Saanbii Izirayɛli shiinbilʼà bò Musa tìiŋi i ke
12
Izirayɛli shiinbii mpyi a jà saanbii pìi na maa pi cyeyi shwɔ mà ta.
Pi mpyi à Zhurudɛn canŋafyinmɛ yyére cyeyi puni cû mà lwɔ́ Arinɔ dùge na mà sà nɔ Ɛrimɔ ɲaŋke na,
mà kàrʼa sà nɔ Zhurudɛn canŋafyinmɛ yyéreŋi tafage puni na.
2 Uru saanŋi niɲcyiiŋi u mpyi Amori shiinbii saanŋi.
U mɛgɛ mpyi Siyɔn.
U mpyi a tɛ̀ɛn Ɛsibɔn e.
Cyeyi ɲùŋɔ na uru mpyi ke,
yire mpyi a lwɔ́ Arowɛri kànhe na mà sà nɔ Arinɔ dùge tafage taaga niŋkin na.
Galadi kùluni taaga niŋkin mú mpyi u cye e mà sà nɔ Yabɔki baŋi na,
u ná Amoni tùluge shiinbii tɛgɛni li mpyi lire.
3 Mà lwɔ́ Zhurudɛn bafage na mà sà nɔ Kinerɛti baŋi canŋafyinmpe e,
maa ŋkàrʼa sà nɔ suumpe lwɔhe ɲyii yaaga bàa woge tafage na Bɛti-Yesimɔti yyetiimpe na,
mà sà bwɔ̀n Pisiga ɲaŋke tatigige na wwòro kùlu yyéreŋi,
u mpyi yire puni ɲùŋɔ na mú.
4 Saanŋi sanŋi mɛgɛ mpyi Ɔgi,
Basan saanŋi u mpyi ure.
Uru mpyi Erefayimu shiinbii shinsanŋi wà.
Uru tatɛɛnge ku mpyi Asitarɔti kànhe,
lire ɲyɛ mɛ Edereyi kànhe.
5 Uru mpyi Ɛrimɔ ɲaŋke ná Salika kùluni ná Basan kùluni puni ɲùŋɔ na,
mà sà nɔ Geshuri shiinbii ná Maka shiinbii tɛgɛni na,
maa ŋkàrʼa sà nɔ Galadi kùluni taaga niŋkin na,
maa yîri wani mà sà nɔ fo Ɛsibɔn saanŋi Siyɔn màrampe tɛgɛni na.
6 Kafooŋi báarapyi Musa ná Izirayɛli shiinbii mpyi a pire saanbii tùn maa jà pi na.
Ka Kafooŋi báarapyiŋi Musa si pi cyeyi tálʼa kan Urubɛn tùluge ná Gadi tùluge ná Manase tùluge taagʼá.
Saanbii Izirayɛli shiinbilʼà bò Zhozuwe tìiŋi i ke
7 Ɲyɛ,
Zhozuwe ná Izirayɛli shiinbilʼà jà saanbii pìi na Zhurudɛn canŋacwumɔ yyére.
Pire u taare mpyi a lwɔ́ Baali-Gadi na mà sà nɔ Liban ɲaŋke kàntugo yyére tafage na,
mà kàrʼa sà nɔ Alaki ɲaŋke na Seyiri kàmpanŋke na.
U à pire u cyeyi kan Izirayɛli shiinbilʼá,
pi puni ná pi nàzhan.
8 Yire cyeyi yi mpyi:
Ɲaŋkuluni ná tatiige ná Zhurudɛn bafage ná ɲaɲyi mumpɛnge ná síwage ná wwòro kùlu yyéreŋi.
Yire yi mpyi Ɛti shiinbii ná Amori shiinbii ná Kana shiinbii ná Pɛrɛzi shiinbii ná Evi shiinbii ná Yebusi shiinbii cyeyi.
9 Izirayɛli shiinbilʼà jà saanbii mpiimu na ke,
pire pi ɲyɛ:
Zheriko saanŋi ná Ayi u ɲyɛ Bɛtɛli taan ke,
uru saanŋi,
10 ná Zheruzalɛmu saanŋi ná Eburɔn saanŋi,
11 ná Yarimuti saanŋi ná Lakishi saanŋi,
12 ná Egilɔn saanŋi ná Gezɛri saanŋi,
13 ná Debiri saanŋi ná Gɛdɛri saanŋi,
14 ná Ɔrima saanŋi ná Aradi saanŋi,
15 ná Libina saanŋi ná Adulamu saanŋi,
16 ná Makeda saanŋi ná Bɛtɛli saanŋi,
17 ná Tapuwa saanŋi ná Efɛri saanŋi,
18 ná Afɛki saanŋi ná Lasharɔn saanŋi,
19 ná Madɔn saanŋi ná Azɔri saanŋi,
20 ná Simerɔn-Merɔn saanŋi nà Akizafu saanŋi,
21 ná Tanaki saanŋi ná Megido saanŋi,
22 ná Kedɛshi saanŋi ná Yokineyamu u ɲyɛ Karimɛli ɲaŋke taan ke,
uru saanŋi,
23 ná Dɔri u ɲyɛ ɲaŋkuluni i ke,
uru saanŋi ná Goyimu u ɲyɛ Giligali taan ke,
uru saanŋi,
24 ná Tirisa saanŋi.
Pire saanbii puni ɲyɛ beɲyjaaga ná kɛ ná niŋkin (31).