Kìni sanni táaŋkanni
18
Izirayɛli shiinbii punʼà piye bínni Silo kànhe e,
maa mbìnniŋi vàanŋke bage kwôro,
ɲaha kurugo yɛ,
pi mpyi a jà kìni puni na a kwɔ̀.
2 Tùluyo baashuunni mpyi a kwôro Izirayɛli shiinbii shwɔhɔlʼe,
pire mpyi na sàha ŋkwɔ̀ a nàzhan tara ta mɛ.
3 Ka Zhozuwe si Izirayɛli shiinbii pyi:
«Kafooŋi,
yii tulyeyi u Kileŋi à nde kìni kan yii á,
ɲaha yii ɲyɛ na sigili si sà ntɛ̀ɛn lʼe yɛ?
4 Yii shiin taanre cwɔɔnrɔ tùlugo maha tùlugo.
Mii sí pi pyi pi sà kìni puni ɲaara,
si tɛgigii le si ntɛ̀gɛ li táa,
si mpa yi yyaha jwo mii á.
5 Pi sí li táa tataaya baashuunni.
Zhuda tùluge shiinbii sí n-kwôro pi nàzhan taare e wwòro kùlu yyéreŋi.
Yusufu shiinbii sí n-kwôro pi nàzhan taare e suumɔ kùlu yyére.
6 Yii aha li táa tataaya baashuunni,
maa li tɛgɛgii puni wwû mà pa ɲcyêe mii na,
mii sí ŋkyaanlwooni pyi ntɛ̀gɛ tùlugo maha tùlugo nàzhan tara cyêe ku na Kafooŋi,
wuu Kileŋi yyahe taan.
7 Ŋka Levi tùluge shiinbii sì nàzhan ta mɛ,
ɲaha kurugo yɛ,
pire nàzhanŋi u ɲyɛ na sárayi wwû Kafooŋi á.
Gadi tùluge ná Urubɛn woge ná Manase woge taagʼà pi nàzhanŋi ta a kwɔ̀ Kafooŋi báarapyiŋi Musa á Zhurudɛn baŋi canŋafyinmɛ yyéreŋi i.»
8 Ɲyɛ,
mpii pi à cwɔɔnrɔ pi sà kìni tɛgigii wwû ke,
ka pire si bégele sʼa ŋkɛ̀ɛge.
Mà jwo pi kuni lwɔ́ ke,
ka Zhozuwe si pi pyi:
«Yii sà kìni ɲaara,
yii i li tɛgigii wwû yii pa ɲcyêe na na.
Mii sí ŋkyaanlwooni pyi yii shwɔhɔlʼe ti na Kafooŋi yyahe taan naha Silo e.»
9 Ka pi i ŋkàrʼa sà kìni ɲaara,
maa tɛgigii baashuunni wwû li na sémɛ e mà tàanna ná li kànbwoyi i,
mà pa ŋkan Zhozuwe á pi tatɛɛnge e Silo e.
10 Ka Zhozuwe si ŋkyaanlwooni pyi ti na Kafooŋi yyahe taan Silo e,
maa kìni táa,
maa Izirayɛli tùlugo maha tùlugo nàzhan kan kʼá.
Bezhamɛ tùluge nàzhan taare
11 Ŋkyaanlwoonʼà tɛ̀gʼa cyage niɲcyiige ŋkemu kan mà tàanna ná pyɛnyi pɛ̀rɛge e ke,
kurʼà pyi Bezhamɛ tùluge wogo.
Pire nàzhan taare mpyi Zhuda tùluge woore ná Yusufu tùluge woore shwɔhɔlʼe.
12 Pi suumɔ kùlu yyére tɛgɛni mpyi à lwɔ́ Zhurudɛn baŋi na maa dùgʼa kàrʼa sà ntòro Zheriko suumɔ kùlu yyére,
maa lwɔ́ wani mà sà ntòro ɲaŋkuluni taan mà kàre canŋacwumɔ yyére mà kàrʼa sà nɔ síwage na Bɛti-Avɛni kànhe taan.
13 Maa yîri wani,
Luzi kànhe pi maha mpyi Bɛtɛli ke,
mà sà ntòro kuru wwòro kùlu yyéreŋi.
Bɛti-Ɔrɔn kànhe ku ɲyɛ tatiige e ke,
ɲaŋke ku ɲyɛ kuru wwòro kùlu yyéreŋi ke,
maa ŋkàrʼa sà dugo kuru ɲuŋʼi mà kàre Atarɔti-Adari kànhe.
14 Pi tɛgɛni mpyi a lwɔ́ kuru ɲaŋke na,
maa mâhana a tòro canŋacwumɔ yyére,
maa yîri wani mà tòro wwòro kùlu yyéreŋi,
mà kàrʼa sà nɔ Kiriyati-Baali na,
pi mú maha uru pyi Kiriyati-Yeharimu.
Zhuda kànbwɔhe kà ku ɲyɛ kure.
Kuru ku ɲyɛ pi canŋacwumɔ yyére tɛgɛni.
15 Wwòro kùlu yyére tɛgɛnʼà lwɔ́ Kiriyati-Yeharimu na maa ŋkàre canŋacwomɔ yyére mà sà láha Nɛfitoha lùbiliŋi cyage na.
16 Maa yîri wani mà tîgʼa sà ntòro ɲaŋke ŋkère na Bɛni-Inɔmu kacyage yyetiimpe na Erefayimu shiinbii tafabwɔhe e suumɔ kùlu yyére,
maa yîri wani mà sà ntòro Inɔmu tafabwɔhe e mà kàre Yebusi shiinbii ɲaŋke wwòro kùlu yyéreŋi mà sà nɔ fo Ɛni-Orogɛli na.
17 Maa yîri wani mà mâhana a ntòro suumɔ kùlu yyére mà sà ntòro Ɛni-Semɛsi i mà kàre Gelilɔti i,
uru na ɲyɛ Adumimu kànhe yyetiimpe na,
maa ŋkàrʼa sà nɔ Urubɛn jyaŋi Bohan kafaage cyage na.
18 Maa yîri wani mà tòro Zhurudɛn bafage ɲaŋke suumɔ kùlu yyére mà tîge kuru bafage e,
19 mà sà ntòro Bɛti-Ogila kànhe suumɔ kùlu yyére mà sà láha suumpe lwɔhe ɲyiiyaaga bàa woge suumɔ kùlu yyéreŋi na.
Kuru cyage e Zhurudɛn baŋʼà sogo suumpe lwɔhe ɲyiiyaaga bàa woge na.
Lire li ɲyɛ pi wwòro kùlu yyéreŋi tɛgɛni.
20 Zhurudɛn baŋi u ɲyɛ pi canŋafyinmɛ yyéreŋi tɛgɛni.
Bezhamɛ shiinbii taare tɛgigii cyi à pyi cyire mà tàanna ná pi pyɛnyi pɛ̀rɛge e.
21 Kànbwoyi yi mpyi Bezhamɛ tùluge shiinbilʼá mà tàanna ná pi pyɛnyi pɛ̀rɛge e ke,
yire yi mpyi:
Zheriko ná Bɛti-Ogila ná Emɛki-Kesisi,
22 ná Bɛti-Araba ná Semarayimu ná Bɛtɛli,
23 ná Avimu ná Para ná Ofira,
24 Ná Kefari-Amona ná Ɔfini ná Geba.
Yire na ɲyɛ kànya kɛ ná shuunni ná yi kwùumpe kànpyɛɛre.
25 Kànyi yi mpyi à bâra yire na ke,
yire yi mpyi:
Gabahɔn ná Arama ná Berɔti,
26 ná Misipa ná Kefira ná Mosa,
27 ná Erekɛmu ná Iripɛli ná Tarala,
28 ná Sela ná Elɛfu ná Yebusi shiinbii kànhe pi maha mpyi Zheruzalɛmu ke,
ná Gibeya ná Kiriyati.
Yire na ɲyɛ kànya kɛ ná sicyɛɛre ná yi kwùumpe kànpyɛɛre.
Tire tʼà pyi Bezhamɛ shiinbii nàzhan taare mà tàanna ná pi pyɛnyi pɛrɛge e.