Zhozuwe a kàshige kwɔ̀n saanlii niɲyahamii na
11
Azɔri saanŋi Jabɛn à Zhozuwe sitaare kyaa lógo ke,
ka u u tùnntunmii tun Madɔn saanŋi Yobab ná Simirɔn saanŋi ná Akizafu saanŋʼá.
2 Maa pìi tun suumɔ kùlu yyére ɲaɲkuluni saanbii ná Zhurudɛn bafage wuubilʼá Kinerɛti dùcyɛnge wwòro kùlu yyéreŋi,
ná tatiige wuubii ná Dɔri ɲaŋke canŋacwumɔ yyére wuubilʼá.
3 Maa pìi tun Kana shiinbilʼá,
pire mpiimu pi à tɛ̀ɛn canŋafyinmpe ná canŋacwumpe e ke.
Maa pìi tun Amori shiinbii ná Ɛti shiinbii ná Pɛrɛzi shiinbii ná Yebusi shiinbii pi à tɛ̀ɛn ɲaŋkuluni i ke,
ná Evi shiinbii pi à tɛ̀ɛn Ɛrimɔ ɲaŋke ɲwɔhʼi Misipa kìni i ke,
pirʼá.
4 Ka pire saanbii si fworo ná pi kàshikwɔɔnbii puni i.
Tire sùpyire mpyi a sàa ɲyaha suumpe lwɔhe ɲwɔge nticyɛnŋi fiige.
Shwɔnyɔ niɲyahaya ná shwɔnyɔwotoroyo niɲyahaya yi mpyi pi á.
5 Ka pire saanbii puni si wà piye na,
maa ŋkàrʼa sà n-tɛ̀ɛn Merɔmu lwɔhe ɲwɔge na kàshige mɛɛ na Izirayɛli shiinbii na.
6 Ka Kafooŋi si Zhozuwe pyi:
«Ma hà raa fyáge pi yyaha na mɛ,
ɲaha kurugo yɛ,
nùmpanŋa numɛ cyíin,
mii sí pi puni buwuubii le Izirayɛli shiinbii cye e.
Yii sí pi shwɔnyi sirakapanɲyi kwɔ̀n si pi shwɔnyi wotorobii súugo.»
7 Ɲyɛ,
Zhozuwe ná u kàshikwɔɔnbilʼà kàrʼa sà pi pâa Merɔmu lwɔhe ɲwɔge na,
maa ɲcwo pi na.
8 Ka Kafooŋi si pi le Izirayɛli shiinbii cye e.
Ka pire si jà pi na,
maa pi ɲwɔhɔ lwɔ́ mà sà nɔ fo Sidɔn kànbwɔhe na,
maa yîri wani,
mà sà nɔ fo Misirefɔti-Mayimu kànhe e,
ma a yîri canŋafyinmpe e mà kàrʼa sà nɔ Misipa tafabwɔhe e.
Pi à pi puni bò,
ali shin niŋkin ɲyɛ a shwɔ mɛ.
9 Zhozuwe à pi pyi bà Kafooŋi mpyi a yi jwo u á mɛ.
U à pi shwɔnyi sirakapanɲyi kwɔ̀n maa pi shwɔnyi wotoroyi súugo.
Zhozuwe à Azɔri kànhe cû
10 Lire tèni ninuuni i,
Zhozuwe ninuruŋʼà Azɔri kànhe cû maa kàshikwɔnŋwɔɔni tɛ̀gʼa ku saanŋi bò.
Tèni lʼà tòro,
Azɔri u mpyi puru kwùumpe saanbii kànyi puni kànbwɔhe.
11 Maa kàshikwɔnŋwɔɔni tɛ̀gʼa kànhe sùpyire puni kakyara maa pi puni bò,
maa ku ɲyiyaayi puni bò,
maa Azɔri kànhe súugo.
12 Yire kànyi yi mpyi a wà yiye na ke,
Zhozuwe à yire puni cû maa yi saanbii puni bò,
maa sùpyire puni bò,
bà Kafooŋi báarapyiŋi Musa mpyi a yi jwo mɛ.
13 Kànyi yi mpyi ɲaŋkuluni i ke,
Azɔri baare e,
Izirayɛli shiinbii ɲyɛ a kuru kà súugo mɛ.
Kuru kanni Zhozuwe à súugo.
14 Izirayɛli shiinbilʼà yire kànyi nàfuuŋi ná yatɔɔre puni kuu.
Ŋka,
pi à kàshikwɔnŋwɔɔni tɛ̀gʼa sùpyire puni bò.
Sùpyaŋi wà niŋkin ɲyɛ a shwɔ mɛ.
15 Tùnnture Kafooŋi mpyi a jwo u báarapyiŋi Musa á,
ka uru si ti jwo Zhozuwe á ke,
Zhozuwe à tire puni pyi ti jwuŋkanni na,
u ɲyɛ a là bwɔ̀n a pôo mɛ.
Kìni sanni ɲcùŋi
16 Ɲyɛ,
Zhozuwe à kìni puni cû mà lwɔ́ ɲaŋkuluni na mà nɔ wwòro kùlu yyéreŋi na,
mà kàrʼa sà nɔ Gozeni kùluni ná tatiige ná Zhurudɛn bafage ná suumɔ kùlu yyére ɲaŋkuluni ná li ɲaɲyi mpùtigimpe na.
17 Maa lwɔ́ Alaki ɲaŋke na Seyiri kùluni kàmpanŋke na mà sà nɔ Baali-Gadi na Liban tafage e Ɛrimɔ ɲaŋke taan,
u à pire saanbii puni cû maa pi bò.
18 Zhozuwe à mɔ kàshige na ná pire saanbilʼe.
19 Evi tùluge shiinbii pi mpyi a tɛ̀ɛn Gabahɔn ke,
pire baare e,
kànha ɲyɛ a jwumabeŋɛ cya Izirayɛli shiinbilʼá mɛ.
Ka Izirayɛli shiinbii si pire sanmpiipuni tùn maa jà pi na.
20 Kafooŋi mpyi a pi zòompii tàra ka pi i kàshige kwɔ̀n Izirayɛli shiinbii na,
bà Izirayɛli shiinbii si n-pyi si pi kakyara ɲùɲaara bàa,
si pi shi bò bà Kafooŋi mpyi a yi jwo Musa á mɛ.
21 Lire tèni ninuuni i,
Anaki shiinbii pi mpyi a tɛ̀ɛn ɲaɲyi ɲuŋʼi,
Eburɔn ná Debiri ná Anabu ná Zhuda ɲaŋkùluni puni i ná Izirayɛli ɲaŋkuluni puni i ke,
Zhozuwe à pire tùn maa jà pi na.
U à tire sùpyire ná ti kànyi kakyara maa yi shi tò.
22 Izirayɛli kìni i,
Gaza ná Gati ná Azidɔdi kànyi baare e,
sùpya ɲyɛ a shwɔ Anaki tùluge e mɛ.
23 Lire pyiŋkanni na,
Zhozuwe à kìni puni cû bà Kafooŋi mpyi a yi jwo Musa á mɛ.
Zhozuwe à li kan Izirayɛli shiinbilʼá maa li táa táa pi tùluyi shwɔhɔlʼe pi à pyi pi tatɛɛngɛ.
Ka kàshige si yyére kìni i,
ka pi i ŋɔ̀.