Musa ná Arɔn a kàrʼa sà jwo ná Farɔn e
5
Ɲyɛ lire kantugo *Musa ná *Arɔn a kàre Farɔn* a maa sà yi jwo u a: «Kafooŋi u ɲyɛ *Izirayɛli shiinbii u Kileŋi ke, urʼa jwo na ma uru shiinbii yaha pi a wà, pi i sà katáan pyi uru mɛge na síwage e.» 2 Ka Farɔn si pi pyi: «Jofoo u ɲyɛ Kafooŋi si nta ɲjyére mii u u ɲwɔmɛɛni cû si Izirayɛli shiinbii cye yaha yɛ? Kafooŋi ɲyɛ ɲaha shi yɛ? Ɲyɛ yii kɛ̀ɛge cyage e mɛ.» 3 Ka pi i jwo: «*Eburu shiinbii u Kileŋi u a uye cyêe wuu na. Wuu a sìi na mu ɲaare, maa wuu yaha wuu u canmpyaa taanre ɲara pyi síwage e, wuu *sárayi wwû Kafooŋi, wuu Kileŋi a. Bà u si mpyi u àha ŋkwɔ̀ yama cyán wuu na, lire ɲyɛ mɛ si wuu kan wuu zàmpɛɛnbii pìlʼa mɛ.» 4 Ka *Misira saanŋi si jwo: «Eyi! Musa ná Arɔn, ɲaha kurugo yii na sùpyire ɲùŋɔ kyánge pi báaraŋi na yɛ? Yii a fyâa, yii a wà yii báaraŋʼa numɛ!5 Numɛ nte sùpyirʼa ɲyaha a ta kìni i, ka yii i wá na sɔ̂nŋi si pi báaraŋi ɲyaha ŋgurugo kɛ?»
Farɔn a là bâra Izirayɛli shiinbii báaraŋi na
6 Ɲyɛ kuru canŋke yabiliŋi i, *Misira shiinbii ná *Izirayɛli shiinbii pi mpyi maha báaraŋi kɛ̂ɛnŋi ke, ka Farɔn* si yi jwo pirʼa 7: «Yii mpyi maha ntêe na ɲyɛge ŋkemu caa na ŋkaan Izirayɛli shiinbilʼa pi i ntɛ̀re na lafaŋi wuni ke, yii lire ɲwɔ yaha. Pire yabilimpii sí raa sì raa ɲyɛge caa. 8 Làfaŋi dáŋi pi mpyi maha ntêe na wuni ke, yii uru ninuŋi fànha cyán pi na. Yii àha zìi wà yige uru dáŋi i mà dɛ! Sàafee pi ɲyɛ pi pi, lire kurugo pi a jwo na pire si raa *sárayi wwû pi Kileŋi a.» 9 Yii báaraŋi tɛ̀gʼa mpii shiinbii yyaha fwɔ́hɔrɔ. Lire ká mpyi, pi sàha si piye pwɔ jwuɲjaama na mɛ.»
10 Ɲyɛ ka báaraŋi kɛɛnŋɛfeebii ná u kàanmucyafeebii si ŋkàrʼa sà yi jwo Izirayɛli shiinbilʼa, na Farɔn a jwo na pire ká núru raa ɲyɛge caa raa ŋkaan pi a mɛ. 11 Cyage e pi sí n-jà ɲyɛge cya n-ta ke, pi a sì pi a ku caa wani. Pi i ntɛ̀ɛn ná lʼe lafaŋi dáŋi pi mpyi maha ntêe na wuni ke, yafyin sì n-fworo urʼe mɛ.
12 Ɲyɛ ka Izirayɛli shiinbii si ɲcaala a Misira kìni puni i, na ɲyɛge caa. 13 Báaraŋi kàanmucyafeebii mpyi maha kala wwû pi na, maa ŋko: «Yii cye wyɛrɛŋɛ báaraŋi na! Tèni i pi mpyi maha ɲyɛge kaan yii a ke, lafaŋi dáŋi yii mpyi maha wuni ke, uru ninuŋi yii sí n-wu dɛ!» 14 Mpii pi mpyi a cwɔɔnrɔ Izirayɛli shiinbilʼe mà yaha pi sanmpii ɲùŋɔ na pi i báaraŋi kɛ̂ɛnŋɛ ke, pi mpyi maha pire bwùun maa ŋko: «Yii mpyi maha ntêe na lafaŋi pɛ̀rɛge ŋkemu wuni ke, ɲaha kʼa yii ta yii a kùuŋɔ kurʼe taɲjaa ná niɲjalʼe yɛ?»
15 Ɲyɛ ka báaraŋi kɛɛnŋɛfeebii si ŋkàrʼa sà Farɔn cɛ̂ɛgɛ maa jwo: «Ɲaha na mu a ma bilibii cumu lemɛ pi amɛ yɛ? 16 Wà sàha ɲyɛ na ɲyɛge kaan wuu a mɛ, maa jwo na wuu a lafaŋi wuni. Pi maha núru na wuu bwùun, mu shiinbii tànga sí ɲyɛ mɛ.» 17 Ka Farɔn si pi pyi: «Yii na ɲyɛ sàafee, yii a sìi sàafeeɲjeye! Lire kurugo yii a jwo na yii kɛ̀ɛge zà sáraya wwû Kafooŋi a! 18 Yii tòro, yii a sì yii báaraŋʼa numɛ, ɲyɛge sì raa ŋkaan yii a mɛ, ŋka lafaŋi dáŋi yii mpyi maha ntêe na wuni ke, uru yii sí raa wuni.»
19 Ɲyɛ ná pi si ɲyɛ a ɲɛnʼa là yige pi canŋa maha canŋa lafaŋi niŋguŋi dáŋi i mɛ, ka báaraŋi kɛɛnŋɛfeebii si li ɲya, na pi a pire katanmpe waha. 20 Pi nivworobii Farɔn pyɛnge e, pi a sà *Musa ná *Arɔn ta pi i pi sigili. 21 Ka pi i jwo Musa ná Arɔn a: «Kafooŋi u yii kapyiini fwooni tò yii na. Yii pi a wuu kantaanmpe sanmpe nâara a waha Farɔn ná u kìni shiinbilʼa. Yii a wuu bòboŋwɔɔni kan u a, u u wuu bò!» 22 Ɲyɛ Musa a puru lógo ke, maa jwo: «Kafooŋi, ɲaha na mu a nde kapiini pyi nte sùpyire na yɛ? Ɲaha na mu a sà a mii tun pi a yɛ? 23 Mà lwɔ́ mii a kàrʼa sà jwo ná Farɔn e, mu mɛge na ke, u a li ɲwɔ cû na nte sùpyire kyérege, mu sí ɲyɛ a ɲɛnʼa pi shwɔ u na mɛ.»