Kile a jwo uru sí Izirayɛli shiinbii ɲùŋɔ wwû
6
Ka Kafooŋi Kile si jwo *Musa a: «Nde mii sí n-pyi Farɔn na numɛ ke, mu sí lire ɲya. Mii sí na cyɛge fànhe tɛ̀gɛ u kárama u u *Izirayɛli shiinbii cye yaha. Mii cyɛge fànhe sí u pyi fo u yii kɔ̀rʼa yige kìni i bá.»2 Maa núrʼa jwo Musa a: «Mii u ɲyɛ Kafooŋi. 3 Mii u a naye cyêe *Ibirayima ná Ishaka ná Yakuba na, maa li cyêe pi na, na mii u ɲyɛ Kileŋi Siŋi Punifoo. Ŋka mii mɛge ku ɲyɛ Kafooŋi Kile ke, pi ɲyɛ a kuru cè mii na mɛ. 4 Mii a na *tunmbyaare le ná pi e, maa ɲwɔmɛɛni lwɔ́ pi a na mii sí *Kana kìni kan pi a, lire kìni i pi mpyi a pa ntɛ̀ɛn nàmpɔnnte e ke. 5 Mii a Izirayɛli shiinbii kyɛɛnni lógo *Misira shiinbii bilere e. Lire e tunmbyaare mii a le ná pi e ke, mii sí tire yige ti kuni i. 6 Lire kurugo yi jwo Izirayɛli shiinbilʼa na “Mii u ɲyɛ Kafooŋi. Misira shiinbilʼa yii kárama a yaha báarawayi ɲjemu na ke, mii sí yii yige yire e, si yii ɲùŋɔ wwû tire bilere e, ná na cyɛge fànhʼe, si yyefugo nimbwɔhɔ cyán pi na. 7 Mii sí yii pyi na shiinbii, mii sí n-pyi yii Kileŋi, lire e yii sí li cè na mii u ɲyɛ yii Kafooŋi, yii Kileŋi, ŋgemu u a yii ɲùŋɔ wwû Misira shiinbii báarawayi i ke. 8 Mii a kâa na mii sí kìni ndemu kan Ibirayima, ná Ishaka ná Yakuba a ke, mii sí yii lèŋɛ lire e si li kan yii a. Mii, Kafooŋi yabiliŋi u sí lire pyi.»
9 Ɲyɛ puru jwumpe ninumpe Musa a taha Izirayɛli shiinbilʼa. Ŋka báarawayi pi mpyi na mpyi tire bilere e ke, yire mpyi a pi tɛgɛlɛ ta, fo mà pi pyi pi ɲyɛ a jà a ɲɛɛ Musa jwumpe na mɛ.
10 Ka Kafooŋi si núrʼa jwo Musa a: 11 «Ta sì maa sà jwo ná Misira saanŋi Farɔn* e, na u Izirayɛli shiinbii cye yaha pi i fworo u kìni i.»
12 Ka Musa si jwo: «Wíi yo! Izirayɛli shiinbii ɲyɛ a ɲɛnʼa lógo mii ɲwɔ na mɛ, nta raa ŋko Farɔn la? Jwumpe sʼa waha mii na.»
13 Ɲyɛ yire yɛrɛyi Kafooŋi a kan Musa ná *Arɔn e mà yyaha tíi ná Izirayɛli shiinbii ná Misira saanŋi Farɔn e, bà Izirayɛli shiinbii si mpyi si fworo Misira kìni i mɛ.
Musa ná Arɔn tulyeyi mɛyi
14 Urubɛn, uru u a pyi *Izirayɛli jyaŋi niɲcyiiŋi. Urubɛn u jyaabii pi mpyi: Enɔki ná Palu ná Ezirɔni ná Karimi. Bayifeebii pi a fworo urʼe ke, pire pi ɲyɛ mpii.
15 Simiyɔn u jyaabii pi mpyi: Yemuweli ná Yamini ná Ohadi ná Yakini ná Sokari, ná Sawuli, uru nuŋi na mpyi *Kanana shin. Bayifeebii pi a fworo Simiyɔn e ke, pire pi ɲyɛ mpii.
16 *Levi u jyaabii pi mpyi: Gerishɔn ná Kehati ná Mɛrari. Bayifeebii pi a fworo Levi e ke, pire pi ɲyɛ mpii. Levi shìŋi canmpyaagilʼa pyi yyee ŋkuu ná beɲjaaga ná kɛ ná baashuunni (137). 17 Gerishwɔn u jyaabii pi mpyi: Libini ná Shimɛyi. Bayifeebii pi a fworo Gerishɔn e ke, pire pi ɲyɛ mpii. 18 Kehati u jyaabii pi mpyi: Amuramu ná Itizari ná Eburɔn ná Uziyɛli. Bayifeebii pi a fworo Kehati e ke, pire pi ɲyɛ mpii. Kehati shìŋi canmpyaagilʼa pyi yyee ŋkuu ná beɲjaaga ná kɛ ná taanre (133).
19 Mɛrari u jyaabii pi mpyi Makili ná Mushi. Bayifeebii pi a fworo Mɛrari e ke, pire pi ɲyɛ mpii.
Yire bayi yʼa wà yiye na mà pyi Levi tùluge shiin.
20 Ɲyɛ Amuramu mpyi a u tuŋi sìɲɛɛŋi Yokebɛdi fúru, maa *Arɔn ná *Musa si u na. Amuramu shìŋi canmpyaagilʼa pyi yyee ŋkuu ná beɲjaaga ná kɛ ná baashuunni (137). 21 Kore ná Nɛfeki ná Zikiri a fworo i. 22 Mikayɛli ná Elisafani ná Sitiri a fworo Uziyɛli i.
23 Arɔn mpyi a Aminadabu pworoŋi Elisheba lèŋɛ mà pyi u cwo. Elisheba na mpyi Nashɔn sìɲɛɛ. Elisheba a Nadabu ná Abiyu ná Eliyazɛri ná Itamari si Arɔn a.
24 Kore u jyaabii Asiri ná Elikana ná Abiyasafu. Bayifeebii pi a fworo Kore e ke, pire pi ɲyɛ mpii.
25 Arɔn jyaŋi Eliyazɛri mpyi a Pucyɛli pworoŋi wà lèŋɛ mà pyi u cwo, maa pùnambile si u na, maa li mɛge le Finɛyasi.
Bayifeebii pi a fworo Levi i ke, yire yi ɲyɛ ɲje.
26 Uru Arɔnŋi ná uru Musaŋi, Kafooŋi Kile a pyi pi Izirayɛli shiinbii yige *Misira kìni i, pi i pi yalʼa tahala tahala piye na kuruyo kuruyo kàshikwɔɔn fiige pi fworo kìni i. 27 Uru Musaŋi ná uru Arɔnŋi u a sà jwo ná Misira saanŋi Farɔn e, bà u si mpyi si Izirayɛli shiinbii cye yaha mɛ pi i fworo Misira kìni i mɛ.
Kile a núru u ɲwɔmɛɛni kurugo Musa a
28 Canŋke Kafooŋi a jwo ná *Musa e Misira kìni i ke, 29 u mpyi a yi jwo u a: «Mii u ɲyɛ Kafooŋi, yaaga maha yaaga mii ɲyɛ na yu mu a ke, ta sì maa sà yire puni taha *Misira saanŋi Farɔn a.» 30 Ka Musa si Kafooŋi pyi: «Jwumpʼa waha mii na pyiŋkanni ndemu na ke, di Farɔn sí ɲɛɛ n-lógo mii ɲwɔ na n-jwo yɛ?»