canŋkʼà pa ntîge ke,
ka nàŋi ná u cwoŋi ná u bilinaŋi si yîri sʼa wà,
ka nafenaŋi si núrʼa u pyi:
«Canŋkʼa tîgʼa kwɔ̀,
yàkoŋke mú sʼa nɔ a kwɔ̀,
yii shwɔ̀n naha,
ɲaha kurugo yɛ,
canŋkʼa kwɔ̀ a kwɔ̀,
yii numpilage pyi,
yii i sɛɛgɛ táan yiye na,
nùmpanŋa yii i sôlʼa yîri yii a sì pyɛngɛ.»
10 Ŋka nàŋi ɲyɛ a ɲɛnʼa kuru numpilage pyi wani mɛ.
U à u dùfaanɲyi shuunniŋi pwɔ,
maa ŋkàre ná u cwoŋi ná u bilinaŋi i.
Ka pi i sà byanhara Yebusi kànhe na,
kuru ku ɲyɛ Zheruzalɛmu.
11 Pi à sà byanhara Yebusi kànhe na tèni ndemu i ke,
lirʼà canŋaɲyiini ta li i ŋko raa ɲcwo,
ka bilinaŋi si u kàfooŋi pyi:
«Wuu sà tashwɔngɔ cya Yebusi shiinbii kànhe e,
wuu u numpilage pyi wani.»
12 Ka u kàfooŋi si u pyi:
«Izirayɛli shiinbii ɲyɛ kànhe ŋkemu na mɛ,
fo supyishiŋi sanŋi ke,
wuu sì n-jà sunmbage lèŋɛ kuru kànhe e mɛ.
Wuu tòro wuu raa sì Gibeya kànhe e.»
13 Ka u u núrʼa u bilinaŋi pyi:
«Wuu a sì Gibeya e,
lire ɲyɛ mɛ,
Arama kànhe e,
wuu u sà numpilage pyi kuru kànhe kà niŋkin i.»
14 Ka pi i ntòro na ɲani i.
Pi à sà byanhara Gibeya kànhe na tèni ndemu i ke,
lire mpyi a canŋaɲyiini ta li i ɲcwo.
Gibeya kànhe na ɲyɛ Bezhamɛ shiinbii kùluni i.
15 Ka pi i ŋkàre Gibeya e si sà shwɔ̀n wani.
Pi à jyè kànhe funŋke e,
maa ŋkàre kàfuge na,
ŋka wà ɲyɛ a pi yyere maa tashwɔngɔ kan pi á mɛ.
16 Tire yàkoɲwɔɔre na,
nàŋkolyeŋi wà mpyi na yîri sige e na ma pyɛngɛ.
Efirayimu ɲaŋkuluni shinŋi wà u mpyi u wi,
ŋka u mpyi a tɛ̀ɛn Gibeya kànhe e.
Bezhamɛ tùluge shiin pi mpyi Gibeya shiinbii.
17 Ɲyɛ nàŋkolyeŋi à ɲùŋke yîrige mà nàmpunaŋi ɲya kàfuge na ke,
maa u pyi:
«Taa mu kɛ̀ɛge ke?
Taa mu à yîri ke?»
18 Ka u u nàŋkolyeŋi pyi:
«Wuu à yîri Bɛtilɛhɛmu i,
Zhuda kùluni i.
Wuu na ŋkɛ̀ɛge Efirayimu ɲaŋkuluni tɛgɛni na.
Wani mii à tɛ̀ɛn,
mii mpyi a kàre Bɛtilɛhɛmu i Zhuda kùluni i,
mii à núru na ŋkɛ̀ɛge na cyage e.
Ŋka sùpya ɲyɛ a ɲɛnʼa mii sunmbage shwɔ u pyɛnge e mɛ.
19 Mà li ta wuu dùfaanɲyi ɲyɛge ná yi yalyire ɲyɛ mii á.
Bwúuruŋi ná ɛrɛzɛn sinmpe pu naha mii á ke,
yire sí mii ná na cwoŋi ná mii bilinaŋi ta.
Yaaga kuu naha wuu na mɛ.»
20 Ka nàŋkolyeŋi si u pyi:
«Mu pama lemʼà ɲwɔ,
Kile u yyeɲiŋke kan yii á.
Mii sí n-yyére ná mu karigii puni i,
mu ɲyɛ a yaa mu shwɔ̀n kàfuge na mɛ.»
21 Ka u u ŋkàre ná pi e,
u pyɛngɛ,
maa ɲjyì kan u dùfaanɲyʼá,
maa lwɔhɔ kan pi à pi tooyi jyè,
maa lyî,
maa bya.
22 Mà pi yaha pi i ɲcwɔhɔre lwúu siɲcyan,
kànhe supyifahafahayi yà à pa bage kwûulo,
maa bage ɲwɔge kúuli,
maa pyɛngefoo pyi:
«Nàmpunnaŋi u ɲyɛ naha mu pyɛnge e ke,
u yige naha wuu wwɔ̀ ná u e.»
23 Ka pyɛngefoo si fworʼa shà pi á,
maa pi pyi:
«Mii cìnmpyiibii,
mii na yii ɲáare,
yii àha ɲɛɛ nde kapiini fiige pyi mɛ.
Ŋge nàŋʼà sunmbage lèŋɛ mii pyɛnge e,
yii àha ɲɛɛ nde kapyimbaani fiige pyi mɛ.
24 Pworofoo na ɲyɛ naha mii á,
u sàha ŋkwɔ̀ a nɔ cè mɛ,
nàmpunnaŋi cwoŋi mú na ɲyɛ naha,
mii sí pire yige si ŋkan yii á,
yii i pire pyi yii ɲɛɛmpe,
nde lʼà táan yii á ke,
yii i lire pyi pi na.
Ŋka yii àha ɲɛɛ nde kapyimbaani fiige pyi ŋge nàŋi na mɛ.»
25 Ŋka yire supyifahafahayi ɲyɛ a ɲɛnʼa lógo pyɛngefolʼá mɛ.
Ka Levi tùluge shinŋi si u cwoŋi yige ntàani na pi á,
ka pi i numpili puni pyi na sínnini ná u e,
maa u kànha,
fo ma sà nɔ ɲyɛ̀kwɔnge na.
Ɲyɛ̀gʼà pa a múru ke,
ka pi i nta a u yaha.
26 Ɲyɛ̀sɔɔge na,
ka ceeŋi si ŋkàrʼa sà ɲcwo u pooŋi bage ɲwɔge na,
pyɛngefoo mpyi a pi sunmbage yaha bage ŋkemu i ke.
Canŋaɲyiinʼà fworʼa u niɲcwuŋi ta wani.
27 Ɲyɛ ɲyɛ̀gʼà pa múgo,
ka u pooŋi si yîri maa bage múgo sʼa ŋkɛ̀ɛge,
mà wílʼa u cwoŋi ɲya u à cwo a sànhana ɲìŋke na,
u cyeyi mpyi a taha kuɲwuuni na.
28 Ka nɔ̀ŋi si u pyi:
«Yîri,
wuu raa sì.»
Ŋka ceeŋi ɲyɛ a u ɲwɔ shwɔ mɛ,
ɲaha kurugo yɛ,
u mpyi a kwû.
Ka u u ceeŋi buwuŋi lwɔ́ a dùrugo dùfaanŋke na,
maa kuni lwɔ́ a kàre pyɛngɛ.
29 U à sà nɔ pyɛnge e tèni ndemu i ke,
maa ŋwɔɔni lwɔ́ maa ceeŋi buwuŋi kwɔ̀n kwɔ̀n takwɔnyɔ kɛ ná shuunni,
maa kwɔnyɔ niŋkin niŋkin tùugo Izirayɛli tùluyi puni niŋkin niŋkinŋʼá.
30 Shin maha shin u à lire ɲya ke,
pire punʼà jwo:
«Mà lwɔ́ Izirayɛli shiinbilʼà fworo Misira kìni i ke,
wuu sàha ntêlʼa nde kani fiige lógo lire ɲyɛ mɛ,
mà li ɲya mɛ.
Wuu à yaa wuu sɔ̂nŋɔ nde kani na,
wuu u funɲyi cya sèlʼe,
nde wuu sí n-pyi ke,
wuu u lire jwo wuyʼá.»