Vworoŋi 8

Ka Kafooŋi si *Musa pyi: «Yi jwo *Arɔn a na u u cyɛge sànha ná u kàbiini i dubwoyi ná Nili baŋi ŋkeyi ná dùcyɛnyi kàmpanɲyi na, u u ntàsɛɛnbii pyi pi fworʼa jyè *Misira kìni i.» 2 Ka Arɔn si u cyɛge sànha ná kàbiini i, Misira kìni lucyeyi kàmpanŋke na, ka ntàsɛɛnbii si fworʼa kìni puni ɲî. 3 Ka jínamahabii si lire shi pyi ná pi ɲcèŋi i, maa ntàsɛɛnbii pìi yigʼa yaha Misira kìni i.

4 Ka Farɔn si Musa ná Arɔn yyere maa jwo: «Yii Kafooŋi ɲáare, bà u si mpyi si ntàsɛɛnbii láha mii ná na shiinbii na mɛ. Lire ká mpyi mii sí *Izirayɛli shiinbii cye yaha pi i sà sáraya wwû Kafooŋi a.» 5 Ka Musa si Farɔn pyi: «Fànhafooŋi Tèni i mu la ɲyɛ li i mpyi ke, lire jwo na a sa! Ɲaha tère e mu la ɲyɛ mii u Kafooŋi ɲáare mu ná ma kìni yyaha yyére shiinbii ná mu kìni shiinbii sanmpii na, si ntàsɛɛnbii yige mu bage ná pi bayi i yɛ? Mii aha Kile ɲáare, ntàsɛɛnbii sí n-pyi baŋi i kanna.» 6 Ka u u jwo: «Nùmpanŋa.» Ka Musa si jwo: «Li sí n-pyi mu jwuŋkanni na, bà mu si mpyi si li cè na wuu Kafooŋi wuu Kileŋi ɲùmbwɔnɲɛɛ ɲyɛ mɛ. 7 Ntàsɛɛnbii sí n-láha mu na, mà bâra mu pyɛngɛ shiinbii, ná mu kìni yyaha yyére shiinbii, ná kìni shiinbii sanmpii na. Nili baŋi kanni i ntàsɛɛnbii sí n-pyi.

8 Ɲyɛ ka Musa ná Arɔn si fworo Farɔn pyɛnge e mà kàre, ka Musa si sà Kafooŋi ɲáare, na ntàsɛɛnbii u mpyi a yigʼa yaha Farɔn ná u kìni shiinbii na ke, na u pi pînniŋɛ. 9 Ka Kafooŋi si Musa ɲaarage shwɔ, ka bayi ntàsɛɛnbii ná ntaaŋkii wuubii ná kɛriyi wuubii puni si ŋkwû. 10 Ka pi i yi kulʼa bínni ɲaɲaɲaɲa, ka yi nùge si yîrʼa kìni puni shwɔ a ta.

11 Ŋka Farɔn a yire ntàsɔnyi ɲya yʼa kwɔ̀ kìni i ke, ka u u u niŋgyiini waha maa ɲcyé lógogo Musa ná Arɔn a, bà Kafooŋi mpyi a yi jwo mɛ.

Yyefuge tanrawoge, lùpaanre kani

12 Ka Kafooŋi si jwo *Musa a: «Yi jwo *Arɔn a na u u kàbiini yîrigʼa tɛ̀gʼa ɲìɲke bwɔ̀n u u bambaŋi yîrige. Lire ká mpyi, u sí n-kɛ̂ɛnŋɛ n-pyi lùpanra Misira kìni puni yyaha kurugo. 13 Ka pi i lire pyi. Arɔn a u cyɛge yîrige ná u kàbiini i maa ɲìŋke bwɔ̀n ka bambaŋi si yîri maa ŋkɛ̂ɛnŋʼa pyi lùpanra na sùpyire ná yatɔɔre nɔni. Bambaŋi puni mpyi a kɛ̂ɛnŋʼa pyi lùpanra *Misira kìni puni i. 14 Ka kìni jínamahabii la si mpyi si lire fiige pyi ná pi jínamahare e, ŋka pi ɲyɛ a jà mɛ. Lùpaanre mpyi a wu sùpyire ná yatɔɔre na. 15 Ɲyɛ ka jínamahabii si ŋkànhʼa jwo Farɔn a: «Kile yabiliŋi fànhe ku ɲyɛ ŋke dɛ!» Ŋka lire ná li wuuni mú i, Farɔn a u niŋgyiini waha, maa ɲcyé Musa ná Arɔn jwumpe lógogo bà Kafooŋi mpyi a yi jwo mɛ.

Yyefuge sicyɛrɛwoge, sisɔnmpii kani

16 Ka Kafooŋi Kile si jwo *Musa a: «Nùmpanŋa ɲyɛsɔɔge na, Farɔn ká a ŋkorʼa ŋkɛ̀ɛge baŋi ɲwɔge na tèni ndemu i ke, maa sà yi jwo u a na Kafooŋi a jwo u uru shiinbii yaha pi a wà, pi i sà uru pêe. 17 Na u aha mpyi u ɲyɛ a uru shiinbii cye yaha mɛ, uru sí sisɔnmpii pyi pi fworo u ná u kìni yyaha yyére shiinbii ná u kìni shiinbii sanmpii kurugo. *Misira shiinbii bayi sí ɲî sisɔnmpii na. Misira kìni taare puni sí n-tò sisɔnmpii na. 18 Na ŋka kuru canŋke Gozeni kùluni i, uru shiinbii ɲyɛ ke, kuru cyage sí kuye wwû Misira kìni cyeyi sanɲyi i. Sisɔnmii sì n-pyi kuru cyage e mɛ. Lire e Farɔn sí li cè na uru u ɲyɛ Kafooŋi ke, na uru u ɲyɛ ná u shiinbilʼe Gozeni kùluni i. 19 Na uru shiinbii cyage sí kuye wwû Farɔn shiinbii cyage e. Na uru sí lire kani cyêe nùmpanŋa.»

20 Ka Kafooŋi si li pyi bà u mpyi a yi jwo mɛ. Sisɔnmii niɲyahamilʼa pa jyè Farɔn bage e, mà bâra u kìni yyaha yyére shiinbii bayi ná u kìni shiinbii sanmpii bayi na. Sisɔnmpii mpyi a kìni sùpyire puni yyaha wyɛ̀rɛŋa. 21 Ka Farɔn si Musa ná *Arɔn yyere maa jwo: «Yii a sì, yii i sà sáraya wwû yii Kileŋi a, ŋka naha kìni funŋke e dɛ!» 22 Ka Musa si jwo: «Lire ná mpyi ɲyɛ a yaa mɛ, ɲaha na yɛ *sárayi wuu sí n-wwû Kafooŋi wuu Kileŋi a ke, yire sárayi na ɲyɛ kafúun Misira shiinbilʼa. Yaage Misira shiinbii ɲyɛ na fún ke, wuu aha kuru pyi sáraga pi ɲyii na, pi sì wuu wà n-bò ná kafaayi i mà? 23 Wuu sí canmpyaa taanre ɲara pyi síwage e si sárayi wwû Kafooŋi wuu Kileŋi a, bà u a yi jwo mɛ.» 24 Ɲyɛ ka Farɔn si jwo: «Ná ku sí naha a ŋke cyage kɔ̀rʼa ta, mii sí yii cye yaha yii sà sáraya wwû Kafooŋi yii Kileŋi a síwage e. Ŋka yii àha ŋkàre tatɔɔnge e mà dɛ! Yii i u ɲáare na a.» 25 Ka Musa si jwo: «Mii aha yîri naha mu cyage e, mii sí n-tíi n-sà Kafooŋi ɲaare mu kurugo. Nùmpanŋa sisɔnmpii sí n-láha mu ná ma kìni yyaha yyére shiinbii ná ma kìni shiinbii sanmpii na. Ŋka ma hà wuu ɲwɔfaanŋa si núru ɲcyé si wuu shiinbii yaha pi a wà pi sà sárayi wwû wuu Kafooŋi a mà dɛ!» 26 Ɲyɛ Musa a fworo Farɔn pyɛnge e ke, maa sà Kafooŋi ɲáare. 27 Ka Kafooŋi si Musa ɲarage shwɔ, maa sisɔnmpii pyi pi a láha Farɔn ná u kìni yyaha yyére shiinbii ná u kìni shiinbii sanmpii na. Ali sisɔnŋɔ niŋkin saha ɲyɛ a kwôro kìni i mɛ.

28 Ka Farɔn si núrʼa u niŋgyiini waha, maa ɲcyé u ɲyɛ a ɲɛnʼa *Izirayɛli shiinbii cye yaha mɛ.