Kile a u kakyanhala karigii cyêe Musa na
4
Ka *Musa si jwo: «*Izirayɛli shiinbii sì n-dá mii na mɛ, pi sì ɲɛɛ mii jwumpe na mɛ. Pi sí n-jwo na Kafooŋi ɲyɛ a uye cyêe mii na mɛ.» 2 Ka Kafooŋi Kile si u pyi: «Ɲaha ku ɲyɛ mu cye e yɛ?» Ka u u jwo: «Kàbii.» 3 Ka Kafooŋi si jwo: «Li wà ɲìŋke na.» U a li wà ɲìŋke na ke, ka li i ŋkɛ̂ɛnŋʼa pyi wwò. Ka u u fê u yyaha na. 4 Ka Kafooŋi si jwo: «Ma cyɛge file, maa wwòŋi cû u nɛŋke na.» Ka u u cyɛge file maa wwòŋi cû nɛŋke na, ka u u núrʼa kɛ̂ɛnŋʼa pyi kàbii u cye e. 5 Ka Kafooŋi si jwo: «Ta sì maa sà nde pyi a cyêe Izirayɛli shiinbii na, bà pi si mpyi si dá li na, na Kafooŋi u ɲyɛ pi tulyeyi *Ibirayima ná Ishaka ná *Yakuba u Kileŋi ke, na uru u a uye cyêe mu na mɛ. 6 Ka Kafooŋi si núrʼa Musa pyi: «Ma cyɛge le ma vàantinŋke ɲwɔhʼi» ka u u lire pyi. U a ta u ku yige vàanntinŋke ɲwɔhʼi ke, ka ku u fíniŋɛ tògo na mu à jwo kòonɔ. 7 Ka Kafooŋi si jwo: «Ma cyɛge le vàanntinŋke ɲwɔhʼi sahaŋki.» Ka u u lire pyi, u a ta u ku yige vàanntinŋke ɲwɔhʼi ke, ka ku u núru ku lyempe e. 8 Ka Kafooŋi si jwo: «Pi aha mpyi pi ɲyɛ a ɲɛɛ, maa dá mu na kakyanhala kani niɲcyiini cye kurugo mɛ, pi sí n-dá mu na shɔnwuuni cye kurugo. 9 Ɲcyii kakyanhala karigii shuunniŋi kampyi cyi ɲyɛ a pi pyi pi a dá mu na maa yi yaha mu wuyi na mɛ, maa sà Nili baŋi lwɔhe kà kwó mà pa wu ɲìŋke na, kuru lwɔhe sí n-kɛ̂ɛnŋɛ n-pyi sìshan.»10 Ka Musa si Kafooŋi pyi: «Ei, Kafooŋi! Jwumpʼa waha mii na dɛ! Taɲjaa bà lirʼa sìi mɛ, taɲjaaŋke mú bà mɛ. Mà lwɔ́ mu na yu ná mii i ke, yaaga sàha ŋkwɔ̀ a fáa mii jwuŋkanni i mɛ. Mii ɲwɔge ná mii ɲjinʼa dùgo.» 11 Ka Kafooŋi si jwo: «Jofoo u a ɲwɔge kan sùpyaŋʼa yɛ? Jofoo u maha sùpyaŋi pyi búbu, lire ɲyɛ mɛ niɲcunu yɛ? Jo u maha sùpyaŋi pyi u u ɲaa, lire ɲyɛ mɛ mà u pyi fyin yɛ? Mii u ɲyɛ Kafooŋi ke, mii bàlʼa? 12 Ɲyɛ ta sì, mii sí n-pyi ná mu i. Mu aha a yu, mpe mu a yaa mu u jwo ke, mii sí puru cyêe mu na.» 13 Ka Musa si jwo: «Ei, Kafooŋi! Mii na mu ɲáare maa wabɛrɛ tun.»
14 Ɲyɛ u a yire jwo ke, ka Kafooŋi lùuni si yîri u taan maa jwo: «Taha mu yyahafooŋi Arɔn, *Levi tùluge shinŋi ɲyɛ wani mɛ? Mii a li cè na urʼa jwumpe cè. U mú bá na mu ɲùŋɔ bêni. U aha mu ɲùŋɔ bɛ̂ a ta tèni ndemu i ke, li sí n-táan u e sèlʼe. 15 Mu sí raa yu raa ŋkaan u a, u a yu. Yii aha a sí raa yu, mii yabiliŋi sí n-pyi ná yii e, jwumpe yii a yaa yi jwo ke, mii sí puru cyêe yii na. 16 Uru u sí raa yu ná sùpyire e, mu cyaga, uru u sí n-pyi mu jwumpe jwufooŋi, mu sí n-pyi mu à jwo Kile u a. 17 Nde kàbiini lwɔ́ maye cye e, ná lire e mu sí raa kakyanhala karigii pyi.»
Musa a núrʼa kàre Misira kìni i
18 Ɲyɛ ka *Musa si núrʼa kàre u nafenaŋi Zhetoro yyére maa sà u pyi: «Kuni yaha, mii sí sà fworo na cìnmpyiibii na *Misira kìni i, kampyi pi saha ɲyɛ shì na, si lire cè.» Ka Zhetoro si u pyi: «Ta sì yyeɲiŋke e.»
19 Ɲyɛ mà Musa yaha Madiyani kìni i, Kafooŋi a u pyi: «Núru maa sì Misira kìni i, mpii pi mpyi na mu caa raa bùu ke, pire punʼa kwû.» 20 Ka Musa si u cwoŋi ná u jyaabii dùrugo dùfaanyi ɲuŋʼi, maa núrʼa kàre Misira kìni i. Kàbiini Kile mpyi a pyi u lwɔ́ ke, maa lire cû uye cye e. 21 Ka Kafooŋi si u pyi: «Mii a kakyanhala karigii shiŋi puni pyipyi fànhe kan mu a, mu aha núrʼa nɔ Misira kìni i tèni ndemu i ke, maa cyi pyi Farɔn ɲyii na. Mii wi ke, mii sí Farɔn niŋgyiini pyi li waha, u sì ɲɛɛ yii cye yaha mɛ. 22 Mu sí yi jwo Farɔn a na Kafooŋi a jwo “*Izirayɛli shiinbii pi ɲyɛ mii jyaŋi, pire pi ɲyɛ mii jyaŋi niɲcyiiŋi. 23 Na jwumpe lógo! Maa pi yaha pi a wà pi i sà na pêe. Mu aha ɲcyé yire e, mii sí mu jyaŋi niɲcyiiŋi bò.”»
24 Ɲyɛ mà Musa ná u cwoŋi ná u pyìibii yaha lire ɲani na, pi a shwɔ̀n cyage kʼe, ka Kafooŋi si file Musa na maa ɲcaa si u bò. 25 Ka Sefura si kafaaga ɲwɔtanga wogo lwɔ́, mà tɛ̀gʼa u jyaŋi *kwɔ̀n, maa kuru sɛɛge bwɔ̀n Musa tooyi na, maa jwo: «Cipooŋi sìshange wuŋi u ɲyɛ mu mii a.» 26 U a lire jwo ŋkwɔ̀nŋi kurugo. Ka Kafooŋi si Musa yaha mbòmbaa.
Musa ná Arɔn a piye ɲùŋɔ bɛ̂
27 Ɲyɛ lire tèni mpyi a Kafooŋi ta u a *Arɔn pyi u yîri, u a sì síwage e, u u sà *Musa ɲùŋɔ bɛ̂. Ka Arɔn si yîrʼa kàrʼa sà Musa ɲùŋɔ bɛ̂ a ta Kile ɲaŋke na, maa u pûrʼa cû. 28 Kafooŋi mpyi a jwumpe mpemu pyi u jwo, maa kakyanhala karigii ɲcyiimu cyêe u na u a mpyi ke, maa yire puni yyaha jwo Arɔn a.
29 Ɲyɛ ka Musa ná Arɔn si kuni lwɔ́ a kàre *Misira e, maa sà *Izirayɛli shiinbii yyecwugo shiinbii puni wà piye na. 30 Jwumɔ maha jwumɔ Kafooŋi mpyi a jwo Musa a ke, ka Arɔn si puru puni jwo pi a, maa kakyanhala karigii pyi mà cyêe pi na. 31 Ka pi i dá. Maa ɲɛɛ li na, na Kafooŋi a pire kàanmucya, maa pire yyefuge ɲya. Ka pi i pi niŋkure sín, maa Kile pêe.