Zhurudɛn baŋi ɲjyiliŋi
3
Zhozuwe à sôlʼa yîri,
ka u ná Izirayɛli shiinbii puni si yîri Shitimu kànhe e mà kàre Zhurudɛn baŋi ɲwɔge na,
maa shwɔ̀n wani mà jwo pi baŋi jyiile ke.
2 Canmpyaa taanre tatoroge e,
ka yyaha yyére shiinbii si tatɛɛnge puni ɲaara,
3 maa yi jwo sùpyirʼá:
«Sáragawwuubii pi ɲyɛ Levi tùluge shiinbii pi ke,
yii aha pa pire ɲya pi à Kafooŋi,
yii Kileŋi tunmbyaare mbwùuni lwɔ́ tèni ndemu i ke,
yii i yîri yii tatɛɛnge e yii taha pi fye e.
4 Lire ká mpyi,
kuni i yii sí n-shà ke,
yii sí lire cè,
ɲaha kurugo yɛ,
yii sàha ntêlʼa shà lire kuni mɛ.
Ŋka,
yii àha n-file ntòro tunmbyaare mbwùuni na mɛ.
Yii i kilomɛtiri niŋkin yaha yii ná li shwɔhɔlʼe.»
5 Ka Zhozuwe si sùpyire pyi:
«Yii yiye fíniŋɛ,
ɲaha kurugo yɛ,
Kafooŋi sí kakyanhala karii pyi yii shwɔhɔlʼe nùmpanŋa.»
6 Kuru canŋa nùmpanŋa,
ka Zhozuwe si sáragawwuubii pyi:
«Yii tunmbyaare mbwùuni lwɔ́ yii tòro sùpyire yyaha na.»
Ka pire si tunmbyaare mbwùuni lwɔ́ mà tòro sùpyire yyaha na.
7 Ka Kafooŋi si Zhozuwe pyi:
«Mii sí li ɲwɔ cû sʼa mu dùruge Izirayɛli shiinbii puni ɲyii na niɲjaa,
bà pi si mpyi si li cè,
na mii sí n-pyi ná mu i bà mii mpyi ná Musa e mɛ.
8 Sáragawwuubii pi à tunmbyaare mbwùuni tugo ke,
yi jwo pirʼá:
“Yii aha nɔ Zhurudɛn baŋi na,
maa jyè lwɔhe e mà shà yyaha na,
yii i yyére.” »
9 Ka Zhozuwe si Izirayɛli shiinbii pyi:
«Yii file naha yii i Kafooŋi,
yii Kileŋi jwumpe lógo.»
10 U à pi pyi:
«Yii sí li cè na Kileŋi ɲyii wuŋi na ɲyɛ yii shwɔhɔlʼe,
na u sí Kana shiinbii ná Ɛti shiinbii ná Evi shiinbii ná Pɛrɛzi shiinbii ná Girigasi shiinbii ná Amori shiinbii ná Yebusi shiinbii kɔ̀rɔ n-lwɔ́ yii yyaha na.
11 Yii li cè na ɲìŋke puni Kafooŋi tunmbyaare mbwùuni sí n-tòro yii yyaha na si Zhurudɛn baŋi jyiile.
12 Numɛ,
yii nàmbaa kɛ ná shuunni cwɔɔnrɔ Izirayɛli tùluyi shwɔhɔlʼe,
tùlugo maha tùlugo,
nɔ̀ niŋkin.
13 Sáragawwuubii pi sí Kafooŋi,
ɲìŋke puni fooŋi tunmbyaare mbwùuni tugo ke,
pire ká sàa pi tooyi cyán Zhurudɛn baŋi lwɔhe e,
baŋi lwɔhe sí n-tíi ɲcyere.
Lwɔhe ku ɲyɛ na fwu na yîri nìɲyiŋi na ke,
kuru sí n-yyére si mpyi ŋkunnuŋɔ fiige.»
14 Ka sùpyire si yîri pi tatɛɛnge e si Zhurudɛn baŋi jyiile,
sáragawwuubii pi mpyi a tunmbyaare mbwùuni tugo ke,
pire sí ɲyɛ pi yyaha yyére na wà.
15 Sùmakwɔɔngii tèni li mpyi li li.
Zhurudɛn baŋi mpyi maha ɲî a fworo kùŋke na lire tèni i.
Sáragawwuubii pi mpyi a tunmbyaare mbwùuni tugo ke,
pirʼà nɔ baŋi na maa tooyi le lwɔhe e cyage ŋkumu i ke,
16 lwɔhe ku mpyi na fwu na yîri nìɲyiŋi na ke,
ka kuru si yyére mà pyi ŋkunnuŋɔ fiige maa sànhana a kàrʼà sà nɔ Adamu kànhe na,
kuru na ɲyɛ Sarita kànhe taan.
Lwɔhe ku mpyi na fwu na wà suumpe lwɔhe ɲyiiyaaga bàa woge kàmpanŋke na ke,
ka kuru si fwɔ a kàre feefee.
Ka sùpyire si baŋi jyiile Zheriko yyetiimpe na.
17 Sáragawwuubii pi mpyi a Kafooŋi tunmbyaare mbwùuni tugo ke,
ka pire si yyére ɲìŋke niŋgwage ɲuŋʼi Zhurudɛn baŋi niŋke e.
Ka Izirayɛli shiinbii puni si wá na ntùuli na jyiili ɲìŋke niŋgwage ɲuŋʼi fo mà sà jyiilʼa kwɔ̀.