Kile a Musa yyerʼa tun
3
Ɲyɛ *Musa mpyi na u nafenaŋi Zeturo yatɔɔre nâha, Zeturo u mpyi Madiyani kìni sáragawwuŋi. Canŋka mà Musa yaha yatonahani na, u mpyi a kàre ná yatɔɔre e síwage kantugo, fo Orɛbua ɲaŋke taan, pi maha kuru ɲaŋke pyi: «Kile ɲaŋke». 2 Mà u yaha wani, Kafooŋi Kile Mɛlɛkɛŋi a uye cyêe u na naɲiŋke e, tahe kà niŋi i. U a wílʼa tahe puni ɲya ku u ɲî nage na, ŋka tahe mpyi na sóre mɛ. 3 Ka u u jwo uye funŋʼi: «Mii sí mâhana n-tòro si nde kakyanhala kani wíi, nde lʼa tahe ta ku ɲyɛ na sóre mɛ si lire cè.» 4 Ɲyɛ Kafooŋi Kile a u ɲya u u mâhani na ntùuli si mpa wíi ke, u a tɛ̀ɛn tahe niŋke e maa jwo: «Musa! Musa!» Ka Musa si shwɔ. 5 Ka Kile si jwo: «Ma hà vili naha mà dɛ! Tanhaɲyi wwû ma tooyi na, ɲaha na yɛ cyage e mu a yyére amɛ ke, kuru cyage ɲyɛ Kile wogo.» 6 Maa núrʼa jwo: «Mii u ɲyɛ mu tulyeyi, *Ibirayima, ná Ishaka, ná *Yakuba u Kileŋi.»Ɲyɛ Musa a yire lógo, maa yyahe tò, ɲaha na yɛ u mpyi na fyáge si Kile wíi. 7 Ka Kafooŋi si jwo: «Mii shiinbii pi ɲyɛ *Misira kìni i ke, mii a pi nàvunŋke ɲya, maa pi parage lógo pi kyéregefeebii cye e, mii a pi kayani cè. 8 Lire kurugo mii a tîgʼa pa si pi ɲùŋɔ wwû, si pi yige Misira shiinbii cye e, si ŋkàre ná pi e, kìni niɲcɛnni nimbwooni i. Nùjirimpe ná sɛɛre na fwu lire kìni i, *Kanana shiinbii ná Hɛti shiinbii ná Amɔri shiinbii ná Ferizi shiinbii ná Evi shiinbii ná Yebusi shiinbii na ɲyɛ lire kìni i numɛ. 9 Ná mii sʼa *Izirayɛli shiinbii parage lógo, kyéregeŋkanni na Misira shiinbii ɲyɛ na pi kyérege ke, maa lire ɲya, 10 lire e ke, numɛ mii sí mu tun Farɔn* a. Ta sì, Izirayɛli shiinbii pi ɲyɛ mii wuubii ke, maa sà pire yige Misira kìni i.
11 Ka Musa si jwo Kile a: «Ɲaha shi ku ɲyɛ mii, mii u sà yyére Farɔn yyaha na, na mii na ŋkorʼa Izirayɛli shiinbii yige Misira kìni i yɛ?» 12 Ka Kile si u pyi: «Mii sí n-pyi ná mu i. Mu aha Izirayɛli shiinbii yige Misira kìni i tèni ndemu i ke, yii puni si n-pa mii pêe naha ŋke ɲaŋke ɲuŋʼi. Lire ká mpyi, mu sí n-cè na mii u a mu tun.
13 Ka Musa si jwo: «Ɲyɛ kʼa bɛ? Mii sí n-kàre Izirayɛli shiinbilʼa sì sà yi jwo pi a na pi tulyeyi u Kileŋi a mii tun pi a. Ŋka pi aha mii yíbe na di u mɛge ɲyɛ yɛ? Ɲaha mii sí n-jwo pi a yɛ?» 14 Ka Kile si u pyi: «Mii u ɲyɛ ŋge u ɲyɛ ke.» Maa núrʼa jwo: «Yire mu sí n-tɛ̀gɛ Izirayɛli shiinbii ɲwɔ shwɔ, na ŋgemu mɛge ku ɲyɛ “Mii u ɲyɛ” ke, uru u a mu tun pi a.» 15 Maa núrʼa jwo Musa a: «Yi jwo Izirayɛli shiinbilʼa na “Ŋge u ɲyɛ Kafooŋi tèrigii puni i” ná uru ɲyɛ pi tulyeyi, Ibirayima, ná Ishaka ná Yakuba u Kileŋi ke, uru u a mu tun pi a. Kuru ku ɲyɛ mii mɛge fo tèekwòmbaa. Fworoŋkii puni sùpyire sí n-pa raa mii yiri amuni. 16 Ɲyɛ numɛ kuni lwɔ́ maa sì, maa sà Izirayɛli shiinbii nàŋkolyeebii wà piye na maa yi jwo pi a na Kafooŋi u ɲyɛ pi tulyeyi Ibirayima ná Ishaka ná Yakuba u Kileŋi ke, uru u a uye cyêe mu na, maa mu pyi mu u yi jwo pi a na nde lʼa tɛ̀gɛ pi na Misira kìni i ke, na urʼa lire ɲya. 17 Lire kurugo u a jwo na uru sí pi yige Misira kìni i kuru nàvunŋke e, si ŋkàre ná pi e, Kanana shiinbii ná Hɛti shiinbii ná Amɔri shiinbii ná Ferizi shiinbii ná Evi shiinbii ná Yebusi shiinbii kìni i. Nùjirimpe ná sɛɛre na fwu lire kìni i. 18 Izirayɛli shiinbii sí ɲɛɛ mu jwumpe na. Ɲyɛ mu ná pi nàŋkolyeebii sí n-kàre Misira saanŋi a si sà yi jwo u a na “Kafooŋi u ɲyɛ *Eburu shiinbii u Kileŋi ke, urʼa uye cyêe wuu na. Ɲyɛ numɛ kuni kan wuu a, wuu u canmpyaa taanre ɲara pyi síwage e, wuu u sà *sárayi wwû Kafooŋi, wuu Kileŋi a.” 19 Mii a li cè na Misira saanŋi sì ɲɛɛ kuni kan yii a mɛ, fo mii aha na cyɛge fànhe tɛ̀gʼa u kárama. 20 Mii sí na fànhe cyêe ná kakyanhala karigilʼe, si yyefuge shiŋi puni pyi ku Misira shiinbii ta. Lire ká mpyi, u sí yii yaha yii a sì. 21 Mii bá sí Misira shiinbii pyi pi yii ɲùɲaara ta. Lire e yii aha a sí raa ŋkɛ̀ɛge, yii cyeŋgaya wuubii sì n-fworo Misira kìni i mɛ. 22 Misira shiinbii cyeebii pi ɲyɛ yii pyɛnyi i, lire ɲyɛ mɛ mpii pi ɲyɛ tɛ̀ɛnni i ná yii e ke, yii cyeebii puni niŋkin niŋkinŋi sí pire ɲáare, wyɛ́rɛfyinŋi yaayi ná sɛɛnŋi yaayi ná vàanntinɲyi na, yire yaayi yii sí n-kwɔ̀ raa leni yii jyaabii ná yii pworibii na. Lire pyiŋkanni na, yii sí Misira shiinbii cyeyaayi shwɔ pi na, si pi cyeŋgaya wuubii yaha.