Izirayɛli tùluyi sanɲyʼà kàshige kwɔ̀n Bezhamɛ tùluge na
20
Izirayɛli shiinbii,
mà lwɔ́ Dan kànhe na fo mà sà nɔ Bɛrisheba kànhe ná Galadi kùluni na,
ka pi puni si pi sɔ̀nŋɔre pyi niŋkin,
maa piye bínni Kafooŋi yyahe taan Misipa kànhe e.
2 Sùpyire puni yyaha yyére shiinbii mà fworo Izirayɛli tùluyi puni i,
ka pire si yiye ta Kile shiinbii piye mbìnniŋi cyage e.
Tɔɔrɔfee shiin kampwɔhii ŋkwuu sicyɛɛre (400.000) mpyi pire shwɔhɔlʼe,
mpiimu pi mpyi na jìni kàshikwɔnŋwɔɔni kàshige na ke.
3 Bezhamɛ tùluge shiinbilʼà lógo na Izirayɛli shiinbilʼà piye bínni Misipa e.
Izirayɛli shiinbilʼà bínni ke,
maa jwo:
«Yii nde kapiini pyiŋkanni yyaha jwo wuu á.»
4 Ɲyɛ,
Levi tùluge nàŋi cwoŋi pi à bò ke,
ka uru si jwumpe lwɔ́ maa jwo:
«Mii ná na bilicwoŋi nindeŋɛŋʼà pa nɔ Gibeya kànhe e Bezhamɛ kùluni i,
maa jwo wuu sí n-shwɔ̀n wani.
5 Ka Gibeya shiinbii si yîri mii kurugo,
maa mii bashwɔnge kwûulo numpilage e.
Pi la mpyi si mii bò,
maa mii bilicwoŋi nindeŋɛŋi sínniŋɛ fànhʼe fo mà sà u bò.
6 Lire kurugo,
mii à na bilicwoŋi nindeŋɛŋi buwuŋi cirige cirige,
maa u kyaare tùugo Izirayɛli tùluge cyeyi puni i,
ɲaha kurugo yɛ,
kapii nimbwoo ná silige kyaa nimbwoo pi à pyi Izirayɛli shiinbii shwɔhɔlʼe.
7 Ɲyɛ,
yii puni pi naha naha Izirayɛli shiin,
yii yiye ɲya yii i ɲwɔ kyaa na.»
8 Ka sùpyire puni si ɲwɔ li na,
maa jwo:
«Wuu wà si ŋkàre u vàanŋke bage e mɛ,
wà sì núru n-kàre u pyɛngɛ mɛ.
9 Numɛ,
nde wuu sí n-pyi Gibeya shiinbii na ke,
lire li nde,
wuu sí ŋkyaanlwooni pyi si ntɛ̀gɛ pìi cwɔɔnrɔ si ŋkàre pi mɛɛ na.
10 Izirayɛli tùluyi puni i,
nàmbaa ŋkuu (100) maha ŋkulʼe,
wuu sí nàmbaa kɛ cwɔɔnrɔ,
kampwoo (1.000) maha kampwolʼe,
si ŋkuu (100) cwɔɔnrɔ,
kampwɔhii kɛ (10.000) maha kampwɔhii kɛ e,
si kampwoo (1.000) cwɔɔnrɔ.
Pire sí sà yalyire cya raa ma kàshikwɔɔnbilʼá.
Pire ká núrʼa pa,
silige kani Gibeya kànhe shiinbilʼà pyi Izirayɛli shiinbii na ke,
wuu sí lire ŋkooŋi wwû pi na Bezhamɛ kùluni i.»
11 Lire pyiŋkanni na,
Izirayɛli shiinbii punʼà piye bínni,
maa ɲwɔ li na si sà Gibeya shiinbii tùn.
12 Ka Izirayɛli tùluyi shiinbii si pìi tun Bezhamɛ tùlugeshiinbii pyɛnyi puni i pi sà pi pyi:
«Ɲaha kurugo yii à nde kapiini pyi yɛ?
13 Supyifahafahayi yi ɲyɛ Gibeya e ke,
yii yi kan wuu á wuu bò wuu u lire kapiini yige Izirayɛli shiinbii shwɔhɔlʼe.»
Ŋka Bezhamɛ tùluge shiinbii ɲyɛ a ɲɛnʼa lógo pi cìnmpyiibii Izirayɛli shiinbilʼá mɛ.
14 Ka Bezhamɛ tùluge shiinbii si yîri pi kànyi na mà sà piye bínni Gibeya kànhe e kàshige mɛɛ na,
Izirayɛli shiinbii na.
15 Bezhamɛ tùluge shiinbii pi à yîri kànyi na kuru canŋke ke,
pi à pire tɔ̀rɔ.
Pi mpyi nàmbaa kampwɔhii beɲjaaga ná baani (26.000),
mpiimu pi mpyi na jìni kàshikwɔnŋwɔɔni kàshige na ke.
Gibeya shiinbii ɲyɛ a mpyi pire e mɛ.
Pire mpyi kàshikwɔnmpiye ŋkwuu baashuunni (700).
16 Pire kàshikwɔɔnbii puni shwɔhɔlʼe,
kàmɛŋgaani feebii mpyi shiin ŋkwuu baashuunni (700).
Pire puni mpyi na sí n-jà ɲùzhyige niŋkin sɛ́ɛnnɛ nta ná nàmuruŋke e.
17 Pi à Izirayɛli kàshikwɔɔnbii tɔ̀rɔ mú.
Nàmbaa kampwɔhii ŋkwuu sicyɛɛre (400.000) mpyi pire e mpiimu pi mpyi na jìni kàshikwɔnŋwɔɔni kàshige na ke.
Bezhamɛ tùluge wuubii nàzhan ɲyɛ pire e mɛ.
Pire puni mpyi kàshikwɔɔn.
18 Ka Izirayɛli shiinbii si ŋkàre Bɛtɛli i,
maa sà Kafooŋi yíbe:
«Wuu e,
mpire pi à yaa pi fyânha a sà kàshige kwɔ̀n Bezhamɛ tùluge na yɛ?»
Ka Kafooŋi si jwo:
«Zhuda tùluge kʼà yaa ku fyânha a shà.»
19 Kuru canŋa nùmpanŋa ɲyɛ̀ge na,
ka Izirayɛli shiinbii si ntílʼa yîri,
maa ɲaarʼa kàrʼa sà pi vàanɲyi bayi kwôro Gibeya yyetiimpe na.
20 Lire kàntugo,
ka Izirayɛli shiinbii si yîri na wà Bezhamɛ tùluge ntùnŋi mɛɛ na,
maa ntaanna kàshige mɛɛ na mà sà yyére Gibeya kànhe yyetiimpe na.
21 Ka Bezhamɛ tùluge shiinbii si fworo Gibeya kànhe e,
maa shiin kampwɔhii beɲjaaga ná shuunni (22.000) bò kuru canŋke Izirayɛli shiinbilʼe.
22 Ka Izirayɛli shiinbii si pi zòompii tàra maa bégele sahaŋki kàshige mɛɛ na pi canɲcyiige cyage e.
23 Ka Izirayɛli shiinbii si sà mɛɛ sú Kafooŋi yyaha taan fo mà sà nɔ yàkoŋke na,
maa Kafooŋi yíbe na:
«Wuu à yaa wuu núrʼa sà wuu cìnmpyiibii Bezhamɛ tùluge shiinbii tùn la?»
Ka Kafooŋi si pi ɲwɔ shwɔ na:
«Yii sà pi tùn.»
24 Ka Izirayɛli shiinbii si ŋkàre canzhwɔnwogo Bezhamɛ tùluge shiinbii mɛɛ na.
25 Ka Bezhamɛ tùluge shiinbii si fworo Gibeya kànhe e pi mɛɛ na,
maa kàshikwɔɔnbii shiin kampwɔhii kɛ ná baataanre (18.000) bò Izirayɛli shiinbilʼe,
mpiimu pi mpyi na jìni kàshikwɔnŋwɔɔni kàshige na ke.
26 Ka Izirayɛli shiinbii puni si ŋkàre Bɛtɛli i,
maa sà ntɛ̀ɛn wani,
maa mɛɛ sú Kafooŋi yyaha taan,
maa súnŋi le kuru canŋke mà sà nɔ fo yàkoŋke na,
maa sáraya nizogoyo ná funntanga sáraya wwû Kafooŋi á.
27 Ka Izirayɛli shiinbii si Kafooŋi yíbe.
Lire mpyi a Kile tunmbyaare mbwùuni ta wani Bɛtɛli i lire tèni i.
28 Cyire canmpyaagilʼe,
Arɔn jyaŋi Eliyazari u jyaŋi Fineyasi u mpyi sáragawwuuni na Kile yyahe taan.
Ka Izirayɛli shiinbii si Kafooŋi yíbe:
«Wuu à yaa wuu núrʼa sà wuu cìnmpyiibii Bezhamɛ tùluge shiinbii tùn laa,
wuu àha zhà mɛ?»
Ka Kafooŋi si pi pyi:
«Yii a si pi mɛɛ na,
ɲaha kurugo yɛ,
mii sí pi le yii cye e nùmpanŋa.»
29 Ɲyɛ ka Izirayɛli kàshikwɔɔnbii pìi si sà ŋwɔhɔ mà Gibeya kànhe kwûulo.
30 Canmpyitanrewuuni,
ka Izirayɛli kàshikwɔɔnbii si ŋkàre Bezhamɛ tùluge shiinbii fye e,
maa piye bégele kàshige mɛɛ na Gibeya shiinbii na tooyi nintoroyi fiige.
31 Ka Bezhamɛ tùluge shiinbii si fworo Izirayɛli shiinbii mɛɛ na,
ka pire si pi yaha pi à pi kɔ̀rʼa laaga tɔɔn kànhe na.
Pi mpyi a ɲwɔ cû na Izirayɛli shiinbii bùu tooyi nintoroyi fiige.
Pi à shiin beɲjaaga ná kɛ fiige bò Izirayɛli shiinbilʼe Bɛtɛli kuni ná Gibeya shiinbii sishe kuni na.
32 Bezhamɛ tùluge shiinbii mpyi na ŋko:
«Wuu à jà pi na tooyi nintoroyi fiige.»
Ŋka Izirayɛli shiinbii mpyi na ŋko:
«Wuu a fî wuu a wà sige kuni i,
wuu u pi fɔ̀ɔnŋʼa laaga tɔɔn kànhe na.»
33 Ka Izirayɛli shiinbii puni si yîri pi tayyereyi i mà sà bínni Baali-Tamari kànhe e.
Mpii pi mpyi a ŋwɔhɔ ke,
ka pire si fyâlʼa fworo pi taŋwɔhɔyi i Gibeya bafage e.
34 Kàshikwɔnmpiyi kampwɔhii kɛŋi (10.000) u mpyi a cwɔɔnrɔ Izirayɛli tùluyi puni i ke,
ka pire si ŋkàrʼa sà nɔ Gibeya ɲwɔ na.
Kàshigʼà pa ɲáaŋa,
ŋka Bezhamɛ tùluge shiinbii ɲyɛ a mpyi a cè na ku sí ɲùŋɔ kuu kakyara nimbwɔrɔ na pirʼá mɛ.
35 Ka Kafooŋi si Bezhamɛ tùluge shiinbii bwɔ̀n a kan Izirayɛli shiinbilʼá.
Ka Izirayɛli shiinbii si kàshikwɔɔnbii shiin kampwɔhii beɲjaaga ná kaŋkuro ná shiin ŋkuu (25.100) bò Bezhamɛ tùluge shiinbilʼe kuru canŋke,
pire mpiimu pi mpyi na jìni kàshikwɔnŋwɔɔni kàshige na ke.
36 Bezhamɛ tùluge shiinbii mpyi a li yaha na pirʼà jà Izirayɛli shiinbii na,
mà li ɲùŋke pyi,
pire mpyi a cyage yaha pi á maa fê,
maa li ta,
Izirayɛli shiinbii mpyi a pi sɔ̀nŋɔre taha pi shiinbii na,
pire mpiimu pi mpyi a ŋwɔhɔ mà Gibeya kànhe kwûulo ke.
37 Ka pire shinŋwɔhɔbii si ntílʼa kà a fworʼa cwo Gibeya kànhe na,
maa kàshikwɔnŋwɔɔni tɛ̀gʼa ku shiinbii puni bò.
38 Izirayɛli shiinbii mpyi a ɲwɔ tàafyeŋi wà na,
na mpii pi à ŋwɔhɔ ke,
pire sí naŋgurugo nimbwɔhɔ yîrige kànhe e.
39 Izirayɛli shiinbii mpyi na fî Bezhamɛ tùluge shiinbii yyaha na.
Lire mpyi a Bezhamɛ tùluge shiinbii ta pi à shiin beɲjaaga ná kɛ fiige bò a kwɔ̀ pi e,
fo pi mpyi na ŋko:
«Wuu mɛnʼà sàa jà pi na tooyi nintoroyi fiige.»
40 Ŋka,
lire mpyi a naŋgurugo nimbwɔhɔ ta ku u fwore kànhe e na dùru nìɲyiŋi i.
Ka Bezhamɛ tùluge shiinbii si yyaha kɛ̂ɛnŋʼa wílʼa kànhe puni sógo sógo nage ɲya ku u dùru nìɲyiŋi i.
41 Ka Izirayɛli shiinbii si yyaha kɛ̂ɛnŋɛ Bezhamɛ tùluge shiinbii kurugo,
ka pire si fyá sèlʼe,
ɲaha kurugo yɛ,
pi mpyi a li ɲya na kakyaare nimbwɔɔre ɲyɛ pire woro.
42 Ka pi i wa na fî Izirayɛli shiinbii yyaha na,
na wà síwage kuni i.
Ka Izirayɛli shiinbii si ɲcyán pi fye e,
mpii pi mpyi a fworo kànhe e ke,
maa pire bò kuni na.
43 Pi à Bezhamɛ tùluge shiinbii kwûulo maa pi ɲwɔhɔ lwɔ́,
maa pi bùu fo mà sà nɔ Gibeya kànhe ɲwɔge na,
ku canŋafyinmɛ yyéreŋi i.
44 Shiin kampwɔhii kɛ ná baataanre (18.000) pi à bò Bezhamɛ tùluge shiinbilʼe.
Pire puni mpyi kàshikwɔnmpiye.
45 Mpii pi à kàntugo le mà fê a kàre síwage kàmpanŋke na,
Irimɔ kafaage cyage e ke,
Izirayɛli shiinbilʼà shiin kampwɔhii kaŋkuro (5.000) bò pire e kuni na.
Maa ɲcyán pi fye e fo mà sà nɔ Gidɔmi kànhe na,
maa shiin kampwɔhii shuunni (2.000) bò pi e.
46 Bezhamɛ tùluge shiinbii pi à bò kuru canŋke ke,
pi punʼà pyi shiin kampwɔhii beɲjaaga ná kaŋkuro (25.000),
mpiimu pi mpyi na jìni kàshikwɔnŋwɔɔni kàshige na ke.
Pire puni mpyi kàshikwɔnmpiye.
47 Shiin ŋkwuu baaniŋi (600) u à kàntugo le mà fê a kàre Irimɔ kafaage cyage e ke,
pirʼà yiɲyɛ sicyɛɛre pyi wani.
48 Ka Izirayɛli shiinbii si núrʼa pa Bezhamɛ tùluge shiinbii mɛɛ na,
maa kàshikwɔnŋwɔɔni tɛ̀gʼa pi bò,
mà lwɔ́ kànyi shiinbii na,
mà pa yatɔɔrʼá mà sà nɔ yaayi puni pi à ta wani ke.
Kànyi yi mpyi wani ke,
pi à nage le yire puni na.