Saanbilʼà fyá Izirayɛli shiinbii yyaha na
5
Amori shiinbii saanbii pi mpyi a tɛ̀ɛn Zhurudɛn baŋi canŋacwumpe e ke,
mà bâra Kana shiinbii saanbii pi mpyi a tɛ̀ɛn suumpe lwɔhe ɲwɔge na ke,
tèni i pire punʼà lógo na Kafooŋi à Zhurudɛn baŋi waha Izirayɛli shiinbii yyaha na maa pi pyi pi à jyiile ke,
ka pi zòompii si ŋkwòro,
zòntarawa foo sàha ɲyɛ a ta si n-yyére pi sige mɛ.
Zhozuwe à Izirayɛli shiinbii kwɔ̀n
2 Lire tèni i,
ka Kafooŋi si Zhozuwe pyi:
«Kafaayi yà ɲwɔ wwû ma pyi ŋwɔhii fiige ma tɛ̀gʼa Izirayɛli pùnampyire niŋkwɔnmbaare kwɔ̀n.»
3 Ka Zhozuwe si kafaayi yà ɲwɔ wwû mà tɛ̀gʼa Izirayɛli pùnampyire kwɔ̀n Aralotia mpwùuni na.
4 Ɲùŋke na Zhozuwe à Izirayɛli shiinbii kwɔ̀n ke,
kuru ku ɲyɛ,
pi nivworobii na Misira kìni i,
nàmbaabii pi mpyi a nɔ kàshikwɔnyaayi ɲjwòŋi na ke,
pire punʼà kwû kuni na,
mà pi yaha pi i síwage jyiili.
5 Tèni i pi à fworo Misira kìni i ke,
nàmbaabii puni mpyi a kwɔ̀n,
ŋka pi fworoŋkwooni kàntugo,
pùnampyire tʼà si mà pi yaha síwage e pi i ku jyiili ke,
pire ɲyɛ a mpyi a kwɔ̀n mɛ.
6 Izirayɛli shiinbilʼà yyee beeshuunni ɲara pyi síwage e.
Cyire yyeegii funŋke e,
nàmbaabii pi mpyi a nɔ kàshige na,
pi nivworobii na Misira kìni i ke,
pire punʼà kwû mà li ɲùŋke pyi,
pi ɲyɛ a Kafooŋi ɲwɔmɛɛni cû mɛ.
Kafooŋi mpyi a kâa,
na kìni ɲwɔmɛɛni urʼà lwɔ́ si ŋkan pi tulyeyʼá ná lʼà ɲî na fwu sɛɛre ná nùjyirimpe na ke,
na pi sì lire ɲya mɛ.
7 Pi pyìibii Kafooŋi à pyi pi à jyè pi cyaga.
Pire Zhozuwe à kwɔ̀n,
ɲaha kurugo yɛ,
mà pi yaha ɲani na,
pi mpyi a kwɔ̀n mɛ.
8 Pi punʼà kwɔ̀n a kwɔ̀ ke,
ka pi i ntɛ̀ɛn pi tatɛɛnge e mà sà yaa ná nɔɔyi ŋkwɔ̀ŋi i.
9 Ɲyɛ ka Kafooŋi si Zhozuwe pyi:
«Silige e yii à fworo Misira kìni i ke,
mii à kuru láha yii na niɲjaa.»
Lire kurugo kuru cyage mɛgʼà le Giligalib.
Kuru ku ɲyɛ kuru cyage mɛge fo mà sà nɔ niɲjaa na.
Bilereŋkwoŋi kataanni
10 Izirayɛli shiinbilʼà tɛ̀ɛn Giligali i,
maa bilereŋkwoŋi kataanni pyi yiŋke canmpyi kɛ ná sicyɛrewuuni yàkoŋke,
Zheriko fage e.
11 Kuru canŋa numpanŋa,
ka pi i bwúuruŋi niɲjirigembaaŋi wà ná sùmafwɔge kà lyî.
Kìni yalyire tà ti mpyi tire.
Pi à tire lyî kuru canŋke.
12 Mà lwɔ́ kuru canŋke na,
maniŋi sàha ɲyɛ a tîge Izirayɛli shiinbilʼá mɛ.
Ka pi i wa na Kana kìni yafaayi lyî lire yyeeni i.
Zhozuwe ná Kafooŋi kàshicyɛge yyaha yyére shinŋi kani
13 Mà Zhozuwe yaha Zheriko kànhe taan,
u à pâlʼa nàŋi wà ɲya u à yyére u yyaha na,
kàshikwɔnŋwɔɔ sí ɲyɛ u cye e u à wwû li fwuuni i.
Ka Zhozuwe si file u na maa u yíbe:
«Wuu wà u ɲyɛ mu laa,
wuu zàmpɛn u ɲyɛ mu?»
14 Ka nàŋi si u pyi:
«Ɔnhɔ!
Yii wà wu bà u ɲyɛ mii mɛ,
Kafooŋi kàshicyɛge ɲùŋufooŋi u ɲyɛ mii,
mii sʼà pa numɛ.»
Ka Zhozuwe si niŋkure sín maa yyahe cyígile ɲìŋke na maa u pyi:
«Mii kàfooŋi,
ɲaha shi mii à yaa mii i pyi yɛ?»
15 Ka Kafooŋi kàshicyɛge yyaha yyére shinŋi si u pyi:
«Ma tanhayi wwû ma tooyi na,
ɲaha na yɛ cyage e mu a yyére amɛ ke,
kuru cyage ɲyɛ Kile wogo.»
Ka Zhozuwe si lire pyi.