Zhuda tùluge nàzhan taare
15
Zhuda tùluge shiinbilʼà nàzhanŋi ŋgemu ta taare e ŋkyaanlwooni cye kurugo mà tàanna ná pi pyɛnyi pɛ̀rɛge e ke,
tire mpyi à lwɔ́ wwòro kùlu yyéreŋi mà shà canŋafyinmɛ yyéreŋi i mà sà nɔ Edɔmu tɛgɛni na.
Zini síwage ku mpyi pi wwòro kùlu yyéreŋi tɛgɛni.
2 Pi wwòro kùlu yyére tɛgɛni mpyi a lwɔ́ suumpe lwɔhe ɲyiiyaaga bàa woge wwòro kùlu yyéreŋi tawage na,
3 mà tòrʼa kàre Akirabimu taduguge wwòro kùlu yyéreŋi,
mà kàrʼa sà nɔ Zini síwage e,
maa ntòrʼa kàrʼa sà nɔ Kadɛsi-Barineya wwòro kùlu yyéreŋi,
maa yîri wani mà sà nɔ Ɛsirɔn na,
mà tòrʼa kàre Adari kàmpanŋke na,
mà mâhanʼa sà nɔ Karika na.
4 Maa yîri wani,
mà sà nɔ Asimɔ na,
maa ŋkàrʼa sà nɔ Misira dùge na,
mà tòrʼa kàre fo suumpe lùbwɔhe na.
Pi tɛgɛni li ɲyɛ lire wwòro kùlu yyéreŋi.
5 Canŋafyinmɛ yyéreŋi i,
pi tɛgɛni li ɲyɛ suumpe lwɔhe ɲyiiyaaga bàa woge,
maa ŋkàrʼa sà nɔ kuru ná Zhurudɛn baŋi yiye tacyirege na.
Suumɔ kùlu yyéreŋi i,
pi tɛgɛnʼà lwɔ́ Zhurudɛn baŋi ná suumpe lwɔhe ɲyiiyaaga bàa woge tacirige na,
6 maa ŋkàrʼa sà nɔ Bɛti-Ogila na,
maa yîri wani mà sà ntòro Bɛti-Araba suumɔ kùlu yyére,
maa ŋkàrʼa sà nɔ Urubɛn jyaŋi Bohan kafaage cyage na,
7 maa ntòro Akɔri tafage e mà dùgʼa kàre Debiri kàmpanŋke na,
mà tòrʼa kàre suumɔ kùlu yyére Giligali yyéreŋi i.
Kuru cyage na ɲyɛ Adumimu yyetiimpe na,
baŋi wwòro kùlu yyéreŋi,
maa ŋkàrʼa sà byanhara Ɛni-Semɛsi lùbiliŋi cyage na,
mà kàrʼa sà nɔ fo Ɛni-Orogɛli na,
8 maa yîri wani,
mà sà ntòro Bɛni-Inɔmu kacyage taan Yebusi shiinbii ɲaŋke tatirige wwòro kùlu yyéreŋi.
Kuru ɲaŋke cyage ku ɲyɛ Zheruzalɛmu,
maa yîri wani mà kàrʼa sà dùgo ɲaŋke kà ɲuŋʼi.
Kuru na ɲyɛ Inɔmu kacyage yyetiimpe na canŋacwumɔ yyéreŋi i,
mà kàrʼa sà nɔ fo Erefayimu shiinbii tɛgɛni tafage na suumɔ kùlu yyére.
9 Maa lwɔ́ kuru ɲaŋke na,
maa ŋkàrʼa sà nɔ Nɛfitoha lùbiliŋi cyage na,
maa yîri wani mà kàrʼa sà nɔ Efurɔn ɲaŋke kànyi na,
mà kàrʼa sà nɔ Bahala na.
Kuru mɛge kà ku ɲyɛ Kiriyati-Yeharimu.
10 Maa yîri wani,
maa wâlʼa kàre canŋacwumpe e mà sà nɔ Seyiri ɲaŋke na,
mà tòrʼa kàrʼa sà nɔ Yeharimu ɲaŋke numpɛnge na suumɔ kùlu yyéreŋi i.
Pi maha kuru cyage mɛgɛ pyi Kesalɔni mú.
Maa yîri wani mà kàrʼa sà nɔ Bɛti-Semɛsi na,
mà sà ntòro Timina taan,
11 mà kàrʼa sà ntòro Ekurɔn suumɔ kùlu yyére mà sà nɔ Sikirɔn na,
maa yîri wani mà sà dùgo Bahala ɲaŋke na mà tîgʼa sà ntòro Yabinehɛli taan mà kàrʼa sà yyére fo suumpe lùbwɔhe na.
12 Suumpe lùbwɔhe kʼà pyi pi tɛgɛni canŋacwumɔ yyéreŋi i.
Zhuda tùluge shiinbii tɛgɛni lʼà pyi lire kàmpanɲyi puni na,
mà tàanna ná pi pyɛnyi pɛ̀rɛge e.
13 Yefune jyaŋi Kalɛbu à u nàzhan taare ta Zhuda tùluge shiinbii shwɔhɔlʼe bà Kafooŋi mpyi a yi jwo Zhozuwe á mɛ.
Ka Zhozuwe si Kiriyati-Araba kan u á.
Anaki shiinbii tulyɛge mɛge kʼà le kuru kànhe na.
Ku mɛge kà ku mpyi Eburɔn mú.
14 Kalɛbu à Anaki shiinbii tùluyo taanre kɔ̀rʼa lwɔ́ wani.
Yire yi mpyi:
Shishayi ná Ahimani ná Talimayi.
15 Wani Kalɛbu à yîri maa ŋkàre Debiri shiinbii mɛɛ na.
Debiri mɛge ku mpyi Kiriyati-Sefɛri tèecyiini i.
16 Kalɛbu mpyi a jwo:
«Ŋgemu ká Kiriyati-Sefɛri kànhe tùn maa jà ku na ke,
mii sí na pworoŋi Akisa kan urufoo u pyi u cwo.»
17 Ka Kalɛbu kàntugowuŋi Kenazi jyaŋi Ɔtiniyɛli si kànhe tùn maa jà ku na,
ka Kalɛbu si u pworoŋi Akisa kan u à pyi u cwo.
18 Akisa à kàre u pooŋi Ɔtiniyɛli pyɛnge e ke,
maa u sɔ̀n na u sà taare tà cya uru tuŋʼá.
Akisa à tîge u dùfaanŋke ɲuŋʼi ke,
ka Kalɛbu si u pyi:
«Na ɲaha yɛ?»
19 Ka u u u ɲwɔ shwɔ:
«Ɲwɔ na na maa lùbiliŋi cyage kà kan na á mú,
ɲaha kurugo yɛ,
cyage mu à kan mii á wwòro kùlu yyéreŋi i ke,
kuru na ɲyɛ tawaga.»
Ka Kalɛbu si nìɲyi yyére lùbilibii cyage ná ɲwɔhɔntaan yyére wuubii cyage kan u á.
20 Zhuda tùluge shiinbii nàzhan taare tʼà pyi nte mà tàanna ná pi pyɛnyi pɛ̀rɛge e.
21 Zhuda tùluge tɛgɛni kanyi yi mpyi wwòro kùlu yyéreŋi mà shà Edɔmu yyére tɛgɛni na ke,
yire yi mpyi ɲje:
Kabisɛli ná Edɛri ná Yaguri,
22 ná Kina ná Dimona ná Adada,
23 ná Kedɛsi ná Azɔri ná Itina,
24 ná Zifu ná Telɛmu ná Behalɔti,
25 ná Azɔri-Adata ná Keriyɔti-Ɛsirɔn pi maha mpyi Azɔri ke,
26 ná Amami ná Shema ná Molada,
27 ná Asari-Gada ná Ɛsimɔ ná Bɛtipalɛti,
28 ná Asari-Suwali ná Bɛrisheba ná Bizotiya,
29 ná Bahala ná Iyimu ná Asɛmu,
30 ná Ɛlitoladi ná Kesili ná Ɔrima,
31 ná Zikilaki ná Madimana ná Sansana,
32 ná Lebahɔti ná Silihimu ná Ayini ná Irimɔ.
Yire puni na ɲyɛ kànya beɲjaaga ná baacyɛɛre ná yi kwùumpe kànpyɛɛre.
33 Kànyi yi mpyi tatiige e ke,
yire yi mpyi:
Esitayɔli ná Zoreya ná Asina,
34 ná Zanoha ná Ɛni-Ganimu ná Tapuwa ná Enamu,
35 ná Yarimuti ná Adulamu ná Soko ná Azeka,
36 ná Sarayimu ná Aditayimu ná Gedara ná Gederotayimu.
Yire na ɲyɛ kànya kɛ ná sicyɛɛre ná yi kwùumpe kànpyɛɛre.
37 Kànyi yʼà bâra yire na ke,
yire yi mpyi:
Zanani ná Adasa ná Migidali-Gadi,
38 ná Dileyani ná Misipa ná Yokitɛli,
39 ná Lakishi ná Bɔsikati ná Egilɔn,
40 ná Kabɔn ná Lamasi ná Kitilisi,
41 ná Gederɔti ná Bɛti-Dagɔn ná Naama ná Makeda.
Yire na ɲyɛ kànya kɛ ná baani ná yi kwùumpe kànpyɛɛre.
42 Kànyi yʼà bâra yire na ke,
yire yi ɲyɛ:
Libina ná Etɛri ná Asan,
43 ná Yifita ná Asina ná Nesibu,
44 ná Keyila ná Akizibu ná Maresa.
Yire na ɲyɛ kànya baacyɛɛre ná yi kwùumpe kànpyɛɛre.
45 Kànyi yʼà bâra yire na ke,
yire yi mpyi:
Ekurɔn ná u kwùumpe kànyi ná kànpyɛɛre.
46 Kànbwoyi ná kànpyɛɛre puni ti mpyi Azidɔdi kwùumpe e ná yi mpyi Ekurɔn ná suumpe lùbwɔhe shwɔhɔlʼe ke,
yire puni mú mpyi pi à,
47 ná Azidɔdi ná u kwùumpe kànyi ná kànpyɛɛre ná Gaza ná u kwùumpe kànyi ná kànpyɛɛre,
fo mà sà nɔ Misira dùge na,
maa ŋkàrʼa sà yyére suumpe lùbwɔhe na.
Kuru ku ɲyɛ pi tɛgɛni.
48 Kànyi yi mpyi pi á ɲaŋkuluni i ke,
yire yi mpyi:
Samiri ná Yatiri ná Soko,
49 ná Dana ná Kiriyati-Sana pi maha mpyi Debiri ke,
50 ná Anabu ná Esitemo ná Animu,
51 ná Gozeni ná Olɔn ná Gilo.
Yire na ɲyɛ kànya kɛ ná niŋkin ná yi kwùumpe kànpyɛɛre.
52 Kànyi yʼà bâra yire na ke,
yire yi ɲyɛ:
Araba ná Duma ná Esheyan,
53 ná Yanumu ná Bɛti-Tapuwa ná Afeka,
54 ná Umita ná Kiriyati-Araba pi maha mpyi Eburɔn ke,
ná Shiyɔri.
Yire na ɲyɛ kànya baacyɛɛre ná yi kwùumpe kànpyɛɛre.
55 Kànyi yʼà bâra yire na ke,
yire yi mpyi:
Mayɔn ná Karimɛli ná Zifu ná Yuta,
56 ná Zizirɛli ná Yokideyamu ná Zanoha,
57 ná Kahini ná Gibeha ná Timina.
Yire na ɲyɛ kànya kɛ ná yi kwùumpe kànpɛɛre.
58 Kànyi yʼà bâra yire na ke,
yire yi ɲyɛ:
Aluli ná Bɛtisuri ná Gedɔri,
59 ná Marati ná Bɛti-Anɔti ná Elitekɔni.
Yire na ɲyɛ kànya baani nà yi kwùumpe kànpɛɛre.
60 Kànyi yʼà bâra yire na ke,
yire yi mpyi:
Kiriyati-Baali pi maha mpyi Kiriyati-Yeharimu ke,
ná Araba.
Yire na ɲyɛ kànya shuunni nà yi kwùumpe kànpɛɛre.
61 Kànyi yi mpyi síwage e ke,
yire yi mpyi:
Bɛti-Araba ná Midini ná Sekaka,
62 ná Nibisan ná Iri-mela ná Ɛni-Gedi.
Yire na ɲyɛ kànya baani ná yi kwùumpe kànpɛɛre.
63 Yebusi shiinbii pi mpyi a tɛ̀ɛn Zheruzalɛmu i ke,
Zhuda tùluge shiinbii ɲyɛ a jà a pire kɔ̀rʼa lwɔ́ wani mɛ.
Lire kurugo Yebusi shiinbii ná Zhuda shiinbilʼà tɛ̀ɛn siɲcyan Zheruzalɛmu kànhe e ali niɲjaa.