Ayi kànhe ɲjyaŋi
8
Kafooŋi à Zhozuwe pyi:
«Mʼahà raa fyáge mɛ,
ma yatanɲyi kʼàha ŋkwû mɛ.
Kàshicyɛge puni yîrige ma a wà Ayi kànhe mɛɛ na.
Wíi,
mii à Ayi saanŋi le mu cye e mà bâra u shiinbii ná u kànhe ná u kìni na.
2 Bà mu à Zheriko kànhe ná ku saanŋi pyi mɛ,
amuni mu sí Ayi kànhe ná ku saanŋi pyi.
Numɛ tɔɔge e,
yii sí n-jà pi cyeyaayi ná pi yatɔɔre kuu.
Kàshikwɔɔnbii pìi ŋwɔhɔ kànhe kàntugo,
pire sí n-pâlʼa ɲcwo pi na.»
3 Ka Zhozuwe si bégele maa yîri ná u kàshicyɛge puni i mà kàre Ayi kànhe mɛɛ na.
U à kàshikwɔnmpiyi kampwɔhii beɲjaaga na kɛ (30.000) cwɔɔnrɔ,
maa pire yaha a kàre numpilage e.
4 U à mpe jwo a kan pi á:
«Yii lógʼa tàra,
yii sà ŋwɔhɔ kànhe kàntugo,
yii àha laaga tɔɔn kànhe na mɛ,
yii i bégele ɲcwuŋi mɛɛ na pi na.
5 Mii ná kàshikwɔɔnbii sanmpiipuni pi ɲyɛ naha ná mii i ke,
wuu sí n-file kànhe na.
Kànhe shiinbii ká fworo wuu mɛɛ na,
wuu sí raa fî pi yyaha na tèecyiini fiige.
6 Pi si ɲcyán wuu fye e,
wuu sí pi fɔ̀ɔnŋɔ si laaga tɔɔn kànhe na.
Pi sí raa sɔ̂nŋi na wuu na fî pire yyaha na tèecyiini fiige.
7 Lire tèni i,
yii sí n-pâa n-fworo yii taŋwɔhɔge e si kànhe cû,
ɲaha kurugo yɛ,
Kafooŋi,
yii Kileŋi sí kànhe le yii cye e.
8 Yii aha kànhe cû,
yii i nage le ku na bà Kafooŋi à yi jwo mɛ.
Yire yi ɲyɛ mii á mà jwo yii á.»
9 Ka Zhozuwe si pi yaha a kàre.
Ka pi i ŋkàrʼa sà ŋwɔhɔ Bɛtɛli ná Ayi shwɔhɔlʼe,
Ayi canŋacwumpe e.
Ka Zhozuwe si kuru canŋke numpilage shwɔ̀n ná sùpyire sannte e.
10 Kuru canŋa numpanŋa,
ka Zhozuwe si sôlʼa yîri,
maa u kàshikwɔɔnbii sanmpii bégeleŋkanni kàanmucya.
Lire kàntugo,
maa ntòro pi yyaha na ná Izirayɛli kacwɔnrɔnbilʼe,
maa lwɔ́ a tò Ayi kànhe na.
11 Ka pire kàshikwɔɔnbii puni si ŋkàre ná Zhozuwe e mà sà nɔ Ayi nàŋkuuŋke na,
maa ŋkàrʼa sà pi tatɛɛnge yaa suumɔ kùlu yyére.
Ɲaŋkworoŋɔ mpyi pi ná Ayi shwɔhɔlʼe.
12 Ka Zhozuwe si shiin kampwɔhii kaŋkuro (5.000) laage pyi pi à ŋwɔhɔ Ayi kànhe canŋacwumpe e,
ku ná Bɛtɛli shwɔhɔlʼe.
13 Kàshikwɔɔnbii niɲyahabii mpyi a sà pi vàanɲyi bayi kwòro kànhe suumɔ kùlu yyére.
Ka pi sanmpiisi sà pi wuyi kwôro kànhe canŋacwumɔ yyére.
Ka Zhozuwe si ŋkàrʼa sà kuru numpilage shwɔ̀n ɲaŋkworoŋke e.
14 Ayi saanŋʼà Izirayɛli shiinbii ɲya ke,
maa sôlʼa u kàshikwɔɔnbii yîrige,
ka pi i fyâlʼa fworo kànhe e kàshige mɛɛ na,
maa ŋkàre sà ɲcwo Izirayɛli shiinbii na tèecyiini cyage e Zhurudɛn bafage e.
Pi ɲyɛ a mpyi a cè na pìlʼà ŋwɔhɔ kànhe kàntugo pi mɛɛ na,
si mpâa ɲcwo pi na mɛ.
15 Ka Zhozuwe ná Izirayɛli kàshikwɔɔnbii si piye pyi mu à jwo pi à jà pire na,
maa fî na wà síwage yyére.
16 Ka Ayi saanŋi si kànhe shiinbii puni pyi pi à fworʼa pìli pi fye e.
Amuni pi à pìli Zhozuwe fye e mà sà laaga tɔɔn kànhe na.
17 Nɔ̀ niŋkin ɲyɛ a sàa kwôro Ayi kànhe ná Bɛtɛli kànhe e mɛ.
Pi punʼà fworʼa pìli Izirayɛli shiinbii fye e maa kànhe niŋgage yaha.
18 Ka Kafooŋi si Zhozuwe pyi:
«Ma cyage sànha ná tàanŋi i Ayi kàmpanŋke na,
ɲaha kurugo yɛ,
mii sí kànhe le mu cye e.»
Ka Zhozuwe si u tàanŋi sànha kànhe kàmpanŋke na.
19 Lirʼà pyi ke,
Izirayɛli kàshikwɔɔnbii pi mpyi a ŋwɔhɔ kànhe kàntugo ke,
ka pire si ntílʼa fworʼa fê a kàrʼa sà kànhe cû,
maa ntílʼa nage le ku na.
20 Ka Ayi kàshikwɔɔnbii si mpa wíi piye kàntugo mà pi kànhe naŋgwuni ɲya li i dùru nìɲyiŋi i.
Pi wà saha ɲyɛ a tafezhaga cè mɛ,
ɲaha kurugo yɛ,
Izirayɛli kàshikwɔɔnbii pi mpyi na fî pi yyaha na na wà síwage e ke,
pire mpyi a núrʼa cyán pi kɔrɔfeebii fye e.
21 Ɲyɛ,
mpii pi mpyi a ŋwɔhɔ ke,
Zhozuwe ná Izirayɛli kàshikwɔɔnbii sanmpilʼà pire ɲya pi à kànhe cû,
ku naŋgwuni si i dùru ke,
maa núrʼa cwo Ayi shiinbii na.
22 Izirayɛli kàshikwɔɔnbii pi mpyi kànhe e ke,
ka pire mú si ɲcwo pi na.
Ka Ayi shiinbii si piye ta Izirayɛli kàshikwɔɔnbii kuruɲyi shuunniŋi shwɔhɔlʼe.
Ka Izirayɛli kàshikwɔɔnbii si pi puni bò,
pi wà ɲyɛ a tafeŋɛ ta mɛ,
wà mú ɲyɛ a shwɔ mɛ,
23 fo Ayi saanŋi kanni,
ka pi i uru ɲyii wuŋi cû mà kan Zhozuwe á.
24 Izirayɛli shiinbilʼà Ayi kàshikwɔɔnbii puni bò a kwɔ̀ sige e,
síwage funŋʼi Ayi shiinbii mpyi a pi kɔ̀rʼa kàre kuru ŋkemu i ke,
maa núrʼa mpa kànhe shiinbii sanmpiipuni bò.
25 Shiin kampwɔhii kɛ ná shuunni (12.000) pi à bò kuru canŋke,
nàmbaa bâra cyee na.
Ayi shiinbii puni pi mpyi pire.
26 Zhozuwe à u tàanŋi yîrigʼa yaha fo ka pi i sà Ayi shiinbii puni bò a kwɔ̀.
27 Ka Izirayɛli shiinbii si kànhe yatɔɔre ná ku yaayi sanɲyi kuu bà Kafooŋi mpyi a yi jwo Zhozuwe á mɛ.
28 Zhozuwe à Ayi kànhe súugo mà pyi takuuŋɔ niŋgaga tèekwombaa wogo.
Amuni ku ɲyɛ ali niɲjaa.
29 Ayi saanŋi wi ke,
ka pi i uru bò mà pwɔ a dùrugo cige e,
maa u yaha u à canmpuni pyi mà sà nɔ yàkoŋke na.
Canŋaɲyicwuure na,
ka Zhozuwe si pi pyi pi à u buwuŋi tîrige cige na,
mà sà ɲcyán kànhe tajyiɲwɔge na,
maa kafaɲaŋa nimbwɔhɔ bínni u ɲuŋʼi.
Kuru na ɲyɛ wani ali niɲjaa.
Sárayi tawwuge ɲjyèreŋi ná Sàliyaŋi ŋkàlaŋi
30 Ɲyɛ ka Zhozuwe si sáraya tawwugo yaa Kafooŋi,
Izirayɛli u Kileŋi á Ebali ɲaŋke ɲuŋʼi.
31 U à ku yaa mà tàanna ná Kafooŋi báarapyiŋi Musa jwumpe niɲjwumpe e Izirayɛli shiinbilʼá.
Purʼà sémɛ Musa sàliyaŋi sémɛŋi i na:
«Sáraya tawwugo yaa ná kafaaya nintembaayʼe,
tɔnɲjyaaga ɲyɛ a bwɔ̀n ɲjemu na mɛ.»
Ka pi i ŋkwɔ̀ maa sárayi nizogoyi ná funntanga sárayi wwû Kafooŋi á kuru sárayi tawwuge ɲuŋʼi.
32 Musa mpyi a sàliyaŋi ŋgemu sémɛ ke,
ka Zhozuwe si uru sémɛ yire kafaayi na Izirayɛli shiinbii ɲyii na kuru cyage e.
33 Izirayɛli shiinbii puni ná pi kacwɔnribii ná pi ɲùŋufeebii ná pi yukyaabii ná pi nàmpwunntɛɛnbii,
pire puni mpyi a yyére Kafooŋi tunmbyaare mbwùuni kànmpaɲyi shuunniŋi na,
mà yyaha kan Levi tùluge sáragawwuubilʼá,
pi à mbwùuni tugo.
Sùpyire taaga niŋkin mpyi a yyére Garizimu ɲaŋke kàmpanŋke na,
taage sanŋke sʼà yyére Ebali ɲaŋke kàmpanŋke na.
Kafooŋi báarapyiŋi Musa mpyi a yi jwo tèecyiini i na pi a yyéreli amuni pi raa jwó leni Izirayɛli shiinbilʼá.
34 Lire kàntugo,
Ka Zhozuwe si Musa sàliyaŋi sémɛŋi jwumpe puni kâla mà yyaha tíi ná jwóŋi ná laŋaŋke jwumpe e bà yʼà sémɛ sàliyaŋi sémɛŋi i mɛ.
35 Ka Zhozuwe si Musa sàliyaŋi jwumpe puni kâla,
u ɲyɛ a funŋɔ wwɔ̀ pà niŋkin na mɛ.
U à pu kâla Izirayɛli shiinbilʼá,
nɔ̀ bâra ceewe na,
mà bâra nàŋkocyaawa na,
mà sà nɔ pi nàmpwuunntɛɛnbii na.