Funɲcwugo kafaayi kɛ ná shuunniŋi
4
Sùpyire punʼà Zhurudɛn baŋi jyiilʼa kwɔ̀ ke,
ka Kafooŋi si Zhozuwe pyi:
2 «Yii shiin kɛ ná shuunni cwɔɔnrɔ sùpyire shwɔhɔlʼe,
tùlugo maha tùlugo,
shin niŋkin.
3 Yii i pi pyi pi jyè Zhurudɛn baŋi niŋke e,
sáragawwuubii mpyi a pi tooyi yyéeŋɛ baŋi nafyiini na cyage ŋkemu i ke,
pi i kafaaya kɛ ná shuunni lwɔ́ kuru cyage e pi a ma pi pa yaha yii tashwɔnge e.»
4 Sùpyire Zhozuwe mpyi a cwɔɔnrɔ tùlugo maha tùlugo shin niŋkin mà fworo Izirayɛli tùluyi kɛ ná shuunniŋi i ke,
ka u u pire yyere,
5 maa pi pyi:
«Yii tòro Kafooŋi,
yii Kileŋi tunmbyaare mbwùuni yyaha na yii a sì Zhurudɛn baŋi niŋke e.
Yii shin maha shin u kafaaga niŋkin lwɔ́ a taha u funkange na u a ma,
Izirayɛli tùlugo maha tùlugo,
kafaaga niŋkin.
6 Yire kafaayi sí n-pyi tàafye yii shwɔhɔlʼe.
Yii pyìibii ká mpa yii yíbe canŋka:
“Ɲje kafaayi ɲwɔhe ɲyɛ ɲaha shi yii á yɛ?”
7 Yii sí pi ɲwɔ shwɔ:
“Zhurudɛn baŋi lwɔhʼà táa mà pyi shuunni Kafooŋi tunmbyaare mbwùuni yyaha na.
Tèni i lʼà jyè Zhurudɛn baŋi lwɔhe e sʼa ntùuli ke,
kʼà táa mà pyi shuunni.
Ɲje kafaayi sí raa Izirayɛli shiinbii funŋɔ cwu tèrigii puni i lire kani na.”»
8 Ka Izirayɛli shiinbii si li pyi bà Zhozuwe à yi jwo pi á mɛ.
Ka pi i sà kafaaya kɛ ná shuunni lwɔ́ Zhurudɛn baŋi niŋke e,
Izirayɛli tùlugo maha tùlugo kafaaga niŋkin,
mà tàanna ná Kafooŋi yi jwuŋkanni i Zhozuwe á,
mà pa yaha pi tashwɔnge e.
9 Sáragawwuubii pi mpyi a tunmbyaare mbwùuni tugo ke,
pire mpyi a jyè a yyére Zhurudɛn baŋi niŋke e cyage ŋkemu i ke,
ka Zhozuwe si kafaaya kɛ ná shuunni lwɔ́ sahaŋki mà sogolo kuru cyage e,
yire na ɲyɛ wani ali niɲjaa.
10 Sáragawwuubii pi mpyi a tunmbyaare mbwùuni tugo ke,
pire niɲjyerebilʼà kwôro Zhurudɛn baŋi niŋke e,
tùnnture Kafooŋi mpyi a jwo Zhozuwe á u à kan sùpyirʼá ke,
fo ka pi i tire puni pyi a nɔ ti tɛgɛni na.
Lire pyiŋkanni na Zhozuwe à Musa tùnnture yige ti kuni i.
Ka sùpyire si baŋi jyiile fwɔfwɔ.
11 Sùpyire punʼà jyiilʼa kwɔ̀ ke,
ka sáragawwuubii si ntòro pi yyaha yyére ná Kafooŋi tunmbyaare mbwùuni i.
12 Ka Urubɛn tùluge ná Gadi woge ná Manase woge niŋɛ taage kàshikwɔɔnbii si ntòro ná pi kàshikwɔnyaayi i Izirayɛli shiinbii sanmpiiyyaha yyére bà Musa mpyi a yi jwo mɛ.
13 Kàshikwɔɔnbii kampwɔhii beeshuunni (40.000) fiige pi à tòro Kafooŋi yyaha taan ná pi kàshikwɔnyaayi i.
Pi mpyi a bégele kàshige mɛɛ na,
na wà Zheriko fage kàmpanŋke na.
14 Kuru canŋke Kafooŋi à Zhozuwe dùrugo Izirayɛli shiinbii puni ɲyii na.
U shìŋi canmpyaagii puni i,
ka pi i wa na fyáge u yyaha na,
bà pi mpyi na fyáge Musa yyaha na mɛ.
15 Ka Kafooŋi si núrʼa Zhozuwe pyi:
16 «Mbwùuni li ɲyɛ na tunmbyaare kyaa yu ke,
sáragawwuubii pi à lire tugo ke,
pire pyi pi fworo Zhurudɛn baŋi i.»
17 Ka Zhozuwe si sàragawwuubii pyi:
«Yii fworo Zhurudɛn baŋi i.»
18 Kafooŋi tunmbyaare mbwùuni tugo tugo sáragawwuubilʼà fworo baŋi i mà pi tooyi cyán kùmpoge na tèni ndemu i ke,
ka Zhurudɛn baŋi lwɔhe si ntílʼa núru ku lyempe e,
mà baŋi ɲî a fworo kùŋke na,
na fwu tèecyiini fiige.
19 Yyeeni yiɲcyiige canmpyi kɛ wuuni i,
Izirayɛli shiinbilʼà Zhurudɛn baŋi jyiile,
maa sà pi vàanɲyi bayi kwòro Giligali i,
Zheriko canŋafyinmpe e.
20 Kafaayi kɛ ná shuunniŋi pi mpyi a lwɔ́ Zhurudɛn baŋi i ke,
Zhozuwe à yire sogolo Giligali i.
21 U à kwɔ̀ ke,
maa Izirayɛli shiinbii pyi:
«Yii pyìibii ká mpa yii yíbe canŋka:
“Ɲje kafaayi ɲwɔhe ɲyɛ ɲaha shi yɛ?”
22 Yii sí yi yyaha jwo pi á na Izirayɛli shiinbilʼà Zhurudɛn baŋi ŋge jyiile ɲìŋgwage na.
23 Ɲaha kurugo yɛ,
Kafooŋi,
yii Kileŋi à Zhurudɛn baŋi lwɔhe waha yii yyaha na ka yii puni si jyiile bà u mpyi a Suumpe Lwɔhe Niɲyage waha ka wuu puni si jyiile mɛ.
24 U à lire pyi,
ɲìŋke supyishiŋi puni si li cè na Kafooŋi fànhʼà ɲyaha,
yii mú sʼa fyáge u na tèrigii puni i.»