Taŋwɔhɔgɔ kànyi
20
Kafooŋi à Zhozuwe pyi
2 u mpe jwo Izirayɛli shiinbilʼá:
«Yii taŋwɔhɔgɔ kànya cwɔɔnrɔ bà mii mpyi a yi jwo Musa á u jwo yii á mɛ.
3 Wà ká ntòrʼa sùpya bò mà ta u ɲyɛ a li yîrige li kurugo mɛ,
urufoo si n-jà n-fê zà ŋwɔhɔ kuru kànhe kʼe,
si shwɔ niŋkwuŋi ŋkowwuvooŋi na.
4 Uru supyibuŋi ká fê a sà nɔ kuru kànhe kà na,
u sí n-yyére ku tajyiɲwɔge na si u kapyiini yyaha jwo ku kacwɔnrɔbilʼá.
Pire sí u sunmbage shwɔ si tatɛɛngɛ kan u á piye shwɔhɔlʼe.
5 Niŋkwuŋi ŋkowwuvooŋi ká u fyè le a sà nɔ wani,
pi sì u kan u á mɛ.
Ɲaha kurugo yɛ,
u ɲyɛ a li yîrige li kurugo maa u supyiɲɛɛŋi bò mɛ,
u mú ɲyɛ a têlʼa pyi u zàmpɛn mɛ.
6 Supyibuŋi sí ŋkwôro kuru kànhe e fo yukyaabii kʼaha yoge kyaala u na.
U sí ŋkwôro wani fo zà n-yaa ná lire tèni sáragawwuubii ɲùŋufembwɔhe ŋkwùŋi i.
Lire kàntugo,
u sí nta núru ŋkàre u pyɛnge e u kànhe na,
u mpyi a fê a yîri kuru ŋkemu i ke.»
7 Kànyi Izirayɛli shiinbii mpyi a yaha lire mɛɛ na ke,
yire yi mpyi:
Kedɛshi u ɲyɛ Galile kùluni i Nɛfitali ɲaŋkuluni i ke,
ná Sikɛmu u ɲyɛ Efirayimu ɲaŋkuluni i ke,
ná Kiriyati-Araba pi maha mpyi Eburɔn ke.
Uru na ɲyɛ Zhuda ɲaŋkuluni i.
8 Zhurudɛn baŋi kàntugoyyereŋi i,
Zheriko canŋafyinmpe e,
Urubɛn tùluge shwɔhɔlʼe,
pi à Besɛri kànhe cwɔɔnrɔ,
kuru na ɲyɛ síwage tafage e.
Mà bâra Aramɔti u ɲyɛ Galadi kùluni i,
Gadi tùluge shiinbii shwɔhɔlʼe,
ná Golan u ɲyɛ Basan kùluni i,
Manase tùluge shiinbii shwɔhɔlʼe ke.
9 Yire kànyi yʼà cwɔɔnrɔ mà pyi shinbuubii taŋwɔhɔgɔ,
bà li si mpyi,
Izirayɛli shinŋi wà,
lire ɲyɛ mɛ,
pi nàmpunntɛɛnŋi wà ká sùpya bò mà ta u ɲyɛ a li yîrige li kurugo mɛ,
urufoo sí n-fê ŋkàre wani,
niŋkwuŋi ŋkowwuvooŋi yyaha na,
mà jwo yuukyaabii pi u kataanmpe cwɔɔnrɔ ke.