Simiyɔn tùluge shiinbii názhan taare
19
Ŋkyaanlwoonʼà tɛ̀gʼà cyage shwɔnwoge ŋkemu kan mà tàanna ná pyɛnyi pɛ̀rɛge e ke,
kurʼà pyi Simiyɔn tùluge wogo.
Pi wogʼà pyi Zhuda tùluge shiinbii woge niŋke e.
2 Pi kànbwoyi yʼà pyi:
Bɛrisheba ná Seba ná Molada,
3 ná Asari-Suwali ná Bahala ná Asɛmu,
4 ná Ɛlitoladi ná Betuli ná Ɔrima,
5 ná Zikilaki ná Bɛti-Marikabɔti ná Asari-Susa,
6 ná Bɛti-Lebahɔti ná Saruwɛni.
Yire na ɲyɛ kànya kɛ ná taanre ná yi kwùumpe kànpyɛɛre.
7 Kànyi yʼà bâra yire na ke,
yire yi mpyi:
Ayini ná Irimɔ ná Etɛri ná Asan.
Yire na ɲyɛ kànya sicyɛɛre ná yi kwùumpe kànpyɛɛre.
8 Kànpyɛɛre ti mpyi yire kànyi kwùumpe e fo mà sà nɔ wwòro kùlu yyéreŋi Bahalati-Bɛri pi maha mpyi Aramati ke,
yire puni yi mpyi Simiyɔn tùluge shiinbii nàzhanŋi mà tàanna ná pi pyɛnyi pɛ̀rɛge e.
9 Zhuda tùluge shiinbii u taare tà ti mpyi a kwɔ̀n mà kan Simiyɔn tùlugʼá.
Ɲaha kurugo yɛ,
Zhuda tùluge shiinbii nàzhanŋi mpyi a pêe pi na sèlʼe.
Lire kurugo Simiyɔn tùluge shiinbii u taarʼà sà tiye ta Zhuda tùluge woore niŋke e.
Zabulɔn tùluge shiinbii názhan taare
10 Ŋkyaanlwoonʼà tɛ̀gʼà cyage tanrawoge ŋkemu kan mà tàanna ná pyɛnyi pɛ̀rɛge e ke,
kurʼà pyi Zabulɔn tùluge wogo.
Pire u taare tɛgɛni mpyi a kàrʼa sà nɔ fo Saridi na.
11 Maa lwɔ́ wani mà sà nɔ Mareyala na canŋacwumɔ yyére,
maa yîri wani mà kàrʼa sà nɔ Dabɛsɛti na,
maa ntòrʼa kàrʼa sà nɔ Yokineyamu kànhe dùge taan.
12 Maa lwɔ́ Saridi na,
mà mâhana a tòro canŋafyinmpe e mà kàrʼa sà nɔ Kisilɔti-Tabɔri kùluni tɛgɛni na.
Maa yîri wani mà sà ntòro Dabirati i mà dùgo Yafiya kàmpanŋke na.
13 Maa yîri wani mà tòro canŋafyinmɛ yyére mà sà nɔ Gita-Efɛri ná Ita-Kasini na,
maa ŋkàrʼa sà ntòrʼa Irimɔ taan mà sà nɔ Neya na.
14 Maa núrʼa mâhana a kàre suumɔ kùlu yyére mà sà ntòro Anatɔn e mà sà láha Yifita-Ɛli tafage na.
15 Kànya kɛ ná shuunni ná yi kwùumpe kànpyɛɛre ti mpyi wani.
Yire yà yi ɲyɛ:
Katati ná Nahalali ná Simirɔn ná Idala ná Bɛtilɛhɛmu.
16 Yire kànyi ná yi kwùumpe kànpyɛɛre tʼà pyi Zabulɔn tùluge shiinbii nàzhanŋi mà tàanna ná pi pyɛnyi pɛ̀rɛge e.
Isakari tùluge shiinbii nàzhan taare
17 Ŋkyaanlwoonʼà tɛ̀gʼà cyage sicyɛrewoge ŋkemu kan mà tàanna ná pyɛnyi pɛ̀rɛge e ke,
kurʼà pyi Isakari tùluge wogo.
18 Pire u taare kànyi yʼà pyi:
Zizirɛli ná Kesulɔti ná Sunɛmu,
19 ná Afarayimu ná Siyɔn ná Anaharati,
20 ná Arabiti ná Kisiyɔn ná Ebɛsi
21 ná Eremɛti ná Ɛni-Ganimu ná Ɛni-Ada ná Bɛti-Pasɛsi.
22 Pire u taare tɛgɛni mpyi a kàrʼa sà nɔ Tabɔri ná Sasayimu ná Bɛti-Semɛsi na,
mà sà láha Zhurudɛn baŋi na.
Kànya kɛ ná baani ná yi kwùumpe kànpyɛɛre ti mpyi pi á.
23 Yire kànyi ná yi kwùumpe kànpyɛɛre tʼà pyi Isakari tùluge nàzhanŋi mà tàanna ná pi pyɛnyi pɛ̀rɛge e.
Asɛri tùluge shiinbii názhan taare
24 Ŋkyaanlwoonʼà tɛ̀gʼà cyage kaŋkurowoge ŋkemu kan mà tàanna ná pyɛnyi pɛ̀rɛge e ke,
kurʼà pyi Ashɛri tùluge wogo.
25 Pire u taare tɛgɛni mpyi a tòro kànyi ɲjemu na ke,
yire yi mpyi:
Ɛlikati ná Ali ná Betɛni ná Akizafu,
26 ná Alamelɛki ná Ameyadi ná Miseyali.
Pi canŋacwumɔ yyére tɛgɛni mpyi a sà ntòro Karimɛli ɲaŋke ŋkère na mà kàrʼa sà nɔ Sikɔri-Libina dùge na.
27 Maa mâhana a kàre canŋafyinmɛ yyére mà sà ntòro Bɛti-Dagɔn ŋkère na,
mà kàrʼa sà nɔ Zabulɔn kùluni na,
maa ŋkàre Yifita-Ɛli bafage e.
Maa yîri wani mà kàre suumɔ kùlu yyére mà sà n-tòro Bɛti-Emɛki ná Neyɛli i mà kàre kàmɛnɛ yyére Kabuli,
28 ná Evurɔn ná Erehɔbu ná Amɔ ná Kana fo mà sà nɔ Sidɔn kànbwɔhe na.
29 Maa yîri wani mà mâhana a kàrʼa sà nɔ Arama ná Tiri kànhe káaŋke na,
maa ntòrʼa kàre Osa kàmpanŋke na mà sà ntòro Akizibu ŋkère na mà sà láha suumpe lùbwɔhe na.
30 Uma ná Afɛki ná Erehɔbu kànyi mú na mpyi pi á.
Yire kànyi puni na ɲyɛ beɲjaaga ná shuunni ná yi kwùumpe kànpyɛɛre.
31 Yire kànyi ná yi kwùumpe kànpyɛɛre tʼà pyi Ashɛri tùluge nàzhanŋi mà tàanna ná pi pyɛnyi pɛ̀rɛge e.
Nɛfitali tùluge shiinbii nàzhan taare
32 Ŋkyaanlwoonʼà tɛ̀gʼà cyage baaniwoge ŋkemu kan mà tàanna ná pyɛnyi pɛ̀rɛge e ke,
kurʼà pyi Nɛfitali tùluge wogo.
33 Pire wwòro kùlu yyéreŋi kàmpanŋke mpyi a lwɔ́ Elɛfu na,
Zananimu kànhe cibwɔhe taan maa sà ntòro Adami-Nekɛbu ná Yabinehɛli i mà kàrʼa sà nɔ Lakumu i maa sà láha Zhurudɛn baŋi na.
34 Maa mâhana a kàre canŋacwumɔ yyére mà sà ntòro Azinɔti-Tabɔri i mà kàrʼa sà nɔ Ukɔki na.
Wwòro kùlu yyéreŋi i,
maa ŋkàrʼa sà nɔ Zabulɔn kùluni na,
canŋacwumɔ yyereŋi i,
maa ŋkàrʼa sà nɔ Ashɛri ná Zhuda na.
Pi canŋafyinmɛ yyéreŋi tɛgɛni lʼà pyi Zhurudɛn baŋi.
35 Pi kànbwoyi káaɲyi wuyi yi mpyi:
Sidimu ná Sɛri ná Amati ná Arakati ná Kinerɛti,
36 ná Adama ná Arama ná Azɔri,
37 ná Kedɛshi ná Edereyi ná Ɛni-Azɔri,
38 ná Yireyɔn ná Migidali-Ɛli ná Orɛmu ná Bɛti-Anati ná Bɛti-Semɛsi.
Yire na ɲyɛ kànya kɛ ná baacyɛɛre ná yi kwùumpe kànpyɛɛre.
39 Yire kànyi ná yi kwùumpe kànpyɛɛre tʼà pyi Nɛfitali tùluge nàzhanŋi mà tàanna ná pi pyɛnyi pɛ̀rɛge e.
Dan tùluge shiinbii nàzhan taare
40 Ŋkyaanlwoonʼà tɛ̀gʼà cyage baashwɔnwoge ŋkemu kan mà tàanna ná pyɛnyi pɛ̀rɛge e ke,
kurʼà pyi Dan tùluge wogo.
41 Pire u kùluni kànyi yʼà pyi:
Zoreya ná Esitayɔli ná Iri-Semɛsi,
42 ná Salabɛni ná Ayalɔn ná Itila,
43 ná Elɔn ná Timina ná Ekurɔn,
44 ná Ɛliteke ná Gibetɔn ná Balati,
45 ná Yewudi ná Bene-Beraki ná Gati-Irimɔ,
46 ná Me-Yarikɔn ná Arakɔn ná Zhope yyetiimpe taare.
47 Tèni i Dan tùluge shiinbii kùluni mpyi a shwɔ pi na ke,
pi à sà Lesɛmu kànhe shiinbii tùn maa jà pi na,
maa kàshikwɔnŋwɔɔni tɛ̀gʼa ku sùpyire bò,
maa ntɛ̀ɛn kʼe,
maa pi tulyɛge Dan mɛge le ku na.
48 Yire kànyi ná yi kwùumpe kànpyɛɛre tʼà pyi Dan tùluge shiinbii nàzhanŋi mà tàanna ná pi pyɛnyi pɛ̀rɛge e.
Zhozuwe nàzhan taare
49 Izirayɛli shiinbilʼà kìni táa maa li tɛgigii wwû mà kwɔ̀ ke,
maa taare tà kan Nuni jyaŋi Zhozuwe á piye shwɔhɔlʼe.
50 Mà tàanna ná Kafooŋi tùnnture e pi á,
Timinati-Sera kànhe u mpyi a ɲáare ke,
ka pi i kuru kan u á.
Kuru kànhe na ɲyɛ Efirayimu ɲaŋkuluni i.
Ka u u kuru kànhe núruŋʼa faanra maa ntɛ̀ɛn wani.
51 Lire pyiŋkanni na sáragawwuŋi Eliyazari ná Nuni jyaŋi Zhozuwe ná Izirayɛli pyɛnyi yyaha yyére shiinbilʼà ŋkyaalwooni pyi mà tɛ̀gʼa kìni táa táa piye na Silo e,
Kafooŋi yyaha taan mbìnniŋi vàanŋke bage tajyiɲwɔge na.
Amuni pi à kìni taampe pyi mà sà ŋkwɔ̀.