Bezhamɛ tùluge cyeebii taŋkanni
21
Izirayɛli shiinbii mpyi a kâa mà pi yaha Misipa kànhe e na:
«Wuu wà sì u pworo kan nàmbaga na Bezhamɛ tùluge shin á mɛ.»
2 Ka sùpyire si ŋkàre Bɛtɛli i maa sà ntɛ̀ɛn Kafooŋi yyaha taan fo mà sà nɔ yàkoŋke na.
Pi à kwuuyi wà maa myahigii sú maa ɲyilwɔhɔ niɲyahaga wu,
3 maa jwo:
«Ei Kafooŋi,
Izirayɛli u Kileŋi,
ɲaha shi kʼà pa ná lʼe ka tùlugo niŋkin si fô Izirayɛli tùluyi i niɲjaa yɛ?»
4 Kuru canŋa nùmpanŋa ɲyɛ̀sɔɔge na,
ka sùpyire si yîri maa sáraya tawwugo yaa kuru cyage e,
maa sárayi nizogoyi ná funntanga sárayi wwû.
5 Ka Izirayɛli shiinbii si jwo:
«Izirayɛli tùluyi puni i,
jofoo u à pyi pa mbàa sùpyire tabinnage e Kafooŋi yyaha taan yɛ?
Ɲaha kurugo yɛ,
wuu mpyi a kâa maa jwo:
“Ŋgemu kampyi pa mbàa Kafooŋi yyaha taan Misipa e ke,
urufoo sí n-bò.”»
6 Bezhamɛ tùluge shiinbii ɲùɲaare mpyi a pi cìnmpyiibii Izirayɛli shiinbii ta,
ka pi i jwo:
«Tùlugo niŋkin na ŋko si mpînni ŋkwɔ̀ niɲjaa Izirayɛli shiinbii shwɔhɔlʼe.
7 Mpii pi à pôlʼa shwɔ ke,
ɲaha wuu sí n-pyi si cyee ta si ŋkan pirʼá yɛ?
Ɲaha kurugo yɛ,
wuu à kâa Kafooŋi na,
na wuu sì wuu pworobii kan pi á nàmbaya na mɛ.»
8 Ɲyɛ ka pi i jwo:
«Izirayɛli tùluyi i,
wà à pyi pa mbàa Kafooŋi yyaha taan Misipa e la?»
Ka li i mpa nta,
Galadi kùluni i,
Yabɛsi kànhe shinŋi wà niŋkin ɲyɛ a sàa pa sùpyire tabinnige e Misipa e Kafooŋi yyaha taan mɛ.
9 Pi à sùpyire tɔ̀rɔ ke,
ka li i mpa nta na Yabɛsi kànhe shin niŋkin ɲyɛ a sàa pa mà yîri Galadi kùluni i mɛ.
10 Ka sùpyire si kàshikwɔɔnbii shiin kampwɔhii kɛ ná shuunni (12.000) tun pi mɛɛ na,
maa pi pyi:
«Yii a sì yii i sà kàshikwɔnŋwɔɔni tɛ̀gʼa Yabɛsi shiinbii bò Galadi kùluni i,
yii bâra pi cyeebii ná nàŋkopyire na.
11 Nde yii sí n-pyi ke,
lire li ɲyɛ,
mà nàmbaabii puni bò yii bâra ceewe maha ceewe u à nɔ̀ shi cè mà ɲya ke.»
12 Ka pi i sà pùcempyire ŋkwuu sicyɛɛre (400) ta nɔ̀ shi cè mbàa Yabɛsi shiinbilʼe Galadi kùluni i.
Ka pi i ŋkàre ná pire e Silo kànhe e Kana kìni i.
13 Bezhamɛ tùluge shinpaanre ti mpyi a fê a sà ŋwɔhɔ Irimɔ kafawyiyʼe ke,
ka sùpyire puni si tùnntunmii tun pi á pi sà kàshige ŋkwòŋi kyaa jwo pi á.
14 Ka Bezhamɛ tùluge shiinbii si mpa lire tèni i.
Yabɛsi shiinbii pùcempyire e pi à pa mà yîri Galadi kùluni i ke,
ka pi i tire kan pi á,
ŋka pi puni ɲyɛ a pìi ta mɛ.
15 Sùpyirʼà Bezhamɛ tùluge shiinbii ɲùɲaara ta,
ɲaha kurugo yɛ,
Kafooŋi mpyi a Izirayɛli tùluyi páha.
16 Ka sùpyire kacwɔnribii si jwo:
«Mpii sanmpiipi ɲyɛ cyee bàa ke,
ɲaha wuu sí n-pyi si pìi ta ŋkan pirʼá yɛ?
Ɲaha kurugo yɛ,
Bezhamɛ tùluge cyeebii punʼà bò.»
17 Pi à jwo:
«Bezhamɛ tùluge shinpaanre tʼà kwôro ke,
cyeelʼà yaa pi ta a kan pirʼá,
bà li si mpyi,
tùlugo nimpuŋɔ kà ŋkwɔ̀ n-pînni Izirayɛli tùluyi i mɛ.
18 Ŋka,
wuu sì n-jà wuu pworobii kan pi á mɛ,
ɲaha kurugo yɛ,
Izirayɛli shiinbilʼà kâa mà kwɔ̀ na:
“Ŋgemu ká u pworo kan Bezhamɛ tùluge shin á ke,
urufolʼà láŋa.”»
19 Ka pi i jwo:
«Wíi,
yyee maha yyee wuu maha kataan pyi Kafooŋi á Silo e.
Kuru kànhe na ɲyɛ Bɛtɛli suumɔ kùlu yyére.
Bɛtɛli kuni lʼà kàre Sikɛmu kàmpanŋke na ke,
maa mpyi lire canŋafyinmɛ yyéreŋi i,
maa mpyi Labona wwòro kùlu yyéreŋi.»
20 Ka pi i Bezhamɛ tùluge shiinbii pyi:
«Yii a si yii i sà mbàŋi le ɛrɛzɛn cikooyi i,
21 yii raa kàanmucyage pyi.
Silo pùcempyire ká mpa fworo na ŋkwɔ̂hɔli,
yii i fworo ɛrɛzɛn cikooyi i,
yii shin maha shin u Silo pùcembili niŋkin cû u pyi u cwo,
yii i núru yii a sì yii kùluni i.
22 Pi tiibii lire ɲyɛ mɛ,
pi cìnmpyiibii ká mpa pi mùmpɛnmɛ jwo wuu á,
wuu si pi pyi:
“Yii náaŋa yii i pi yaha pi á,
ɲaha kurugo yɛ,
wuu ɲyɛ a ceewe ta shin maha shin á kàshige cyage e mɛ.
Yii bà pi à pi kan pi á mɛ,
lire e ke,
tìgire ɲyɛ yii na mɛ.”»
23 Lire Bezhamɛ tùluge shiinbilʼà pyi.
Pi à pùcempyire yaha ti i ŋkwɔ̂hɔli,
ka pi shin maha shin si là cû.
Ka pi i ŋkàre ná pi e pi cyage e,
maa sà kànyi núruŋʼa faanra maa ntɛ̀ɛn yʼe.
24 Lire tèenuuni i,
ka Izirayɛli shiinbii si núrʼa kàre,
pi shin maha shin,
u tùluge e,
u pyɛnge e,
u nàzhan taare e.
25 Lire tèni i saanwa mpyi Izirayɛli shiinbii ɲùŋɔ na mɛ.
Pi shin maha shin mpyi na u ɲyii karigii pyi.