Yusufu tùluge nàzhan taare
16
Taare Yusufu tùluge shiinbii mpyi a ta ŋkyaanlwooni cye kurugo ke,
tire mpyi a lwɔ́ Zhurudɛn baŋi na Zheriko kànhe taan,
Zheriko lùbilibii canŋafyinmpe e,
maa ntòro síwage e mà kàrʼa sà nɔ ɲaŋke na Bɛtɛli kànhe na.
2 Ta à yîri wani mà kàrʼa sà nɔ Luzi kànhe na,
maa lwɔ́ wani mà sà nɔ Arika shiinbii tɛgɛni na Atarɔti kànhe e,
3 maa yîri wani mà tîge canŋacwumpe e mà sà ntòro Yafilɛti shiinbii kùluni tɛgɛni na,
maa ŋkàre lùfwuntigimpe e mà sà nɔ fo Bɛti-Ɔrɔn ná Gezɛri na,
mà kàrʼa sà yyére suumpe lwùbwɔhe na.
4 Tire tʼà pyi Yusufu jyaabii,
Manase ná Efirayimu nàzhan taare.
Efirayimu tùluge nàzhan taare
5 Efirayimu tùluge nàzhan taare tʼà pyi ntemu mà tàanna ná pi pyɛnyi pɛ̀rɛge e ke,
tire ti mpyi:
Canŋafyinmɛ yyéreŋi i,
ti mpyi a lwɔ́ Atarɔti-Adari i mà kàrʼa sà nɔ Bɛti-Ɔrɔn na nìɲyi yyére.
6 Canŋacwumɔ yyére tɛgɛni mpyi a lwɔ́ Mikimetati suumɔ kùlu yyére,
maa mâhana a pa canŋafyinmɛ yyéreŋi i mà sà ntòro Tanahati-Silo taan mà kàre Yanoha canŋafyimpe e,
7 maa yîri Yanoha e mà kàre Atarɔti ná Naarata kànyi na mà sà nɔ fo Zheriko e mà tòrʼa kàrʼa sà yyére Zhurudɛn baŋi na.
8 Ta à lwɔ́ Tapuwa na maa ŋkàre canŋacwumpe e mà sà nɔ Kana dùge na,
maa ntòrʼa kàrʼa sà yyére suumpe lùbwɔhe na.
Tire tʼà pyi Efirayimu tùluge nàzhan taare mà tàanna ná pi pyɛnyi pɛ̀rɛge e.
9 Kànbwoyi yà ná yi kànpyɛɛrɛ tà mú à kan Efirayimu tùluge shiinbilʼá Manase tùluge shiinbii shwɔhɔlʼe.
10 Kana shiinbii pi mpyi a tɛ̀ɛn Gezɛri kànhe e ke,
Efirayimu shiinbii ɲyɛ a pire kɔ̀rɔ mɛ.
Pire Kana shiinbii saha na ɲyɛ Efirayimu shiinbii shwɔhɔlʼe ali niɲjaa,
ŋka pi à pyi pi bilii.