Akan kapiini nimpyiini kakyaare
7
Yaayi yi mpyi a yaa yi yaha Kafooŋi yaharʼe ke,
Izirayɛli shiinbilʼà ɲwɔmɛyahare pyi yire kàmpanŋke na.
Zhuda tùluge shinŋi mɛgɛ ku ɲyɛ Akan,
ná u tuŋi mɛgɛ ɲyɛ Karimi,
Karimi tuŋi mɛgɛ sí ɲyɛ Zabidi,
Zabidi tuŋi mɛgɛ sí ɲyɛ Zera ke,
uru mpyi a yire yaayi yà ŋwɔhʼa lwɔ́.
Lirʼà pyi ke,
ka Kafooŋi lùuni si yîri sèlʼe Izirayɛli shiinbii taan.
2 Mà pi yaha Zheriko e,
Zhozuwe à pìi yaha a kàre Ayi kànhe e,
maa pi pyi:
«Yii sà kànhe ŋwɔhʼa wíi.»
Ka pire si ŋkàrʼa sà kànhe ŋwɔhʼa wíi.
Ayi kànhe ná Bɛti-Avɛni kànhe laage ɲyɛ a tɔɔn mɛ,
maa mpyi Bɛtɛli canŋafyimpe e.
3 Pi à núrʼa pa ke,
maa Zhozuwe pyi:
«Kàshikwɔɔnbii puni kakarala wà Ayi mɛɛ na mɛ.
Shiin kampwɔhii shuunni (2.000) lire ɲyɛ mɛ,
kampwɔhii taanre (3.000) wa na si n-jà.
Mʼàha sùpyire puni yaha ti tiye kànha a kàre mɛ,
ɲaha kurugo yɛ,
pi wà a ɲyaha mɛ.»
4 Ka shiin kampwɔhii taanre (3.000) laage si ŋkàre pi mɛɛ na,
ŋka pi à fê Ayi shiinbii yyaha na.
5 Ayi shiinbilʼà shiin beɲjaaga ná kɛ ná baani laage bò Izirayɛli shiinbilʼe,
maa pi sanmpiiɲwɔhɔ lwɔ́ mà lwɔ́ kànhe ɲwɔge na mà sà nɔ fo Shebarimu taan,
maa pi bwɔ̀n a caala ɲaŋke tatigege e.
Ka Izirayɛli shiinbii si fyá fo ma pi yatanɲyi bò.
6 Ka Zhozuwe ná Izirayɛli kacwɔnribii nàvunŋɔ wuubii si pi vàanɲyi cwɔn,
maa cwɔɔnre kulʼa wu pi ɲùɲyi i,
maa niŋkure sín,
maa yyahe cyígile ɲìŋke na Kafooŋi tunmbyaare mbùuni yyaha yyére fo mà sà nɔ yàkoŋke na.
7 Ka Zhozuwe si jwo:
«Ei Saanbwɔhe Kafooŋi,
ɲaha na mu à wuu yaha wuu à Zhurudɛn baŋi jyiile si mpa wuu le Amori shiinbii cye e pi wuu kakyara amɛ yɛ?
Ká mpyi wuu mpyi a tɛ̀ɛn baŋi kàntugo de!
8 Ɲwɔ na na Kafooŋi,
ɲaha mii sí n-jà n-jwo numɛ mà Izirayɛli shiinbii yaha pi à fê pi zàmpɛɛnbii yyaha na yɛ?
9 Kana shiinbii ná kìni shiinbii sanmpiisí yi lógo.
Pi sí wuu kwûulo si wuu shi bò.
Di mu sí ma mɛge mpèeŋi cyêe ɲjwo yɛ?»
10 Ka Kafooŋi si Zhozuwe ɲwɔ shwɔ na:
«Yîri!
Ɲaha kurugo mu à niŋkure sín a yaha maa yyahe cyígile yɛ?
11 Izirayɛli shiinbilʼà kapii pyi.
Tunmbyaare mii à le ná pi e ke,
pi à tire kɛ̀ɛgɛ.
Yaayi yʼà yaha Kafooŋi yahare e ke,
pi à yire yà lwɔ́,
maa yi nàŋkaaga mà ŋwɔhɔ pi yaayi i.
12 Lire kurugo Izirayɛli shiinbii sì n-jà n-yyére pi zàmpɛɛnbii sige mɛ.
Pi sí raa fî pi yyaha na,
ɲaha kurugo yɛ,
pi ɲyɛ mbòŋi laagʼe.
Yaayi yʼà yaha Kafooŋi yahare e ke,
ná yii ɲyɛ a yire yige yiye shwɔhɔlʼe mɛ,
mii saha sì n-pyi ná yii e mɛ.
13 Yîri maa sùpyire fíniŋɛ.
Yi jwo pi á:
“Yii yiye fíniŋɛ naha ná nùmpanŋa shwɔhɔlʼe.
Ɲaha kurugo yɛ,
Kafooŋi,
Izirayɛli u Kileŋi à jwo na urʼà yii Izirayɛli shiinbii sige yaayi ɲjemu ɲjwò na ke,
yii à yire lwɔ́.
Yii aha mpyi yii ɲyɛ a yi yige yiye shwɔhɔlʼe mɛ,
yii sì n-jà n-yyére yi zàmpɛɛnbii sige mɛ.
14 Nùmpanŋa ɲyɛ̀gɛ na,
yii sí n-file tùluyo tùluyo.
Kafooŋi ká tùluge ŋkemu cyêe ke,
kuru sí n-file pyɛnyɛ pyɛnyɛ.
Kafooŋi ká pyɛnge ŋkemu cyêe ke,
kuru sí n-file baya baya.
Kafooŋi ká bage ŋkemu cyêe ke,
kuru nàmbaabii sí n-file niŋkin niŋkin.
15 Nàŋi ŋgemu ká ɲcyêe na uru u à kuru yalwɔmbaage lwɔ́ ke,
uru ná u cyeyaayi puni sí n-súugo.
Ɲaha kurugo yɛ,
u à Kafooŋi tunmbyaare kafuun pyi.
U à silige kyaa pyi Izirayɛli shiinbii shwɔhɔlʼe.” »
16 Kuru canŋa nùmpanŋa,
ka Zhozuwe si sôlʼa yîri,
maa Izirayɛli shiinbii pyi pi à file tùluyo tùluyo.
Ka Zhuda tùluge si mpa ɲcyêe.
17 Ka u u Zhuda shiinbii pyi pi à file pyɛnyɛ pyɛnyɛ.
Ka Zera pyɛnge si mpa ɲcyêe.
Ka u u kuru pyɛnge pyi kʼà file baya baya.
Ka Zabidi bage si mpa ɲcyêe.
18 Ka u u kuru bage nàmbaabii pyi pi à file niŋkin niŋkin.
Ka Akan si mpa ɲcyêe.
Akan na mpyi Zhuda tùluge shinŋi Karimi jya.
Karimi tuŋi mɛgɛ mpyi Zabidi,
Zabidi tuŋi mɛgɛ si mpyi Zera.
19 Ka Zhozuwe si Akan pyi:
«Na jya,
pèenɛ taha Kafooŋi,
Izirayɛli u Kileŋi mɛge na maa u kêe,
nde mu à pyi ke,
li jwo na á,
mʼahà yaaga ŋwɔhɔ na na mɛ.»
20 Ka Akan si Zhozuwe ɲwɔ shwɔ:
«Sèeŋi na,
mii à kapii pyi Kafooŋi,
Izirayɛli u Kileŋi na.
Nde mii à pyi ke,
lire li nde:
21 Yaayi yʼà ta kàshige cyage e ke,
mii à Sineyari kìni vàanntinsinaŋke kà ɲya yire shwɔhɔlʼe ná wyɛ́rɛfyinŋi kiloo shuunni ná sɛnyire giramuu ŋkwuu kaŋkuro (500).
Yi lagʼà mii ta,
ka mii i yi lwɔ́.
Yi ɲyɛ mii à ŋwɔhɔ ɲìŋke e na vàanŋke bage niŋke e,
wyɛ́rɛfyinŋi ɲyɛ yi ɲwɔhɔntaan.»
22 Ka Zhozuwe si pìi tun,
ka pire si fyâlʼa kàre Akan vàanŋke bage e,
mà sà yi ta yi jwoŋkanni na,
wyɛ́rɛŋi sí ɲyɛ yi ɲwɔhɔntaan.
23 Ka pi i yi yige,
maa mpa ná yʼe Zhozuwe ná Izirayɛli shiinbii puni yyére,
maa mpa yi yaha Kafooŋi yyahe taan.
24 Ka Zhozuwe ná Izirayɛli shiinbii puni si Zera jyaŋi Akan cû mà bâra wyɛ́rɛfyinŋi ná vàanntinŋke ná sɛɛnŋi ná u jyaabii ná u pworobii ná u nìiyi ná u dùfaanɲyi ná u mpàabii ná u sikyaabii ná u vàanŋke bage ná u cyeyaayi puni na,
maa ŋkàre ná yʼe Akɔri tafage e.
25 Ka Zhozuwe si Akan pyi:
«Ɲaha na mu à wuu kyaala amɛ yɛ?
Kafooŋi sí mu kyaala niɲjaa.»
Ka Izirayɛli shiinbii puni si u wà a bò ná kafaayi i.
Pi à u shiinbii puni mú wà a bò maa pi puni súugo.
26 Lire kàntugo,
ka pi i kafaɲaŋa nimbwɔhɔ bínni u ɲuŋʼi,
kuru na ɲyɛ wani ali niɲjaa.
Ɲyɛ ka Kafooŋi lùuni si ntɛ̀ɛn.
Lire kurugo,
ali niɲjaa,
kuru cyage mɛge na yiri Akɔria tafage.