Izirayɛli shiinbii ná Amɔri shiinbii kàshige
10
Zheruzalɛmu saanŋi Adoni-Sedɛki à lógo na Zhozuwe à Ayi kànhe cû maa ku shiinbii puni bò,
na nde u à pyi Zheriko ná u saanŋi na ke,
na lire shi u à pyi Ayi ná u saanŋi na.
U mú à lógo na Gabahɔn shiinbii na ɲyɛ a sà jwumabeŋke cya Izirayɛli shiinbilʼá maa ntɛ̀ɛn pi shwɔhɔlʼe.
2 Ka lire si u pyi u à fyá sèlʼe,
ɲaha kurugo yɛ,
Gabahɔn kànhe mpyi a pêe saanwa kànhe fiige,
ku mpyi a pêe Ayi na.
Kànhe kàshikwɔɔnbii puni mpyi a tanha.
3 Ɲyɛ ka Zheruzalɛmu saanŋi Adoni-Sedɛki si tùnntunmii tun Eburɔn saanŋi Ohamu ná Yarimuti saanŋi Piramu ná Lakishi saanŋi Yafiya ná Egilɔn saanŋi Debiri á maa yi jwo pi á na:
4 «Yii pa na tɛ̀gɛ wuu u Gabahɔn shiinbii tùn,
ɲaha kurugo yɛ,
pi à jwumabeŋke cya Zhozuwe ná Izirayɛli shiinbilʼá.»
5 Ɲyɛ ka Amori shiinbii saanlii kaŋkuro mu à jwo:
Zheruzalɛmu saanŋi ná Eburɔn wuŋi ná Yarimuti wuŋi ná Lakishi wuŋi ná Egilɔn wuŋi,
ka pire si wà piye na,
maa ŋkàre ná pi kàshicyeyi puni i Gabahɔn shiinbii mɛɛ na.
Maa ŋkàrʼa sà pi tatɛɛnge yaa Gabahɔn kànhe yyaha yyére maa ku tùn.
6 Ka Gabahɔn shiinbii si pìi tun Zhozuwe á Izirarayɛli shiinbii tatɛɛnge e Giligali i,
pi i sà yi jwo u á:
«Wuu na ɲyɛ mu bilii,
ma hà ɲcyé si wuu tɛ̀gɛ mɛ.
Fyâlʼa pa wuu yyére ma a wuu shwɔ,
ɲaha kurugo yɛ,
Amori saanbii puni pi à tɛ̀ɛn ɲaɲyi i ke,
pirʼà wwɔ̀ maa wuu tùnni.»
7 Ka Zhozuwe si yîri Giligali i ná u kàshikwɔɔnbii puni ná u kàshikwɔnmpiyi puni i mà kàre.
8 Ka Kafooŋi si Zhozuwe pyi:
«Ma hà n-fyá pi yyaha na mɛ,
mii sí pi le mu cye e.
Pi wà sì n-jà n-yyére mu sige mɛ.»
9 Ka Zhozuwe ná u shiinbii si numpilage puni pyi ɲani na mà yîri Giligali i mà sà pi pâa.
10 Ka Kafooŋi si Amori shiinbii pyi pi à fyá Izirayɛli shiinbii yyaha na.
Ka Izirayɛli shiinbii si pi kakyara Gabahɔn ɲwɔ na.
Pi à cyán pi fye e mà sà nɔ Bɛti-Ɔrɔn ɲaŋke taduguge e maa ntòrʼa kàrʼa sà nɔ fo Azeka kànhe ná Makeda kànhe na.
11 Mà pi yaha pi i fî Izirayɛli shiinbii yyaha na mà sà nɔ Bɛti-Ɔrɔn tatigige na,
ka Kafooŋi si zànhafuɲcɛɛnɲyɛ nitabaaya tîrige pi ɲuŋʼi fo mà sà nɔ Azeka na.
Zànhafuɲcɛɛnɲyʼà mpiimu bò ke,
pirʼà ɲyaha Izirayɛli shiinbii kàshikwɔnŋwɔɔni nimbuubii na.
12 Canŋke Kafooŋi à Amori shiinbii le Zhozuwe cye e ke,
kuru canŋke Zhozuwe à jwo ná Kafooŋi i Izirayɛli shiinbii ɲyii na.
U à jwo:
«Canŋaɲyii,
yyére Gabahɔn nìɲyi na.
Yiŋɛ,
yyére Ayalɔn tafage e.»
13 Ka canŋaɲyiini si yyére,
ka yiŋke mú si yyére fo mà sà yaa ná Izirayɛli shiinbilʼe pi à pi nàvunŋɔ kwɔ̀ pi zàmpɛɛnbii na.
Nde kani ɲyɛ a sémɛ Yasharia sémɛŋi i mà?
Canŋaɲyiinʼà nɔ niŋke e maa yyére nìɲyiŋi i li ɲyɛ a cwo fwɔfwɔ mɛ,
fo mà canmpuŋɔ fiige pyi.
14 Nde canmbilini fiige sàha ntêlʼa pyi mɛ,
li fiige mú saha sì n-pyi mɛ,
canbilini i Kafooŋi à sùpya ɲwɔmɛɛ cû nde cùŋkanni na ke.
Nàkaana bàa,
Kafooŋi à kàshige kwɔ̀n nde canmbilini i Izirayɛli shiinbilʼà.
15 Ka Zhozuwe ná Izirayɛli shiinbii kàshikwɔɔnbii puni si núrʼa kàre pi tatɛɛnge e Giligali i.
Zhozuwe à saanlii kaŋkuro bò
16 Lirʼà ta,
saanbii kaŋkuroŋi mpyi a fê a sà ŋwɔhɔ ɲaŋgyige kʼe Makeda kànhe e.
17 Ka pi i sà Zhozuwe pyi:
«Saanbii kaŋkuroŋi niŋwɔhɔbilʼà ɲya Makeda ɲaŋgyige e.»
18 Ka Zhozuwe si jwo:
«Yii kafabwoyi yà kuuŋkulʼa tɛ̀gʼa ɲaŋgyige ɲwɔ tò,
yii i pìi yaha pi a pi kàanmucaa.
19 Ŋka,
yii àha mɔ wani mɛ,
yii i ɲcyán yii zàmpɛɛnbii fye e,
yii i kuni kwɔ̀n pi na pi àha ŋkwɔ̀ n-jyè pi kànhe e mɛ.
Ɲaha kurugo yɛ,
Kafooŋi yii Kileŋi si pi le yii cye e.»
20 Ka Zhozuwe ná Izirayɛli shiinbii si jà pi puni na,
maa pi kakyara.
Mpii pi à jà a fê a shwɔ ke,
ka pire si sà jyè kànyi káaɲyi wuyʼe.
21 Ɲyɛ ka sùpyire puni niɲcɛnmii wuu si núrʼa kàre Zhozuwe yyére pi tatɛɛnge e Makeda e.
Sùpya ɲyɛ sàa yaaga jwo Izirayɛli shiinbii na mɛ.
22 Ka Zhozuwe si yi jwo:
«Yii ɲaŋgyige ɲwɔ múgo,
yii i saanbii kaŋkuroŋi cû a yige naha na á.»
23 Ka pi i li pyi amuni maa saanbii kaŋkuroŋi cû a yige ɲaŋgyige e mà pa ŋkan u á.
Pire pi ɲyɛ:
Zheruzalɛmu saanŋi ná Eburɔn wuŋi ná Yarimuti wuŋi ná Lakishi wuŋi ná Egilɔn wuŋi.
24 Pi à pa ná pi e ke,
ka Zhozuwe si Izirayɛli nàmbaabii puni yyere.
Kàshicyeyi yyaha yyére shiinbii pi mpyi ná Zhozuwe e ke,
ka u u pire pyi:
«Yii file yii i yii tooyi taha mpii saanbii yaciyi na.»
Ka pire si file maa pi tooyi taha pi yaciyi na.
25 Ka Zhozuwe si pi pyi:
«Yii àha raa fyáge mɛ,
yii zòompii kʼàha ŋkwɔ̀n mɛ.
Yii yii zòompii tàra,
yii i yiye waha!
Ɲaha kurugo yɛ,
yii zàmpɛɛnbii na yii sí kàshige kwɔ̀n ke,
amɛ Kafooŋi sí pire puni pyi yii á.»
26 Lire kàntugo,
ka Zhozuwe si pire saanbii bò maa pi pwɔ pi i fánŋi ciye kaŋkuro na.
Pi nindurubilʼà canmpuni pyi ciyi na fo mà sà nɔ yàkoŋke na.
27 Canŋaɲyicwuure na,
ka Zhozuwe si kuni kan pi pi tîrige ciyi na pi sà wà ɲaŋgyige e,
pi mpyi a ŋwɔhɔ ŋkemu i ke.
Ka pi i kafabwoyo tɛ̀gʼa ɲaŋgyige ɲwɔ tò.
Kuru na ɲyɛ wani ali niɲjaa.
Wwòro kùlu yyéreŋi kànyi ɲcùŋi
28 Kuru cannuge,
Zhozuwe à Makeda kànhe cû maa ku saanŋi ná kànhe shiinbii puni bò ná kàshikwɔnŋwɔɔni i,
ali shin niŋkin ɲyɛ shwɔ mɛ.
Nde u à pyi Zheriko saanŋi na ke,
lire shi u à pyi Makeda saanŋi na.
29 Ka Zhozuwe ná Izirayɛli shiinbii puni si yîri Makeda kànhe e mà kàre Libina kànhe e,
maa sà ɲcwo ku na.
30 Ka Kafooŋi si kuru kànhe ná ku saanŋi le Izirayɛli shiinbii cye e mú.
Ka Zhozuwe si ku jya maa kàshikwɔnŋwɔɔni tɛ̀gʼa ku shiinbii puni bò,
ali shin niŋkin ɲyɛ a shwɔ mɛ.
Nde u à pyi Zheriko saanŋi na ke,
lire shi u à pyi uru saanŋi na mú.
31 Ka Zhozuwe ná Izirayɛli shiinbii puni si yîri Libina e mà kàre Lakishi kànhe e,
maa sà n-tɛ̀ɛn ku ɲwɔ na,
maa ku tùn.
32 Ka Kafooŋi si Lakishi le Izirayɛli shiinbii cye e.
Canmpyishwɔnwuuni i,
ka pi i jà ku na,
maa kàshikwɔnŋwɔɔni tɛ̀gʼa ku sùpyire puni bò Libina fiige.
33 Ka Gezɛri kànhe saanŋi Oramu si mpa mpa Lakishi shiinbii tɛ̀gɛ,
ka Zhozuwe si u ná u shiinbii puni bò,
ali shin niŋkin ɲyɛ a shwɔ mɛ.
34 Ka Zhozuwe ná Izirayɛli shiinbii puni si yîri Lakishi i mà kàre Egilɔn kànhe e,
maa sà n-tɛ̀ɛn ku ɲwɔ na,
maa ku tùn.
35 Kuru canŋke yabiliŋi,
ka pi i jà ku na maa kàshikwɔnŋwɔɔni tɛ̀gʼa ku sùpyire puni bò canŋa niŋkin Lakishi wuubii fiige.
36 Ka Zhozuwe ná Izirayɛli shiinbii puni si yîri Egilɔn i mà kàre Eburɔn kànhe e,
maa sà ku tùn.
37 Pi à jà ku na,
maa kashikwɔnŋwɔɔni tɛ̀gʼa ku ná ku kwùumpe kàɲyi jya,
maa pi saanŋi ná kànyi supyire puni bò.
Nde u à pyi Egilɔn na ke,
lire shi u à pyi wani mù.
U à yire kànyi jya maa yi sùpyire puni bò.
Ali shin niŋkin ɲyɛ a shwɔ mɛ.
38 Ka Zhozuwe ná Izirayɛli shiinbii puni si núrʼa kàre Debiri Kànhe e,
maa sà ku tùn.
39 U à ku ná ku kwùumpe kànyi jya maa pi saanŋi cû,
maa kàshikwɔnŋwɔɔni tɛ̀gʼa u ná sùpyire puni bò,
ali shin niŋkin ɲyɛ a shwɔ mɛ.
Nde u à pyi Eburɔn ná Libina ná pi saanbii na ke,
lire shi u à pyi Debiri ná u saanŋi na.
40 Zhozuwe à lire kìni puni tùn maa jà li na:
Ɲaŋkùluni ná wwòro kùlu kùluni ná tatiige kùluni ná mpùntaŋke kùluni.
U à cyi saanbii puni ná cyi sùpyire puni bò,
ali shin niŋkin ɲyɛ a shwɔ mɛ.
U à cyi ɲyiiyaayi puni bò bà Kafooŋi,
Izirayɛli u Kileŋi mpyi a yi jwo mɛ.
41 Zhozuwe à jà lire kìni na,
mà lwɔ́ Kadɛsi-Barineya na,
mà sà nɔ Gaza na,
maa lwɔ́ Gozeni kwùumpe na,
má sà nɔ Gabahɔn na.
42 Zhozuwe à jà pire saanbii ná cyire kùlugii puni na tère niŋkin i,
ɲaha kurugo yɛ,
Kafooŋi,
Izirayɛli u Kileŋi à kàshige kwɔ̀n pi á.
43 Lire kàntugo,
ka Zhozuwe ná Izirayɛli shiinbii puni si núrʼa kàre pi tatɛɛnge e Giligali i.