Zhozuwe à shiin shuunni tun pi sà Zheriko ŋwɔhʼa wíi
2
Nuni jyaŋi Zhozuwe à tɛ̀ɛn Shitimu kànhe e maa shiin shuunni ŋwɔhʼa tun maa yi jwo pi á:
«Yii sà kìni ŋwɔhʼa wíi,
mà cye cyán Zheriko kànhe na.»
Ka pi i ŋkàre,
pi à sà nɔ ke,
maa ŋkàrʼa sà n-tîrige fwòroba cwoŋi wà yyére,
uru mɛgɛ na ɲyɛ Arahabu,
maa sínni wani.
2 Ka wà si sà Zheriko saanŋi pyi:
«Wíi,
Izirayɛli shiinbii pìlʼà pa naha ŋke numpilage e si mpa kìni ŋwɔhɔ ŋgíi.»
3 Ɲyɛ ka Zheriko saanŋi si tùnturo tun Arahabu á na:
«Nàmbaabii pi à pa mu yyére maa sunmbage lèŋɛ mu pyɛnge e ke,
pi yige,
ɲaha kurugo yɛ,
pi à pa si mpa kìni puni ŋwɔhɔ ŋgíi.»
4 Ŋka Arahabu mpyi a nàampii shuunniŋi ŋwɔhɔ,
maa jwo:
«Sèe wi,
nàampii pìlʼà nɔ naha mii yyére,
ŋka mii ɲyɛ a mpyi a pi tayirige cè mɛ.
5 Canŋaɲyicwuure na,
pi à láha a fworo mà jwo kànhe tajyiɲwɔyi yi tò ke.
Mii ɲyɛ a pi takaraga cè mɛ.
Yii pi fyè le fwɔfwɔ,
yii sí n-jà pi kɔ̀rɔ ɲcû.»
6 Lirʼà ta,
u mpyi a pi pyi pi à dùgo u bage kàtanŋke ɲuŋʼi maa pi ŋwɔhɔ kacyeere ɲwɔhʼi,
u mpyi a tire bínni wani.
7 Ka saanŋi tùnntunmpii si Zhurudɛn baŋi tɔɔrɔfeebii tajyilige kuni lwɔ́ na pi fyè leni.
Pi à fworo ke,
ka pi i ntílʼa kànhe tajyiɲwɔge tò.
8 Mà jwo nàampii shuunniŋi pi sínni ke,
ka Arahabu si dùgo pi fye e bage kàtanŋke ɲuŋʼi.
9 U à sà pi pyi:
«Mii à cè na Kafooŋi à nde kìni kan yii á.
Wuu na fyáge yii na,
kìni sùpyire puni funɲyʼà sàa pɛn yii yyaha na,
10 ɲaha kurugo yɛ,
wuu à lógo na Kafooŋi à Suumpe Lwɔhe Niɲyage waha yii yyaha yyére yii tèefworoni i Misira kìni i.
Pyiŋkanni na yii à Amori shiinbii saanbii shuunniŋi,
Siyɔn ná Ɔgi shi tò Zhurudɛn baŋi canŋafyinmpe e ke,
wuu à lire lógo mú.
11 Wuu à yire lógo ke,
wuu zòompilʼà kwòro,
zòntarawa foo sàha ɲyɛ a ta si n-yyére yii sige mɛ,
ɲaha kurugo yɛ,
Kafooŋi,
yii Kileŋi u ɲyɛ nìɲyiŋi ná ɲìŋke Kileŋi.
12 Numɛ,
mii na yii ɲáare,
yii kâa Kafooŋi na na á,
na kacɛnni mii à pyi yii á ke,
yii sí lire fiige pyi mii tuŋi pyɛngɛshiinbilʼá.
Yii kyaa pyi na á ndemu li sí li fíniŋɛ ɲcyêe mii na,
13 na yii sí mii tuŋi ná mii nuŋi ná mii cìmpyiibii,
nɔ bâra ceewe na,
ná pi pyɛngɛ shiinbii puni yaha bòmbaa ke,
na yii sì wuu yaha pi bò mɛ.»
14 Ka nàampii si jwo:
«Wuu à kâa,
mu aha mpyi mu ɲyɛ a wuu kyaa jwo wà á mɛ,
wuu sí wuu munahigii yaha mu wuuni laagʼe.
Kafooŋi ká kìni kan wuu á tèni ndemu i ke,
wuu sí kacɛnnɛ pyi mu á si wuu ɲwɔmɛɛni fûnŋɔ.»
15 Ɲyɛ ka Arahabu si mɛɛrɛ tɛ̀gʼa pi yige fìnɛtiriŋi i mà tîrige kànha kàntugo yyére,
ɲaha kurugo yɛ,
u bage mpyi a faanrʼa sogo kànhe káaŋke na.
16 Mà jwo u pi tìrige ke,
u à pi pyi:
«Yii a wà ɲaɲyi kàmpanŋke na,
yii àha ŋkwɔ̀ ɲcíri ná yii fyètɔrɔfeebilʼe mɛ.
Yii sà ŋwɔhɔ wani canmpyaa taanre funŋʼi fo pi aha núrʼa pa kànhe e,
yii i nta a fworo yii a sì.»
17 Ka nàampii si u pyi:
«Wùŋkanni na wuu sí wuu kàage wwû mu á ke,
lire li nde:
18 Wuu aha bú n-pa kìni i,
fìnɛtiriŋi i mu à wuu yige ke,
ma a nte mɛɛre niɲyɛɛre pwɔ uru na.
Ma a ma tuŋi ná ma nuŋi ná ma cìnmpyiibii ná ma pyɛngɛ shiinbii puni bínni ma bage e.
19 Pi wà ká fworo mu bage e mà kàre cyíinŋi na,
urufoo kwùŋi na ɲyɛ u niɲcyaa,
wuu fyè bà mɛ.
Ŋka,
shin maha shin u ɲyɛ ná mu i bage e ke,
wà cye ká nɔ uru wà na,
urufoo kwùŋi tugure ɲyɛ wuu ɲuŋʼi.
20 Ŋka mu aha wuu naha mpaŋi jwo,
kàage mu à pyi wuu à pyi ke,
kuru sí n-fyìinnɛ.»
21 Ka Arahabu si jwo:
«Ɔɔn,
mii à ɲɛɛ.»
Ɲyɛ ka u u pi yaha pi à kàre.
Pi à kàre ke,
ka u u mɛɛre niɲyɛɛre pwɔ u fìnɛtiriŋi na.
22 Ka nàampii si ŋkàre ɲaɲyi i,
maa ŋwɔhɔ wani canmpyaa taanre fo mà sà yaa ná pi fyètɔrɔbilʼe pi à núrʼa pa.
Pirʼà pi cya cyeyi puni i pi ɲyɛ a pi ɲya mɛ.
23 Ka nàampii shuunniŋi si n-tîge ɲaɲyi ɲuŋʼi,
maa Zhurudɛn baŋi jyiile mà kàre Nuni jyaŋi Zhozuwe cyage e,
karigii pi à ɲya ke,
maa sà cyire puni jwo Zhozuwe á.
24 Pi à u pyi:
«Sèeŋi na,
Kafooŋi à kìni puni kan wuu á.
Kìni shiinbii puni bá wa a sàa fyá wuu yyaha na.»