Gabahɔn shiinbii sìɲciimpe
9
Kàshiyi Izirayɛli shiinbilʼà kwɔ̀n ke,
saanbii pi mpyi Zhurudɛn baŋi canŋacwumɔ yyére ke,
pire punʼà yire kyaa lógo.
Pire saanbii kìrigii cyi ɲyɛ ɲaŋkuluni ná tatiige ná suumpe lwɔhe ɲwɔge ná Liban yyetiimpe.
Cyire kìrigii shiinbii pi ɲyɛ Ɛti shiinbii ná Amori shinnbii ná Kana shiinbii ná Pɛrɛzi shiinbii ná Evi shiinbii ná Yebusi shiinbii.
2 Ka pire si wà piye na,
maa ɲwɔmɛɛni pyi niŋkin si Zhozuwe ná Izirayɛli shiinbii tùn.
3 Nde Zhozuwe à pyi Zheriko ná Ayi kànyi na ke,
Gabahɔn shiinbilʼà lire lógo ke,
4 ka pi i cwɔ̀ɔre pyi,
maa piye fáa,
maa piye pyi tùnntunmii,
maa pi dùfaanɲyi tugo bolyeyi ná ɛrɛzɛn sinmpe le le bolyeyi yà niɲjwooloyo na.
5 Maa tanhaɲjyeyi niɲjwooloyi yà ná vàanɲjyeyi niɲjwooloyi yà le,
maa bwúuruwayi niŋkyɛgɛyi yà lwɔ́a.
6 Maa ŋkàre Zhozuwe yyére pi tatɛɛnge e Giligali i,
maa sà yi jwo u ná Izirayɛli shiinbilʼá:
«Wuu à yîri kìritɔɔnlʼe mà pa yii yyére si mpa yii ɲáara yii i tunmbyara le ná wuu e.»
7 Ka Izirayɛli shiinbii si pire Evi shiinbiib ɲwɔ shwɔ:
«Li sí n-jà n-ta yii à yîri naha kwùumpe e,
lire e ke,
di wuu sí n-jà tunmbyara le ná yii e yɛ?»
8 Ka pi i Zhozuwe pyi:
«Wuu sí raa báare mu á.»
Ka Zhozuwe si pi yíbe:
«Mpi pi ɲyɛ yii yɛ?
Taa yii à yîri ke?»
9 Ka pi i u ɲwɔ shwɔ:
«Mu báarapyiibilʼà yîri kìritɔɔnlʼe.
Wuu à pa Kafooŋi,
mu Kileŋi mɛge kurugo.
Nde u à pyi Misira e ke,
wuu à lire puni lógo.
10 Nde u à pyi Amori shiinbii saanbii shuunniŋi na Zhurudɛn baŋi kàmpanŋke sanŋke na ke,
wuu à lire lógo mú.
Pire pi ɲyɛ Ɛsibɔn saanŋi Siyɔn ná Basan saanŋi Ɔgi,
uru ŋgemu u mpyi Asitarɔti kànhe e ke.
11 Wuu kacwɔnribii ná wuu kìni shiinbii punʼà jwo na wuu yalyire tugo wuye fye e,
wuu u mpa yi jwo yii á na wuu sí raa báare yii á,
na yi tunmbyara le ná wuu e.
12 Yii wuu bwúuruŋi wíi,
canŋke wuu à fworo wuu kìni i sʼa ma yii yyére ke,
u mpyi a wyɛ̀rɛ.
U we u à waha fo mà kyɛɛgɛ.
13 Seeyi bɔrigii cyi ɲcyii ke,
cyi nivɔɔnŋkii wuu à ɲî ɛrɛzɛn sinmpe na.
Cyi cyii cyi à cwɔn cwɔn.
Yii wuu vàanɲyi ná wuu tanhayi kɛ̀ɛgɛŋkanni wíi laage ntɔɔnŋi kurugo.»
14 Ka Izirayɛli shiinbii si Gabahɔn shiinbii yalyire ta shwɔ mà ta pi ɲyɛ a Kafooŋi yíbe mɛ.
15 Ka Zhozuwe si jwumabeŋke le ná pi e maa tunmbyaare le ná pi e ntemu ti sí pi munahigii yaha shì na ke.
Ka sùpyire yyaha yyére shiinbii si ŋkâa pi á sʼa tire tunmbyaare kurigii ɲaare.
16 Canmpyaa taanre tunmbyaare leŋkwooni kàntugo,
ka Izirayɛli shiinbii si lógo na Gabahɔn shiinbii na ɲyɛ pi tɛnɲɛɛlii,
na pi pyɛnyi na ɲyɛ kwùumpe e.
17 Ka Izirayɛli shiinbii si kuni lwɔ́ na ŋkɛ̀ɛge.
Canmpyaa taanre ɲara tatoroge e,
ka pi i nɔ mpii shiinbii kànyi na,
yire yi ɲyɛ:
Gabahɔn ná Kefira ná Berɔti ná Kiriyati-Yeharimu.
18 Izirayɛli shiinbii ɲyɛ a pi bò mɛ,
ɲaha kurugo yɛ,
pi kacwɔnribii mpyi a kâa tire supyirʼá Kafooŋi,
Izirayɛli u Kileŋi na,
sʼa tunmbyaare kurigii ɲaare.
Ka Izirayɛli shiinbii si wá na pi kacwɔnribii cɛ̂ɛge.
19 Ka pire si jwo:
«Wuu sì n-jà kapii pyi pi na mɛ,
ɲaha kurugo yɛ,
wuu à kâa pi á Kafooŋi Izirayɛli u Kileŋi na.
20 Nde wuu sí n-pyi pi na ke,
lire li ɲyɛ,
wuu sí pi yaha shì na,
wuu àha ŋkwɔ̀ Kile lùyirini yaha li cwo wuu na,
wuu kàage kurugo pi á mɛ.
21 Wuu pi yaha wani,
ŋka wuu sí pi pyi pi a kàɲciiyi caa,
pi raa lwɔhe kwóre sùpyire punʼá.»
Yire na kacwɔnrɔbilʼà ɲwɔ.
22 Ka Zhozuwe si Gabahɔn shiinbii yyere maa pi pyi:
«Ɲaha kurugo yii à wuu ɲwɔ fáan na yii à yîri tatɔɔnge e mà li ta yii à yîri naha kwùumpe e yɛ?
23 Ɲyɛ numɛ yii à láŋa,
yii sí n-pyi bilii tèrigii puni i.
Yii sí raa kàɲciiyi caa sʼa mii Kileŋi bage lwɔhe kwóre.»
24 Ka Gabahɔn shiinbii si Zhozuwe pyi:
«Wuu à nde pyi ɲaha kurugo yɛ,
wuu à sàa lógo na Kafooŋi mu Kileŋi à u bárapyiŋi Musa pyi na uru sí nde kìni puni kan yii nimpabilʼá si yii pyi yii li shiinbii puni bò.
Yii mpaŋʼà wuu pyi wuu à sàa fyá,
lire lʼà wuu pyi wuu à nde pyi wuu múnahigii kurugo.
25 Wuu na ɲyɛ mu fànhe ɲwɔhʼi numɛ.
Nde lʼà ɲwɔ maa ntíi mu ɲyii na ke,
lire pyi wuu na.»