Zheriko ɲjyaŋi
6
Zheriko kànhe tajyiɲwɔyi puni mpyi a yalʼa tò maa yi shwɔ̂hɔ Izirayɛli shiinbii yyahafyagare na.
Wà saha mpyi na fwore mɛ wà mú mpyi na jyè mɛ.
2 Ka Kafooŋi si Zhozuwe pyi:
«Wíi,
mii à Zheriko saanŋi ná u kàshikwɔnmpiyi le mu cye e.
3 Mu ná ma kàshikwɔɔnbii puni,
yii sí kànhe mâhana tɔɔgɔ niŋkin canŋa maha canŋa zà nta canmpyaa baani.
4 Sáragawwuubii shiin baashuunni sí n-tòro tunmbyaare mbwùuni yyaha na,
pi shin maha shin sí n-pyi ná mpúruwalʼe,
mpàpooŋi ɲɛnʼà tɛ̀gʼa ndemu yaa ke.
Canmpyibaashwɔnwuuni,
yii i kànhe mâhana tooyo baashuunni mà sáragawwuubii yaha pi i mpúruwaagii wyì.
5 Pi aha mpa mpúruwaagii wyì nɛntɔɔngɔ na tèni ndemu i ke,
sùpyire puni sí n-kwúulo sèlʼe.
Lire ká mpyi,
kànhe káaŋke puni sí n-cwo,
Izirayɛli kàshikwɔɔnbii puni sí n-jyè pi yyetiimpe na kànhe e.»
6 Ka Nuni jyaŋi Zhozuwe si sáragawwuubii yyere maa pi pyi:
«Yii Kafooŋi tunmbyaare mbwùuni lwɔ́.
Yii shiin baashuunni sí n-tòro tunmbyaare mbùuni yyaha na ná mpàpooŋi ɲɛɛŋkii mpúruwaagilʼe.»
7 U à kwɔ̀ ke,
maa sùpyire pyi:
«Yii ɲaarʼa kànhe mâhana,
kàshikwɔnyaayi feebii pi tòro Kafooŋi tunmbyaare mbwùuni yyaha na.»
8 Ka karigii puni si ntòro Zhozuwe cyi jwuŋkanni na.
Mpàpooŋi ɲɛɛŋkii baashuunniŋi mpúruwaagii mpyi sáragawwuubii baashuunniŋi mpiimu cye e Kafooŋi yyahe taan ke,
ka pire si ntòro tunmbyaare mbwùuni yyaha na,
maa pi mpúruwaagii wyì.
9 Sáragawwuubii pi mpyi na mpúruwaagii wyì ke,
kàshikwɔɔnbii yyaha yyére shiinbii mpyi pire yyaha yyére ná pi kàshikwɔnyaayi i,
ka kàshikwɔɔnbii kàntugoyyere wuubii si ntaha tunmbyaare mbwùuni fye e.
Mà pi yaha ɲani na,
sáragawwuubii mpyi na mpúruwaagii wyì na wà.
10 Zhozuwe mpyi a sùpyire pyi:
«Yii àha raa tùnmɔ pyi mɛ,
yii àha raa yu mɛ.
Yii fyâha fo mii aha jwo yii kwúulo tèni ndemu i ke,
yii i nta a kwúulo.»
11 Ka pi i Kafooŋi tunmbyaare mbwùuni tɛ̀gʼa kànhe mâhana tɔɔgɔ niŋkin,
maa núrʼa kàrʼa sà shwɔ̀n pi vàanɲyi bayi i.
12 Kuru canŋa nùmpanŋa,
ka Zhozuwe si sôlʼa yîri,
ka sáragawwuubii si Kafooŋi tunmbyaare mbwùuni lwɔ́ a taha pi funkanɲyi na.
13 Sáragawwuubii baashuunniŋi u mpyi ná mpàpooŋi ɲɛɛŋkii baashuunniŋi mpúruwaagilʼe Kafooŋi tunmbyaare mbwùuni yyaha yyére ke,
ka pire si wá na pi mpúruwaagii wyì na wà Kafooŋi tunmbyaare mbwùuni yyaha na.
Kàshikwɔɔnbii yyaha yyére shiinbii mpyi na wà sáragawwuubii yyaha na,
kàntugo yyére wuubii sʼà taha Kafooŋi tunmbyaare mbwùuni fye e na wà.
Mà pi yaha ɲani na,
sáragawwuubii mpyi na pi mpúruwaagii wyì na wà.
14 Kuru cannuge,
ka pi i ɲaarʼa kànha mâhana tɔɔgɔ niŋkin,
maa núrʼa kàre pi vàanɲyi bayi i.
Pi à lire pyi amuni mà sà nta canmpyaa baani.
15 Canmpyibaashwɔnwuuni,
ka pi i wyɛ̀rʼa yîri ɲyɛ̀kwɔnge na,
maa kànhe mâhana tooyo baashuunni lire pyiŋkanni ninuuni na.
Kuru canŋke kanni pi à kànhe mâhana tooyo baashuunni.
16 Toobaashwɔnwoge na,
sáragawwuubilʼà pi mpúruwaagii wyì ke,
ka Zhozuwe si sùpyire pyi:
«Yii kwúulo!
Kafooŋi à kànhe le yii cye e.
17 Kànhe ná ku funŋɔ yaayi puni sí shi tò Kafooŋi á.
Fwòrobacwoŋi Arahabu ná u pyɛngɛ shiinbii kanni pi sí n-yaha bòmbaa,
ɲaha kurugo yɛ,
uru u à wuu tùnntunmpii ŋwɔhɔ.
18 Yii a yiye kàanmucaa!
Yaaga maha yaaga kʼà yaha Kafooŋi yaharʼe ke,
yii àha kuru kà lwɔ́ mɛ.
Lire baare e,
yii sí kapii nɔ Izirayɛli shiinbii tatɛɛnge na si ku kɛ̀ɛge.
19 Wyɛ́rɛfyinŋi puni ná sɛɛnŋi puni ná dàɲyɛŋi yaayi ná tɔɔnte wuyi puni sí n-yaha Kafooŋi yaharʼe,
yi sí n-yaha u nàfuuŋi tayahage e.»
20 Ɲyɛ,
sùpyirʼà mpúruwaagii mɛɛni lógo ke,
ka pi i ŋkúulo fànha na,
ka kànhe káaŋke si ntílʼa cwo.
Ka Izirayɛli shiinbii kàshikwɔɔnbii si ŋkà a jyè,
shin maha shin u yyetiimpe na kànhe e,
ka pi i kànhe cû.
21 Ka pi i kànhe shiinbii puni bò,
nɔ̀ bâra ceewe na,
nàŋkocyaawa bâra shinlye na,
fo mà sà nɔ nìiyi ná mpàabii ná dùfaaɲyi na.
Pi à yire puni bò ná kàshikwɔnŋwɔɔni i.
Arahabu ná u pyɛngɛshiinbilʼà shwɔ
22 Nàampii shuunniŋi pi mpyi a sà kànhe ŋwɔhʼa wíi ke,
ka Zhozuwe si yi jwo pirʼá:
«Yii shà Arahabu pyɛnge e,
yii i sà u ná u pyɛngɛ shiinbii puni yige bà yii mpyi a kâa u á mɛ.»
23 Pire nàɲjiibii shuunniŋi pi à sà kànhe ŋwɔhɔ a wíi ke,
ka pire si ŋkàre Arahabu pyɛnge e,
maa sà u ná u tuŋi ná u nuŋi ná u cìnmpyiibii ná u pyɛngɛ shiinbii sanmpiipuni yige.
Pi à u ná u pyɛngɛ shiinbii puni yige mà sà yaha Izirayɛli shiinbii tatɛɛnge ŋkère na.
24 Lire kàntugo,
ka Izirayɛli shiinbii si kànhe ná ku funŋɔ yaayi puni súugo fo mà yaha wyɛ́rɛfyinŋi yaayi ná sɛɛnŋi wuyi ná dàɲyɛŋi wuyi ná tɔɔnte wuyi.
Pi à yire lwɔ́ a sà yaha Kafooŋi pyɛnge nàfuuŋi tayahage e.
25 Zhozuwe à fworobacwoŋi Arahabu ná u tuŋi pyɛngɛ shiinbii yaha bòmbaa ná u cyeyaayi i.
Arahabu saha na ɲyɛ Izirayɛli shiinbii shwɔhɔlʼe ali niɲjaa,
ɲaha kurugo yɛ,
Zhozuwe mpyi a nàampii mpiimu tun pi sà Zheriko kànhe ŋwɔhʼa wíi ke,
Arahabu u mpyi a pire ŋwɔhɔ.
26 Lire tèni i,
ka Zhozuwe si ŋkâa maa jwo:
«Shin maha shin ká yîri si Zheriko kànhe faanra sahaŋki ke,
Kafooŋi u urufoo láŋa.
Urufoo ká kànhe nintaani wwû canŋke ŋkemu i ke,
u jyaŋi niɲcyiiŋi u kwû.
U aha ku bàrayi le canŋke ŋkemu i ke,
u jyaŋi nizanŋi u kwû.»
27 Kafooŋi mpyi ná Zhozuwe e,
ka u mɛtange si fworo kìni puni i.