Manase tùluge shiinbii nàzhan taare
17
Manase tùluge shiinbii nàzhan taare ŋkyanlwoonʼà pyi mú.
Uru u mpyi Yusufu jyaŋi niɲcyiiŋi.
Makiri u mpyi Manase jyaŋi niɲcyiiŋi maa mpyi Galadi tuŋi ke,
urʼá Galadi kùluni ná Basan wuunʼà kan,
ɲaha kurugo yɛ,
káshikwɔnmpege ku mpyi ku ki.
2 Pi à ŋkyaanlwooni pyi mú mà tɛ̀gʼa Manase tùluge sanŋke nàzhan taare kan pi á mà tàanna nà pi pyɛnyi pɛ̀rɛge e.
Pire pi mpyi:
Abiyezɛri bage shiinbii ná Elɛki woge shiinbii ná Asiriyɛli woge shiinbii ná Sikɛmu woge shiinbii ná Efɛri woge shiinbii ná Semida woge shiinbii.
Pire pi ɲyɛ Yusufu jyaŋi Manase jyaabii.
Pire punʼà pi nàzhan ta mà tàanna ná pi pyɛnyi pɛ̀rɛge e.
3 Manase jyaŋi Makiri,
uru u jyaŋi Galadi,
uru u jyaŋi Efɛri,
uru u jyaŋi Selofadi wi ke,
uru ɲyɛ a mpyi a pùnambile ta mɛ fo pùcempyire.
Pire pi mpyi:
Mala ná Nowa ná Ogila ná Milika ná Tirisa.
4 Ka tire pùcempyire si shà sáragawwuŋi Eliyazari ná Nuni jyaŋi Zhozuwe ná sùpyire yyaha yyére shiinbii yyére maa sà pi pyi:
«Kafooŋi mpyi a yi jwo Musa á na u taare tà kan wuu á,
wuu cìnmpyinambaabii fiige.»
Ka pi i taare tà kan pi á pi cìnmpyinambaabii fiige bà Kafooŋi mpyi a yi jwo mɛ.
5 Lire pyiŋkanni na Manase tùluge shiinbilʼà cyeye kɛ ta mà bâra Zhurudɛn baŋi kàntugoyyereŋi,
Galadi ná Basan cyeyi na.
6 Ɲaha kurugo yɛ,
Manase pworobilʼà nàzhan tara ta u jyaabii shwɔhɔlʼe.
Ka Galadi kùluni si mpyi Manase jyaabii sanmpiiwuu.
7 Manase tùluge shiinbii taare mpyi a lwɔ́ Ashɛri na,
maa ŋkàrʼa sà ntòro Mikimetati i,
Sikɛmu canŋafyinmpe e,
maa yîri wani,
mà sà ntòro Yamini i mà kàre wwòro kùlu yyéreŋi Ɛni-Tapuwa shiinbii kàmpanŋke na.
8 Tapuwa kùluni mpyi Manase tùluge wuu,
ŋka Tapuwa kànhe yabiliŋi,
ná kuru mpyi Manase tùluge taare tɛgɛni na ke,
kuru mpyi Efirayimu tùluge wogo.
9 Manase shiinbii tɛgɛni mpyi a lwɔ́ wani,
maa ŋkàrʼa sà láha Kana dùge wwòro kùlu yyéreŋi kàmpanŋke na.
Lire kùluni kànyi mpyi Efirayimu wuyo,
Manase tùluge kànyi sʼà yire mâhana.
Manase tùluge taare tɛgɛni mpyi a tòro dùge suumɔ kùlu yyére mà kàrʼa sà láha suumpe lùbwɔhe na.
10 Lire pyiŋkanni na,
Efirayimu tùluge taare mpyi wwòro kùlu yyéreŋi,
Manase tùluge woore sí ɲyɛ suumɔ kùlu yyére.
Suumpe lùbwɔhe ku ɲyɛ pi tɛgɛni canŋacwumɔ yyére.
Ashɛri tùluge taare mpyi Manase tùluge woore suumɔ kùlu yyére,
Isakari tùluge woore sí ɲyɛ canŋafyinmɛ yyére.
11 Isakari tùluge taare ná Ashɛri tùluge taare kànyi yà mpyi a kan Manase wogʼá.
Yire kànyi yi mpyi:
Bɛti-Sehan ná u kwùumpe kànpyɛɛre ná Ibilehamu ná u kwùumpe kànpyɛɛre ná Dɔri ná Eni-Dɔri ná Tanaki ná Megido ná yire kànyi shiinbii ná yire kànyi kwùumpe kànpyɛɛre.
Cyirʼà pyi kùlugii taanre.
12 Manase tùluge shiinbii ɲyɛ a jà a yire kànyi shiinbii kɔ̀rɔ mɛ.
Lire kurugo Kana shiinbii saha na ɲyɛ wani lire kùluni i.
13 Izirayɛli shiinbilʼà pa fànha ta sèlʼe ke,
ka pi i Kana shiinbii yaha báarawayi na,
ŋka pi ɲyɛ a pi kɔ̀rɔ mɛ.
Yusufu tùluge shiinbilʼà taare tà ɲáara sahaŋki
14 Canŋka,
Yusufu tùluge shiinbilʼàa sà Zhozuwe pyi:
«Ɲaha kurugo mu à cyaga niŋkin kanna kan wuu á mà li ta Kafooŋi à jwó lwɔ́ wuu na mà pa nɔ niɲjaa na maa wuu pyi wuu à ɲyaha yɛ?»
15 Ka Zhozuwe si jwo:
«Ká mpyi yii à ɲyaha,
ka Efirayimu ɲaŋkùluni si ɲcyɛ́rɛ yii e,
yii jyè Pɛrɛzi ná Erefayimu shiinbii kùluni tapuŋke e,
yii i cire tà páan yiyʼá.»
16 Ka Yusufu tùluge shiinbii si jwo:
«Ɲaŋkulunʼà cyɛ́rɛ wuu e.
Ŋka,
Kana shiinbii pi à tɛ̀ɛn tatiige e,
Bɛti-Sehan ná u kwùumpe e,
ná mpii pi ɲyɛ Zizirɛli bafage e ke,
pire na ɲyɛ ná tɔɔnte kàshikwɔnwotorobilʼe.»
17 Ka Zhozuwe si Yusufu tùluge shiinbii,
Efirayimu ná Manase pyi:
«Yii à ɲyaha,
yii fànhe mú a ɲyaha,
cyaga niŋkin kanna sì n-jà ŋkan yii á mɛ.
18 Ɲaŋkuluni sí n-kan yii á.
Ku mɛɛ ká nta tapunŋɔ,
yii si ku puni páan si mpyi yiye wogo.
Tɔɔnte kàshikwɔnwotorobii mɛɛ ká nta Kana shiinbilʼá ka pi fànhe si nta kʼà ɲyaha,
yii sí pi kɔ̀rɔ si n-lwɔ́ wani.»