Kìni cyeyi yi ɲyɛ cùmbaa ke
13
Ɲyɛ,
Zhozuwe mpyi a sàa pa lyɛ,
u mpyi a shìtɔɔnwɔ ta,
ka Kafooŋi si u pyi:
«Mu à pyi nàŋkolyɛ numɛ,
ŋka cyeyi niɲcumbaayi saha a ɲyaha.
2 Kìni cyeyi saha yi ɲyɛ ke,
yire yi ɲyɛ:
Filisi woge puni ná Geshuri woge puni,
3 mà lwɔ́ Shiyɔri dùge ku ɲyɛ na fwu na ntùuli Misira ŋkère na ke,
mà sà nɔ Ekurɔn kànhe na suumɔ kùlu yyére.
Kuru cyage puni na ntɔ̀re Kana shiinbilʼá.
Filisi shiinbii saanlii kaŋkuro tatɛɛnyɛ na ɲyɛ wani,
yire yi ɲyɛ:
Gaza ná Azidɔdi ná Asikalɔn ná Gati ná Ekurɔn mà bâra Avi shiinbii cyage na wwòro kùlu yyéreŋi.
4 Kana shiinbii kùluni puni mú à yaa li cû mà lwɔ́ Mera u ɲyɛ Sidɔn á ke,
mà sà nɔ Afɛki na Amori kùluni tɛgɛni na.
5 Mà bâra lire na,
Gebali wuuni ná Liban wuuni li ɲyɛ canŋafyinmpe e ke,
mà sà nɔ Baali-Gadi wuuni na Ɛrimɔ ɲaŋke taan,
maa ŋkàrʼa sà nɔ Amati tajyiɲwɔge na.
6 Ɲaŋkuluni li ɲyɛ Liban kùluni ná Misirefɔti-Mayimu shwɔhɔlʼe ke,
lire mú na ɲyɛ.
Sidɔn shiinbii pi à tɛ̀ɛn lire e.
Mii yabiliŋi u sí pi kɔ̀rɔ n-lwɔ́ Izirayɛli shiinbii yyaha na.
Ŋkyaanlwooni tɛ̀gʼa yire cyeyi táa Izirayɛli shiinbii na pi pyi pi tatɛɛngɛ bà mii mpyi a yi jwo mu á mɛ.
7 Numɛ,
yire cyeyi táa Izirayɛli tùluyo baacyɛɛre ná Manase tùluge niŋɛ taage na.»
Zhurudɛn canŋafyinmɛ yyéreŋi tùluyi u taare
8 Urubɛn tùluge ná Gadi tùluge ná Manase tùluge niŋɛ taage mpyi a pi nàzhan taare ta Zhurudɛn baŋi canŋafyinmpe e mà kwɔ̀.
Kafooŋi báarapyiŋi Musa u mpyi a ti kan pi á.
9 Pire u taare mpyi a sìi Arowɛri na,
kuru na ɲyɛ Arinɔ dùge ɲwɔge na,
ná kànhe ku ɲyɛ kuru dùge kacyage niŋke e ke,
maa ŋkàrʼa sà Medeba tafage puni lwɔ́ fo mà sà nɔ Dibɔn na,
10 maa yîri wani mà sà nɔ Amori saanŋi Siyɔn màrampe kànyi puni ná u tatɛɛnge Ɛsibɔn na,
mà kàrʼa sà nɔ Amoni shiinbii taare tɛgɛni na.
11 Galadi kùluni mú mpyi pi á ná Geshuri kùluni ná Maka wuuni ná Ɛrimɔ ɲaŋke puni ná Basan kùluni puni fo mà sà nɔ Salika kànhe na,
12 Basan saanŋi Ɔgi u mpyi yire cyeyi puni foo.
U mpyi a tɛ̀ɛn Asitarɔti ná Edereyi kànyi na.
U kanni u mpyi a kwôro Erefayimu shiinbii cyagʼe.
Musa mpyi a cyire kùlugii saanbii tùn maa jà pi na,
maa pi taare shwɔ pi na.
13 Ŋka,
Izirayɛli shiinbii ɲyɛ a ɲɛnʼa Geshuri shiinbii ná Maka shiinbii kɔ̀rɔ mɛ.
Pire na ɲyɛ Izirayɛli shiinbii shwɔhɔlʼe ali niɲjaa.
14 Levi tùluge kanni kʼà pyi,
Musa ɲyɛ a yaaga kan kurʼá mɛ.
Sárayi yi maha súugo Kafooŋi,
Izirayɛli u Kileŋi á ke,
yire yi ɲyɛ pire u nàzhanŋi bà Kafooŋi mpyi a yi jwo u á mɛ.
Urubɛn tùluge shiinbii nàzhan taare
15 Musa mpyi a Urubɛn tùluge nàzhanŋi kan pi á mà tàanna ná pi pyɛnyi pɛ̀rɛge e.
16 Pire u taare mpyi a lwɔ́ Arowɛri na,
Arinɔ dùge ɲyɛ kuru ŋkemu taan ke,
ná kuru dùge kacyage niŋke kànhe,
mà sà nɔ Medeba taan tafage puni na,
17 mà kàrʼa sà nɔ Ɛsibɔn kànhe ná ku kwùumpe kànyi puni yi ɲyɛ tafage e ná yire yi ɲyɛ:
Dibɔn ná Bamɔti-Baali ná Beti-Baali-Meyɔn ke,
18 ná Yahasi ná Kedemɔti ná Mefaati,
19 ná Kiriyatayimu ná Sibima ná Serɛti-Asahari u ɲyɛ ɲaŋke ɲuŋʼi mà yyaha kan tafagʼà ke,
20 ná Bɛti-Pehɔri ná Pisiga ɲaŋke tatigige ná Bɛti-Yesimɔti,
21 ná tafage kànyi puni.
Amori shiinbii saanŋi Siyɔn u mpyi a tɛ̀ɛn Ɛsibɔn e ke,
uru u taare puni mpyi Urubɛn tùluge shiinbii woro.
Musa mpyi a jà uru saanŋi ná Madiyani shiinbii ɲùŋufeebii na,
pire pi mpyi:
Evi ná Erekɛmu ná Suri ná Uri ná Ereba,
pire pi mpyi kìni i.
Siyɔn saanŋi mpyi pire ɲùŋɔ na.
22 Izirayɛli shiinbilʼà mpiimu bò lire tèni i ná kàshikwɔnŋwɔɔni i ke,
Beyɔri jyaŋi Balamu u mpyi na cɛɛre pyi ke,
uru mpyi pire e.
23 Zhurudɛn baŋi u à pyi Urubɛn tùluge shiinbii taare tɛgɛni.
Yire kànbwoyi ná yi kwùumpe kànpyɛɛre tʼà pyi Urubɛn tùluge shiinbii nàzhanŋi mà tàanna ná pi pyɛnyi pɛ̀rɛge e.
Gadi tùluge shiinbii nàzhan taare
24 Musa mpyi a kìni táa maa Gadi tùluge shiinbii nàzhan taare kan pi á mà tàanna ná pi pyɛnyi pɛ̀rɛge e.
25 Pire u taare tʼà pyi:
Yazɛri kànhe ná Galadi kànyi puni ná Amoni shiinbii kùluni taaga niŋkin,
maa ŋkàrʼa sà nɔ fo Arowɛri kànhe na,
Araba kànhe taan.
26 Tire taare mpyi a lwɔ́ Ɛsibɔn na,
maa ŋkàre fo mà sà nɔ Aramati-Misipa ná Betonimu kànyi na,
maa lwɔ́ Mahanayimu na,
mà kàrʼa sà nɔ fo Debiri tɛgɛni na.
27 Zhurudɛn bafage kànyi mú mpyi pi á,
yire kànyi yi ɲyɛ:
Bɛti-Aramu ná Bɛti-Nimira ná Sukɔti ná Safɔn.
Ɛsibɔn saanŋi Siyɔn u mpyi yire cyeyi puni ɲùŋɔ na.
U taare mpyi a lwɔ́ Zhurudɛn baŋi na,
mà kàrʼa sà nɔ fo Kinerɛti baŋi tɛgɛni na Zhurudɛn baŋi canŋafyinmpe e.
28 Yire kànbwoyi ná yi kwùumpe kànpyɛɛre tʼà pyi Gadi tùluge shiinbii nàzhanŋi mà tàanna ná pi pyɛnyi pɛ̀rɛge e.
Manase tùluge taage nàzhan taare
29 Musa mpyi a Manase tùluge niŋɛ taage nàzhan taare kan pi á mà tàanna ná pi pyɛnyi pɛ̀rɛge e.
30 Pire u taare mpyi a lwɔ́ Mahanayimu kànhe ná Basan kùluni puni ná Basan saanŋi Ɔgi taare puni ná Yahiri kànpyɛɛre beetaanreŋi (60) puni u ɲyɛ lire kùluni i ke,
31 ná Galadi kùluni taaga ná Asitarɔti kànhe ná Edereyi kànhe.
Yire yi mpyi Basan saanŋi Ɔgi kànbwoyi.
Yirʼà kan Manase jyaŋi Makiri bage taagʼá mà tàanna ná pi pyɛnyi pɛ̀rɛge e.
32 Musa mpyi a tɛ̀ɛn Muwabu tafage e,
Zhurudɛn baŋi kàntugoyyere canŋafyinmɛyyereŋi i,
Zheriko yyetiimpe na,
maa mpe taampe pyi.
33 Ŋka Musa ɲyɛ a nàzhan kan Levi tùluge shiinbilʼá mɛ.
Kafooŋi,
Izirayɛli u Kileŋi u ɲyɛ pire nàzhanŋi bà u mpyi a yi jwo pi á mɛ.