Vworoŋi 7

Ka Kafooŋi si jwo *Musa a: «Mii sí mu pyi Kile fiige Farɔn a, mu yyahafooŋi *Arɔn sí raa yu mu cyaga. 2 Yaaga maha yaaga mii ɲyɛ na yu mu a ke, maa yire puni taha ma yyahafooŋi Arɔn a u jwo Farɔn a, bà u si mpyi si *Izirayɛli shiinbii yaha pi fworo u kìni i mɛ. 3 Ŋka mii wi ke, mii sí Farɔn niŋgyiini pyi li waha, si kyanhalakarii niɲyahagii pyi *Misira kìni i. 4 Farɔn sì ɲɛɛ n-lógo yii ɲwɔ na mɛ. Ɲyɛ lire ká mpyi, mii sí na fànhe cyêe Misira shiinbii na, ná yyefugo nimbwɔhe e, Izirayɛli shiinbii pi ɲyɛ mii shiinbii maa mpyi mii kàshikwɔɔnbii ke, si pire pyi pi taha taha piye na kuruyɔ kuruyɔ kàshikwɔɔn fiige, pi fworo Misira kìni i. 5 Mii aha na fànhe cyêe Misira shiinbii na, maa Izirayɛli shiinbii yige pi kìni i, lire e pi sí li cè na mii u ɲyɛ Kafooŋi. 6 Ɲyɛ ka Musa ná Arɔn si li pyi bà Kafooŋi mpyi a yi jwo pi a mɛ. 7 Tèni i Musa ná Arɔn a kàrʼa sà jwo ná Farɔn e ke, lire tèni mpyi a Musa shìŋi ta yyee beecyɛɛre (80), Arɔn wuŋi sí ɲyɛ yyee beecyɛɛre ná taanre (83).

Musa kàbiinʼa kɛ̂ɛnŋʼa pyi wwò

8 Ka Kafooŋi si *Musa ná *Arɔn pyi 9: «Farɔn ká jwo na yii kakyanhala kani là pyi, Musa, maa Arɔn pyi u u kàbiini lwɔ́, u u li wà ɲìŋke na Farɔn ɲyii na. Lire ká mpyi, kàbiini sí n-kɛ̂ɛnŋɛ n-pyi wwò.» 10 Ka Musa ná Arɔn si ŋkàre Farɔn a, bà Kafooŋi mpyi a yi jwo pi a mɛ, maa li pyi amuni. Arɔn a u kàbiini wà Farɔn ná u kìni yyahayyere shiinbii ɲyii na ke, ka li i ŋkɛ̂ɛnŋʼa pyi wwò. 11 Ka Farɔn si *Misira kìni ɲcèfeebii ná li sìŋkaanfeebii ná li jínamahabii yyerʼa pa, ka pire mú si lire shi pyi ná pi ɲcèŋi i. 12 Pi punʼa pi kàbigigii wà ka cyii ŋkɛ̂ɛnŋʼa pyi wwòo. Ŋka Arɔn u kàbiinʼa pi kàbigigii lwɔ́ a jò. 13 Ŋka lire ná li wuuni mú i, Farɔn a u niŋgyiini waha, bà Kafooŋi mpyi a yi jwo mɛ. U ɲyɛ a ɲɛnʼa lógo Musa ná Arɔn a mɛ.

Yyefuge niɲcyiige, lwɔhʼa kɛ̂ɛnŋʼa pyi sìshan

14 Ka Kafooŋi Kile si jwo *Musa a: «Farɔn niŋgyiinʼa waha, u a cyé si mii shiinbii cye yaha. 15 Nùmpanŋa ɲyɛ̀ge na, shà Farɔn a. U sí n-kàre baŋi ɲwɔge na, maa u ɲùŋɔ bɛ̂ wani. Kàbiini li mpyi a kɛ̂ɛnŋʼa pyi wwò ke, maa lire lwɔ́ maye cye e. 16 Maa yi jwo u a na Kafooŋi u ɲyɛ *Eburu shiinbii u Kileŋi ke, na urʼa mu tun na mu u mpa yi jwo u a, na u uru shiinbii cye yaha bà pi si mpyi si sà uru pêe síwage e mɛ. Na ali numɛ u sàha ɲɛɛ puru jwumpe na mɛ. 17 Na lire kurugo, Kafooŋi a jwo mu a na “Kàbiini li nde mu cye e ke, na ma lire tɛ̀gʼa Nili baŋi lwɔhe bwɔ̀n, na lwɔhe sí n-kɛ̂ɛnŋɛ n-pyi sìshan.” Na lire ká mpyi, Farɔn sí n-cè numɛ na uru u ɲyɛ Kafooŋi. 18 Na fyaabii puni sí n-kwû baŋi i, lwɔhe puni sí n-kɛ̀ɛge, *Misira shiinbii la sí n-pyi sʼa ku byii, ŋka pi sì n-jà raa ku byii mɛ.»

19 Ɲyɛ ka Kafooŋi si Musa pyi: «Yi jwo *Arɔn a na u u kàbiini lwɔ́ a yáaŋa Misira kìni lùcyeyi puni ɲuŋʼi, mu à jwo dubwoyi ná Nili baŋi ŋkéɲyi ná dùcyɛnyi ná lwɔhe cyeyi sanɲyi puni. Yire lucyeyi puni sí n-kɛ̂ɛnŋɛ n-pyi sìshan. Sìshange sí n-pyi Misira kìni puni i. Ali lwɔhe ku ɲyɛ pi luleyaayi i, mu à jwo ŋkunayi ná peyi ke, kuru puni sí n-pyi sìshan.» 20 Ka Musa ná Arɔn si li pyi, bà Kafooŋi mpyi a yi jwo mɛ. Arɔn a u kàbiini yîrige maa li tɛ̀gʼa Nili baŋi lwɔhe bwɔ̀n, Farɔn ná u kìni yyaha yyére shiinbii ɲyii na, ka baŋi lwɔhe puni si ŋkɛ̂ɛnŋʼa pyi sìshan. 21 Ka baŋi fyaabii puni si ŋkwû, ka lwɔhe puni si ŋkɛ̀ɛgɛ. Misira shiinbii sàha mpyi na jà a baŋi lwɔhe bya mɛ. Ka kìni puni si mpyi sìshan. 22 Ka Misira kìni jínamahabii si lire shi pyi ná pi ɲcèŋi i. Bà Kafooŋi mpyi a yi jwo mɛ, ka Farɔn si niŋgyiini waha u ɲyɛ a ɲɛnʼa lógo Musa ná Arɔn a mɛ.

23 Ka Farɔn si núrʼa kàre u bage e, u mú bá ɲyɛ a nde kani wíi yaaga mɛ.

24 Ka Misira shiinbii puni si ɲcwɔhii wwû baŋi ɲwɔge na lwɔhe kurugo, ɲaha na yɛ pi mpyi na sì n-jà raa baŋi lwɔhe byii mɛ. 25 Kafooŋi a baŋi lwɔhe kɛ̀ɛge ke, canmpyaa baashuunni kʼa pyi purʼe.

Yyefuge shɔnwoge, ntàsɔnyi kani

26 Lire kantugo ka Kafooŋi Kile si *Musa pyi: «Sà yi jwo Farɔn a na Kafooŋi a jwo na u uru shiinbii cye yaha pi a wà pi i sà uru pêe. 27 Na u aha mpyi u ɲyɛ a pi cye yaha mɛ, na uru sí ntàsɛɛnbii pyi pi fworʼa u kìni puni ɲî. 28 Ntàsɛɛnbii sí baŋi ɲî n-fworo n-kàre sà jyè u pyɛnge e, si jyè u baashɔnge e, fo si sà dùgo u yasínniŋke ɲuŋʼi. Pi sí n-jyè u kìni yyaha yyére shiinbii bayi ná u kìni shiinbii sanmpii bayi i. Pi sí n-jyè ali u bwúuruŋi tafwoyi ná u farani mbyìmpe tacwɔnhɔyi i. 29 Ntàsɔnyi sí raa dùru u yabiliŋi ɲuŋʼi, sʼa dùru u kìni yyaha yyére shiinbii ná u kìni shiinbii sanmpii puni ɲuŋʼi.