Zhurudɛn canŋacwumɔyyereŋi ntàaŋi
14
Taare Izirayɛli shiinbilʼà ta Kana kìni i ke,
tire ti ɲyɛ nte.
Sáragawwuŋi Eliyazari ná Nuni jyaŋi Zhozuwe ná Izirayɛli tùluyi pyɛnyi feebii pi à ti táa táa.
2 Ŋkyaanlwooni pi à tɛ̀gʼa taampe pyi mà tàanna ná Kafooŋi yi jwoŋkanni i Musa á,
tùluyo baacyɛɛre nà taaga shwɔhɔlʼe.
3 Musa mpyi a tùluyo shuunni ná niŋɛ taaga nàzhan kan yʼá Zhurudɛn baŋi kàntugoyyere,
ŋka u ɲyɛ a mpyi a yaaga kan Levi tùlugʼá pire shwɔhɔlʼe mɛ.
4 Yusufu jyaabii,
Manase ná Efirayimu na ɲyɛ tùluyo shuunni.
Wà ɲyɛ a tara kan Levi tùluge shiinbilʼá kìni i mɛ fo kànyi na pi à tɛ̀ɛn ke,
nà yi kwùumpe kanni pi yatɔɔre tanahage ná pi cyeyaayi kurugo.
5 Lire pyiŋkanni na Izirayɛli shiinbilʼà kìni táa mà tàanna ná Kafooŋi yi jwuŋkanni i Musa á.
Kalɛbu nàzhan taare
6 Canŋka,
Zhuda tùluge shiinbii pìlʼà shà Zhozuwe yyére Giligali i.
Yefune jyaŋi Kalɛbu u ɲyɛ Kenazi bage shin ke,
uru mpyi pi wà,
ka uru si jwo «Mà wuu yaha Kadɛsi-Barineya kànhe e,
ɲje Kafooŋi à jwo Kile sùpyaŋi Musa á mii ná mu kyaa na ke,
mu à yire cè.
7 Tèni i Kafooŋi báarapyiŋi Musa à mii tun mà yîri Kadɛsi-Barineya e na mii i pa nde kìni ŋwɔhʼa wíi ke,
mii mpyi yyee beeshuunni.
Mii à núrʼa shà ke,
ka mii i tùnnture ɲwɔshwɔɔre fínniŋʼa jwo u á.
8 Mii cìnmpyiibii pi mpyi a pa ná mii i ke,
pire mpyi a sùpyire yatanɲyi bò,
ŋka mii wi ke,
karigii Kafooŋi,
mii Kileŋi mpyi a jwo mii á ke,
mii à pyi u á ɲwɔmɛɛ foo cyi puni i.
9 Kuru canŋke,
Musa à kâa mii á,
na mii aha na tɔɔge cyán kìni cyaga maha cyagʼe ke,
kuru sí n-pyi mii ná na tùluge wogo fo tèekwombaa.
Ɲaha kurugo yɛ,
karigii Kafooŋi,
mii Kileŋi mpyi a jwo mii á ke,
mii à pyi u á ɲwɔmɛɛ foo cyi puni i.
10 Ɲyɛ,
mà lwɔ́ Kafooŋi à mpe jwumpe jwo Musa á mà Izirayɛli shiinbii yaha síwage e ɲani na ke,
Kafooŋi à yaha mii múnaani na yyee beeshuunni ná kaŋkuro (45) funŋʼi mà tàanna ná u ɲwɔmɛɛni niɲjwooni i.
Mii niɲjaa wuŋi ɲyɛ yyee beecyɛɛre ná kaŋkuro (85).
11 Ŋka,
fànhe saha a sìi mii i mu à jwo canŋke Musa à mii tun ke.
Fànhe na ɲyɛ mii i kuru canŋke fiige si sà kàshi kwɔ̀n lire ɲyɛ mɛ,
mà kani labɛrɛ pyi.
12 Lire e ke,
ɲaŋkuluni ɲwɔmɛɛni Kafooŋi mpyi a lwɔ́ mii á kuru canŋke ke,
lire kan na á.
Ɲaha kurugo yɛ,
mu à yi lógo kuru canŋke na Anaki tùluge shiinbii pi ɲyɛ wani,
kànbwoyi yi ɲyɛ wani káaŋke sʼa tɛ̀gʼa yi kwûulo.
Kafooŋi ká jyè lʼe,
mii sí li shwɔ pi na bà Kafooŋi mpyi a yi jwo mɛ.»
13 Ɲyɛ ka Zhozuwe si jwó le Yefune jyaŋi Kalɛbu á maa Eburɔn kànhe kan u á u à pyi u nàzhan taara.
14 Lire pyiŋkanni na Eburɔn kànhʼà pyi Kenazi tùluge shinŋi Yefune jyaŋi Kalɛbu wogo ali niɲjaa.
Ɲaha kurugo yɛ,
u à pyi ɲwɔmɛɛ foo Kafooŋi,
Izirayɛli u Kileŋi á karigii puni i.
15 Eburɔn kànhe mɛge mpyi a fyânha a pyi Kiriyati-Araba.
Araba u mpyi Anaki shiinbii puni shinbwoŋi.
Ka kàshige si yyére,
ka pi i ŋɔ̀.